Gunábacabe chigúnicabe dxiiñaʼ né stale gana guidxi Brasil

GUIDÚʼYANU xi biʼniʼ Rúbia (1), ti gunaa xpinni Cristu, yanna riʼ nápabe 30 iza. Raca chupa chonna iza guyebe ladu gueteʼ stiʼ guidxi Brasil, para chigánnabe ti xhamígabe ni láʼ Sandra (2), laa cayuni dxiiñaʼ casi precursora regular lade ti neza binni ridagulisaa nahuiiniʼ nuu raqué. Dxi nuu Rúbia raqué bizaaca xiixa ni bidxagayaabe stale ne bicaani laabe guchaabe modo nabánibe. Xi laani yaʼ. Gudiʼnu lugar gábibe laanu xi gúcabe.

«¡QUÉ GUIRÁʼ GUNEʼ CRÉ NI GUNIʼBE!»

«Yené Sandra naa para chigánnadu ti gunaa ni cayuundanebe Biblia. Laga zubanedu gunaa que guníʼ: “Ra runeʼ dxiiñaʼ nuu chonna baʼdudxaapaʼ ni racalaʼdxiʼ guiziidiʼ ni cá lu Biblia, peru cumu nannaʼ maʼ nuu xhiiñaluʼ guidubi iza riʼ la? gudxeʼ laacabe cuézacabe dede ora gaca caber laacabe”. ¡Qué guiráʼ guneʼ cré ni guniʼbe!  Nuu stale binni ni rapa gana guiziidiʼ de Jiobá, dede napa Sandra ti guiʼchiʼ ra cá lá ca binni ni cabeza laa. ¡Peru lade ca binni ridagulisaa ra nuaaʼ nabé nagana raca para guidxelaʼ neca ti binni para guundaniáʼ Biblia! Óraque, laga nuudu ralidxi gunaa que, bidii gana naa gacaniáʼ ca binni nuu ndaaniʼ guidxi que. Qué nindaa bisaana guidxi roʼ ra nabezaʼ ne yebieeʼ ra cayuni Sandra dxiiñaʼ casi precursora.»

Ximodo guyeni Rúbia raqué yaʼ. Laabe cusiénebe: «Chupa si beeu de nuaaʼ raqué mápeca cayuundaniáʼ quince binni. Nabé bidxagayaaʼ, purtiʼ qué nindaa de ngue, laaca maʼ gupaʼ ti lista ra cá lá ca binni ni cabeza naa».

GUNÍʼ ÍQUEBE XIMODO CAYÚNIBE XHIIÑAʼ DIOS

Yanna guidúʼyanu xi bizaaca Diego (3), laa napa jma de gande iza. Ti biaje yegánnabe chupa hombrehuiiniʼ ni cayuni dxiiñaʼ casi precursor ndaaniʼ ti guidxi nuu ladu gueteʼ de Brasil ni láʼ Prudentópolis. Bizaacabe ti cosa raqué ni yendá dede ndaaniʼ ladxidoʼbe, ne bicaani laabe guiníʼ íquebe ximodo cayúnibe xhiiñaʼ Dios. Laapebe guniʼbe: «Lade ca binni ridagulisaa ra nuaaʼ, runeʼ biaʼ randa si ne rucheecheʼ diidxaʼ chupa chonna hora si cada beeu. Peru ra guyuaaʼ ra nuu ca precursor riʼ ne gucaadiaʼgaʼ guiráʼ ni cayúnicabe, bicaani naa guuyaʼ jma nayecheʼ nuucabe que naa. Ora biiyaʼ cayúnicabe dxiiñaʼ né stale gana ne pabiáʼ galán runi sentírcabe, guníʼ iqueʼ: “¡Ñuuladxeʼ nibaneʼ casi nabánicabe!”». Guca Diego precursor, dxi bibiguetaʼ ralidxi.

Yanna, lii yaʼ. Ñee lii nga tobi de ca hombrehuiiniʼ o dxaapahuiiniʼ Testigu ni rucheeche diidxaʼ ne ridagulisaa, peru nuu tiru rudiiluʼ cuenta maʼ careeluʼ gana ne maʼ qué riuuluʼ nayecheʼ ora maʼ cayuʼnuʼ xhiiñaʼ Dios la? Pa zacá ni, zándaca caquiiñeʼ guchaaluʼ modo nabániluʼ ti ganda cheuʼ sti guidxi ra jma caquiiñeʼ tu gucheeche diidxaʼ ne chuʼluʼ nayecheʼ ora guʼnuʼ xhiiñaʼ Dios raqué, casi ca binni ni maʼ bizéʼtenu lu tema riʼ. Zándaca huaxiéʼ ziuulaʼdxuʼ gusaanuʼ guiráʼ ni napuʼ raliʼdxuʼ. Peru ngapeʼ nga ni huayuni stale Testigu biaʼ lii: gúcacabe nadxibalú para bisaanacabe ni riuuláʼdxicabe ne guchaacabe ni cá íquecabe para gúnicabe jma lu xhiiñaʼ Jiobá. Guidúʼyanu xi biʼniʼ Bruno.

 ZUXHÍDXIBE SAA LA? O ZUCHEECHEBE DIIDXAʼ

Bruno (4), yanna riʼ nápabe 28 iza, laabe biziidibe guxhídxibe saa ndaaniʼ ti scuela ni nabé runibiáʼ binni. Cá íquebe gácabe director stiʼ ti orquesta, ne cumu nabé biziidibe stale la? biʼniʼ invitárcabe laabe chupa chonna biaje para guni dirigirbe ti orquesta sinfónica. Pur guiráʼ ni nánnabe, rihuinni zanda gácabe ti maestru ni nabé risaca. Peru laabe guniʼbe: «Bineʼ sentir casi ora cayaadxaʼ xiixa naa. Maca bidieeʼ xquendanabaneʼ Jiobá, peru nannaʼ cadi cayuneʼ biaʼ naquiiñeʼ guneʼ, ne rucaa ngue naa chuaaʼ triste. Gudxeʼ Jiobá xi guiráʼ nuu ndaaniʼ ladxiduáʼ ne laaca gunieniáʼ stale xpinni Cristu ni maʼ xadxí de cayuni xhiiñaʼ Dios. Despué de guníʼ iqueʼ ni stale, gudixheʼ iqueʼ guneʼ jma lu xhiiñaʼ Reinu: bisaanaʼ scuela que ne guyaaʼ sti lugar ra jma caquiiñeʼ tu gucheeche stiidxaʼ Reinu». Ñee jneza ni bíʼnibe que la?

Yendeza Bruno ti guidxi láʼ Guapiara, ra nuu 7,000 binni, riaanani biaʼ 260 kilómetru de São Paulo. Laca laabe guniʼbe nabé maʼ gadxé modo nabani binni raqué: «Guizáʼ nahuiiniʼ yoo que, qué gápani nevera, televisión nin Internet. Peru nuu caadxi cosa raqué ni qué huayapaʼ, casi ti leʼ ra nuu stale yaga cuananaxhi». Raqué guyuube lade ti neza binni ridagulisaa ra rié huaxiéʼ binni. Guidúʼyanu xi rúnibe ti dxi cada semana. Ricaabe ti bolsa, riguube libru ne revista, nisa guebe ne guendaró ndaaniʼ ni, de raqué maʼ riebe lu motocicleta stibe ndaaniʼ caadxi guidxi huiiniʼ nuu zitu, ra nuu stale binni ni qué huayuu dxi gunadiága de stiidxaʼ Reinu. Laabe cusiénebe: «Ruundaniáʼ dieciocho binni raqué. Nabé riecheʼ ora ruuyaʼ ruchaa ca binni que modo laacaʼ. Óraque nga bidieeʼ cuenta pabiáʼ nayecheʼ riuu binni ruyubi guni xhiiñaʼ Reinu primé lu xquendanabani. Qué zadxelaʼ sti dxiiñaʼ ni gusiecheʼ naa jma que biaʼ nayecheʼ nuaaʼ yanna riʼ». Ximodo runi ganarbe ni riquiiñebe yaʼ. Dede cuxidxi huiinibe bicábibe sicaríʼ: «¡Rusiideʼ binni guxhidxi guitarra!». Nga runi, zanda guininu ¡ruxhídxibe saa dede yanna!

«NAPA XIDÉ GUIAANAʼ RARÍʼ»

Cásica ni bizaaca Bruno nga bizaaca Mariana (5), laa napa jma de gande iza. Rúnibe dxiiñaʼ casi abogada ne runi ganarbe stale bueltu, neca zaqué ruluíʼ  cayaadxaʼ laabe xiixa. Laca laabe guniʼbe: «Modo nabaneʼ que, beeda gácani “casi ñaca ñuneʼ stipa pur ninaazeʼ bi”» (Ecl. 1:17). Gudxi stale xpinni Cristu laabe gúʼyabe pa zanda gácabe precursora. Despué de guníʼ íquebe ni, laabe ne chonna xhamígabe Bianca (6), Caroline (7) ne Juliana (8) gudixhe íquecabe gacanécabe ti neza binni ridagulisaa ni nuu Barra do Bugres, ti guidxi gaxha de Bolivia, riaanani stale mil de kilómetru de ralídxicabe. Xi bizaaca ra guyécabe yaʼ.

Mariana guníʼ: «Chonna si beeu ngue rabeʼ guiaanaʼ raqué. Peru ora bizaa tiempu que maʼ cayuundaniáʼ quince binni de lu Biblia, ne nabé caquiiñeʼ ca binni que tu gacané laacaʼ para guiniisicaʼ lu stiidxaʼ Dios. Ximodo ndiʼ gabeʼ laacabe maʼ chaaʼ pue. Qué ñanda diʼ ñuneʼ ni. Napa xidé guiaanaʼ raríʼ». Ne zaqué biʼniʼ guidápacabe. Yanna jma maʼ nayecheʼ nuu Mariana: «Riecheʼ stale purtiʼ caquiiñeʼ Jiobá naa para gacaniáʼ binni guchaa modo nabani ne caquiiñeʼ tiempu ne stipa stinneʼ para guneʼ dxiiñaʼ ni dxandíʼ risaca». Carolina guníʼ ximodo runi sentir ne modo runi sentir ca xhamiga: «Guiráʼ dxi ora maʼ chigaseʼ, runeʼ sentir nayecheʼ purtiʼ nannaʼ bineʼ biaʼ gúndatiʼ lu xhiiñaʼ Reinu. Ricá iqueʼ gacaniáʼ ca binni ni cusiideʼ de Biblia, ne nabé sicarú nga guuyaʼ modo ziniisicabe lu stiidxaʼ Dios. Maʼ bidieeʼ cuenta jneza conseju rudii Biblia ora riníʼ: “Lagudii cuenta ne laguuyaʼ pabiáʼ nachaʼhuiʼ Jiobá”» (Sal. 34:8).

Nánnanu nabé riecheʼ Jiobá ora ruuyaʼ cadale hombrehuiiniʼ ne dxaapahuiiniʼ guidubi Guidxilayú ni canábacaʼ chigucheechecaʼ stiidxaʼ Reinu né stale gana ca lugar nuu jma zitu (Sal. 110:3; Prov. 27:11). Ne ricaacabe stale ndaayaʼ pur stipa rúnicabe (Prov. 10:22).

[Cuadru ni zeeda lu yaza 5]

«Gastiʼ qué huayaadxaʼ laadu»

[Cuadru ni zeeda lu yaza 5]

Dxi guníʼ João Paulo ne Noemi, xheelabe, ñuuláʼdxicaʼ ñecaʼ sti lugar ra jma caquiiñeʼ tu gucheeche diidxaʼ, guyuu tu gudxi laacabe cadi gúnicabe ni. Caadxi de ca binni ridagulisaanécabe guníʼ: «Pa chetu ndaaniʼ guidxi huiiniʼ ca la? zándaca ziaadxaʼ bueltu laatu», yanna, «Xiñee ndiʼ nuutu chetu racá pue, cadi laaca nuu stale dxiiñaʼ ni gaca lade ca binni ridagulisaa nuu raríʼ la?» João Paulo cusiene: «Nánnadu cadi caníʼcabe zaqué para cueecabe gana laadu, peru guca nagana para laadu cueedu ca diidxaʼ que ndaaniʼ íquedu». Yanna maʼ napa João Paulo ne Noemi chupa chonna iza de cayúnicaʼ dxiiñaʼ ra caquiiñeʼ tu gucheeche diidxaʼ, ne nuucabe nayecheʼ purtiʼ cayúnicabe jma lu xhiiñaʼ Dios, casi maca guníʼcabe gúnicabe. João Paulo guníʼ: «Dede dxi biúpadu raríʼ, gastiʼ qué huayaadxaʼ laadu. Ne rudiʼdu cuenta nápadu stale cosa ni risaca yanna que biaʼ gúpadu dxiqué». Noemi laaca guníʼ: «Guleendudu stale cosa galán pur stipa bínidu».

Nagana para guidxela binni ni iquiiñeʼ para guibani ndaaniʼ ti guidxi huiiniʼ. Ximodo ridxela cani rié ca lugar nuu zitu riʼ modo guibánicaʼ yaʼ. Rúnicabe guiráʼ clase dxiiñaʼ. Nuu tu laa rusiidiʼ inglés o sti diidxaʼ, rusiidicabe xcuidi, riguíbacabe, rutieecabe yoo o rúnicabe intiisi sti dxiiñaʼ ra zanda chúʼcabe galaa dxi si. Guirácabe maʼ bidiicabe cuenta nabé stale ndaayaʼ ricaacabe pur guiráʼ stipa rúnicabe.

[Cuadru ni zeeda lu yaza 6]

Ni rúnicabe para cadi guibánacabe

Tiago: «Cadi xadxí de nuaaʼ lade neza binni ridagulisaa ra guyaa que nabé guyuaaʼ triste. Ndaaniʼ guidxi huiiniʼ que huaxiéʼ tu rucheeche diidxaʼ ne gastiʼ xiixa lugar ra chuʼ binni nayecheʼ, ngue runi nabé bibanaʼ. Bidieeʼ cuenta naquiiñeʼ guneʼ xiixa para uguaaʼ gana laca naa, ngue runi gudixhe iqueʼ gunebiaʼyaʼ ca xpinni Cristu de raqué, ¡ne gucané ngue naa! Binebiaʼyaʼ stale de laacabe ne qué nindaa gupaʼ jma xhamiguaʼ ne bineʼ sentir nayecheʼ casi ora ñuaaʼ ralidxeʼ».

[Imagen ni zeeda lu yaza 3]

Nuu Noemi ne João Paulo Ascurra (Santa Catarina)