«Riguu stiidxaʼ cani nahuiiniʼ» gana

Lu beeu diciembre iza 2009, Tribunal Supremo ni nuu Rusia guníʼ guibiaa ti neza binni ridagulisaa stiʼ ca testigu stiʼ Jiobá, guieeguʼ ti Yoo stiʼ Reinu ni nuu Taganrog ne laaca guníʼcabe nabé rutinde 34 de ca libru ne revista stícabe binni. Lu sitiu de Internet stiʼ ca testigu stiʼ Jiobá gucuá ximodo gúcani. Lu sitiu que nuu caadxi foto stiʼ stale Testigu ni gucaná, ne laaca nuu foto stiʼ stale xcuidi huiiniʼ.

Gudiʼdiʼ si chupa chonna beeu, gucuaa Centro Administrativo stiʼ ca Testigu stiʼ Jiobá ni nuu Rusia ti paquete ne ti carta ni biseendaʼ ti familia de Testigu ni nabeza guidxi Queensland (Australia), laacaʼ biindacaʼ ni cá lu Internet. Carta que na sicaríʼ: «Guiropaʼ xiiñidu, Cody ne Larissa, biéchecaʼ ora bíʼyacaʼ pabiáʼ napa ca xpinni Cristu de Rusia fe ora gudíʼdicaʼ guendanagana. Yanna maʼ bíʼnicabe caadxi tarjeta ne ti paquete huiiniʼ ra nuu caadxi cosa ni cusigáʼdecabe ca xcuidi huiiniʼ de Taganrog. Rápacabe gana gánnatu, nuuruʼ jma xcuidi huiiniʼ, neca zitu nuucaʼ, laaca cayúnicaʼ ni na Jiobá sin guixélecaʼ de laabe ne laaca riníʼ íquecaʼ laatu. Cuseendacabe stale diuxi para laatu ne laganna nadxiicabe laatu stale».

Ora gucuaa ca xcuidi huiiniʼ de Taganrog cani bisigaʼdeʼ familia de Australia que, bidiicaʼ xquíxepeʼ laacabe ra biseendacaʼ caadxi carta ni napa dibuju. Ti xpinni Cristu ni runi dxiiñaʼ Betel ni nuu Rusia, de tantu cayecheʼ pur «stiidxaʼ cani nahuiiniʼ», bicaa ra nuu Cody ne Larissa sicaríʼ: «Cadi dxandíʼ nabé triste nga para cani huaniisi ne cani nahuiiniʼ ora gudiicabe ti castigu laacaʼ neca qué ñúnicaʼ gastiʼ la? Zacaca nga nuu ca xpinni Cristu de Taganrog, purtiʼ neca qué ñúnicabe xiixa cosa malu, biʼniʼ castigar binni laacabe ra guxhaʼ laacabe Yoo stiʼ Reinu ra ridagulisaacabe. Peru nabé ziéchecabe ora gánnacabe nuu xpinni Cristu sti ladu Guidxilayú ni riníʼ ique laacabe. ¡Xquíxepeʼ laatu pur nacháʼhuitu ne pur guendarannaxhii stitu!» (Sal. 8:2.)

Dxandipeʼ nuunu lade guiráʼ ca testigu stiʼ Jiobá ni nuu lu guidubi Guidxilayú, ne modo nadxiisaanu racaneni laanu gudxíʼlunu intiica guendanagana gápanu. Laga cayuuya ca tribunal pa rucaa ca libru ne revista stinu gacananaláʼdxisaa binni la? ca xiiñinu rusihuínnicaʼ racaláʼdxicaʼ chuʼ xcaadxi xpinni Cristu galán, neca de gadxé guidxi laanu o gadxé modo biniisinu, peru rusihuínninu napa Jesús razón ora guníʼ ca diidxaʼ riʼ: «Pa ganaxhii saa tu zacá la? zanna binni xpinne laatu» (Juan 13:35).

[Imagen ni zeeda lu yaza 32]

Ca xcuidi huiiniʼ de Rusia ni gucuaa ni bisigaʼdeʼ ca xcuidi huiiniʼ de Austria