Biquiiñe ni biaana stícabe para cani biaadxaʼ stiʼ

GUIDÚʼYANU xi bizaaca lu iza 49. Pedru, Santiagu (Jacobo) ne Juan, cani naca «xaíque lade ca xpinni Cristu», bidiicaʼ ti dxiiñaʼ Pablu ne Bernabé: naquiiñeʼ gúʼyacabe xi caquiiñeʼ ca binni pobre ni nuu lade ca xpinni Cristu laga cucheechecabe diidxaʼ ndaaniʼ xcaadxi guidxi (Gál. 2:9, 10). Ximodo bíʼnicabe dxiiñaʼ riʼ yaʼ.

Lu ca carta ni bicaa Pablu rihuinni ximodo bíʼnicabe dxiiñaʼ que. Guidúʼyanu xi bicaabe ra nuu ca xpinni Cristu de Corinto: «Rarí chi uzeete de ofrenda ni cadopa para ca xpinni Cristu. Modo ca gudixhe guni ca hermanu ni nuu Galacia la? zaqueca laguni. Cada tobi de laatu, biaʼ acané Dios laa guni ganar la? cuee chu tindaa de lú ni cada domingu, ne lagapa ni ti ma cadi idopa ofrenda ora guendaʼ. Laatu cui tu tu chiné ni Jerusalén, ne naa ma useenda nia laacabe carta ora chindayaʼ» (1 Cor. 16:1-3).

Lu guiropa carta ni bicaabe ra nuu ca xpinni Cristu que, gúdxibe laacaʼ xi para cadopa bueltu que: «Gapa tu biaʼca biaʼca. Laga napa tu yanna la? laudii cani huaxiéʼ napa, ne ora ma qué gapa tu ne napa cabe la? ma laacabe udii cabe laatu, ne zacá ziaana tu biaʼca» (2 Cor. 8:12-15).

Dxi bicaa Pablu ti carta ra nuu ca xpinni Cristu de Roma lu iza 56, mápeca caluxe cadopa ca bueltu que. Apóstol que guníʼ: «Yanna ri chaa Jerusalén chi gacaniá ca xpinni Cristu ni nuu raqué. Purti uníʼ stiidxa ca hermanu de Macedonia ne de Acaya utopa ca vueltu para cani caquiiñe ni nuu lade ca xpinni Cristu Jerusalén» (Rom. 15:25, 26). Cadi xadxí de ngue biluxe Pablu dxiiñaʼ stiʼ, purtiʼ ora gunaazecabe laabe ndaaniʼ guidxi Jerusalén dxi bibiguétabe raqué, bisiénebe ndiʼ Félix, gobernador stiʼ Roma: «Bigueta xquidxe para udiee guna ne para udiee ofrenda Dios» (Hech. 24:17).

Dxi cuzeeteʼ Pablu de ca xpinni Cristu de Macedonia, guníʼ ca diidxaʼ riʼ: «Nabé ucuá cabe lú du udíʼ du lugar acané cabe ca xcaadxi hermanu». Zaqué nga riníʼ ique ca xpinni Cristu ni bibani lu primé siglu, ngue runi gudxi apóstol que ca binni de Corinto chinándacaʼ ejemplu que: «Cada tobi udii biaʼ ruluiʼlaʼdxiʼ, ne cadi acaná ladxidóʼ ti ma bidii ni, nin udii ni purti canaba cabe ni laa, purti nadxii Dios ni rudii ni laa de idubi ladxidóʼ». Xi bicaa ca binni ridagulisaa que chuuláʼdxicaʼ gudiicaʼ yaʼ. Pablu guníʼ: «Ora racané nu ca hermanu zacá la? riquiiñe ni chupa modo. Tobi la? rapa ca ni caquiiñe caʼ, ne stobi la? stale binni rudii diuxquixe Dios» (2 Cor. 8:4; 9:7, 12). Laanu laaca zanda chuuláʼdxinu gudiʼnu para gacanenu ca xpinni Cristu, ne runi crenu zaguu Jiobá ndaayaʼ laanu pur ni gúninu. Ñee cadi laani nga ndaayaʼ stiʼ Jiobá ni jma zuchátipa ladxidoʼno la? (Prov. 10:22.)

 [Cuadru ni zeeda lu yaza 9]

Modo Rudii Caadxi Binni Bueltu Para Dxiiñaʼ Ni Raca Guidubi Guidxilayú

Cásica biʼniʼ caadxi binni bibani tiempu stiʼ Pablu, ca dxi riʼ laaca nuu stale binni ni ribeechú ti ndaa de bueltu stiʼ para gusábani ndaaniʼ ca caja ra na «Obra mundial» «Dxiiñaʼ raca guidubi Guidxilayú», ni nuu ndaaniʼ ca Yoo stiʼ Reinu (1 Cor. 16:2). Guiráʼ beeu ruseendaʼ ca neza binni ridagulisaa bueltu riʼ ra yoo Betel stiʼ ca testigu stiʼ Jiobá ni ruuyaʼ dxiiñaʼ raca xquídxicaʼ. Laaca zanda guseendaʼ binni bueltu Betel ra iquiiñeʼ tobi de ca lá (entidad legal) ni napa ca testigu stiʼ Jiobá nezalú gobiernu stiʼ xquidxi. Pa racalaʼdxuʼ gannuʼ gunáʼ nga tobi de ca lá ni riquiiñecabe la? guníʼ ra yoo Betel ni ruuyaʼ dxiiñaʼ raca xquídxiluʼ. Zadxeʼluʼ dirección stícabe lu www.pr418.com/contact. Raríʼ zeeda caadxi de cani zanda gudii binni:

CANI ZANDA GUSIGÁʼDELUʼ

• Zanda gusigáʼdeluʼ bueltu, oro ne xcaadxi cosa ni risaca stiluʼ.

• Naquiiñeʼ guseenduʼ ti carta ra gusieʼnuʼ qué zanabuʼ gastiʼ pur ca bueltu o pur ca cosa ni risaca cusigáʼdeluʼ.

ZANDA GUINIʼLUʼ XIMODO GUDIILUʼ

• Ora gudiiluʼ bueltu sicaríʼ la? naquiiñeʼ gannuʼ zanda guibiguetaʼ xpuéltuluʼ pa iquiiñeluʼ ni.

• Naquiiñeʼ guseenduʼ ti carta ra gusieʼnuʼ lii nga caniʼluʼ ximodo gudiiluʼ bueltu.

XCAADXI MODO ZANDA GUDIILUʼ

Raríʼ zeeda ti lista ra cá xcaadxi modo zanda gacaneluʼ para xhiiñaʼ Reinu ni raca guidubi Guidxilayú, aparte de guseenduʼ bueltu o xiixa cosa risaca. Pa racaláʼdxiluʼ iquiiñeluʼ tobi de laacani, rinábadu lii guiniʼluʼ ra yoo Betel ni ruuyaʼ dxiiñaʼ raca xquídxiluʼ para gannuʼ pa zanda gácani zacá. Ndaaniʼ cada guidxi nuu gadxé gadxé ley ra cá xi naquiiñeʼ guni tuuxa ni racalaʼdxiʼ gusigaʼdeʼ xiixa, nga runi galán guiníʼneluʼ tuuxa ni nanna de laacani para gannuʼ gunáʼ ni jma zanda guʼnuʼ.

Seguru. Zanda iquiiñeluʼ tobi de ca lá ni napa ca testigu stiʼ Jiobá nezalú gobiernu para guiniʼluʼ laa nga guiaanané seguro de vida stiluʼ o plan de jubilación napuʼ.

Cuenta bancaria. Ca cuenta de bancu, ca certificadu de depósito, bueltu napa tuuxa para gaca jubilar, zanda guiaana cani lu ti fideicomiso o guicá tobi de ca lá ni napa ca testigu stiʼ Jiobá nezalú gobiernu para guiaxa bueltu stiʼ tuuxa ni gueeda gati, peru naquiiñeʼ gácani modo na ley stiʼ ca bancu nuu guidxi ca.

Acción ne bono. Zanda guiaana cani para lá ni napa ca testigu stiʼ Jiobá nezalú gobiernu o gaca ti contratu ra guicá guiaana cani para laacabe pa gueeda gati binni ca.

Inmuebles. Zanda gudiiluʼ xiixa ni zanda guidoo, casi ti yoo, ne guicá lá ni napa ca testigu stiʼ Jiobá nezalú gobiernu para guiaanané ni ne cadi guinabuʼ gudiicabe lii xiixa pur laani, peru pa nabeza binni ndaaniʼ ni la? zanda quíxheluʼ ximodo iquiiñeluʼ ni, dede zanda chindezuʼ ndaaniʼ ni dede dxi gátinu.

Zanda gudii binni bueltu ne guicaa interés stini. Zanda gudii binni bueltu o sti cosa risaca para tobi de ca lá ni napa ca testigu stiʼ Jiobá nezalú gobiernu, peru cada iza, biaʼ dxi nabani binni riʼ zanda guicaa interés stiʼ cani bidii (o cuibe ti binni guicaa ni). Ora rudii binni modo riʼ la? racaneni para guiete lu impuestu ni quixe iza guni zacá.

Testamentu ne fideicomiso. Zanda gudiʼnu xiixa ni nápanu casi layú o bueltu para tobi de ca lá ni napa ca testigu stiʼ Jiobá nezalú gobiernu, peru nezalú ti notariu nga gudiʼnu testamentu stini o gucaʼnu laani nga beneficiariu lu ti fideicomiso. Ora rudii binni xiixa sicaríʼ la? laaca racaneni laa ora maʼ chitixe impuestu.

Cani chuulaʼdxiʼ gudii xiixa casi bisiénedu ra na «xcaadxi modo zanda gudiiluʼ», primeru naquiiñeʼ guʼyaʼ chaahuicaʼ ximodo zanda gúnicaʼ ni. Para gacanedu cani racalaʼdxiʼ gudii xiixa para dxiiñaʼ runi ca testigu stiʼ Jiobá lu guidubi Guidxilayú la? maʼ guyáʼ ti folletu huiiniʼ lu diidxaʼ inglés ne diidxastiá ni láʼ Donaciones planificadas para favorecer el servicio del Reino en todo el mundo. Lu folletu riʼ zeeda xi guiráʼ modo zanda gudiicabe bueltu o ximodo gusigáʼdecabe xiixa. Zándaca qué zanda guʼnuʼ guiráʼ ni zeeda lu folletu riʼ, purtiʼ gadxé ley napa cada guidxi ne gadxé impuestu ruquíxecaʼ. Nga runi, ora maʼ biindaluʼ folletu riʼ, naquiiñeʼ guníʼneluʼ ti abogadu o ti contador para gusiene chaahuiʼ lii de laani. Stale binni maʼ huadii xiixa casi bisiénedu raríʼ, zacá racanécabe religión stinu ne riquiiñenu ni rudiicabe para gacanenu binni ora guizaaca xiixa ni guniná laa, casi ti xu, peru laaca maʼ qué runi cobrar gobiernu laacabe stale impuestu. Pa nuu folletu riʼ xquídxiluʼ, zanda guinabuʼ tobi de laani secretariu stiʼ neza binni ridagulisaa ra rieluʼ.

Pa racaláʼdxiluʼ gannuʼ jma la? bicaa o guníʼ ra Oficina de Donaciones Planificadas (Charitable Planning Office), xagueteʼ riʼ cá dirección stini, o guníʼ ra yoo Betel ni ruuyaʼ dxiiñaʼ raca xquídxiluʼ.

CHARITABLE PLANNING OFFICE

Watch Tower Bible and Tract Society of Pennsylvania

100 Watchtower Drive

Patterson, New York 12563-9204

Teléfono: (845) 306-0707