Guibáninu «casi tuuxa ni nabeza xquidxi binni»
Guibáninu «casi tuuxa ni nabeza xquidxi binni»
«Laatu nuu tu ndaani guidxilayú casi ni canazá xquidxi binni. Nga runi rinaba laatu cadi ucaa ique tu ni cadi jneza.» (1 PED. 2:11)
XI NICÁBILUʼ.
Xiñee rininu nuu ca xpinni Cristu ni bibí casi ni canazá xquidxi binni.
Ximodo nga nabani «xcaadxi dendxu» casi ni canazá xquidxi binni.
Xii nga ni cabézaluʼ né stale guendanayecheʼ.
1, 2. Tuu nga na Pedru «cani bibí pur espíritu», ne xiñee guniʼbe nuucaʼ «casi ni canazá xquidxi binni».
GUDIʼDIʼ si biaʼ treinta iza de bibiguetaʼ Jesús guibáʼ, bicaa apóstol Pedru ti carta ra guníʼ: «Cucaa guiʼchi ri lu ca xpinni Dios [o «cani bibí pur espíritu», TNM] ni ma cadi nabeza xquidxi, cani reche ndase neza Ponto, Galacia, Capadocia, Asia, ne Bitinia» (1 Ped. 1:1). Cásica Pedru, «cani bibí pur espíritu» que cabézacaʼ guicaacaʼ «ti enda nabani cubi, casi ñaca [ñálecaʼ] sti tiru», para guni mandárnecaʼ Cristu guibáʼ (biindaʼ 1 Pedro 1:3, 4). Nga runi, despué gudxi apóstol Pedru laacabe, nuucabe «ndaani guidxilayú casi ni canazá xquidxi binni» (1 Ped. 2:11). Xiñee gúdxibe laacaʼ zacá yaʼ. Ne xiñee risaca ndiʼ para laanu pa tobi si de cada 650 Testigu riníʼ nuu lade cani bibí pur espíritu santu.
2 Jneza ngue guníʼ Pedru bibani ca xpinni Cristu ni guyuu lu primé siglu «casi ni canazá xquidxi binni», purtiʼ qué ziaanacabe lu Guidxilayú riʼ. Ca xpinni Cristu ni bibí pur espíritu ni nabani tiempu riʼ laaca qué ziaanacaʼ lu Guidxilayú. Apóstol Pablu, tobi de ca binni ni nuu lade ca «dendxu huiini» que, bisiene: «Binni de ibáʼ laanu, ne cabeza nu gueeda Señor Jesucristu de raqué, ti laa bilá laanu» (Luc. 12:32; Filip. 3:20). Cumu guibáʼ cheʼ ca binni ni bibí la? ora gáticaʼ rusaanacaʼ Guidxilayú ne ricaacaʼ sti cosa jma galán: ti guendanabani ni qué zaluxe guibáʼ (biindaʼ Filipenses 1:21-23). Nga runi, zanda guininu nuucabe ndaaniʼ guidxilayú stiʼ Binidxabaʼ «casi ni canazá xquidxi binni».
3. Xi zanda guininu de «xcaadxi dendxu».
3 Yanna, xi zanda guininu de «xcaadxi dendxu» yaʼ (Juan 10:16). Biblia na cabézacabe guibánicabe sin gáticabe ndaaniʼ Guidxilayú. Peru laaca zazíʼdinu nabánicabe casi tuuxa ni canazá xquidxi binni.
GUIRÁʼ NI BIZÁʼ DIOS NAPA TI YUUBAʼ ROʼ
4. Xi qué zanda guni cani racalaʼdxiʼ gacané binni.
4 Laga cudii Jiobá lugar chuʼ guidxilayú stiʼ Binidxabaʼ riʼ, guiráʼ binni dede ne ca xpinni Cristu zápacaʼ stale yuubaʼ pur bicaalú Binidxabaʼ Jiobá. Zacá rusihuinni Romanos 8:22 ni: «Nuu né [guiráʼ ni bizáʼ Dios] ti yuuba roʼ». Neca gacalaʼdxiʼ ca políticu, ca científicu ne cani rudii bueltu para gacané pobre, qué zanda diʼ cueecabe guiráʼ yuubaʼ cadiʼdiʼ binni.
5. Xi maʼ gudixhe ique millón de binni guni dede iza 1914, ne xiñee.
5 Millón de binni maʼ nanna zacá ni, nga runi dede iza 1914 cudiicabe lugar guni mandar Jesucristu laacabe, Rey ni gulí Dios. Qué liica racaláʼdxicabe chúʼcabe lu guidxilayú stiʼ Binidxabaʼ ne gúnicabe ni na, sínuque caquiiñecabe xquendanabánicabe, stipa stícabe ne cani nápacabe para gacanécabe Reinu stiʼ Dios ni nuu guibáʼ (Rom. 14:7, 8).
6. Xiñee nabani ca testigu stiʼ Jiobá «casi ni canazá xquidxi binni» ndaaniʼ guidxilayú riʼ.
6 Ca testigu stiʼ Jiobá nácacaʼ binni ni runi ni jneza ne runibiáʼ binni laacabe lu jma de chupa gayuaa guidxi roʼ. Ratiica nuucabe nabánicabe «casi ni canazá xquidxi binni». Qué riuucabe lu política ne qué riuucabe lade binni ora maʼ cucaalú para gaca chaahuiʼ ca guendanagana stiʼ. Riníʼ íquecabe casi ora maʼ nuucabe lu guidxilayú cubi stiʼ Dios, ne riéchecabe purtiʼ nánnacabe zidiʼdiʼ sícabe ndaaniʼ guidxilayú malu ni mayaca guinitilú riʼ.
7. Paraa chiguibani ca xpinni Dios, ne padxí maʼ chúʼcabe racá.
7 Mayaca iquiiñeʼ Jesús poder stiʼ para gunitilú guidxilayú stiʼ Binidxabaʼ. Zabee Cristu pecadu ne guiráʼ yuubaʼ lu Guidxilayú ora maʼ guni mandar. Ne laaca zunduuxebe Binidxabaʼ, ca demonio stiʼ ne guiráʼ binni ni cucaalú derechu ni napa Jiobá de guni mandar. Óraca maʼ zanda guibani guiráʼ ca xpinni Dios ni ruzuubaʼ diidxaʼ ndaaniʼ ti paraísu lu Guidxilayú riʼ ne qué ziuu dxi gáticaʼ (biindaʼ Apocalipsis 21:1-5). Dxi ca maʼ zaxegueʼ guiráʼ binni «lu ná enda nayuudxuʼ, ti ibigueta aca ni galán, ne ma iquiiñe pe ni para laabe» (Rom. 8:21).
XI NAQUIIÑEʼ GUNI CANI DXANDÍʼ XPINNI CRISTU
8, 9. Xi cusiene Pedru ora guníʼ de ca cosa «ni cadi jneza» runi binni.
8 Apóstol Pedru bisiene xi naquiiñeʼ guni ca xpinni Cristu «ni canazá xquidxi binni» ora guníʼ ni cá lu 1 Pedro 2:11: «Hermanu ni nadxiee caʼ, [...] rinaba laatu cadi ucaa ique tu ni cadi jneza, purti irá nga riguba yu laatu ladu initilú xhialma tu». Conseju riʼ gucuani para cani bibí, peru laaca zanda gacaneni ca xcaadxi dendxuʼ stiʼ Cristu.
9 Cadi guiráʼ diʼ ni riuulaʼdxiʼ binni guni nga malu pa gácacani modo na Dios, purtiʼ racanécani para chuʼ binni nayecheʼ. Cadi malu diʼ nga gó binni ti guendaró nanixe ne gueʼ, guni xiixa ni riuulaʼdxiʼ ne guidxaaga ca xhamigu. Ne tuuxa ni maʼ bichaganáʼ la? cadi malu diʼ nga gatané xheelaʼ (1 Cor. 7:3-5). Peru ora guníʼ Pedru de «ni cadi jneza», caniʼbe de «irá [ni] riguba yu [binni] ladu initilú xhialma». Nga runi, ora riníʼ xcaadxi Biblia de «ni cadi jneza» la? riquiiñecaʼ diidxaʼ casi: «cosa malu ni riuulaʼdxiʼ binni guni» (Nueva Biblia al Día; Reina-Valera Contemporánea). Nabé risaca nga gucueeza ti xpinni Cristu laa para cadi guni xiixa ni qué riuulaʼdxiʼ Dios, purtiʼ zándaca guxheleʼ ni laa de laabe. Ne pur nga zuniti guendanabani stiʼ.
10. Xi trampa riquiiñeʼ Binidxabaʼ para gucaa laanu guibáninu casi nabani binni guidxilayú.
10 Binidxabaʼ rucaa laanu guiníʼ íquenu casi riníʼ ique binni guidxilayú ne guibáninu modo nabánicaʼ. Xiñee rúnibe ni yaʼ. Purtiʼ qué racaláʼdxibe guiníʼ íquenu nuunu ndaaniʼ guidxilayú riʼ casi tuuxa «ni canazá xquidxi binni». Laabe racaláʼdxibe guicá íquenu gápanu stale bidxichi, chúʼnenu ni cadi xheelanu, guyúbinu puru si para laanu, gácanu tuuxa ni risaca ne guiníʼ íquenu jma risaca xquídxinu que stobi. Naquiiñeʼ guiénenu riquiiñeʼ Binidxabaʼ ca trampa riʼ para gusaba laanu. Pa gudxíʼlunu guiráʼ ca cosa malu riʼ la? zusihuínninu cadi nácanu de guidxilayú riʼ, sínuque zidídisinu ndaaniʼ ni. Ni dxandíʼ racaláʼdxinu nga guibáninu sin gátinu lu guidxilayú cubi chiguni Dios ne cayúninu stipa para ugaandanu ni.
«LASÁ JNEZA»
11, 12. Xi riníʼcabe de ca binni de sti guidxi, ne xi riníʼ ique binni de ca testigu stiʼ Jiobá.
11 Guidúʼyanu xiruʼ cusiene Pedru naquiiñeʼ guni ca xpinni Cristu «ni canazá xquidxi binni». Versículo 12 ca na sicaríʼ: «Lasá jneza lade cani qué runi cre Dios, neca riníʼ cabe laatu ne napa cabe laatu casi binni malu, peru zuuya cabe pabiáʼ jneza runi tu, ne zacá zusisaca cabe Dios dxi cuidxi cuenta irá xixé». Nuu tiru riníʼcabe mal de ca binni de sti guidxi o ruuyacabe laacaʼ casi «binni malu» purtiʼ si maʼ gadxé laacaʼ, gadxé costumbre nápacaʼ, gadxé modo riniʼcaʼ ne pur modo rácucaʼ lari. Peru pur ni rúnicabe rudii binni cuenta nacháʼhuicabe.
12 Zaqueca nga ruuyaʼ binni cani dxandíʼ xpinni Cristu. Cumu gadxé modo riníʼcabe, modo rácucabe lari, modo ruzuchaahuicabe, ne gadxé ni rúnicabe para chúʼcabe nayecheʼ la? rucaani binni guiníʼ ique maʼ gadxé laacabe. Nga runi, binni ni qué runibiáʼ laacabe riniʼcaʼ mal de laacabe. Peru zaqueca nuu tu rusisaca modo nabánicabe.
13, 14. Bizeeteʼ ti ejemplu ni rusihuinni dxandíʼ ni na ca diidxaʼ riʼ: «Pur ni runi binni rihuinni tu laa».
13 Cumu jneza modo nabani ca Testigu la? rudii binni cuenta gastiʼ razón para guiniʼcaʼ mal de laacabe. Dede guníʼcabe mal de Jesús, ti hombre ni qué nuchee dxi bibani lu Guidxilayú. Laapebe guniʼbe: «Na cabe nalaya ne binigüéʼ naa, ne ridxaaga ca malu ni ruquixe impuestu ne cani qué rulabi ley». Peru cumu gúcabe ti binni nuu xpiaaniʼ ne qué liica nucheenebe Dios la? bisihuínnibe cadi dxandíʼ guiráʼ ni guníʼ binni de laabe. Laca laabe guniʼbe: «Pur ni runi binni rihuinni tu laa» (Mat. 11:19). Ngaca nga ni rizaaca ca dxi riʼ. Guzéʼtenu ti ejemplu. Caadxi de ca binni ni nabeza gaxha de Betel ni nuu Alemania, ndaaniʼ guidxi Selters, riníʼ íquecaʼ maʼ gadxé cani runi dxiiñaʼ raqué. Peru alcande stiʼ guidxi que guníʼ pur laacabe ne na: «Ca Testigu runi dxiiñaʼ racá maʼ gadxé laacabe, peru qué ruchiichicabe binni».
14 Zacagá nga ni bizaaca ca testigu stiʼ Jiobá de Moscú (Rusia), nabé guníʼ binni mal de laacaʼ. Ngue runi guyécabe nezalú Tribunal Europeo de Derechos Humanos, ni nuu Estrasburgo (Francia), ne lu beeu junio iza 2010 bihuinni xi guníʼ ca binni que: «Tribunal riʼ guníʼ cadi jneza ni biʼniʼ ca binni [de Moscú] ora bicueezacabe ca Testigu de guni adorarcaʼ Dios, laaca cadi jneza ni bíʼnicabe ora guníʼcabe qué gápacaʼ derechu de guidagulisaacaʼ. Cadi jneza ni biʼniʼ ca juez [de Moscú] ora guniʼcaʼ ruchiá ca Testigu familia, [...] rucaacaʼ binni guuti laca laa o qué rinacaʼ cheʼ xpínnicaʼ ra nuu doctor [...]. Tribunal que guníʼ cadi jneza modo biquiiñeʼ ca binni de Moscú que ca ley sticaʼ luguiáʼ ca Testigu».
GUZÚʼBANU STIIDXAʼ CANI RUNI MANDAR
15. Xi conseju zeeda lu Biblia rinanda cani dxandíʼ xpinni Cristu.
15 Cásica Moscú ne xcaadxi lugar ni nuu guidxilayú, laanu ca testigu stiʼ Jiobá cayúninu sti cosa ni guníʼ Pedru: «Lauzuuba stiidxa irá cani runi mandar ndaani guidxilayú», pa rey o pa gobernador laa «purti nga ni racalaʼdxi Señor» (1 Ped. 2:13, 14). Neca qué rúninu ni runi binni guidxilayú, ruzúʼbanu stiidxaʼ gobiernu. Pablu guníʼ: «Dios nga gudixhe cani nuu para guni mandar Iaanu» (biindaʼ Romanos 13:1, 5-7).
16, 17. 1) Ximodo rusihuínninu qué rucáʼlunu gobiernu. 2) Xi maʼ guníʼ caadxi políticu de ca Testigu.
16 Neca nuu ca testigu stiʼ Jiobá lu guidxilayú riʼ casi «ni canazá xquidxi binni», cadi pur nga diʼ nucaalúcabe gobiernu o niníʼcabe mal de sti binni. Laacabe riénecabe cada binni nga ribí tu guni mandar laacaʼ ne ximodo guni chaahuicaʼ ca guendanagana sticaʼ. Xcaadxi religión riuucaʼ lu política, peru ca testigu stiʼ Jiobá qué rúnicaʼ zacá. Nga runi ora riníʼ binni rucaalú ca Testigu gobiernu o rucaacaʼ binni guni ni la? cadi dxandíʼ ni riníʼcabe.
17 Apóstol Pedru guníʼ: «Laguni respetar presidente». Nga runi ca xpinni Cristu ruzuubacaʼ stiidxaʼ gobiernu ne runi respetarcaʼ laacabe (1 Ped. 2:17). Nuu biaje riníʼ ca gobiernu ca gastiʼ razón para guiníʼ íquecaʼ mal de ca testigu stiʼ Jiobá. Ne zacá guníʼ ti políticu alemán ni láʼ Steffen Reiche ni, laa beeda gaca tobi de cani guyuu lu gobiernu stiʼ guidxi Brandeburgo ne despué beeda gaca tobi de ca ni guyuu lu grupu ni riníʼ pur guidxi Alemania. Dxi caniʼbe de ca Testigu ni biseeguyoo ca soldadu nazi, guniʼbe: «Qué nuchaa ca Testigu cani runi crecaʼ neca guzanándacabe laacaʼ ne gúcacaʼ nachaʼhuiʼ né xcaadxi binni ni daguyoo. Nabé risaca chinanda ca binni de Alemania ejemplu stícabe yanna, purtiʼ nabé raninacaʼ binni de sti guidxi pur ni runi crecaʼ, ne pur gadxé modo riníʼ íquecaʼ».
GANNAXHIINU CA XPINNI CRISTU
18. 1) Xiñee qué raca nagana para laanu gannaxhiinu guiráʼ ca xpinni Cristu. 2) Xiñee ridxagayaa binni ca testigu stiʼ Jiobá.
18 Apóstol Pedru laaca guníʼ: «Laganaxhii irá ca hermanu. Laidxibi Dios» (1 Ped. 2:17). Laanu, ca testigu stiʼ Jiobá, ridxíbinu gúninu xiixa ni qué riuulaʼdxiʼ Dios, ne nga nga sti razón ni rucaa laanu gúninu ni nabe. Laaca riéchenu purtiʼ nuunu lade ca binni ni cayuni ni na Jiobá. Nga runi, qué raca nagana para laanu gannaxhiinu guiráʼ ca bíʼchinu ne ca bizáʼnanu. Huaxiéʼ si binni nadxiisaa casi nadxiisaanu, nga runi stale binni ridxagayaa ora guʼyaʼ laanu. Casi ni bizaaca ti gunaa de Estados Unidos ni ziné ti grupu de binni para gunibiáʼ sti lugar. Nabé bidxagayaabe ora bíʼyabe modo bidxaagalú caadxi Testigu de Alemania xcaadxi xpinni Cristu ni zeeda de sti guidxi para checaʼ ti guendaridagulisaa stiʼ stale guidxi roʼ lu iza 2009. Bidiibe cuenta pabiáʼ nachaʼhuiʼ ca binni que ne nadxiisaacaʼ. Gunaa riʼ guníʼ qué huayuu dxi guʼyaʼ ni bizaaca raqué biaʼ tiempu ziné de cayuni dxiiñaʼ. Despué bisiene ti xpinni Cristu: «Pur modo caniʼbe de laanu que rihuinni nabé bidxagayaabe ne guyuuláʼdxibe ni». Ñee maʼ huayunadiágaluʼ xi huaníʼ tuuxa binni ni biʼyaʼ ca testigu stiʼ Jiobá lu tobi de ca guendaridagulisaa stinu la?
19. Xi maʼ gudixhe íquenu gúninu, ne xi rucaa laanu gúninu ni.
19 Casi maʼ bizíʼdinu lu tema riʼ, runi ca Testigu stale cosa ni rusihuinni nuucaʼ ndaaniʼ guidxilayú stiʼ Binidxabaʼ «casi ni canazá xquidxi binni». Nabé nayecheʼ nuunu pur laani ne maʼ gudixhe íquenu guibáninu zacá. Nanna dxíchinu maʼ cadi candaa para chuʼnu lu guidxilayú cubi stiʼ Dios, ne racá nga zabáninu sin gátinu. Ñee cadi dxandíʼ pa ñanda si maʼ ñeedandá dxi ca la?
[Guendarinabadiidxaʼ stiʼ párrafo]
[Imagen ni zeeda lu yaza 20]
Lugar de gucáʼlunu para gaca chaahuiʼ guidxilayú stiʼ Binidxabaʼ. Rusíʼdinu binni de guidxilayú cubi stiʼ Dios
[Imagen ni zeeda lu yaza 22]
Racané cani rusiidiʼ Biblia para chuʼ ca familia de Rusia tobi si casi nuu ca binni riʼ
