Nácanu mayordomo ni runi xhiiñaʼ jneza
Nácanu mayordomo ni runi xhiiñaʼ jneza
«Cadi stubi tu raca mandar tu.» (1 COR. 6:19)
XI NICÁBILUʼ.
Xi dxiiñaʼ biʼniʼ ca mayordomo guyuu dxiqué.
Xi dxiiñaʼ napa guiráʼ ca mayordomo stiʼ Dios.
Ximodo naquiiñeʼ guidúʼyanu dxiiñaʼ de mayordomo bidii Dios laanu.
1. Xi riníʼ ique binni ora runadiaga de tuuxa ni naca esclavu.
RACA biaʼ chupa mil gaayuʼ gayuaa iza guníʼ ti hombre de Grecia sicaríʼ: «Guirutiʼ nga riuulaʼdxiʼ gaca esclavu stiʼ stobi». Stale binni na biaʼsi nga ni guníʼ hombre ca. Ora rininu de esclavu la? riníʼ íquenu de binni ni cuquichinácabe ne liibi cadena, ne para xpixuaanisícabe nga guiráʼ dxiiñaʼ rúnicabe.
2, 3. 1) Ximodo ruuyaʼ binni ca esclavu stiʼ Cristu. 2) Xi guendarinabadiidxaʼ zacábinu pur dxiiñaʼ ni nápanu casi ti mayordomo.
2 Jesús guníʼ zaca ca discípulo stiʼ binni ni qué rudxiibaʼ laca laa, o esclavu, peru ca xpinni Cristu riʼ qué ruquiichinácabe laacaʼ. Ne cumu rúnicabe xhiiñacabe jneza la? runi respetar binni laacabe ne rusisácacaʼ laacabe. Guidúʼyanu xi guníʼ Jesús ante gati de ti «mozo ni nuu xpiaani ne ni runi jneza» ni zacaa caadxi dxiiñaʼ risaca (Mat. 24:45-47).
3 (Biindaʼ Lucas 12:42-44.) Lu diidxaʼ griegu biquiiñecabe diidxaʼ «mayordomo» ora guníʼcabe de tuuxa ni gucuaa ti dxiiñaʼ. Ca dxi riʼ cadi guiráʼ xpinni Cristu nuucaʼ lade esclavu ni gulí Jesús que, peru guiráʼ xpinni Dios maʼ gucuaacaʼ ti dxiiñaʼ casi ni runi ti mayordomo. Xi dxiiñaʼ biaananenu, ne ximodo naquiiñeʼ guidúʼyanu cani yaʼ. Guidúʼyanu xi dxiiñaʼ biʼniʼ ca mayordomo guyuu dxiqué para gánnanu ni.
DXIIÑAʼ BIʼNIʼ CA MAYORDOMO
4, 5. Xi dxiiñaʼ gupa ca mayordomo guyuu dxiqué. Bizeeteʼ chupa ejemplu.
4 Laaca ti esclavu nga biquiiñeʼ binni para gaca mayordomo dxiqué, peru cumu jneza runi esclavu riʼ dxiiñaʼ la? rusaana xpixuaanabe guiráʼ ni napa lu nabe ne ruuyabe ca negocio stiʼ. Ne cumu nanna xpixuaanabe zanda gúnibe dxiiñaʼ jneza la? rusaana guiráʼ bidxichi stiʼ lu nabe ne laaca runi mandarbe xcaadxi esclavu ni nuu ndaaniʼ yoo que. Tobi de ca mayordomo guyuu dxiqué nga Eliezer, ne bisaana Abrahán guiráʼ ni gupa lu nabe purtiʼ nanna zápabe cani. Ne zándaca laabe nga biseendaʼ Abrahán Mesopotamia para ti dxiiñaʼ nabé risaca: chiyúbibe ti gunaa guichaganáʼ Isaac (Gén. 13:2; 15:2; 24:2-4).
5 José, ti xiiñiʼ xhiaga Abrahán, laaca guca mayordomo ralidxi Potifar (Gén. 39:1, 2). Ra gudiʼdiʼ tiempu laaca beeda gapa José ti mayordomo ni biʼyaʼ guiráʼ ni nápabe ndaaniʼ lídxibe, ne ti biaje bidxaagalú hombre riʼ chii de ca biʼchiʼ José. Ne laaca José nga gudxi laabe uguube copa de plata stiʼ ndaaniʼ sacu stiʼ tobi de biʼchiʼ ti guihuinni guláʼnacabe ni. Né cani maʼ bidúʼyanu riʼ rudiʼnu cuenta gupa ca mayordomo que ti puestu nabé risaca (Gén. 43:19-25; 44:1-12).
6. Xi guiráʼ dxiiñaʼ runi ca binnigola ni naca casi mayordomo.
6 Gudiʼdiʼ si biaʼ ti mil xhono gayuaa iza, guníʼ apóstol Pablu «ma biaana xhiiña Dios lu ná» ca binnigola stiʼ ca xpinni Cristu, purtiʼ mayordomo stiʼ Dios laacaʼ (Tito 1:7). Bibícabe para gúʼyacabe «ca xpinni Dios», gusiidicabe laacaʼ ne quíxhecabe ti ejemplu sicarú para laacaʼ (1 Ped. 5:1, 2). Gadxé gadxé dxiiñaʼ runi cada tobi de laacabe. Stale de laacabe runi dxiiñaʼ ndaaniʼ ti neza binni ridagulisaa, peru nuu binnigola ni racané stale neza binni ridagulisaa. Cani nuu lu Grupu ni Ruuyaʼ Modo Raca Dxiiñaʼ Betel runi tendercaʼ guiráʼ ca neza binni ridagulisaa ni nuu stale guidxi roʼ. Peru guirácabe naquiiñeʼ gúnicabe xhiiñacabe jneza, purtiʼ zabidxi Dios cuenta laacabe (Heb. 13:17).
7. Xiñee zanda guininu laaca mayordomo guiráʼ ca xpinni Cristu.
7 Yanna, xi zanda guininu de ca xpinni Cristu ni cadi naca binnigola yaʼ. Guidúʼyanu xi bicaa apóstol Pedru ra nuu guiráʼ ca xpinni Cristu guyuu dxiqué: «Cada tobi iquiiñe gracia ni bidii Dios laa para acané ca xcaadxi, para ihuinni jneza cayuni né gracia bidii Dios laa» (1 Ped. 1:1; 4:10). Pur guendanachaʼhuiʼ stiʼ Dios nga bidii laanu gracia ne guendabiaaniʼ ni zanda iquiiñenu para gacanenu ca bíʼchinu ne ca bizáʼnanu. Nga runi, guiráʼ cani runi adorar Dios nácacaʼ mayordomo, ne naquiiñeʼ gusisaca binni laacabe purtiʼ rúnicabe dxiiñaʼ gucuaacabe.
MAʼ STIʼ DIOS LAANU
8. Xii nga ni nabé risaca ni naquiiñeʼ guietenaláʼdxinu.
8 Galán guietenaláʼdxinu chonna cosa nabé risaca ora maʼ cayúninu dxiiñaʼ casi mayordomo. Primé: Maʼ stiʼ Dios guiranu ne zabídxibe cuenta laanu. Pablu guníʼ: «Cadi stubi tu raca mandar tu. Purti ma uzíʼ Dios laatu» né rini stiʼ Cristu (1 Cor. 6:19, 20). Cumu maʼ stiʼ Jiobá laanu la? napa xidé gúninu guiráʼ ni guni mandarbe laanu, ne cadi nagana ni rinábabe laanu (Rom. 14:8; 1 Juan 5:3). Laaca maʼ esclavu stiʼ Cristu laanu. Ne casi ca mayordomo guyuu dxiqué, zanda gúninu stale cosa, peru cadi naquiiñeʼ gúninu ni gápanu gana. Naquiiñeʼ gúninu ca dxiiñaʼ stinu modo cayábicabe laanu. Intiica dxiiñaʼ nápanu lade ca binni ridagulisaa, nácanu esclavu stiʼ Dios ne stiʼ Cristu.
9. Ximodo bisiene Jesús dxiiñaʼ runi ti esclavu.
9 Jesús bizeeteʼ ti ejemplu ni racané laanu guiénenu ximodo runi ti esclavu dxiiñaʼ ne xpixuaanaʼ. Guníʼnebe ca discípulo stibe de ti esclavu ni bibiguetaʼ ralidxi xpixuanaʼ despué de biʼniʼ dxiiñaʼ guidubi dxi. Ñee gudxi xpixuaanabe laabe: «Gurí ruaa mexa» la? Coʼ. Sínuque gudxi laabe ca diidxaʼ riʼ: «Ulee xhaʼbuʼ, biʼni endaró xhi ne udiiu ni gahua xhieʼ. Iluxe siaʼ, óraque ma cui lu lii, go xhiuʼ». Despué bisiene Jesús laacabe xi racalaʼdxiʼ gusiidiʼ né ejemplu que: «Zacaca laatu ora ma biʼni tu ni bisaana Dios lu ná tu la? sicarí nga lainíʼ: “Gasti qué ñuni du purti bini du ni nexhe si guni du”» (Luc. 17:7-10).
10. Ximodo nánnanu rusisaca Jiobá guiráʼ stipa ni rúninu pur guni adorarnu laa.
10 Dxandíʼ rusisaca Jiobá stipa rúninu para guni adorarnu laa. Biblia cusiene: «Jneza runi Dios, ne qué zusiaanda irá enda nachaʼhui ni huayuni tu ca xpinni purti nadxii tu laa» (Heb. 6:10). Qué ziuu dxi guinabaʼ Jiobá laanu xiixa ni qué zanda gúninu. Rábibe cani laanu para gacanécani laanu ne cadi nagana cani. Neca zacá, lu ejemplu stiʼ Jesús que bizeeteʼ qué runi esclavu que ni riuulaʼdxiʼ primeru. Zaqueca nga laanu, ora rudiʼnu laanu Dios rábinu laabe zúninu xhiiñabe primeru lu xquendanabáninu, cadi dxandíʼ la?
XI RIBEZA JIOBÁ GÚNINU
11, 12. Ora maʼ cayúninu dxiiñaʼ casi mayordomo, xi naquiiñeʼ gusihuínninu, ne xi naquiiñeʼ gucáʼnanu.
11 Guiropa cosa risaca: Ora maʼ cayúninu dxiiñaʼ casi mayordomo, tobi si ley nga rinanda guiráʼ xixenu. Dxandíʼ nga maca nuu tu guni xiixa dxiiñaʼ, peru stale de laacani zanda guni guiráʼ ca xpinni Cristu cani. Naquiiñeʼ gannaxhiisaanu purtiʼ discípulo stiʼ Cristu laanu ne testigu stiʼ Jiobá laanu. Ne bisihuinni Jesús zanna binni tuu nga ca xpínnibe purtiʼ nadxiisaacaʼ (Juan 13:35). Peru laaca nadxiinu cani cadi naca xpinni Cristu, cani qué runi cré cani runi crenu. Zacá nga na Cristu gannaxhiisaanu, zanda gúninu ni ne naquiiñeʼ gusihuínninu ni.
12 Laaca rinabaʼ Jiobá gaca xpiaʼnu nayá. Qué racaláʼdxinu gúninu ca cosa ni na Biblia cadi jneza. Pablu gudixhená laanu: «Nin cani napa jnadxii, nin cani runi cre bidóʼ, nin cani riuu né xheela stobi, nin ca muxeʼ, nin cani riuu né muxeʼ, nin ca gubaanaʼ, nin cani rucaa ique puru si gapa bidxichi, nin ca binni güeʼ, nin cani riguu dí, nin cani ruxhii pobre, nin tobi de ca nga qué ziuu ra runi mandar Dios» (1 Cor. 6:9, 10). Nagana nga para chinándanu ca ley stiʼ Dios, nga runi naquiiñeʼ gúninu stipa. Peru galán gúninu ni purtiʼ zabeendunu stale cosa sicarú. Tobi de laacani nga ziuʼnu jma nazaaca, qué zadindenenu binni ne zaca xhamígunu Dios. Biblia na: «Naa, Jiobá, nacaʼ Dios stiluʼ, Ni cusiidiʼ lii para cueenduluʼ ni galán para lii, Ni cayabi lii pa ladu saluʼ. ¡Pa lii dxandíʼ nucaadiaʼguʼ ca mandamientu stinneʼ! Óraque guendariuudxi stiluʼ ñeeda gaca cásipeʼ ti guiiguʼ, ne guendaruni jneza stiluʼ casi ola nisadóʼ» (Isaías 48:17, 18).
13, 14. Xi dxiiñaʼ napa guiráʼ ca xpinni Cristu, ne ximodo naquiiñeʼ gúʼyacabe ni.
13 Ne casi ca mayordomo guyuu dxiqué, laanu laaca nápanu ti dxiiñaʼ ni naquiiñeʼ gúninu. Maʼ bisiidiʼ Jiobá laanu xii nga ni dxandíʼ ne nabé risácani. Yanna ribézabe gusíʼdinu ni binni (Mat. 28:19, 20). Pablu bicaa: «Nga runi, lagapa laadu casi mozo sti Cristu purti ma gulaʼqui be laadu usiʼdi du ni gudixhe Dios ni qué ñanna binni chiqué» (1 Cor. 4:1). Apóstol Pablu nanna naquiiñeʼ gusiidiʼ ni «qué ñanna binni chiqué», laani nga guiráʼ ni zeeda lu Biblia, ngue runi gucanebe binni casi gudxi Jesucristu laabe gúnibe (1 Cor. 9:16).
14 Rusíʼdinu binni de Dios purtiʼ nadxiinu laacaʼ. Peru nánnanu gadxé gadxé modo nabani cada xpinni Cristu. Cadi guirácabe zanda gucheechecabe diidxaʼ biáʼqueca, ne riene Jiobá laacabe. Ni risaca nga guni cada tobi de laanu biaʼ ganda guni. Zacá zusihuínninu nadxiinu Dios de guidubi ladxidoʼno ne laaca nadxiinu binni.
NABÉ RISACA CADI GUCHÉʼNENU DIOS
15-17. 1) Xiñee risaca guzuubaʼ ti mayordomo diidxaʼ. 2) Xi rizaaca ora qué ruzuubaʼ binni diidxaʼ, casi bisiene Jesús.
15 Guionna cosa ni nabé risaca: naquiiñeʼ guzúʼbanuʼ diidxaʼ ne cadi guchéʼnenu xpixuaananu. Zanda gapa ti mayordomo stale gracia sicarú ne guni xhiiñaʼ jneza, peru qué zasaca nin tobi de laacani pa qué ruzuubabe diidxaʼ ne qué rúnibe ni guni mandar xpixuaanabe laabe. Nabé risaca guzuubaʼ binni diidxaʼ para ganda guni xhiiñaʼ jneza. Guietenaláʼdxinu ca diidxaʼ guníʼ Pablu riʼ: «Naquiiñe guni ni jneza ti qué uchee né xpixuaanaʼ» (1 Cor. 4:2).
16 Nga runi, pa guzúʼbanu diidxaʼ la? zaguu Jiobá ndaayaʼ laanu, peru pa qué gúninu ni la? qué ziuuláʼdxibe modo runi adorarnu laabe. Ngapeʼ nga ni bisiidiʼ Jesús ora guníʼ ejemplu stiʼ ca hombre ni gucuaa caadxi talentu. Ca esclavu ni biʼniʼ xhiiñaʼ jneza, cani bizuubaʼ diidxaʼ ne bitálecaʼ xpueltu xpixuaanacaʼ la? bisisácabe laacaʼ ne gucuaacaʼ sti premiu. Peru ni qué ñuni dxiiñaʼ que gúdxibe laa «qué iquiiñe», «nachaaba» ne «hombre qué iquiiñe». Gúxhabe laa talentu ni biaanané ne guleebe laa de ralídxibe (biindaʼ Mateo 25:14-18, 23, 26, 28-30).
17 Jesús bisihuinni xi rizaaca ora qué ruzuubaʼ binni diidxaʼ né sti ejemplu riʼ: «Uyuu tobi hombre ricu bisaana xpidxichi lu ná ti xpinni para guni né dxiiñaʼ. Peru uyuu tu gudxi laabe caguite xpinni be que xpueltu be. Para guridxi be laa ne rabi be laa: “Xii nga na cabe cayuʼnuʼ. Yanna ulee cuenta xi biʼni neu bidxichi bidiee lii, purti ma chi ndee lii de dxiiñaʼ”» (Luc. 16:1, 2). Cumu gudxite mayordomo que xpueltu xpixuaanaʼ la? guladxi hombre que laabe. ¡Nabé risaca ni rusiidiʼ ejemplu riʼ laanu! Qué chuʼ dxi guiníʼ íquenu qué zúninu ni guinabaʼ Jiobá laanu.
ÑEE JNEZA NGA GUCHAAGANU NI RÚNINU NÉ RUNI STOBI LA?
18. Xiñee cadi galán guchaaganu ni rúninu né ni runi stobi.
18 Neca naquiiñeʼ guʼyaʼ cada tobi de laanu ximodo cayuni dxiiñaʼ stiʼ casi mayordomo la? cadi jneza guchaaaganu ni rúninu né runi stobi. Biblia cudii conseju riʼ laanu: «Cada tobi guʼya chaahui ni cayuni, ne pa nanna jneza ni cayuni la? zieche né ni, ne qué zazaalaʼdxi ni cayuni stobi» (Gál. 6:4). Lugar de guchaaganu ni rúninu né ni cayuni stobi, jma galán guiníʼ íquenu ximodo gúninu dxiiñaʼ stinu jma jneza. Zacá qué zudxíʼbanu laca laanu ne qué ziuʼnu triste pur ni qué ganda gúninu. Laaca naquiiñeʼ gánnanu zándaca guchaa modo nabáninu. Zándaca pur ti guendahuará, guendayooxhoʼ o pur xcaadxi dxiiñaʼ nápanu maʼ qué zanda gúninu biaʼca bíninu dxiqué. O zándaca gúninu jma lu xhiiñaʼ Dios yanna que dxiqué. Pa zacá nuuluʼ, ñee zanda guyúbiluʼ ximodo gúniluʼ jma la?
19. Xiñee cadi galán guireʼnu gana pa caʼruʼ guicaanu ti dxiiñaʼ ni riuuláʼdxinu.
19 Laaca cadi galán guininu xiñee qué gápanu ti dxiiñaʼ ni napa sti binni. Zándaca chuʼ ti xpinni Cristu guiníʼ racalaʼdxiʼ gaca binnigola lade ca binni ridagulisaa o gudii ti libana lu ti guendaridagulisaa roʼ. Galán guni binni stipa pur ugaanda ni, peru cadi guiree gana pa ruluíʼ candaa ni. Zándaca qué ziénenu xi pur cadiʼdiʼ stale tiempu para guicaanu ti dxiiñaʼ ni nabé riuuláʼdxinu. Cadi guiaandaʼ laanu ni bizaaca Moisés, neca ruluíʼ maʼ zanda cueebe ca israelita de Egipto, gupa xidé gulézabe cuarenta iza para bíʼnibe ni. Tiempu gulézabe que gucané ni laabe para gápabe ca guenda ni caquiiñeʼ para chinebe ti guidxi ni riguicheruaa ne qué ruzuubaʼ diidxaʼ (Hech. 7:22-25, 30-34).
20. Xi rusiidiʼ ejemplu stiʼ Jonatán laanu.
20 Ne zándaca qué ziuu dxi guicaanu xiixa dxiiñaʼ risaca. Ngapeʼ nga ni bizaaca Jonatán, xiiñiʼ Saúl. Laabe nga ñácabe rey stiʼ Israel despué de bixhózebe. Peru gulí Dios David, ti hombre jma nahuiiniʼ que laabe. Ximodo biiyaʼ Jonatán ni bizaaca que yaʼ. Qué nidxiichibe, sínuque gucanebe David neca guyuu xquendanabánibe ra naxoo. Dede gúdxibe laa ca diidxaʼ riʼ: «Lii zácaluʼ rey ndaaniʼ guidxi Israel, ne naa zacaʼ guiropa stiluʼ» (1 Sam. 23:17). Qué nidxiichi Jonatán pur ngue casi biʼniʼ bixhoze. Xi rusiidiʼ ejemplu riʼ laanu yaʼ. Lugar de guidxiichinenu binni ni gucuaa xiixa dxiiñaʼ, jma galán guicá íquenu gúninu ca dxiiñaʼ stinu jneza. Naquiiñeʼ guni crenu zudii Jiobá guiráʼ ni racalaʼdxiʼ ca xpinni lu guidxilayú cubi stiʼ.
21. Ximodo naquiiñeʼ guidúʼyanu dxiiñaʼ stinu casi mayordomo.
21 Cadi guiaandaʼ ndiʼ laanu, ra cayúninu dxiiñaʼ casi mayordomo cadi nácanu esclavu stiʼ tuuxa ni cayuniná ne cuquiichináʼ laanu. Maʼ bidii Jiobá laanu ti dxiiñaʼ risaca gúninu ne qué ziuu dxi gácani sti biaje: gucheechenu diidxaʼ nacubi ne galán lu ca últimu dxi stiʼ guidxilayú malu riʼ. Ne Jiobá rudii lugar laanu para guyúbinu ximodo gúninu ca dxiiñaʼ rudiibe laanu. Nga runi, gácanu mayordomo ni ruzuubaʼ diidxaʼ ne cadi gusaana de gúninu ni na Jiobá, Dios ni jma risaca guibáʼ ne lu guidubi Guidxilayú.
[Guendarinabadiidxaʼ stiʼ párrafo]
[Imagen ni zeeda lu yaza 12]
Gúninu dxiiñaʼ ni biaananenu casi modo na Dios
