Rietenalaʼdxuʼ la?

Ñee maʼ biindaluʼ ca últimu tema ni bedané revista Torre stiʼ ni rapa la? Yanna biiyaʼ pa zanda guicábiluʼ ca guendarinabadiidxaʼ riʼ:

Xi zanda gúninu para cadi gaca ca diidxaʼ rininu casi «ti batee ni guchiá ca xpinni Cristu».

Ni naquiiñeʼ gúʼyanu primeca nga xi nuu ndaaniʼ ladxidoʼno. Lugar de guiníʼ íquenu mal de laacabe, naquiiñeʼ guidúʼyanu xi rucaa laanu guininu zacá. Ñee racaláʼdxinu gusihuínninu jma galán rúninu dxiiñaʼ que stobi la? Guietenaláʼdxinu ndiʼ, pa guininu mal de stobi qué zabeendunu gastiʼ (15/8, yaza 21).

Xi zazaaca ante guinitilú guidxilayú riʼ.

Ca xaíque stiʼ ca guidxi roʼ zaniʼcaʼ: «Gastiʼ chi gaca, nuu dxí guidxi». Zunitilú ca guidxi roʼ «Babilonia» de racá maʼ zucaalúcabe xquidxi Dios. Óraca maʼ guzulú Armagedón ne zalaa Binidxabaʼ ne ca demonio stiʼ ndaaniʼ ti bizé roʼ (15/9, yaza 4).

Xi zazaaca ora guiree guendaguti.

Biblia na: «Ni unitilú [Dios] últimu nga enda guti» (1 Cor. 15:26). Chupa grupu nga zacaa ndaayaʼ pur laani. Primé grupu ca nga ca xpinni Dios ni nabani yanna ni chiguiuu lu guidxilayú cubi, racá zanda guibánicaʼ sin gáticaʼ. Sti grupu ca nga guiráʼ millón de binni ni chiguiasa lade gueʼtuʼ (15/9, yaza 11).

Xi ribeendunu pur qué gánnanu padxí ne pora guinitilú guidxilayú malu riʼ.

Racaneni para gusihuínninu xi nuu ndaaniʼ ladxidoʼno. Racaneni laanu gusiéchenu ladxidóʼ Jiobá. Rucaani laanu iquiiñenu xquendanabáninu para gacanenu sti binni guiziidiʼ de Dios. Racaneni laanu guni crenu Jiobá ne gúninu guiráʼ ni rusiidiʼ Stiidxabe laanu. Ne laaca zaquiiñeni para gaca fe stinu jma naguidxi ora gápanu xiixa guendanagana (15/9, yaza 24 ne 25).

Ximodo nga rutiidilaʼdxiʼ Dios donda stiʼ cani maʼ guca arrepentir.

Sicaríʼ gudxi Jiobá ca xpinni: «Maʼ qué zietenalaʼdxeʼ ca donda stitu» (Jer. 31:34). Pur guendaguti stiʼ Jesús zanda gutiidilaʼdxiʼ Dios stóndanu. Ndiʼ rusihuinni maʼ qué zietenaláʼdxibe ra bicheecaʼ ne maʼ qué zudxiibabe donda íquecaʼ pur ni bíʼnicaʼ (1/10, yaza 18).

Tuu nga zeeda gaca «gadxe luceru» ni ruzeeteʼ Apocalipsis 1:16, 20 ni nuu ndaaniʼ náʼ Jesús ladu derechu.

Laacabe nga guiráʼ ca xpinni Cristu ni bibí, ne guiráʼ ca binnigola ni nuu lade ca binni ridagulisaa (15/10, yaza 14).

Xi zacané laanu para gúninu ni guininu.

Lu ca últimu dxi riʼ, nabé maʼ bidale binni ni nabani «modo na ique», qué gánnacaʼ pa nuu Dios, ne qué rusihuínnicaʼ guendanachaʼhuiʼ stiʼ Dios (2 Tim. 3:1-5). Nga runi galán gúninu stipa pa ganda cadi liica guidxaaganu ca binni ca, sínuque guidagulisaanu gatigá né cani runi guiráʼ ni maʼ bidii stiidxaʼ (Heb. 10:24, 25) (15/10, yaza 30).

Ximodo bisihuinni Jesús qué rudxiibaʼ laca laa casi na Isaías 50:4, 5.

Ca versículo riʼ rusihuínnicaʼ qué ñuni Jesús nin sti cosa ni qué ñabi Bixhoze laa. Cumu nabé racalaʼdxiʼ Jesús guiziidiʼ la? bicaadiaga guiráʼ ni bisiidiʼ Dios ni dxandíʼ laa. Ne laaca biziidibe ra bíʼyabe ximodo bilaselaʼdxiʼ Dios binni ruchee (15/11, yaza 11).

Xiñee cadi guiráʼ biaje nga randa rutiidiláʼdxinu donda stiʼ stobi.

Purtiʼ ora gúnicabe laanu xiixa, nabé racananu. Zándaca guidxiichinu, guiníʼ íquenu qué ñúnicabe ni guníʼcabe o guinábanu gusabanácabe laabe o guquíxenu laabe ni bíʼnicabe laanu (15/11, yaza 27).