Torre stiʼ ni rapa ni jma ziene binni xiñee chigaca ni

MAʼ RACA stale iza de huaree lu revista Torre stiʼ ni rapa caadxi tema ni zeeda lu Biblia, ni huayacané stale hombre ne gunaa lu guidubi naca guidxilayú. Peru lu beeu julio iza 2011 biree primé númeru stiʼ revista Torre stiʼ rapa lu diidxaʼ inglés ni jma nagueenda riene binni, ne guníʼcabe zácani ti iza para gúʼyacabe pa jma zacaneni binni.

Yanna, nayéchepeʼ nga nuudu gábidu laatu zácaruʼ ni ne yanna maʼ chiguiree ni lu diidxastiá, francés ne portugués.

XIÑEE RIUULAʼDXIʼ BINNI NI

Guidúʼyanu xi guníʼ ca Testigu ni nuu lu Pacífico sur, dxi yendá revista ni jma nagueenda riene binni riʼ ra nuucaʼ: «Yanna jma maʼ randa riene chaahuiʼ ca xpinni Cristu xi rusiidiʼ revista Torre stiʼ ni rapa». Sti carta na: «Dxiqué nabé biquiiñedu stale tiempu para guyúbidu xi riníʼ caadxi diidxaʼ nagana reeda lu revista, peru yanna maʼ riquiiñedu tiempu riʼ para guiduʼndaʼ chaahuidu ca relatu zeeda lu Biblia ne guidúʼyadu xiñee caquiiñecabe ca textu riʼ lu revista ca».

Ti gunaa xpinni Cristu de Estados Unidos ni biʼndaʼ scuela roʼ guníʼ: «Dieciocho iza guniéʼ ne bicaa diidxaʼ ni riquiiñeʼ ca binni si ni guzá scuela roʼ. Ngue runi, nabé nagana biiyaʼ xcaadxi binni modo riníʼ iqueʼ ne modo riniéʼ. Óraque nga bidieeʼ cuenta naquiiñeʼ guneʼ xiixa». Peru yanna riʼ nabé maʼ galán modo rusiidibe binni de stiidxaʼ Dios.  Guidúʼyanu xi guniʼbe: «Nabé huayacané revista Torre stiʼ ni rapa ni jma nagueenda riene binni riʼ naa. Ca diidxaʼ riquiiñeni nga ti ejemplu sicarú para ganda gusiideʼ binni ne guiénecaʼ naa jma nagueenda».

Sti gunaa xpinni Cristu de Inglaterra ni guyuunisa lu iza 1972 guníʼ sicaríʼ: «Ora biindaʼ primé númeru stini, bineʼ sentir casi ora Jiobá peʼ ngue cayuundané ni naa, nuaaʼ ndaaniʼ nabe ne guiidxibe naa, casi runi bixhoze binni ora maʼ cayuundané dxaapahuiiniʼ stiʼ ti cuentu».

Ti gunaa ni runi dxiiñaʼ Betel ni nuu Estados Unidos ni ziné jma de cuarenta iza de guyuunisa guníʼ huayacané revista cubi riʼ laa para guiene chaahuiʼ caadxi cosa ni qué huayene. Yanna guidúʼyanu xi guniʼbe ora maʼ cayuundaʼ revista riʼ ra ridagulisaanu: «Neca guʼndaʼ si ti xcuidi huiiniʼ lu revista riʼ para guicabi la? guiráʼ cani ziné Torre stiʼ ni rapa ni maca nápanu que riuuláʼdxicaʼ modo ricábibe, purtiʼ riquiiñebe gadxé diidxaʼ».

Sti gunaa ni nuu Betel guníʼ: «Nabé riuuladxeʼ gucaadiaʼgaʼ ora ricabi ca xcuidi huiiniʼ ra ridagulisaadu. Revista cubi riʼ huayacané laacabe guiníʼcabe né stale fe. Nabé riguucabe gana naa pur modo ricábicabe».

Ti gunaa xpinni Cristu ni guyuunisa lu iza 1984 cudii xquíxepeʼ pur revista riʼ, laa guníʼ: «Casi ora para naasiaʼ nga gucuá revista  riʼ. Cadi liica peʼ nagana para guieneʼ ni ne maʼ qué ridxibeʼ para guicabeʼ ora maʼ cayuundaʼ revista riʼ ra ridagulisaadu».

TI COSA NABÉ RISACA PARA CANI NAPA XIIÑIʼ

Jñaa ti hombrehuiiniʼ de gadxe iza guníʼ: «Nabé stale tiempu nga ribeeʼ dxiqué para gusieneʼ stale diidxaʼ nagana baʼduhuiiniʼ stinneʼ ora maʼ cayúʼndadu Torre stiʼ ni rapa ne nabé rusidxágani naa». Ximodo huayacané revista cubi riʼ laabe yaʼ. Laabe cusiénebe: «Nabé ridxagayaaʼ ora ruuyaʼ modo rieneʼ xiiñeʼ ca párrafo stini ora maʼ cayuundaʼ ni. Cumu cadi nagana ca diidxaʼ reeda luni ne cadi ziuulaʼ ca oración stini la? jma riuuláʼdxibe cani. Laasibe ridxélabe xi guicábibe ne rucaadiágabe ora cayuundaʼ revista riʼ ra ridagulisaadu».

Jñaa ti dxaapahuiiniʼ de gaʼ iza guníʼ: «Maʼ cadi caquiiñepeʼ gacaniáʼ laabe guyúbibe xi guicábibe. Nagabaʼ si ora nga ribeedu tiempu para gusiénedu laabe xiixa tema ti guiene chaahuibe ni. Cumu riquiiñeʼ revista riʼ diidxaʼ ni runibiaʼbe la? nabé riuube listu ora maʼ cayuundaʼ Torre stiʼ ni rapa ra ridagulisaadu».

YANNA, XI RINÍʼ CA XCUIDI YAʼ

Stale xcuidi runi sentir guca revista cubi riʼ para si laacaʼ. Guidúʼyanu xi guníʼ Rebecca, laa napa 12 iza: «¡Cadi gusaana de gúnitu revista riʼ! Riuuladxeʼ modo rusiene ca cuadru stini ca diidxaʼ zeeda racá. Cadi nagana para guiénedu cani».

Laaca zacagá guníʼ Nicolette, laa napa gadxe iza: «Nabé guca nagana para naa guieneʼ Torre stiʼ ni rapa que. Peru yanna maʼ stúbesiaʼ randa ridxelaʼ xi guicabeʼ». Emma, de gaʼ iza, bicaa: «Naa ne bizanaʼ de xhoopaʼ iza huayacaneni laadu guiene chaahuidu stale cosa. ¡Xquíxepeʼ laatu!».

Casi bidúʼyanu, stale nga tu cayacané revista cubi riʼ, purtiʼ cadi nagana ca diidxaʼ ne ca oración ni riquiiñeni. Dxandíʼ nga maʼ caquiiñeʼ ni, nga runi zácaruʼ ni cásica cayaca revista ni maca nápanu que, ni huayacané stale binni dede iza 1879.

[Ni caníʼ yaza 30]

«Dxiqué nabé biquiiñedu stale tiempu para guyúbidu xi riníʼ caadxi diidxaʼ nagana reeda lu revista, peru yanna maʼ riquiiñedu tiempu riʼ para guʼndaʼ chaahuidu ca relatu zeeda lu Biblia ne guidúʼyadu xiñee caquiiñecabe ca textu riʼ lu revista ca»

[Ni caníʼ yaza 31]

«Nabé ridxagayaaʼ ora ruuyaʼ modo rieneʼ xiiñeʼ ca párrafo stini ora maʼ cayuundaʼ ni»