1, 2. Xi guerra nga mayaca guzulú, ne xi qué zuni ca xpinni Dios ora maʼ guzulú ni.

 GUIDÚʼYANU xi guca gueelaʼ 30 stiʼ octubre iza 1938, dxi cucaadiaga millón de binni de Estados Unidos ti programa cadiʼdiʼ lu radiu. Lu programa que zeeda ti novela de ciencia ficción ni láʼ La guerra de los mundos. Ca actor ni gudiʼdiʼ lu novela que bireecaʼ de periodista ne caniʼcaʼ beeda caadxi binni de planeta Marte lu Guidxilayú riʼ ne cunitilucaʼ guiráʼ ra zidíʼdicaʼ. Neca bizeeteʼ ca binni que ti novela de ciencia ficción ni, stale de ca ni cucaadiaga programa que guníʼ íquecaʼ dxandíʼ cayácani, ngue runi bidxíbicaʼ. Dede guyuu tu biyubi ximodo guilá de ca extraterrestre que.

² Tiempu stinu riʼ mayaca guzulú ti guendaridinde. Ndiʼ huaxa dxandíʼ zaca. Triste guininu ni, peru stale binni cadi liica cuyubi ximodo guilá. Stiidxaʼ Dios nga caníʼ chigaca guendaridinde riʼ, ne cadi ti novela de ciencia ficción ni. Guerra riʼ nga Armagedón, ne zaquiiñeʼ Dios ni para gunitilú guidxilayú malu riʼ (Apoc. 16:14-16). Qué zadinde ca xpinni Jiobá ora guzulú ni, peru zadxagayaacabe ora gúʼyacabe guiráʼ ni guni Dios ne modo iquiiñeʼ poder stiʼ para gulá laacabe.

3. Xi diidxaʼ riguixhená zadúʼyanu lu tema riʼ, ne xiñee risácani para laanu.

³ Ca diidxaʼ riguixhená zeeda lu capítulo 14 stiʼ Zacarías cusiene ximodo chigaca guerra ni láʼ Armagedón riʼ. Neca gucuá cani raca biaʼ chupa mil gaayuʼ gayuaa iza, nabé risaca cani para laanu (Rom. 15:4). Ca diidxaʼ riguixhená riʼ cusiénecaʼ xi guiráʼ maʼ bizaaca xquidxi Dios dede iza 1914, dxi bizulú cayuni mandar Cristu guibáʼ. Laaca caníʼcani xi guiráʼ chiguizaaca despué. Nuu chupa cosa ni jma rieeteʼ lu ca diidxaʼ riguixhená riʼ, laacani nga «ti valle guizáʼ naroʼbaʼ» ne «nisa ni rudii guendanabani» ni zeeda de Jerusalén (Zac. 14:4, 8). Caquiiñeʼ cheʼ ca xpinni Jiobá ndaaniʼ valle riʼ  para guilacaʼ. Ne ora maʼ nánnanu xii nga nisa rudii guendanabani ca la? zudiʼnu cuenta naquiiñeʼ guideʼnu ni ne ziale de laanu gúninu ni. Dxandíʼ zabeendunu stale cosa sicarú pa gucaadiáganu ca diidxaʼ riguixhená riʼ (2 Ped. 1:19, 20).

4. 1) Padxí bizulú «dxi stiʼ Jiobá». 2) Xi guníʼ ca xpinni Jiobá ante de 1914, ne xi biʼniʼ ca xaíque stiʼ ca guidxi roʼ.

⁴ Ca primé diidxaʼ ruzuluné capítulo 14 stiʼ Zacarías caníʼ cani de «ti dxi stiʼ Jiobá» (Zac. 14:1, 2). Xi dxi ca yaʼ. Laani nga «dxi stiʼ Señor», ni bizulú ora «bidxiña dxi guiaana irá xixé ni runi mandar ladxi ná Dios ne Cristu stiʼ» (Rev. 1:10; Apoc. 11:15). Xi iza guca ni yaʼ. Guca ni iza 1914, dxi gurí Jesús casi Rey guibáʼ. Peru maca dede ante guníʼ ca xpinni Jiobá zaluxe tiempu gudixhe Dios guni mandar «cani cadi judíu» lu iza que. Ne dede iza ca ziuu stale guendaridinde lu Guidxilayú (Luc. 21:24). Peru xi biʼniʼ ca xaíque stiʼ ca políticu ne stiʼ ca religión ni nuu ndaaniʼ stale guidxi roʼ yaʼ. Lugar de nucaadiágacabe ca xpinni Cristu ni bibí ni cucheeche diidxaʼ tiempu que, laga biʼniʼ búrlacabe ne guzanándacabe laacaʼ. Peru qué gánnacabe pa Dios ni jma nandxóʼ ngue cayuni búrlacabe, purtiʼ ca xpinni Cristu que nuucaʼ lu Reinu stiʼ Dios ne cayúnicaʼ xhiiñaʼ Reinu riʼ ndaaniʼ Guidxilayú; cani nuu lu Reinu riʼ laaca runibiáʼ binni laacaʼ casi «Jerusalén ni nuu ibáʼ» (Heb. 12:22, 28).

5, 6. 1) Xi biʼniʼ ca xhenemigu xquidxi Dios casi maca guníʼ Zacarías. 2) Tuu nga ca binni ni biaana ndaaniʼ guidxi que.

⁵ Maca guníʼ Zacarías zuni ca guidxi ca zacá. Laabe bicaabe: «Zuni ganárcabe guidxi [Jerusalén]». «Guidxi» ca nga Reinu stiʼ Dios, ne ca binni ni nabeza ndaaniʼ ni nga ca xpinni Cristu ni bibí ni caʼruʼ cheʼ guibáʼ ni cayuni xhiiñaʼ Reinu ndaaniʼ Guidxilayú (Filip. 3:20). Dxi guca primé guendaridinde lu guidubi Guidxilayú, biʼniʼ ganárcabe «guidxi» que ora gunaazecabe stale de ca xpinni Cristu ni zaniruʼ ndaaniʼ xquidxi Jiobá lu Guidxilayú ne biseguyoocabe laacaʼ guidxi Atlanta (Georgia, Estados Unidos). Ne «guláʼnacabe ni nuu ndaaniʼ ca yoo que» ora gudíñecabe ne ora bininácabe ca xpinni Cristu riʼ ne xcaadxi bíʼchicaʼ ne bizáʼnacaʼ, neca qué guzaabicaʼ gastiʼ. Laaca qué nudii ca xhenemígucabe lugar ñunirúcabe jma libru ne revista ne gucaláʼdxicaʼ nucueezacaʼ laacabe de nucheechecabe stiidxaʼ Reinu, zaqué nga casi ora nibáʼnacaʼ ni nápacabe ndaaniʼ yoo.

⁶ Neca huaxiéʼ ca xpinni Dios, neca guníʼ ca xhenemígucabe stale cosa ni cadi jneza de laacabe, neca biquichinacaʼ ne bininacaʼ laacabe, qué ñanda nunduuxecaʼ religión ni dxandíʼ, purtiʼ guyuu xpinni Cristu ni bibí ni bizuubaʼ diidxaʼ. Laacabe nga xcaadxi binni ni biaana ndaaniʼ guidxi que, cani qué ninécabe de esclavu.

7. Xi rucaa ejemplu stiʼ ca xpinni Cristu ni bibí laanu gúninu.

⁷ Ñee guca ni na guiráʼ ni zeeda lu ca diidxaʼ riguixhená que ora biluxe primé guendaridinde ni guca guidubi Guidxilayú la? Coʼ, purtiʼ zucaaluruʼ ca guidxi que ca xpinni Cristu ni bibí ne laaca zucaalucaʼ xcaadxi xcompañérucabe, cani cabeza guibani ndaaniʼ Guidxilayú sin gati (Apoc. 12:17). Cadi guiaandaʼ laanu pabiáʼ naná modo guzanándacabe xquidxi Dios dxi guca guiropa guendaridinde lu guidubi Guidxilayú. Cumu qué nixeleʼ ca xpinni Cristu ni bibí riʼ de Jiobá la? riguu ejemplu stícabe gana laanu para gudxíʼlunu intiica guendanagana, dede né ora gucaalú ne guni burla ca binnilídxinu ni cadi Testigu laanu, cani runinenu dxiiñaʼ o cani rinenu scuela (1 Ped. 1:6, 7). Ratiica nabézanu, cani dxandíʼ xpinni Cristu, maʼ gudixhe íquenu guzuhuáʼ chaahuinu ne cadi guidxíbinu cani rucaalú laanu (Filip. 1:27, 28). Peru paraa ndiʼ guidxela  xquidxi Jiobá ti lugar ra ganda guilá ndaaniʼ guidxilayú riʼ pa nanalaʼdxiʼ guiráʼ binni laacaʼ yaʼ (Juan 15:17-19).

8. 1) Xi zanda guiénenu ora ruzeeteʼ Biblia de dani. 2) Xii nga «dani ra zuhuaa ca olivo» que.

⁸ Cumu «guidxi» —Jerusalén— ca nga zeeda gaca casi Reinu stiʼ Dios la? «dani ra zuhuaa ca olivo, ni nuu frente de Jerusalén» que, laaca nuu xi riniʼni. Xi riniʼni yaʼ. Xiñee ndiʼ rácani chupa galaa ne rácani chupa dani yaʼ. Ne xiñee riníʼ Jiobá laacani nga «ca dani stinneʼ» yaʼ (Zac. 14:3-5). Nuu tiru, ora ruzeeteʼ Biblia de dani, caniʼni de reinu, o gobiernu. Ne ora ruzeeteni de dani stiʼ Dios la? caniʼni de ca ndaayaʼ ne ximodo rapa Dios ca xpinni (Sal. 72:3; Is. 25:6, 7). Nga runi, «dani ra zuhuaa ca olivo» ra ruzuhuaañee Dios que, zeeda gácani derechu ni napa Jiobá para guni mandar casi Xaíque stiʼ guibáʼ ne guidubi Guidxilayú.

9. Xi zanda guiénenu ora ridúʼndanu ra na rilaa «dani ra zuhuaa ca olivo» que.

⁹ Xi zanda guiénenu ora ridúʼndanu ra na rilaa «dani ra zuhuaa ca olivo» que yaʼ. Dani ni riaana neza ra rindani Gubidxa stiʼ guidxi Jerusalén que, gúcani chupa galaa purtiʼ bicuí Jiobá sti reinu nacubi: Reinu stiʼ Cristu. Laaca stiʼ Dios gobiernu riʼ, peru bisaanabe ni lu náʼ Jesucristu. Nga runi, ora rilaa «dani ra zuhuaa ca olivo» que ne rácani chupa ndaa la? riníʼ Jiobá de laacani casi «ca dani stinneʼ» (Zac. 14:4, 5). Stibe guiropaʼ dani ca.

10. Xii nga «valle guizáʼ naroʼbaʼ» ni bihuinni lade guiropaʼ dani que.

¹⁰ Ora raca «dani ra zuhuaa ca olivo» que chupa galaa la? ti galaa ni riaana ladu guiaʼ, ne sti galaa ni riaana ladu gueteʼ. Lu cada tobi de ca dani que riaana ti chú ñee Jiobá ne rixeleʼ «ti valle guizáʼ naroʼbaʼ» xagueteʼ que. Xii nga valle riʼ yaʼ. Laani nga modo cayapa Jiobá ca xpinni ne para gúnibe ni riquiiñebe derechu ni nápabe para guni mandarbe ne riquiiñebe Reinu stiʼ Cristu. Zacá rusihuinni Jiobá qué ziuu dxi guinitilú religión ni dxandíʼ. Yanna, padxí guca «dani» que chupa galaa yaʼ. Gúcani lu iza 1914, dxi biluxe tiempu gudixhe Dios guni mandar cani cadi judíu ne dxi bicuibe Reinu stiʼ Cristu guibáʼ. Yanna, padxí nga bizulú guyé cani dxandíʼ xpinni Dios ndaaniʼ «valle» riʼ yaʼ. Guidúʼyanu.

11, 12. 1) Padxí nga bizulú guyé binni ndaaniʼ valle stiʼ Jiobá. 2) Ximodo nánnanu caquiiñeʼ Jiobá poder stiʼ para gapa ca xpinni.

¹¹ Sicaríʼ gudixhená Jesús ca discípulo stiʼ: «Zaca nanalaʼdxi binni de irá ladu laatu purti xpinne laatu» (Mat. 24:9). Dede dxi bizulú ca últimu dxi stiʼ guidxilayú malu riʼ lu iza 1914, zeʼ dxi jma nanalaʼdxiʼ binni ca xpinni Cristu ni bibí. Ne dxi guca primé guendaridinde lu guidubi naca Guidxilayú nabé bininacaʼ ne biseguyoocaʼ caadxi de laacabe. Neca zacá qué ñanda nunduuxeʼ ca enemigu riʼ religión ni dxandíʼ, purtiʼ lu iza 1919 biree ca xpinni Cristu que de ra deguyoocaʼ. Despué laaca biree xquidxi Dios de lu naʼ Babilonia Guidxi roʼ, ni zeeda gaca guiráʼ ca religión ni qué rusiidiʼ ni dxandíʼ (Apoc. 11:11, 12). * Dxi que nga bizulú guyé binni ndaaniʼ valle ni nuu lade ca dani stiʼ Jiobá.

¹² Dede iza 1919 caquiiñeʼ Jiobá valle stiʼ para gapa guiráʼ ca xpinni ni nuu lu guidubi Guidxilayú. Maʼ xadxí nga de racalaʼdxiʼ stale binni gucueeza ca Testigu de gúnicaʼ libru ne revista ne de gucheechecaʼ diidxaʼ ndaaniʼ stale guidxi roʼ. Peru intiica guni ca guidxi roʼ ca, qué zudii Jiobá lugar gunitilúcabe religión ni dxandíʼ. Caquiiñeʼ Jiobá poder stiʼ para  cadi chuʼ tu guniná ca xpinni (Deut. 11:2).

13. Ximodo ruyúbinu gapa Jiobá laanu ndaaniʼ valle stiʼ, ne xiñee yanna nga jma risaca guiaananu ndaaniʼ ni.

¹³ Pa chuʼnu gaxha de Jiobá ne guni adorarnu laabe modo racaláʼdxibe la? cásica laabe ne Xiiñibe, Jesucristu, zápacabe laanu. Qué zudii Dios lugar chuʼ xiixa o tuuxa ni guxheleʼ laanu de laa (Juan 10:28, 29). Jiobá racalaʼdxiʼ gacané laanu guzúʼbanu stiidxaʼ ne cadi guixélenu de Reinu stiʼ Cristu. Ne cumu mayaca guzulú ca dxi jma nagana la? jma risaca guiaananu ndaaniʼ valle stiʼ Jiobá.

14, 15. Xi zazaaca né ca binni ni qué guiuu ndaaniʼ valle roʼ stiʼ Jiobá dxi tindenebe ca xhenemígube.

¹⁴ Cásica cayuniná Binidxabaʼ xquidxi Dios yanna, zacaca zúnirube ni dede ora ganda dxi guinitilú guidxilayú malu riʼ, ne cada biaje jma naná modo gúnibe ni. Peru últimu biaje gúnibe ni nga dxi gucaalú Jiobá ca xhenemigu ora tindené «guiráʼ guidxi». Ora maʼ biluxe guerra riʼ zahuinni naca Jiobá ti binni ni nanna tinde (Zac. 14:3).

¹⁵ Peru xi zazaaca né ca binni ni qué guiuu ndaaniʼ valle roʼ stiʼ Jiobá yaʼ. Biblia na qué zuzaaniʼ «biaaniʼ sicarú» stiʼ Dios laacabe, o qué ziuuláʼdxibe guiráʼ ni gúnicaʼ. Guidúʼyanu xi sti cosa cuzeeteʼ diidxaʼ riguixhená que: «Caballu, ne mulo, ne camellu ne burru, ne guiráʼ clase maniʼ» ni rusidóʼ binni para iquiiñeʼ lu guerra, qué zanda iquiiñeʼ binni laacame para tinde, purtiʼ casi ora zachóngacame tantu nananda. Laaca caniʼni zuseendaʼ Jiobá ti guendahuará. Pa dxandíʼ zaca huará ca xhenemígunu o pa coʼ, nánnanu qué zudii Dios lugar guninácabe laanu. Dxi gaca nga «ziuʼdxuʼ» guielú ne ludxi ca binni ni gucaalú laanu. Ximodo nga yaʼ. Purtiʼ qué zuninácabe laanu né ni guiníʼcabe ne laaca maʼ qué zanda guiníʼcabe mal de Dios (Zac. 14:6, 7, 12, 15). Dxandíʼ zapa Binidxabaʼ stale rey ne stale soldadu para tinde dxi ca, peru ratiica chúʼcabe, zunitilú Jiobá guirácabe (Apoc. 19:19-21). Zácani casi na Jeremías 25:32, 33: «Ca binni ni guuti Jiobá dxi ca, ziaanacaʼ dede ti ladu guidxilayú hasta sti ladu guidxilayú».

16. Xi naquiiñeʼ guinabadiidxanu laca laanu, ne xi naquiiñeʼ gúninu purtiʼ maʼ nánnanu mayaca guzulú guerra stiʼ Jiobá.

¹⁶ Guiráʼ binni racaná ora gaca ti guerra, dede né cani runi ganar. Nuu binni runiti lidxi, runiti guiráʼ ni napa ne nuu tiru dede runiti derechu stiʼ. Ruchaa modo nabani binni dede nuu tu qué ridxela ni gó. Xi gúninu pa gueeda guizaacanu xiixa zacá lu ca dxi jma nagana yaʼ. Ñee zadxíbinu la? Ñee zusaana de gúninu ni na Jiobá pa gucaalúcabe laanu la? Ñee zaníʼ íquenu qué zuni Jiobá guiráʼ ni maʼ guníʼ ne zadxiichinu la? Para cadi guizaacanu nga, naquiiñeʼ guiaananu ndaaniʼ valle stiʼ Jiobá ne guni crenu zanda gulabe laanu. Biblia na: «Neca qué cuee yaga duʼgaʼ guieʼ, neca qué guicá uva lu ca lubáʼ uva; neca qué gudii yaga olivo, neca qué gudii ca layú ca ni gó binni; neca guirá ca dendxuʼ ni nuu ndaaniʼ currá; neca maʼ qué chuʼ yuze ndaaniʼ currá; peru naa, dxandipeʼ ziecheniáʼ Jiobá; dxandipeʼ ziecheniáʼ Dios ni rulá naa» (Habacuc 3:17, 18).

17, 18. 1) Xii nga nisa ni «rudii guendanabani». 2) Xii nga «nisadóʼ ni nuu neza ra rindani gubidxa» ne «nisadóʼ ni nuu neza ra riaaziʼ gubidxa». 3) Xi maʼ gudixhe íqueluʼ gúniluʼ.

¹⁷ Ora maʼ gudiʼdiʼ Armagedón, zadá nisa ni «rudii guendanabani» dede ra nuu Reinu stiʼ Cristu. Xi nisa riʼ yaʼ. Laani nga guiráʼ ni rudii Jiobá laanu para gápanu guendanabani ni qué zaluxe. Yanna, xii nga guiropaʼ nisadóʼ ni cuzeeteʼ diidxaʼ riguixhená que yaʼ. «Nisadóʼ ni nuu neza ra rindani gubidxa» nga  mar Muerto, ne «nisadóʼ ni nuu neza ra riaaziʼ gubidxa» nga mar Mediterráneo. Cada tobi de laacani zeeda gaca gadxé gadxé grupu de binni. Nisadóʼ ni láʼ mar Muerto ca nga zeeda gaca guiráʼ ca binni ni maʼ guti ni gusibani Dios sti biaje. Yanna, cumu jma nuu guendanabani ndaaniʼ nisadóʼ Mediterráneo que la? zanda guchaaganu ni né guiráʼ binni ni guilá ora gueeda Armagedón. Biblia na: «Dxi que dxandíʼ zadá nisa ni rudii guendanabani dede Jerusalén, galaa de laani zie lu nisadóʼ ni nuu neza ra rindani gubidxa ne sti galaa zie lu nisadóʼ ni nuu neza ra riaaziʼ gubidxa. Zácani gusibá ne tiempu nanda. Ne zeeda gaca Jiobá rey lu guidubi naca guidxilayú. Ne Jiobá si nga gaca Dios dxi que, ne tobi si modo guiníʼcabe labe» o xlabe (Zacarías 14:8, 9; Apoc. 7:9-15). Ora maʼ gueʼ guiropaʼ grupu riʼ nisa «guiigu [...] ni rudii enda nabani», zareecaʼ de lu náʼ guendaguti ni bisaanané Adán laanu (Apoc. 22:1, 2).

¹⁸ Cumu cayapa Jiobá laanu la? zalanu ora guinitilú guidxilayú malu riʼ ne ziuʼnu lu guidxilayú cubi stiʼ Dios. Nga runi, neca gaca nanalaʼdxiʼ guiráʼ binni laanu, maʼ gudixhe íquenu qué ziuu dxi guixélenu de Reinu stiʼ Dios ne ziaananu ndaaniʼ valle stiʼ Jiobá, lugar ra qué ziuu tu guniná laanu.