1, 2. 1) Xii nga «cabaña stiʼ David», ne ximodo nga guiasa ni sti biaje. 2) Tuu nga cani cayuni xhiiñaʼ Dios yanna.

 LU IZA 49 despué de ca dxi stiʼ Jesús, bidagulisaa Grupu ni Zaniruʼ lade ca xpinni Cristu ndaaniʼ guidxi Jerusalén. Dxi que guníʼ discípulo Jacobo [Santiagu]: «Ma byuíʼ né Simón [Pedru] laanu modo bizulú bilabi Dios cani cadi judíu. Laca ma cabí xpinni lade cabe [“para chiné labe”, TNM]. Ne nga ca bicaa ca profeta ra na Dios: “Zandisa xcaadxi ni gaca xpinne jlugar ca xiiñi David ni ma biree chu de naa. Zutopa cani qué niree chu, udxigueta laaca ra uyuu ca chiqué, ti uyubi irá binni naa dede cani cadi judíu ni ma ulié gaca xpinneʼ. Nga nga ni na Dios, ne ma xadxí gudxi be ni laanu”» (Hech. 15:13-18).

² Ca diidxaʼ guníʼ Santiagu que zeeda cani lu ca diidxaʼ riguixhená stiʼ Amós ra bizeeteʼ de «cabaña stiʼ David», o guiráʼ cani gule lade ca xiiñiʼ rey David. Bilúxeni dxi maʼ qué ñaca Sedequías rey (Amós 9:11). Peru «cabaña» riʼ zandisaʼ Jesús ni sti biaje, tobi de cani za de David ne laa qué ziuu dxi gusaana de guni mandar (Ezeq. 21:27; Hech. 2:29-36). Lu guendaridagulisaa que guníʼ Santiagu zaca ni na ca diidxaʼ riguixhená que ora guidopa guiráʼ ca xpinni Cristu ni chiguni mandarné Cristu guibáʼ, cásica judíu ne ni cadi judíu. Ca xpinni Cristu ni bibí ni nabániruʼ lu Guidxilayú yanna ne millón de binni ni zeeda gaca casi «xcaadxi dendxuʼ» stiʼ Jesús cusiidicaʼ binni ni dxandíʼ (Juan 10:16).

3, 4. Xi gucané ca judíu para cadi nixélecaʼ de Jiobá dxi guyuucaʼ Babilonia.

³ Dxi yenécabe ca judíu de esclavu Babilonia, bihuinni dxíchica maʼ biaba «cabaña stiʼ David». Ndaaniʼ guidxi que guyuu stale religión ni qué rusiidiʼ ni dxandíʼ, ne biaana ca judíu raqué setenta iza, dede iza 607 hasta 537 ante de ca dxi stiʼ Jesús. Xi gucané laacabe para gunda bizuubacabe stiidxaʼ Jiobá yaʼ. Herencia ni bidii Dios laacabe, ne laaca laani nga cayacaneni xquidxi Dios yanna, neca nabánicaʼ  ndaaniʼ ti guidxilayú ra cayuni mandar Binidxabaʼ (1 Juan 5:19).

⁴ Yanna riʼ nápanu Biblia ne laani nga tobi de ca herencia bidii Dios laanu. Dxandíʼ qué ñapa ca judíu ni guyuu de esclavu Babilonia guidubi Stiidxaʼ Dios, peru gúpacaʼ Ley stiʼ Moisés, ra zeeda Chii Mandamientu. Laaca binibiáʼcabe «ca canción ni zeeda de Sión» ne ca relatu stiʼ ca xpinni Dios ni bibani ante de laacabe. Ne laaca bietenaláʼdxicabe stale proverbio. Nga runi qué ridxagayaanu xiñee biinacabe ora guníʼ íquecabe guidxi Sión ne qué nusiaandacabe Jiobá. Biblia na: «Guridu ruaa ca guiiguʼ stiʼ Babilonia. Laaca bíʼnadu ora bietenaláʼdxidu de Sión. Ne lu ca yaga álamo nuu ndaaniʼ guidxi que rugaandadu arpa stidu. Iguiidiʼ ludxeʼ ndaaniʼ ba yanneʼ pa qué guietenalaʼdxeʼ de lii, ne pa qué guuyaʼ Jerusalén casi ti lugar ni jma rusiecheʼ naa» (Salmo 137:1, 2, 6). Gucané herencia stícabe laacabe para cadi guixélecabe de Jiobá neca guyuucabe Babilonia, ti guidxi ra guyuu stale religión ni qué nusiidiʼ ni dxandíʼ.

5. Ximodo nánnanu maca runi adorárcabe Trinidad ndaaniʼ guidxi Babilonia ne Egipto.

⁵ Ca religión guyuu Babilonia nabé biʼniʼ adorarcaʼ Trinidad, o ti grupu de chonna dios. Tobi de ca grupu de dios que nga Sin (dios stiʼ Beeu), Shamash (dios stiʼ Gubidxa) ne Istar (diosa ni racané binni gapa xiiñiʼ ne ni racané lu guendaridinde). Ca binni ni bibani Egipto biʼniʼ adorarcaʼ ti familia de chonna dios, ra nuu ti hombre, ti gunaa ne ti xiiñicabe. Libru Mitología General na «binibiáʼcabe guionnaʼ binni ca casi tríada divina, peru cadi guiráʼ diʼ biaje raca hombre ca —o dios-padre ca— xaíque stícabe, purtiʼ ora chiguni gunaa ca o diosa ca ti dxiiñaʼ jma risaca la? rúnicabe menu dios-padre ca ne maʼ riaanabe casi ti príncipe». Tobi de ca grupu de dios ni gupa ca egipciu que nga dios Osiris, diosa Isis ne Horus, xiiñicabe.

6. Xii nga Trinidad, ne xiñee qué runi cré ca xpinni Jiobá ni.

⁶ Ca binni ni na zinanda Cristu laaca runi adorarcaʼ Trinidad. Ca xaíque stícabe rusiidiʼ naca Padre ne Hijo ne espíritu santu ti Dios si. Peru né ni rusiidicabe riʼ rucaacabe binni guiníʼ ique cadi Jiobá diʼ nga Dios ni jma nandxóʼ, purtiʼ ruuyacabe laabe casi ti ndaa de guionnaʼ dios ca. Peru xquidxi Dios qué runi cré guiráʼ ni cadi jneza rusiidicabe purtiʼ nánnacaʼ xiná ca diidxaʼ riʼ: «Bicaadiaga Israel: Jiobá Dios stinu laasibe nga Jiobá» (Deut. 6:4). Pa Jesús peʼ nga bizeeteʼ ca diidxaʼ riʼ, ximodo ndiʼ guiníʼ ti xpinni Cristu cadi dxandíʼ ni yaʼ (Mar. 12:29).

7. Xi naquiiñeʼ ganna tuuxa ante gudii laa Jiobá ne chúʼnisa.

⁷ Jesús biʼniʼ mandar ca discípulo stiʼ: «Laché irá xixé guidxi, lachiusiidi irá xixé binni sa nanda naa, ne lacuu nisa laaca [“lu lá Bixhozeʼ, ne lu lá Xiiñiʼ ne lu lá espíritu santu”, TNM]» (Mat. 28:19). Ca diidxaʼ guníʼ Jesús riʼ rusihuínnicani cadi jneza guni cré binni Trinidad. Nga runi, para ganda chúʼnisa ti xpinni Cristu ne gaca testigu stiʼ Jiobá la? naquiiñeʼ ganna jma nandxóʼ Jiobá, Bixhoze Jesús; laaca naquiiñeʼ guiene binni riʼ Jesús nga Xiiñiʼ Dios, ni beeda ndaaniʼ Guidxilayú para gulá binni. Ne laaca naquiiñeʼ guni crebe espíritu santu ca nga stipa stiʼ Dios ne cadi nuu espíritu ca lu ni rábicabe Trinidad (Gén. 1:2). Nga runi, neca gudii tuuxa laa Dios ne chúʼnisa qué ziuulaʼdxiʼ Jiobá ni guni pa runi cré Trinidad. ¡Riéchenu stale purtiʼ racané herencia bisaanané Dios laanu para cadi guni crenu Trinidad, purtiʼ cadi dxandíʼ ni ne qué rusisácani Dios!

8. Xi biʼniʼ cré ca binni de Babilonia.

⁸ Ca binni ni guyuu Babilonia gúpacaʼ stale dios, peru laaca biʼniʼ crécabe demonio ne bíʼnicabe dxiiñaʼ de espiritismo. Guidúʼyanu xi cusiene libru Historia Religionum. Manual de Historia de las religiones: «Para ca babilonio que la? nuu stale dios ne stale espíritu lu  guidubi Guidxilayú, nuu espíritu nachaʼhuiʼ ne nuu espíritu malu» ne «runi huará ca demonio ca binni [...]. Para ganda guiládxicabe ca demonio ni cayuni huará ti binni la? naquiiñeʼ gúnicabe xiixa remediu o caadxi ritu para cheʼ guendahuará ca [...]. Ca demonio que nabé riuucaʼ lu xquendanabani binni; ne laaca napa ca binni que stale libru de magia ra cá xi naquiiñeʼ gúnicaʼ para gucaalucaʼ laacabe».

9. 1) Xi biʼniʼ stale de ca judíu que bireesicaʼ de esclavu Babilonia. 2) Ximodo rapa Jiobá laanu para cadi guiábanu lu trampa stiʼ espiritismo.

⁹ Biree si ca judíu que de esclavu Babilonia, stale de laacaʼ biʼniʼ crecaʼ ca cosa ni cadi jneza bíʼyacaʼ raqué. Ne dxi maʼ zireeche modo riníʼ ique ca binni de Grecia lu guidxilayú, stale judíu bizulú biʼniʼ cré nuu demonio nachaʼhuiʼ ne nuu demonio malu. Peru herencia bisaanané Dios laanu rápani laanu de espiritismo, purtiʼ maʼ bizíʼdinu qué ñuulaʼdxiʼ Jiobá guiráʼ dxiiñaʼ de espiritismo biʼniʼ ca binni de Babilonia (Is. 47:1, 12-15). Nga runi, pa guzúʼbanu stiidxaʼ Dios ne gucáʼnanu espiritismo la? zápabe laanu. Biblia na: «Cadi naquiiñeʼ chuʼ ládetu tuuxa ni gutiidiʼ xiiñiʼ lu gui, nin tu cuee suerte, nin ni guni magia, nin ni chiyubi cani rudii señal ne ni runi brujería, nin ni runi dañu nin ni riniʼné espíritu o tobi ni riníʼ xi chigaca, nin ni guinabadiidxaʼ gueʼtuʼ. Purtiʼ nanalaʼdxiʼ Jiobá guiráʼ binni runi ca cosa riʼ, ne pur ca cosa dxabaʼ riʼ chindee Jiobá, Dios stiluʼ laacabe nezaluluʼ» (Deuteronomio 18:10-12; biindaʼ Apocalipsis 21:8).

10. Xi zanda guzéʼtenu de cani runi ne ni runi cré ca binni ni nuu ndaaniʼ Babilonia Guidxi roʼ.

¹⁰ Yanna riʼ laaca nuu ti Babilonia Guidxi roʼ, laani nga guiráʼ religión ni qué rusiidiʼ ni dxandíʼ ne stale de ca binni ni nuu ndaaniʼ ca religión riʼ runi crecaʼ ne rúnicaʼ dxiiñaʼ de espiritismo, cásica biʼniʼ ca binni de Babilonia ni guyuu dxiqué (Apoc. 18:21-24). Guidúʼyanu xi cusiene ti libru: «Babilonia [Guidxi roʼ] qué zanda diʼ guchaaganu ni né ti imperiu o ti guidxi. Purtiʼ Babilonia ca nuuni guiráʼ lugar ra runi adorar binni gadxé gadxé clase bidóʼ» (The Interpreterʼs Dictionary of the Bible, vol. 1, yaza 338). Ndaaniʼ Babilonia Guidxi roʼ dxaʼ binni ni runi dxiiñaʼ de espiritismo, runi adorarcaʼ bidóʼ ne rúnicaʼ stale cosa ni qué riuulaʼdxiʼ Dios. Peru maʼ cadi candaa para guinitilú ni (biindaʼ Apocalipsis 18:1-5).

11. Ximodo huaguixhená ca libru ne ca revista ni ribee xquidxi Dios laanu de espiritismo.

¹¹ Ti biaje guníʼ Jiobá sicaríʼ: «Qué zanda guneʼ huantar gúnitu magia» (Is. 1:13). Lu siglu XIX laaca nabé guyuu stale binni ni biʼniʼ dxiiñaʼ de espiritismo o espiritualismo. Ngue runi, lu beeu mayo iza 1885 biree ti tema lu Zionʼs Watch Tower (La Torre del Vigía de Sión) ni gudixhená binni: «Ca religión guyuu dxiqué maca runi crecaʼ ribani ca gueʼtuʼ ca sti lugar ne guiráʼ ni biʼniʼ crécabe nga biquiiñeʼ para gudíxhecabe guiráʼ mitología guyuu dxiqué, nga runi cadi nacubi diʼ ni». Stale binni runi cré riniʼné ca gueʼtuʼ ca binni nabani, ngue runi guniʼruʼ revista que «riquiiñeʼ ca demonio ca trampa riʼ para quítecaʼ binni ne gucaacaʼ laacabe guiníʼ íquecabe nabániruʼ binni ni maʼ guti. Ni runi cré ca binni riʼ riquiiñeʼ ca demonio ni para gucaachicaʼ tu laacaʼ zacá riguítecaʼ xpiaaniʼ binni ne rucaacaʼ laacabe gúnicabe ni riuuláʼdxicaʼ». Despué biree ti Folletu ni láʼ What Say the Scriptures About Spiritism? (¿Qué dicen las Escrituras acerca del espiritismo?), ni caguixhená binni de ca demonio ca. Ca libru ne ca revista ni nápanu yanna laaca caguixhená cani laanu de espiritismo.

12. Ximodo na Stiidxaʼ Dios nuu ca gueʼtuʼ ca.

¹² «Irá cani runibiáʼ ni dxandíʼ» nánnacaʼ ximodo nuu ca gueʼtuʼ ca (2 Juan 1). Ngue runi biaʼsi nga ca diidxaʼ bicaa Salomón riʼ: «Ti biʼcuʼ nabani la? jma galán nuu que ti lión ni maʼ guti. Purtiʼ cani nabani nánnacaʼ záticaʼ, peru cani maʼ guti la? laacabe qué liica gánnacabe gastiʼ [...]. Guiráʼ ni guidxela naluʼ  guni, biʼniʼ ni ne stale stipa, purtiʼ gastiʼ dxiiñaʼ nin guendariníʼ ique nin guendananna nin guendanuuxpiaaniʼ ndaaniʼ Seol [o ndaaniʼ báʼ], ra cheluʼ ca» (Ecl. 9:4, 5, 10).

13. Ximodo gucuaa ca judíu religión ne costumbre stiʼ Grecia.

¹³ Ca judíu que maca nánnacaʼ ximodo nuu ca gueʼtuʼ ca. Peru xi guca dxi biaana Grecia lu náʼ ca general stiʼ Alejandro Magno yaʼ. Gucalaʼdxiʼ ca hombre que niquiiñecaʼ religión ne costumbre stiʼ Grecia para ñúnicaʼ guidxi Judá ne Siria tobi si. Ngue runi, ra gudiʼdiʼ tiempu, biʼniʼ cré ca judíu caadxi de ca cosa ni cadi jneza rusiidiʼ ca binni que, tobi de laani nga napa binni ti alma ni qué rati ne nuu ti lugar ra cayacanacaʼ. Peru cadi Grecia nga bizulú biʼniʼ cré binni nuu ti lugar ra cayacaná stale alma, sínuque bizulú ni Babilonia, ca binni que maca runi crecaʼ «nuu ti lugar ra runiná ca demonio ne ca dios malu binni ni maʼ guti» (The Religion of Babylonia and Assyria). Nga runi zanda guininu ndaaniʼ guidxi Babilonia que nga biʼniʼ crécabe napa binni ti alma ni qué rati.

14. Xi gunna Job ne Abrahán de ca gueʼtuʼ ca ne xi chiguni Dios pur laacaʼ.

¹⁴ Neca qué ñapa Job Stiidxaʼ Dios, peru gúnnabe ximodo nuu ca gueʼtuʼ ca. Laaca gúnnabe nabé nadxii Jiobá Dios laabe ne zanda gusibani laabe sti biaje (Job 14:13-15). Abrahán laaca biʼniʼ cré zanda gusibani Dios gueʼtuʼ (biindaʼ Hebreos 11:17-19). Ca hombre riʼ qué ñuni crecaʼ napa binni ti alma ni qué rati, purtiʼ ti binni si ni maʼ guti nga zanda guibani sti biaje. Espíritu stiʼ Dios nga gucané Job ne Abrahán para guiénecaʼ ximodo nuu ca gueʼtuʼ ca ne guni crecaʼ ziásacabe. Ndiʼ nga stobi de ca herencia ni bidii Dios laanu.

15, 16. Ximodo bilá Dios laanu lu náʼ pecadu ne guendaguti.

¹⁵ Rudiʼnu xquixe Dios purtiʼ maʼ bisiidiʼ laanu xi biʼniʼ para gulá laanu de lu náʼ pecadu ne guendaguti bisaanané Adán laanu (Rom. 5:12). Nánnanu beeda Jesús ne guníʼ ca diidxaʼ riʼ: «Benda cadi para gacané cabe naa  sínuque para gacaniá laacabe ne para gudiee xpida ti ganda ilá stale binni» (Mar. 10:45). Nabé riéchenu gánnanu «bixhá [Dios] stonda nu sin quixe nu laa, purtiʼ Jesucristu gudixe saca ni bichéʼ nu» (Rom. 3:22-24).

¹⁶ Ca judíu ne ca binni de sti guidxi ni bibani lu primé siglu que naquiiñeʼ gaca arrepentircaʼ ne gápacaʼ fe lu guendaguti stiʼ Jesús. Pa qué gaca arrepentírcabe la? qué zaxiá donda stícabe. Yanna riʼ laaca naquiiñeʼ guni binni zacá (Juan 3:16, 36). Pa tuuxa qué náʼ gusaana de guni cré Trinidad o guni cré napa binni ti alma ni qué rati casi rusiidiʼ stale religión la? qué zanda iquiiñeʼ guendaguti stiʼ Jesús para guixá ca donda stiʼ. Peru laanu zanda guixá ca donda stinu, purtiʼ nánnanu ni dxandíʼ de Xiiñiʼ Dios, «laa bilá laanu ne bixhá stonda nu ra guti pur laanu» (Col. 1:13, 14).

17, 18. Paraa zanda guizíʼdinu historia stiʼ xquidxi Jiobá, ne xi zabeendunu pa guizíʼdinu de laacani.

¹⁷ Zanda guzéʼtenu stale cosa de guiráʼ ni maʼ bisiidiʼ Dios laanu, guiráʼ ni maʼ bizaacanu casi xpinni Dios, ximodo huayacanebe laanu ne guiráʼ ca ndaayaʼ ni maʼ bidiibe laanu. Maʼ raca stale iza de huadúʼndanu lu Anuario ximodo cayúninu dxiiñaʼ lu guidubi Guidxilayú. Zeeda historia stinu lu ca videu Historia de fe viva (parte 1 ne 2) ne lu libru Los testigos de Jehová, proclamadores del Reino de Dios. Ne gatigá reeda lu ca revista stinu ca relatu stiʼ xcaadxi xpinni Cristu ni nabé riguu gana laanu.

¹⁸ Ribeendunu stale ora ridúʼndanu historia stiʼ xquidxi Jiobá, cásica guleendú guidxi Israel stale cosa ora guníʼ íquecaʼ modo bilá Jiobá laacaʼ Egipto (Éx. 12:26, 27). Dxi mayaca gati Moisés guníʼ de ca milagru ni biʼniʼ Dios. Ngue runi bidiibe conseju riʼ guidxi Israel: «Laguietenalaʼdxiʼ ca tiempu yooxhoʼ que. Laguiníʼ ique ca iza bibani binni dxiqué. Laguinabaʼ diidxaʼ bixhózetu ne laa zabi ni laatu. Laguinabaʼ diidxaʼ ca binnigola stitu ne laacaʼ zábicaʼ laatu xi guca dxiqué» (Deut. 32:7). Cumu zeeda gácanu casi dendxuʼ ni nuu ndaaniʼ xquidxi Jiobá la? riéchenu stale ora rusisácanu laabe ne ora rusíʼdinu binni guiráʼ ni maʼ bíʼnibe (Sal. 79:13). Laaca galán gánnanu xi guiráʼ huadiʼdiʼ xquidxi Dios, guizíʼdinu de laacani purtiʼ zacanécani laanu cadi gusaana de gúninu ni na Jiobá.

19. Xi naquiiñeʼ gúninu purtiʼ maʼ nuunu lu biaaniʼ stiʼ Dios.

¹⁹ Riéchenu stale purtiʼ nuunu lu biaaniʼ stiʼ Dios ne cadi canazanu lu gueelacahui ra nuu stale binni ni qué ganna ni dxandíʼ (Prov. 4:18, 19). Nga runi, naquiiñeʼ guidúʼndanu ne guiénenu Stiidxaʼ Dios ne gucheechenu diidxaʼ né stale gana. Zacá zanda gúninu casi biʼniʼ salmista que, laa guníʼ ca diidxaʼ riʼ para bisisaca Jiobá, Dios ni jma nandxóʼ: «Zaniéʼ rúniluʼ ni jneza, ne lii si nga rúniluʼ zacá. Dios stinneʼ, dede nahuiineʼ huasiidiluʼ naa ne dede yanna cayuʼnuʼ ni, ne qué huasaanaʼ de guiniéʼ guiráʼ ca cosa sicarú ni maʼ bíʼniluʼ. Neca guióxhuaʼ ne guitoope iqueʼ, cadi gusaanaluʼ naa Dios stinneʼ, ti ganda gabeʼ ca binni ni [guibani despué] pabiáʼ nadipaʼ naluʼ ne pabiáʼ naroʼbaʼ poder stiluʼ» (Sal. 71:16-18).

20. Xi rusihuínninu ora ruzúʼbanu stiidxaʼ Jiobá, ne xi maʼ gudixhe íquenu gúninu.

²⁰ Ora ruzúʼbanu stiidxaʼ Jiobá la? rusihuínninu nápabe derechu para guni mandarbe ne laasibe nga naquiiñeʼ guni adorar binni. Ne ngapeʼ nga ni rusíʼdinu binni ora rucheechenu diidxaʼ (Apoc. 4:11). Racané espíritu stiʼ Jiobá laanu gucheechenu ca diidxaʼ nacubi ne galán, para quixhedxinu ladxidóʼ binni ne para gábinu laacaʼ xi cabézanu guni Dios para laanu (Is. 61:1, 2). Binidxabaʼ racalaʼdxiʼ guni mandar guiráʼ binni guidxilayú ne laaca ngaca nuube gúnibe né xquidxi Dios, peru qué ganda gúnibe ni. Xiñee yaʼ. Purtiʼ rusisácanu herencia bidii Dios laanu, qué racaláʼdxinu guixélenu de Jiobá ne rusíʼdinu binni qué ziuu dxi gusaana de gácabe Señor ni jma nandxóʼ. Biblia na: «Peru naa la? zazayaniáʼ Dios sin gucheeniáʼ laa. Bilá naa, ne biá naa. Rusisacaʼ lii de guidubi ladxiduáʼ, Jiobá, Dios stinneʼ, ne qué ziuu dxi gusaana de gusisacaʼ laluʼ» (Salmo 26:11 ne 86:12).