Nuu biaje ridxela ca arqueólogo xiixa ni rusihuinni dxandíʼ guyuu ca binni ni ruzeeteʼ Biblia. Zándaca guidxélacabe xiixa cosa ra cá lá tuuxa binni ni bibani dxiqué o guidxélacabe xiixa cosa ni biquiiñeʼ binni ca o ni guiníʼ de laabe. Guininu ti ejemplu, lu iza 2011 bizeeteʼ caadxi arqueólogo de Israel bidxélacaʼ ti osario (o ti guiña huiiniʼ) ni nuu maʼ raca chupa mil iza. Ndaaniʼ guiña huiiniʼ de guié riʼ guluucabe dxita ladi ti gunaa ni maʼ xadxí guti.

Cueʼ guiña huiiniʼ que zeeda caadxi letra ra na: «Míriam, xiiñiʼ Yeshúa xiiñiʼ Caifás, sacerdote stiʼ Maazías de Bet Imrí». Caifás nga guca xaíque stiʼ cani ruzaaquiʼ guʼxhuʼ ni guyuu lu juiciu stiʼ Jesús ne ora biiticabe laa (Juan 11:48-50). Historiador Flavio Josefo na xaíque stiʼ cani ruzaaquiʼ guʼxhuʼ que nga «José, ni laaca láʼ Caifás». Nga runi, zanda guininu stiʼ tobi de ca binnilidxi Caifás guiña huiiniʼ que. Ne sti guiña huiiniʼ ni bidxélacabe ante —ni guníʼ íquecabe stiʼ Caifás— zeeda caadxi diidxaʼ ra na laabe nga Yehosef bar Caiapha (José xiiñiʼ Caifás). * Nga runi, zanda guininu guca Míriam tobi de ca binnilidxi Caifás.

La Autoridad de Antigüedades de Israel (IAA, nga nga ca letra stini lu diidxaʼ inglés) na gúxhacabe guiña huiiniʼ que caadxi gubaanaʼ ni gulaʼnaʼ ni ndaaniʼ ti baʼ yooxhoʼ. Ne maʼ biiyaʼ chaahuiʼ ca arqueólogo laani nga guiña huiiniʼ que, purtiʼ cá caadxi letra cueʼni ni rusihuinni maʼ xadxí nuuni.

Guiña huiiniʼ riʼ bisihuinni sti cosa ni naquiiñeʼ gánnanu. Guyuu 24 grupu de sacerdote ndaaniʼ guidxi Israel dxiqué ne rúnicaʼ dxiiñaʼ pur turnu ndaaniʼ yuʼduʼ stiʼ Jerusalén, ne lu últimu grupu ca zeeda «Maazías» (1 Crón. 24:18). Autoridad de Antigüedades de Israel na rusihuinni ni cá cueʼ guiña huiiniʼ que «zeeda binnilidxi Caifás lade grupu stiʼ Maazías».

Laaca zeeda ca diidxaʼ riʼ cueʼni «Bet Imrí». Autoridad de Antigüedades de Israel na zándaca riniʼni chupa cosa. Primé, zándaca zeeda gácani «lá ti familia de sacerdote, ca xiiñiʼ Imer (Esdras 2:36, 37; Nehemías 7:39-42), ni za de grupu ra nuu Maazías». Guiropa, zándaca zeeda gácani «lugar ra gule gueʼtuʼ que o de ra zeeda guidubi familia stibe». Modo tiica laani, guiña huiiniʼ que rusihuinni dxandíʼ bibani guiráʼ ca binni ni rieeteʼ lu Biblia.