1. Xi biʼniʼ Mary Decker para bisihuinni cadi cá ique guiabayú.

 DEDE dxi nahuiiniʼ Mary Decker, mápeca runibiáʼ stale binni laa purtiʼ nabé biʼniʼ ganar lu ca carrera ra bixooñeʼ. Ne guníʼcabe zuni ganarbe medalla de oro lu carrera de 3,000 metru lu olimpiada ni guca iza 1984. Peru qué ñuni ganarbe dxi que. Xiñee yaʼ. Purtiʼ biábabe ora birenda ñeebe ñee sti gunna ni cuxooñenebe. Cumu nabé gucanabe la? gupa xidé guleecabe laabe lu pista que. Guizáʼ biinaʼ Mary pur ni bizaaca. Peru qué ñabayube. Lu iza 1985, ante gusaa ti iza de dxi biábabe que, gudxítebe sti biaje, yanna huaxa maʼ biʼniʼ ganarbe dede bixooñebe jma nagueenda que últimu gunaa ni biʼniʼ ganar carrera riʼ.

2. Xi cayuni ca xpinni Cristu yanna, ne xi maʼ gudixhe íquecaʼ.

² Laanu, ca xpinni Cristu, laaca casi ñaca cuxóʼñenu lu ti carrera ne maʼ gudixhe íquenu gundúʼxenu ni neca gácani nagana para laanu. Lu carrera riʼ qué risácapeʼ guxooñeʼ binni nagueenda. Peru qué riníʼ diʼ nga zanda chuunu chaahuiʼ ne guiziiláʼdxinu gatigá. Zanda guchaaganu ni né ti carrera de maratón, purtiʼ riquiiñeʼ guni huantar binni ne cadi guiree gana ti guni ganar. Apóstol Pablu bizeeteʼ de ti carrera lu primé carta ni bicaa ra nuu ca xpinni Cristu de Corinto, ti guidxi ra nabé gudxite binni carrera dxiqué. Laabe bicaabe: «Ñee qué ganna tu pa irá ni rie carrera ruxooñeʼ, peru tobi si ricaa premiu la? Nga runi lauyubi uxooñe tu para icaa tu ni» (1 Cor. 9:24).

3. Tuu nga cani zanda guicaa premiu para guibani sin gatiʼ.

³ Biblia cayabi laanu chuunu lu carrera riʼ (biindaʼ 1 Corintios 9:25-27). Premiu nuu raríʼ nga guendanabani ni qué zaluxe: ca xpinni Cristu ni bibí pur espíritu la? ziecaʼ guibáʼ, peru xcaadxi binni ni zeʼ lu carrera riʼ, zabánicaʼ ndaaniʼ Guidxilayú. Guiráʼ binni ni guxooñeʼ lu carrera riʼ ne gunduuxeʼ ni, zacaa premiu stiʼ, ngapeʼ nga ni qué raca lu guiráʼ carrera ni runi binni tiempu riʼ (Mat. 24:13). Ca binni si ni runiti nga cani qué ruxooñeʼ modo nexheʼ gaca ni o cani qué gunduuxeʼ  carrera stiʼ. Ne nuu sti cosa risaca ni naquiiñeʼ gánnanu: raríʼ si nga zanda guicaa binni guendanabani ni qué zaluxe.

4. Xiñee nagana para cheʼ binni lu carrera ra zacaa guendanabani ni qué zaluxe.

⁴ Nagana nga para gunduuxeʼ binni carrera riʼ. Xiñee yaʼ. Purtiʼ naquiiñeʼ gusaana binni caadxi de ca cosa ni riuulaʼdxiʼ guni ne gucaa ique chindá ra racalaʼdxiʼ. Biaʼ dxi huabani binni ndaaniʼ Guidxilayú, qué huayuu sti binni ni guxooñeʼ lu carrera riʼ sin guirenda ñee, Jesucristu si nga gunda biʼniʼ ni. Peru guidúʼyanu xi guníʼ discípulo Santiagu de guiráʼ ca xpinni Cristu: «Irá nu ruchéʼ nu» (Sant. 3:2). Cadi dxandíʼ ni na ca diidxaʼ ca la? Guiranu rucheʼnu ne laaca riuubaʼ ladxidoʼno ora guchee sti binni. Zándaca ziuu ora zarenda ñeenu o zieechuʼ ni, zuxóʼñenu jma chaahuiʼ o zándaca dede gueeda guiábanu, peru naquiiñeʼ guiásanu nagueendaca ne guxóʼñenu sti biaje. Nuu xpinni Cristu huayaba ne nabé huayacaná dede huaquiiñecaʼ tu gacané laacaʼ para guiásacaʼ ne guibiguétacaʼ lu carrera riʼ sti biaje. Nga runi, zándaca ziuu ora zarenda ñeenu chupa chonna biaje o dede ziábanu (1 Rey. 8:46).

5, 6. 1) Ximodo zanda guiénenu ca diidxaʼ zeeda lu Biblia ra na gastiʼ qué zanda gusaba ca xpinni Cristu. 2) Xi zanda gacané laanu para guiásanu pa guiábanu. 3) Xiñee nuu tu qué randa riasa ora maʼ biaba.

⁵ Ni gúninu ora guirenda ñeenu ne guiábanu zusihuínnini ximodo nuunu nezalú Dios. Nuu tu rirenda ñee ne riaba peru riasa ne runi ni na Dios sti biaje, peru laaca nuu cani maʼ qué liica riná gaca arrepentir ora maʼ biaba. Guidúʼyanu xiná Proverbios 24:16: «Zándaca guiaba ti binni nachaʼhuiʼ hasta gadxe biaje, peru ziásabe. Peru ca binni malu zarenda ñeecaʼ pur ca guendananá gueeda luguiacaʼ».

⁶ Pa chuʼ xiixa ni guirenda ñeenu o gusaba laanu la? Jiobá qué zudii lugar guiaananu ra biábanu. Nanna dxíchinu zandisaʼ Jiobá laanu para cadi gusaana de gúninu ni na de guidubi ladxidoʼno. Nabé riguixhedxí ndiʼ ladxidóʼ ca binni ni dxandíʼ nadxii Jiobá. Peru ca binni qué iquiiñeʼ, qué rinacaʼ guiásacaʼ ne qué rudiicaʼ lugar gacané xquidxi Dios ne espíritu stibe laacaʼ. ¡Peru ca binni ni nadxii ca ley stiʼ Dios maʼ gadxé laacaʼ! Qué ziuu xiixa ni guirenda ñeecabe  o ni cuee laacabe lu carrera ra zécabe para guicaacabe guendanabani. Biblia na: «Cani nadxii ley stiluʼ ratadxí ladxidoʼcaʼ, ne gastiʼ qué zanda gusaba laacaʼ» (Salmo 119:165).

7, 8. Xi naquiiñeʼ guni tuuxa ni gueeda guiaba para chuuláʼdxiruʼ Jiobá modo runi adorar.

⁷ Nuu tiru ruchee ti xpinni Cristu purtiʼ cadi zuhuaa dxiichiʼ nezalú Dios, ne neca cadi naroʼbaʼ ca pecadu gúnibe, zándaca gueeda gucheebe chupa chonna biaje. Peru zanda chuulaʼdxiʼ Jiobá modo runi adorarbe laa pa guiásabe, o pa gaca arrepentirbe de guidubi ladxidoʼbe ne gúnibe stipa para cadi gucheebe sti biaje. Ne rudiʼnu cuenta zacá ni ora ridúʼyanu modo guzané Dios guidxi Israel (Is. 41:9, 10). Textu stiʼ Proverbios 24:16, ni maca bizéʼtenu que, ruzeeteʼ dxandíʼ rucheʼnu, peru nuu ti cosa ni jma risaca ni cusiidini laanu: zanda gacané Jiobá laanu para guiásanu, purtiʼ rilaseláʼdxibe binni. Biblia na: «Gusaana binni malu neza stiʼ, ne gusaana binni qué iquiiñeʼ cani riníʼ ique; ne guibiguetaʼ ra nuu Jiobá, laa zalaselaʼdxiʼ laabe, ne guibiguetaʼ ra nuu Dios stinu, purtiʼ laa zutiidilaʼdxiʼ guiráʼ donda» (Isaías 55:7). Jiobá ne Jesús ruuyacaʼ laanu casi binni ni zanda gunduuxeʼ carrera stiʼ, nga runi riguucabe gana laanu para guiásanu pa guiábanu (Sal. 86:5; Juan 5:19).

⁸ Pa guirenda ñee tuuxa ni cuxooñeʼ lu ti carrera de maratón ne guiaba la? zanda gunduuxeʼ carrera stiʼ pa guiasa nagueenda. Lu carrera ra ziuunu para guicaanu guendanabani ni qué zaluxe riʼ, qué gánnadinu «padxí ne pora» guiluxe ni (Mat. 24:36). Neca zacá, pa gúninu stipa pur cadi gucheʼnu la? qué zaca nagana para laanu gundúʼxenu carrera riʼ ne guicaanu premiu stinu. Yanna, xi zanda gúninu para cadi chuʼ xiixa ni guirenda ñeenu yaʼ.

9. Gunáʼ nga caadxi de ca cosa ni zándaca guirenda ñeenu.

⁹ Guidúʼyanu gaayuʼ cosa ni zándaca guirenda ñeenu: 1) xiixa ni gucueeza laanu de gúninu ni na Dios, 2) ca cosa malu ni riuuláʼdxinu gúninu, 3) xiixa ni cadi jneza biʼniʼ ti xpinni cristu, 4) ora sanándacabe laanu ne 5) ora gúʼyanu guchee ti xpinni Cristu. Pa maʼ huarenda tobi de cani maʼ bizéʼtenu riʼ ñeenu la? cadi guiaandaʼ laanu qué ridxiichi Jiobá nagueenda. Qué zuuyabe laanu casi tuuxa ni maʼ qué zanda chuʼ lu carrera riʼ pa gucheʼnu.

10, 11. Xi guca nagana para rey David.

¹⁰ Ca cosa ni rucueeza laanu de gúninu ni na Dios zanda guchaaganu cani né guié ni zándaca guirenda ñee tuuxa ni ziguxooñeʼ lu ti carrera. Pa guidúʼyanu modo bibani rey David ne apóstol Pedru la? zadúʼyanu chupa de ca «guié» ca: David qué ñanda nucueeza laca laa ne Pedru nabé bidxibi binni.

¹¹ Nabé guca nagana para rey David gucueeza laa de guni cosa malu, ne rihuinni zacá ni purtiʼ guyuunebe Bat-seba ne laaca gucaláʼdxibe ñuutibe Nabal dxi bichiichi laabe. Dxandíʼ bíʼnibe caadxi cosa sin niníʼ íquebe, peru qué nusaana de ñúnibe stipa pur ñúnibe ni na Jiobá. Cumu bidiibe lugar gacané xcaadxi binni laabe la? gunda biásabe ne guyuube galán né Dios sti biaje (1 Sam. 25:5-13, 32, 33; 2 Sam. 12:1-13).

12. Ximodo gunda biaana Pedru lu carrera stiʼ neca bichee.

¹² Nabé bidxibi Pedru binni purtiʼ guníʼ ique zándaca gúnicabe laa xiixa, ne neca bicheebe chupa chonna biaje, qué nixélebe de Jesús ne de Jiobá. Guietenaláʼdxinu dxi guniʼbe qué runibiaʼbe Maestru stibe nezalú stale binni ne bíʼnibe ni chonna biaje (Luc. 22:54-62). Ra gudiʼdiʼ dxi laaca bíʼnibe sti cosa ni cadi jneza: gucaláʼdxibe nusihuínnibe huaxiéʼ risaca ca xpinni Cristu de sti guidxi que ca judíu ni maʼ naca xpinni Cristu. Peru nanna Pablu cadi jneza guiníʼ ique ca xpinni Cristu nuu tu jma risaca lade ca binni ridagulisaa. Racá ridúʼyanu cadi jneza ni biʼniʼ Pedru. Ngue runi, ante guni xcaadxi xpinni Cristu zaqueca la? gudxi Pablu laabe cadi jneza ni cayúnibe (Gál. 2:11-14). Ñee bidxiichi Pedru pur ni gudxi Pablu laa ne pur ngue nusaana carrera ra zanda guicaa guendanabani la? Coʼ, sínuque guníʼ íquebe lu conseju bidii Pablu laabe, bizuubabe diidxaʼ ne biaanabe lu carrera stibe.

13. Ximodo zanda gucueeza ti guendahuará laanu de gúninu ni na Dios.

 ¹³ Sti cosa ni zándaca gucueeza laanu de gúninu ni na Dios nga ti guendahuará. Pa chúʼpenu xizaa pur laani la? zabeeni gana laanu, zusidxágani laanu o dede zusábani laanu. Guzéʼtenu ni bizaaca ti gunaa xpinni Cristu de Japón, laa gupa ti guendahuará gudiʼdiʼ si diecisiete iza de guyuunisa. Cumu nabé guyuube xizaa pur laani la? bisidxágani laabe dede bisaana de gucheechebe diidxaʼ. Despué yeganna chupa binnigola laabe, ne cumu guluucabe gana laabe la? bizulú guyebe ca guendaridagulisaa stinu sti biaje. Laabe guniʼbe: «Dede biinaʼ purtiʼ nabé sicarú modo bidxagalú ca xpinni Cristu naa». Yanna riʼ maʼ bibiguétabe lu carrera stibe.

14, 15. Xi naquiiñeʼ gúninu ora guiale de laanu gúninu xiixa cosa malu. Bizeeteʼ ti ejemplu.

¹⁴ Stale xpinni Cristu maʼ huayábacaʼ pur ca cosa malu ni riuuláʼdxicaʼ gúnicaʼ. Ora guiale de laanu gúninu xiixa cosa malu, naquiiñeʼ gúninu stipa pur guibáninu jneza, pur chuʼ xquendabiaaninu nayá ne pur chuʼnu nayá nezalú Dios. Jesús guníʼ naquiiñeʼ gáxhanu ti guielunu o ti chú nanu pa cucaani laanu gucheʼnu. Yanna, cadi jma risaca cueenu guiráʼ cosa malu ni nuu ndaaniʼ ladxidoʼno ni zándaca cuee laanu lu carrera stinu la? (Mat. 5:29, 30.)

¹⁵ Guzéʼtenu de ti hombre ni naca xpinni Cristu. Dede nahuiinibe cayúnibe stipa pur gusaana de chuuláʼdxibe xcaadxi hombre. Neca biniisibe ndaaniʼ ti familia ra runi adorárcabe Dios, guniʼbe huaxiéʼ galán runi sentirbe ora maʼ nuube lade binni. Gúcabe precursor regular ne siervu ministerial dxi nápabe 20 iza. Peru despué bíʼnibe ti pecadu nabé naroʼbaʼ, ngue runi guluu jnézacabe laabe ne laaca gucané ca binnigola laabe. Ximodo gunda biasa hombre riʼ ne bibiguetaʼ lu carrera stiʼ yaʼ. Biʼniʼ orarbe, biindabe Stiidxaʼ Dios ne bicaa íquebe gacanebe xcaadxi binni. Ra gudiʼdiʼ iza guniʼbe: «Nuu biaje málasi ridiʼdiʼ ca cosa dxabaʼ que ndaaniʼ iqueʼ, peru nagueendaca ribee cani. Maʼ biziideʼ qué zudii Jiobá lugar gueeda xiixa guendanagana luguiaʼyaʼ ni qué zanda guneʼ huantar. Nga runi, runeʼ cré nanna Jiobá zanda gudxieeluáʼ guendanagana stinneʼ». Ne laaca guniʼbe: «Nannaʼ zaguu Jiobá ndaayaʼ naa lu guidxilayú cubi stiʼ pur guiráʼ ni cayuneʼ huantar yanna. ¡Ngapeʼ nga ni racalaʼdxeʼ! Laga cabezaʼ guedandá dxi ca, qué zusaanaʼ de gudxieeluáʼ ni». Racá ridúʼyanu cadi cá ique Testigu riʼ gusaana carrera stiʼ.

16, 17. 1) Xi gucané ti xpinni Cristu ni guníʼ ique cadi jneza ni bíʼnicabe laa. 2) Xi naquiiñeʼ gúninu pa qué racaláʼdxinu guiábanu.

¹⁶ Ca cosa ni cadi jneza guni ti xpinni cristu laaca zanda gusaba cani laanu. Guzéʼtenu ni bizaaca ti xpinni Cristu de Francia ni guca binnigola, nabé bidaabe xiana purtiʼ guníʼ íquebe cadi jneza ni bíʼnicabe laabe. Ne pur ngue bisaana de chebe ca guendaridagulisaa ne laaca maʼ qué nucheechebe diidxaʼ. Despué yeganna chupa binnigola laabe, bicaadiágacaʼ laabe ne biénecaʼ modo nuube. Qué nucueezacaʼ laabe ora caniʼbe xi bizaacabe. Gúdxicabe laabe gusaanabe ca cosa que lu náʼ Jiobá ne gúʼyabe jma risaca guni adorarbe Jiobá modo riuulaʼdxiʼ. Bidii Testigu riʼ lugar gacanécabe laa ne qué nindaa bibiguétabe lu carrera stibe. Yanna riʼ maʼ cayúnibe xhiiñaʼ Dios sti biaje.

¹⁷ Guiranu naquiiñeʼ chinándanu ejemplu stiʼ Jesucristu, Xaíque stiʼ ca binni ridagulisaa ne cadi chinándanu binni guidxilayú. Guielú Jesús zeeda gaca «casi bele», nga runi jma jneza modo ruuyabe guiráʼ cosa ne nánnabe xi guiráʼ cayaca lade ca binni ridagulisaa jma que laanu (Apoc. 1:13-16). Zándaca guiníʼ íquenu cadi jneza xiixa cosa ni guca lade ca binni ridagulisaa purtiʼ cadi cayene chaahuinu ni, peru Jesús nanna xipeʼ nga guca ne laa zuni chaahuiʼ ni ora maʼ caquiiñeʼ gácani ne zúnibe ni jneza. Nga runi, qué chuʼ dxi guixélenu de Dios pur ni guiníʼ ti xpinni Cristu o pur ni guni.

18. Xi zanda gacané laanu para gudxíʼlunu ca guendanagana gueeda luguianu.

¹⁸ Nuuruʼ xhupa cosa ni zándaca gueeda gusaba laanu: ora sanándacabe laanu ne ora guidúʼyanu guchee ti xpinni Cristu. Ora bizeeteʼ Jesús ejemplu  stiʼ hombre ni zinduu biní que guniʼbe nuu tu rixeleʼ de Dios ora sanándacabe laa pur ni caziidiʼ. Tutiica sananda laanu, pa binnilídxinu, pa xpecínunu o gobiernu, pa cadi naguidxi nuu fe stinu la? zusábacabe laanu (Mat. 13:21). Peru pa maʼ gudixhe íquenu cadi guixélenu de Jiobá la? zacané stiidxaʼ Reinu para gaca fe stinu jma naguidxi ne zuzuhuaʼnu dxiichiʼ, casi ti yaga ni nabé gueteʼ nuu xcu. Ora guniná xiixa guendanagana laanu la? naquiiñeʼ guni orarnu ne guiníʼ íquenu lu ca cosa ni rusiecheʼ laanu (biindaʼ Filipenses 4:6-9). Rudii Jiobá stipa laanu para guni huantarnu intiica ni gueeda luguianu ne qué zudiʼnu lugar chuʼ xiixa guendanagana ni gusaba laanu.

19. Xi zanda gúninu para cadi gusaananu carrera stinu ora guchiichi tuuxa laanu.

¹⁹ Triste guininu ni, peru nuu tu laa maʼ bisaana carrera stiʼ purtiʼ ruuyaʼ ra ruchee xcaadxi. Rixélecabe de Dios purtiʼ para laacabe cadi jneza xiixa ni biʼniʼ ti xpinni Cristu o pur biiyacabe laa biʼniʼ xiixa ni riuulaʼdxiʼ (1 Cor. 8:12, 13). Pa guchiichi tuuxa laanu, ñee zúninu guendanagana ca jma naroʼbaʼ dede gucaani laanu gusaana de guizíʼdinu ni dxandíʼ la? Biblia cayabi ca xpinni Cristu cadi guni juzgarcaʼ binni ne cadi guicacaʼ tema gácapeʼ ni racaláʼdxicaʼ, sínuque gutiidiláʼdxicaʼ donda stiʼ stobi (Luc. 6:37). Pa guchiichi tuuxa laanu pur xiixa ni guni, guinabadiidxanu laca laanu: «Ñee riniéʼ cadi jneza ni bíʼnibe purtiʼ qué riuuladxeʼ modo gúcani la? Nannaʼ binni ruchee ca bicheʼ ne ca bizanaʼ, yanna, ñee zusaana carrera ra zacaaʼ guendanabani pa guuyaʼ guchee tobi de laacabe la?». Cumu dxandíʼ nadxiinu Jiobá la? zudiini stipa laanu para gundúʼxenu carrera stinu ne qué zazaaláʼdxinu ni guni xcaadxi.

20, 21. Xi maʼ gudixhe íqueluʼ gúniluʼ lu carrera ra zacaaluʼ guendanabani.

²⁰ Ñee maʼ gudixhe íqueluʼ guxooñeluʼ dede gunduuxeluʼ carrera stiluʼ la? (2 Tim. 4:7, 8.) Pa zacá ni la? biindaʼ Biblia ne ca libru ne revista ni rudii xquidxi Jiobá, guníʼ ique lu ni caziidiluʼ para gánnaluʼ gunáʼ nga ca cosa ni zándaca gueeda guirenda ñeeluʼ. Gunabaʼ Dios gudii lii espíritu santu, purtiʼ zudiini lii stipa ni caquiiñeluʼ para gúniluʼ ni na Dios. Bietenalaʼdxiʼ, cadi purtiʼ si guiaba tuuxa ni zeʼ lu ti carrera guininu maʼ qué zanda guiasa ne guxooñeʼ sti biaje, sínuque zanda guiásabe ne guibiguétabe lu carrera stibe. Dede zanda guiziidibe stale cosa sicarú de ca guendanagana ni gudíʼdibe.

²¹ Stiidxaʼ Dios na caquiiñeʼ gúninu stipa para ganda guiaananu lu carrera ra zacaanu guendanabani ni qué zaluxe. Qué zanda diʼ guiaananu casi tuuxa ni riguiʼbaʼ ndaaniʼ ti autobús ne cabeza si chinécabe laa dede ra racalaʼdxiʼ. Cada tobi de laanu naquiiñeʼ guxooñeʼ ne guicá ique gunduuxeʼ carrera stiʼ. Ne laga ziuunu lu neza riʼ, guendariuudxi ni rudii Dios laanu zeeda gácani casi ti bi huiiniʼ ni maʼ zigucaanáʼ laanu (Sal. 119:165). Naquiiñeʼ gánnanu zacané Jiobá laanu ne qué zusaana de uguube ndaayaʼ laanu pa maʼ gudixhe íquenu gundúʼxenu carrera stinu (Sant. 1:12).