1, 2. Xi bizeeteʼ Jiobá ti biaje, ne xiñee galán gánnanu de laani.

 ÑEE riuuláʼdxiluʼ duʼgaʼ la? Stale binni nabé riuulaʼdxiʼ ni, nuu tu riuulaʼdxiʼ ni ora maʼ nagüí ni ne nuu tu riuulaʼdxiʼ ni ora maʼ nabidxi ni. Nga runi, ndaaniʼ stale guidxi nabé ruzuhuaa binni yaga duʼgaʼ. Ca israelita que nabé guyuuláʼdxicaʼ ni (Nah. 3:12; Luc. 13:6-9). Nabé racané cuananaxhi riʼ para chuʼ binni nazaaca ne laaca ribeeni caadxi de ca cosa ni cadi caquiiñeʼ xcuérpunu. Nga runi stale binni riníʼ galán ni para chuʼ ladxidoʼno nazaaca.

² Ti biaje bizeeteʼ Jiobá de duʼgaʼ riʼ, peru cadi para gusiénebe xiñee galán gó binni cuananaxhi riʼ, sínuque para guchaagabe ni binni. Ni gúdxibe Jeremías guiníʼ zacané laanu para gánnanu ximodo nuu ladxidoʼno ne ximodo nuu ladxidóʼ ca binni ni nadxiinu. Ora maʼ cadúʼndanu ca diidxaʼ ni bicaa Jeremías riʼ, galán guiníʼ íquenu xi zanda guizíʼdinu de laacani.

3. Tuu nga beeda gaca ca duʼgaʼ ni cuzeeteʼ capítulo 24 stiʼ Jeremías.

³ Primeru guidúʼyanu xi gudxi Dios Jeremías. Guníʼ ique nuunu lu iza 617 ante de ca dxi stiʼ Jesús; ca binni de Judá nabé cayúnicaʼ stale cosa malu nezalú Dios, ngue runi ruuyabe laacaʼ casi binni ni huará. Lu ti visión gudxi Dios Jeremías xi zazaaca ca binni que ne bichaagabe laacaʼ chupa clase duʼgaʼ: caadxi duʼgaʼ sicarú ne xcaadxi duʼgaʼ ni maʼ nayuudxuʼ. Biblia na: «Óraque gudxi Jiobá naa: “Xi cayuuyaluʼ, Jeremías”. Óraque guniéʼ: “Cayuuyaʼ caadxi duʼgaʼ sicarú, ca duʼgaʼ riʼ nabé sicarú cani; ne laaca cayuuyaʼ caadxi duʼgaʼ ni maʼ nayuudxuʼ, ca duʼgaʼ riʼ guizáʼ maʼ nayuudxuʼ cani, dede maʼ qué zanda gó binni cani purtiʼ nabé maʼ biuʼdxuʼ cani”» (Jeremías 24:3). Ca duʼgaʼ ni maʼ biuʼdxuʼ que nga zeeda gaca rey Sedequías ne xcaadxi binni malu casi laa, ne zadxiña dxi gueeda rey Nabucodonosor ne ca soldadu stiʼ luguiácabe para gunitilú laacabe. Yanna, xi zanda guininu de Ezequiel, Daniel ne guionnaʼ xcompañeru, cani maʼ nuu ndaaniʼ guidxi Babilonia yaʼ. Ne xi zazaaca né xcaadxi judíu ni cheʼ casi esclavu  Babilonia. Laacabe nga zeeda gácacabe casi ca duʼgaʼ sicarú que. Ra tiidiʼ iza zabiguetaʼ caadxi de laacabe para guni chaahuicaʼ guidxi Jerusalén ne yuʼduʼ stini. Ne ngapeʼ nga ni bizaaca (Jer. 24:8-10; 25:11, 12; 29:10).

4. Ora guidúʼndanu ni guníʼ Dios de ca duʼgaʼ sicarú que, ximodo riguu ca diidxaʼ riʼ gana laanu.

⁴ Guidúʼyanu xi guníʼ Jiobá de ca israelita ni zeeda gaca casi ca duʼgaʼ sicarú que: «Ne dxandipeʼ zudieeʼ laacabe sti ladxidóʼ para gunibiáʼcabe naa, purtiʼ naa nga Jiobá; ne zeeda gácacabe xquidxeʼ» (Jer. 24:7). Textu riʼ nga ni biquiiñeʼ para guca tema ni cadúʼndanu riʼ. ¡Dios racalaʼdxiʼ gudii laanu sti ladxidóʼ para gunibiaʼnu laa! Ladxidóʼ ni caniʼbe raríʼ nga modo laanu, nga runi, naquiiñeʼ chuuláʼdxinu gunibiaʼnu Dios ne gácanu tobi de ca binni xquídxibe. Para ganda gúninu ni, naquiiñeʼ guidúʼndanu Biblia ne guzúʼbanu stiidxaʼ Dios, gaca arrepentirnu ne guchaʼnu modo laanu, gudiʼnu xquendanabáninu Dios ne chuʼnísanu lu lá Jiobá, lu lá Jesús ne lu lá espíritu santu (Mat. 28:19, 20; Hech. 3:19). Nuu tu maʼ biʼniʼ cani bizéʼtenu riʼ, ne xcaadxi cayuni stipa para gúnini ne maʼ cadagulisaanecaʼ laanu.

5. Tu para ngue ca diidxaʼ guníʼ Jeremías ora bizeeteʼ de ladxidóʼ binni.

⁵ Neca maʼ xadxí de cayúninu ni na Dios, guiranu naquiiñeʼ chuʼnu cuidadu modo riníʼ íquenu ne modo nabáninu. Xiñee yaʼ. Zánnanu ni ora guidúʼndanu ca diidxaʼ ni bicaa Jeremías ora guníʼ de ladxidóʼ binni. Dxandíʼ ruzeeteʼ caadxi capítulo stiʼ libru riʼ de ca guidxi nuu gaxha de Judá, peru gucuani para guidxi Judá dxi biʼniʼ mandar gaayuʼ de ca rey stiʼ (Jer. 1:15, 16). Guníʼ Jeremías ca diidxaʼ que para ca hombre, ca gunaa ne ca baʼduhuiiniʼ ni maʼ bidiicaʼ laacaʼ Jiobá. Ca bixhoze gólacabe ni bibani dxiqué, de laacaʼ biale gácacaʼ xquidxi Dios (Éx. 19:3-8). Ne ca israelita ni bibani tiempu stiʼ Jeremías laaca bizeetecaʼ maʼ bidiicaʼ laacaʼ Dios ora guniʼcaʼ: «¡Raríʼ nuudu! Maʼ bibiguétadu ra nuuluʼ, purtiʼ lii, Jiobá, lii nga Dios stidu» (Jer. 3:22). Peru xi rábiluʼ nuu ndaaniʼ ladxidóʼcabe yaʼ.

6. Xiñee naquiiñeʼ chuuláʼdxinu guiénenu ca diidxaʼ guníʼ Dios ora bizeeteʼ de ladxidoʼno.

⁶ Ca doctor nuu yanna riʼ nápacaʼ stale aparatu nacubi para ganda gúʼyacaʼ ladxidóʼ binni ne gánnacaʼ ximodo nuuni. Peru Jiobá randa runi jma que nga, cásica bíʼnibe tiempu bibani Jeremías. Jiobá si nga zanda guʼyaʼ xi nuu ndaaniʼ ladxidoʼno pur ni na ca diidxaʼ riʼ: «Ladxidóʼ binni nga ni jma riguite laa que intiica si cosa, ne qué ridxélani xi gúnini. Tu zanda gunibiáʼ ni yaʼ. Naa Jiobá, cayuuyaʼ chaahueʼ xi nuu ndaaniʼ ladxidoʼto, [...] para gudieeʼ cada tobi ni naquiiñeʼ guicaa pur modo nabani» (Jer. 17:9, 10). Ca doctor ca nápacaʼ aparatu para gúʼyacaʼ pa nazaaca nuu ladxidoʼno ne nánnacabe ripapa ladxidóʼ tuuxa biaʼ 3,000 millón biaje pa guibani biaʼ setenta ne ochenta iza. Peru cadi ladxidoʼno ni ruuyaʼ ca doctor ca nga ni ruuyaʼ Jiobá, laabe ruuyabe ximodo laanu, ximodo riníʼ íquenu, xi runi sentirnu, ximodo xpiaʼnu ne xi naguixhe íquenu gúninu. Cani bizéʼtenu riʼ nga ni zeeda gaca casi ladxidoʼno. Zanda guʼyaʼ Dios ximodo nuu ladxidoʼno riʼ, ne laanu laaca zanda gúʼyanu ximodo nuuni.

7. Ximodo na Jeremías nuu ladxidóʼ stale de ca judíu ni bibani tiempu stiʼ.

⁷ Para ganda guidúʼyanu ximodo nuu ladxidoʼno la? guinabadiidxanu laca laanu: «Ximodo ngue nuu ladxidóʼ stale de ca judíu ni bibani tiempu stiʼ Jeremías que yaʼ». Para guicábinu ni, guidúʼyanu ca diidxaʼ guníʼ Jeremías riʼ: «Guiráʼ binni ni nuu Israel caʼruʼ gaca circuncidar ladxidoʼcaʼ». Raríʼ cadi caníʼdibe de modo guca circuncidar ca hombre ni guyuu ndaaniʼ guidxi Israel dxiqué, purtiʼ maca guniʼbe ca diidxaʼ riʼ: «¡Biiyaʼ! Zadxiña dxi —na Jiobá—, zabidxeʼ cuenta guiráʼ cani maʼ guca circuncidar purtiʼ cadi dxandíʼ diʼ nga guca circuncidárcabe». Nga runi, dede ca judíu ni maʼ guca circuncidar que caquiiñeʼ gaca circuncidar ladxidoʼcaʼ (Jer. 9:25, 26). Ximodo zanda guiénenu ca diidxaʼ riʼ yaʼ.

8, 9. Xii ngue caquiiñeʼ guni stale de ca judíu que né ladxidoʼcaʼ.

⁸ Gudxi Dios ca judíu que naquiiñeʼ gaca  circuncidar ladxidoʼcaʼ, ne para ganda gúnicabe ni caquiiñeʼ cueecabe guiráʼ cosa malu nuu ndaaniʼ ni. Xiñee yaʼ. Laabe bisiénebe: «Ti cadi gueeda xiana stinneʼ [...] pur guiráʼ guenda qué iquiiñeʼ ni cayúnitu». Paraa ngue ruzulú guiráʼ guenda qué iquiiñeʼ stícabe yaʼ. Ndaaniʼ ladxidóʼcabe (biindaʼ Marcos 7:20-23). Biquiiñeʼ Dios Jeremías para gusihuinni paraa ngue ruzulú guiráʼ guenda qué iquiiñeʼ stiʼ ca judíu que. Maʼ qué riná ladxidóʼcabe guzuubaʼ diidxaʼ ne qué riuulaʼdxiʼ Jiobá guiráʼ ni rúnicabe ne ni riníʼ íquecabe. Biblia na: «Peru guidxi riʼ maʼ napa ti ladxidóʼ ni qué riene ne qué ruzuubaʼ diidxaʼ; maʼ bireechúcabe ne canazácabe modo na íquecabe». «Qué nucaadiágacabe, ne qué nulábicabe ni gudxeʼ laacabe, sínuque gúcacabe binni qué riene ne bíʼnicabe guiráʼ ni na ladxidóʼcabe neca cadi jneza cani, ngue runi bidxiidéchecabe naa ne maʼ qué ninandarúcabe naa.» (Jeremías 5:23 ne 7:24.) Ngue runi gudxi Jiobá laacabe caquiiñeʼ gaca circuncidar ladxidóʼcabe o cueecabe guiráʼ cosa malu nuu ndaaniʼ ni (Jer. 4:4; 18:11, 12).

⁹ Zanda guininu casi ora caquiiñeʼ gaca operar ladxidóʼ ca judíu que, cásica biʼniʼ ca bixhoze gólacabe ni bibani tiempu stiʼ Moisés (Deut. 10:16; 30:6). Para gaca circuncidar ladxidóʼcabe naquiiñeʼ cueecabe ca cosa malu nuu ndaaniʼ ni: gusaana de gúnicabe cosa malu, guchaacabe modo riníʼ íquecabe ne chinándacabe ca ley stiʼ Dios (Hech. 7:51).

10. Xi naquiiñeʼ gúninu para chinándanu ejemplu stiʼ David.

¹⁰ Riéchenu stale purtiʼ racané Dios laanu gánnanu ximodo nuu ladxidoʼno. Yanna, xiñee naquiiñeʼ guizaalaʼdxiʼ ca testigu stiʼ Jiobá modo nuu ladxidoʼcaʼ yaʼ. Purtiʼ nuucabe ndaaniʼ guidxi nayá stiʼ Dios ne ruzuubacabe stiidxabe. Cadi pur cayúnicabe cosa malu casi biʼniʼ stale de ca judíu ni bibani dxiqué, cani biʼyaʼ Dios laacaʼ casi «duʼgaʼ ni maʼ nayuudxuʼ». Neca zacá, naquiiñeʼ guiníʼ íquecabe lu oración biʼniʼ David, ti hombre ni bizuubaʼ stiidxaʼ Jiobá: «Dios, biiyaʼ chaahuiʼ guidubi nacaʼ, ne biiyaʼ xi nuu ndaaniʼ ladxiduáʼ. Biiyaʼ chaahuiʼ naa, ne biiyaʼ chaahuiʼ xi guiráʼ riníʼ iqueʼ ni riguu xizaa naa, ne biiyaʼ pa canazayaʼ lu ti neza ra zacanaʼyaʼ» (Sal. 17:3; 139:23, 24).

11, 12. 1) Xiñee naquiiñeʼ guʼyaʼ cada tobi de laanu xi nuu ndaaniʼ ladxidóʼ. 2) Xii nga ni qué zuni Dios.

¹¹ Jiobá rinabaʼ cada tobi de laanu gunibiaʼnu laa ti ganda chuuláʼdxibe modo runi adorarnu laabe. Jeremías guníʼ: «Lii, Jiobá, Dios stiʼ stale binni nanda guiibaʼ, cayuuyaʼ chaahuiluʼ ximodo nuu ca binni ni runi ni jneza; cayuuyaluʼ ca riñón stícabe ne ladxidóʼcabe» (Jer. 20:12). Yanna, pa ruuyaʼ Jiobá xi nuu ndaaniʼ ladxidóʼ ca binni ni runi ni jneza, cadi laaca naquiiñeʼ guʼyaʼ chaahuinu xi nuu ndaaniʼ ladxidoʼno la? Biblia na: «Jiobá cayuuyaʼ ximodo nuu binni nachaʼhuiʼ ne binni malu, ne Xhiálmabe dxandipeʼ nanalaʼdxiʼ tutiisi ni nadxii guendaridinde» (Salmo 11:5). Ora maʼ cayúʼyanu xi nuu ndaaniʼ ladxidoʼno, zándaca zudiʼnu cuenta cadi jneza xiixa ni cayúninu, ni cá íquenu gúninu, o ni runi sentirnu. O zándaca guidxélanu xiixa ni cuquidxi ladxidoʼno ni caquiiñeʼ cueenu. Zacá nga casi ora ñuni operarnu ladxidoʼno. Xi zanda guyúbinu ora maʼ cayúʼyanu xi nuu ndaaniʼ ladxidoʼno yaʼ. Ne ximodo zanda guchaʼnu pa caquiiñeʼ gúninu ni (Jer. 4:4).

¹² Naquiiñeʼ gánnanu ndiʼ: qué zucaa diʼ Jiobá laanu guchaʼnu. De «ca duʼgaʼ sicarú» que guniʼbe: «Zudieeʼ laacabe sti ladxidóʼ para gunibiáʼcabe  naa». Qué niníʼdibe zucaabe laacaʼ guchaacaʼ ladxidoʼcaʼ, sínuque naquiiñeʼ guiale de laacabe chuuláʼdxicabe gunibiáʼcabe Dios. Cadi ngaca nga ni naquiiñeʼ chuuláʼdxinu gúninu la?

13, 14. Ximodo zanda guniná ladxidóʼ ti xpinni Cristu laa.

¹³ Jesús guníʼ: «De ndaani ladxidóʼ cabe reeda ni cadi jneza ni cá ique cabe guni cabe: guuti cabe binni, o chuʼ né cabe ni cadi xheela cabe, gapa cabe jnadxii cabe, cuana cabe, indisa cabe falsu luguiá stobi, cuʼ dí cabe binni» (Mat. 15:19). Nga runi, ti xpinni Cristu ni naguidxi ladxidóʼ la? zándaca gueeda guni xiixa ni cadi jneza casi chuʼné ni cadi xheelaʼ o gapa jnadxii, ne pa qué gaca arrepentirbe la? zándaca maʼ qué ziuu dxi chuulaʼdxiʼ Dios modo runi adorarbe. Peru laaca naquiiñeʼ gánnanu ndiʼ: neca qué guni ti xpinni Cristu tobi de ca pecadu ni bizéʼtenu riʼ, pa qué chuʼbe cuidadu la? zándaca zudiibe lugar chuʼ ca cosa dxabaʼ riʼ ndaaniʼ ladxidoʼbe (biindaʼ Mateo 5:27, 28). Óraca nga naquiiñeʼ guʼyaʼ chaahuinu xi nuu ndaaniʼ ladxidoʼno, purtiʼ zacaneni laanu stale. Ñee runi sentirnu xiixa ni cadi jneza pur ti hombre o pur ti gunaa, xiixa cosa nagaʼchiʼ ni qué riuulaʼdxiʼ Dios ni caquiiñeʼ cueenu ndaaniʼ ladxidoʼno la?

¹⁴ Yanna, xi zanda guininu de tuuxa ni qué huayuuti ti binni peru cutopa xiana ndaaniʼ ladxidóʼ dede gucaani laa gaca nanalaʼdxiʼ ti xpinni Cristu yaʼ (Lev. 19:17). Ñee zúnibe stipa para cueebe ca cosa malu ni runi sentirbe riʼ ndaaniʼ ladxidoʼbe la? (Mat. 5:21, 22.)

15, 16. 1) Ximodo zanda gusihuinni ti xpinni Cristu caʼruʼ gaca circuncidar ladxidóʼ. 2) Xiñee rábiluʼ qué riuulaʼdxiʼ Jiobá gápanu cosa malu ndaaniʼ ladxidoʼno.

¹⁵ Stale de ca xpinni Cristu qué rudiicaʼ lugar chuʼ ca cosa malu riʼ ndaaniʼ ladxidoʼcaʼ, nga runi nuucaʼ nayecheʼ. Peru Jesús laaca guníʼ de ca cosa «ni cadi jneza ni cá ique» binni guni. Guzéʼtenu ti ejemplu. Zándaca chuʼ tuuxa guiníʼ ique jma risaca familia stiʼ que stobi. Ne dxandíʼ naquiiñeʼ gannaxhii ca xpinni Cristu binnilídxicaʼ, ne cadi gúnicaʼ casi runi ca binni ni nabani tiempu riʼ, purtiʼ laacaʼ qué riuuláʼdxicaʼ gannaxhiicaʼ stobi (2 Tim. 3:1, 3). Peru nuu tu laa dede riníʼ ique guirutiʼ qué zanda canaʼ binnilidxi ne dede riuucaʼ pur laacabe neca cadi jneza ni cayúnicabe. Pa chuʼ tu guniná tobi de ca binnilídxicabe la? dede né laacabe ridxiichicabe. Bietenalaʼdxiʼ xi biʼniʼ ca bizaʼnaʼ Dina, cumu nabé bidxiichicabe pur gulaxoo ti hombre bizáʼnacabe la? bicaani laacabe guuticabe stale binni (Gén. 34:13, 25-30). O guníʼ ique pabiáʼ naroʼbaʼ xiana gupa Absalón ndaaniʼ ladxidóʼ, dede bicaani laa guuti Amnón biʼchiʼ (2 Sam. 13:1-30). Cadi dxandíʼ runi binni stale cosa malu ora «cadi jneza ni cá ique» guni la?

¹⁶ Cani dxandíʼ xpinni Cristu qué ruuticaʼ binni. Peru zándaca chuʼ ti Testigu ni guidxiichiné  sti xpinni Cristu, purtiʼ riníʼ ique cadi jneza ni bíʼnibe tobi de ca binnilidxi, neca cadi dxandíʼ ni. Ne zándaca pur nga maʼ qué riebe ralidxi binni riʼ ora guni invitar laabe o maʼ qué liica runi invitarbe laa ralídxibe (Heb. 13:1, 2). Peru ti xpinni Cristu ni dxandíʼ nadxii ca biʼchiʼ ne ca bizaʼnaʼ la? qué ziuu dxi guni zacá. Ne ora guʼyaʼ Dios ximodo nuu ladxidóʼ xpinni Cristu riʼ, zándaca zuuyaʼ caʼruʼ gaca circuncidar ladxidoʼbe, o caʼruʼ cueebe ca cosa malu nuu ndaaniʼ ni (Jer. 9:25, 26). Ne guietenaláʼdxinu gudxi Jiobá ca judíu que naquiiñeʼ gaca circuncidar ladxidoʼcaʼ (Jer. 4:4).

17. Xiñee naquiiñeʼ guidxíbinu Dios ti ganda chuulaʼdxiʼ ladxidoʼno guzuubaʼ diidxaʼ.

¹⁷ Zándaca ora gúʼyaluʼ ximodo nuu ladxidoʼloʼ zudiiluʼ cuenta raca nagana para lii guzuubaluʼ stiidxaʼ Jiobá, o caʼruʼ cueeluʼ ca cosa malu nuu ndaaniʼ ladxidoʼloʼ. Zándaca gudiiluʼ cuenta ridxíbiluʼ binni, riuuláʼdxiluʼ gusisácacabe lii ne gápaluʼ stale cosa risaca, o dede qué rinaluʼ chuʼluʼ razón o maʼ qué riuuláʼdxiluʼ chuʼ tu guni mandar lii. Pa zacá ni la? cadi lii si nga nuuluʼ zacá (Jer. 7:24; 11:8). Jeremías guníʼ naguidxi nuu ladxidóʼ ca judíu que ne qué rinacaʼ guzuubacaʼ diidxaʼ, ne laaca guníʼrube de laacaʼ: «Cadi maʼ guniʼtu ndaaniʼ ladxidoʼto: “Guidxíbinu Jiobá yanna, Dios stinu, ni cudii laanu nisaguié ni riquiiñenu lu primavera ne lu otoño”» (Jer. 5:23 24). Cadi dxandíʼ rusihuinni ca diidxaʼ ca naquiiñeʼ guidxíbinu Dios ne guni respetarnu laa para ganda cueenu guiráʼ cosa malu ni nuu ndaaniʼ ladxidoʼno la? Pa ridxíbinu Dios la? zacaneni laanu para chuulaʼdxiʼ ladxidoʼno guzuubaʼ stiidxaʼ Jiobá.

18. Xi gudxi Jiobá ca binni ni bíʼninebe ti pactu cubi.

¹⁸ Pa gudiʼnu lugar gacané Jiobá laanu la? zudiibe laanu ti ladxidóʼ ni ziuulaʼdxiʼ gunibiáʼ laabe. Ngapeʼ nga ni gúdxibe ca xpinni Cristu ni bibí, cani bíʼninebe ti pactu cubi: «Zudiéʼ laacabe ley stinneʼ ne zaguaani ndaaniʼ ladxidóʼcabe. Ne zeeda gacaʼ Dios stícabe, ne laacabe zeeda gácacabe xquidxeʼ». * Ne zunibiáʼ chaahuicabe laabe purtiʼ laaca guniʼbe: «Maʼ qué zusiidiʼ cada binni xcompañeru ne qué zusiidiʼ biʼchiʼ, ne guiníʼ: “¡Lagunibiáʼ Jiobá!”, purtiʼ guirácabe zunibiáʼcabe naa, dede ni jma nahuiiniʼ hasta ni jma huaniisi [...]. Purtiʼ zutiidelaʼdxeʼ stóndatu, ne maʼ qué zietenalaʼdxeʼ ca donda stitu» (Jer. 31:31-34).

19. Xi cabeza cani dxandíʼ xpinni Cristu gudii Jiobá laacaʼ.

¹⁹ Guiranu cabézanu guicaanu ndaayaʼ pur pactu cubi que, nuu tu laa zie guibáʼ ne nuu tu laa zabani lu Guidxilayú riʼ. Peru para nga naquiiñeʼ gunibiáʼ chaahuinu Jiobá ne guiaananu ndaaniʼ xquidxi. Para ganda guicaaluʼ ca ndaayaʼ riʼ, caquiiñeʼ guxhiá Jiobá ca donda stiluʼ ra iquiiñebe guendaguti stiʼ Cristu. Cumu rutiidilaʼdxiʼ Dios donda stiluʼ la? naquiiñeʼ gucaa nga lii gutiidiláʼdxiluʼ donda stiʼ xcaadxi binni, ne laaca naquiiñeʼ gutiidiláʼdxiluʼ donda stiʼ tuuxa ni bichiichi lii. Pa cueeluʼ ca cosa malu riʼ ndaaniʼ ladxidoʼloʼ ziuuluʼ jma nazaaca. Zacá zusihuínniluʼ dxandíʼ cayuʼnuʼ ni na Jiobá ne cada dxi tiidiʼ zunibiaʼluʼ laabe jma. Ne zeeda gácaluʼ tobi de ca binni ni bizeeteʼ Jiobá nezalú Jeremías ora guníʼ ca diidxaʼ riʼ: «Dxandipeʼ zuyúbitu naa ne zadxélatu naa, purtiʼ de guidubi ladxidoʼto zuyúbitu naa. Ne zudieeʼ lugar guidxélatu naa» (Jer. 29:13, 14).