1, 2. Xi guníʼ Jesús zazaaca lu ca últimu dxi riʼ ni jma bicaa ca discípulo que guiníʼ íquecaʼ, ne xiñee.

 YANNA huaxa maʼ nuu Pedru, Santiagu (Jacobo), Juan ne Andrés stúbisicaʼ né Maestru sticaʼ. Laacabe qué ganda gusaana de guiníʼ íquecabe lu ca diidxaʼ guníʼ Jesús ora bizeeteʼ zanitilú yuʼduʼ ni nuu Jerusalén (Mar. 13:1-4). Ngue runi, gunabadiidxacaʼ laabe: «Racalaʼdxi du ganna du padxí nga nouʼ gaca irá ni guʼdxu laadu que. Ne xi seña ihuinni dxi mayaca gueedu ne iluxe guidx[i]layú riʼ» (Mat. 24:1-3). Ora bicabi Jesús laacabe guníʼ xi guiráʼ zazaaca ante guinitilú Jerusalén, peru laaca guníʼ guiráʼ ni zahuinni lu ca últimu dxi stiʼ guidxilayú stiʼ Binidxabaʼ. Lade guiráʼ cani guníʼ Jesús que zeeda ti cosa ni jma bicaa ca discípulo que guiníʼ íquecaʼ. Jesús bizeeteʼ zahuinni caadxi guendanagana casi guerra, ziaadxaʼ ni gó binni ne zadale binni qué iquiiñeʼ. Peru laaca guniʼbe zazaaca ti cosa nabé sicarú lu ca últimu dxi riʼ. Xi laani yaʼ. Laabe guniʼbe: «Zuiʼ cabe stiidxa Dios de idubi naca guidxilayú para ganna irá xixé guidxi modo runi mandar, ne dxi que ru nga iluxe guidxilayú» (Mat. 24:7-14).

² Nabé biecheʼ ca discípulo que dxi guzanecaʼ Jesús ora bicheechecaʼ stiidxaʼ Reinu (Luc. 8:1; 9:1, 2). Ngue runi, zándaca bietenaláʼdxicabe ca diidxaʼ ni maca gudxi Jesús laacabe ora guníʼ: «Ma stale binni cabeza si ucaa diaga stidxa Dios. Tu güi ni nga huaxiéʼ. Yanna lainaba lu Dios guseenda stale tu guni dxiiña ca, ti laa nga xpixuaana ni» (Luc. 10:2). Peru zándaca guníʼ íquecabe: «Ximodo ganda gucheechedu diidxaʼ “idubi naca guidxilayú” ne güínedu binni “modo runi mandar” Dios yaʼ». Paraa guiree jma binni para guni dxiiñaʼ que yaʼ. ¡Ñánnacabe ximodo ñaca ni gunabadiidxacabe que pa ñanda ñuuyacabe xi chiguizaaca despué! Guizáʼ nidxagayaa ca discípulo que pa ñuuyacaʼ modo ñaca  ni na ca diidxaʼ zeeda lu Mateo 24:14 ni cadúʼndanu riʼ.

3. Ximodo cayaca ni na Lucas 21:34 ca dxi stinu, ne xi naquiiñeʼ guinabadiidxanu laca laanu.

³ Ca dxi nabáninu riʼ nga cayaca ni na ca diidxaʼ riguixhená guníʼ Jesús que, purtiʼ nuu millón de binni ni cucheeche ca diidxaʼ nacubi ne galán stiʼ Reinu stiʼ Dios lu guidubi naca Guidxilayú (Is. 60:22). Peru Jesús laaca guníʼ ziuu caadxi xpinni Cristu ni zaca nagana para laacaʼ gúnicaʼ dxiiñaʼ riʼ lu ca últimu dxi nabáninu, purtiʼ jma zacá íquecaʼ «ni ricá ique binni ni qué runibiáʼ Dios» (biindaʼ Lucas 21:34). Yanna riʼ cadúʼyanu ximodo cayaca ni na ca diidxaʼ ca. Caadxi de ca binni ni nuu ndaaniʼ xquidxi Dios jma cá íquecaʼ gúnicaʼ stale cosa ni huaxiéʼ risaca. Ne rihuinni zacá nuucabe purtiʼ jma ricá íquecabe dxiiñaʼ stícabe, chécabe scuela roʼ, jma riuuláʼdxicabe gápacabe stale cosa risaca o jma riquiiñecabe tiempu stícabe para chichítecabe o para gúnicabe xiixa ti chúʼcabe nayecheʼ. Ne nuu xpinni Cristu nabé maʼ nachaabaʼ modo cayuni xhiiñaʼ Dios purtiʼ jma cá ique gapa ni guibaniné ne pur ca guendanagana ni ridxaagalú guiráʼ dxi. Nga runi, galán guinabadiidxanu laca laanu: «Naa yaʼ, ximodo cayuneʼ xhiiñaʼ Dios. Xii nga ni jma risaca para naa pur cani riguixheʼ iqueʼ guneʼ lu xquendanabaneʼ yaʼ».

4. 1) Xi gunabaʼ Pablu lu oración para ca xpinni Cristu de Filipos, ne xiñee. 2) Xi zazíʼdinu lu tema riʼ ne lu stobi ca, ne ximodo zacanécani laanu.

⁴ Stale de ca xpinni Cristu ni bibani lu primé siglu que bisiidicaʼ «stiidxa» Dios sin «idxibi caʼ», cásica biʼniʼ Pablu (Filip. 1:12-14). Peru naquiiñeʼ gúnicabe stale stipa para cadi gusaana de gúnicabe xhiiñaʼ Dios primé. Ngue runi, biʼniʼ orar apóstol Pablu pur ca xpinni Cristu ni nuu Filipos ti quixhe íquecaʼ gúnicaʼ guiráʼ «ni dxandí risaca» (biindaʼ Filipenses 1:9-11). Ne zacagá nga ni cayaca ca dxi stinu. Stale de laanu rucheechenu Stiidxaʼ Dios sin guidxíbinu. Neca zacá, galán guʼyaʼ chaahuinu xi cayuni xquidxi Jiobá ca dxi stinu, purtiʼ zacaneni laanu quixhe íquenu gucheechenu diidxaʼ né stale gana. Lu tema riʼ zazíʼdinu xi huayuni Jiobá para gaca ni na ca diidxaʼ zeeda lu Mateo 24:14. Xi cayuni xquidxi Jiobá ca dxi stinu riʼ. Ne ximodo riguuni gana laanu ne binnilídxinu yaʼ. Lu sti tema ca zazíʼdinu xi zanda gacané laanu para guni huantarnu laga cayúninu xhiiñaʼ Jiobá ne chuunu biaʼ zeʼ xquídxibe.

5, 6. 1) Xiñee bidii Jiobá lugar gunibiaʼnu modo runi xquidxi ni nuu guibáʼ dxiiñaʼ. 2) Xi visión gucuaa Ezequiel.

⁵ Nuu stale cosa ni qué niná Jiobá nicá lu Biblia. Guzéʼtenu ti ejemplu. Neca galán nga ñánnanu ximodo runi cerebru stinu dxiiñaʼ ne ximodo runi guiráʼ ni nuu guibáʼ dxiiñaʼ, qué nusiene Jiobá ni laanu. Peru bisaanabe guiráʼ ni naquiiñeʼ gánnanu para guiénenu xi naguixhe íquebe gúnibe ne guibáninu modo riuuláʼdxibe (2 Tim. 3:16, 17). Guiráʼ ca xpinni Dios —cani nuu lu Guidxilayú riʼ ne cani nuu guibáʼ— zeeda gácacaʼ ti guidxi si. Cumu qué zanda guidúʼyanu xquidxi Dios ni nuu guibáʼ la? riéchenu ora ridúʼndanu ni bicaa Isaías, Ezequiel, Daniel ne Juan ora bisiénecaʼ ximodo riguixhe chaahuiʼ Dios ca dxiiñaʼ raca guibáʼ (Is. 6:1-4; Ezeq. 1:4-14, 22-24; Dan. 7:9-14; Apoc. 4:1-11). Zeeda gácani casi ora nuxheleʼ Jiobá ti cortina ne nudii lugar nidúʼyanu ximodo cayuni Xquídxibe dxiiñaʼ guibáʼ. Xiñee bidiibe lugar guicá cani lu Stiidxabe yaʼ.

⁶ Purtiʼ qué racalaʼdxiʼ Jiobá guiaandaʼ laanu nuunu ndaaniʼ xquidxi, lugar ra nuu ca espíritu ni nuu guibáʼ ne ra nuunu. Ca dxi stinu riʼ, cayaca stale cosa para gaca guiráʼ ni maʼ gudixhe ique Jiobá, jma que biaʼ ridúʼyanu. Guietenaláʼdxinu biiyaʼ profeta Ezequiel lu ti visión ti carru naroʼbaʼ ni zeeda  gaca casi xquidxi Dios ni nuu guibáʼ. Nabé reciu ruxooñeʼ carru riʼ ne laaca nagueenda modo ricá bieque ni (Ezeq. 1:15-21). Cada biaje guicá bieque ca rueda stiʼ carru riʼ nabé zitu rizani. Ne laaca biiyaʼ Ezequiel caadxi cosa ni naquiiñeʼ gánnanu de binni ni zigusá carru riʼ. Laabe guniʼbe: «Beeda guuyaʼ xiixa casi xtuxhu electro, casi ora naze bele guidubi guriá ni [...]. Laani nga zeeda gácani casi guendanandxóʼ stiʼ Jiobá» (Ezeq. 1:25-28). Guizáʼ bidxagayaa Ezequiel pur ni biʼyaʼ riʼ ne zándaca dede qué nidxela xi niníʼ. Biiyabe pabiáʼ jneza cuniibi Jiobá xquidxi ne caquiiñeʼ espíritu santu stiʼ para gúnini. ¡Carru ni biʼyaʼ Ezequiel guibáʼ que rusihuínnini pabiáʼ jneza cayuni xquidxi Jiobá dxiiñaʼ!

7. Ximodo racané visión stiʼ Daniel laanu para guni crenu Jiobá.

⁷ Laaca biiyaʼ Daniel stale cosa ni rucaa laanu guni crenu Jiobá. Lu ti visión gucaabe gunda biiyabe Jiobá casi ti «Binnigola ni nabani dede maʼ xadxipeʼ» ne zuba lu ti trono ni naze bele ni napa rueda (Dan. 7:9). Bidii Jiobá lugar guʼyaʼ Daniel ximodo riniibi xquidxi para gúnini guiráʼ ni maca gudixhe ique Dios. Laaca biiyaʼ Daniel «tuuxa casi ti xiiñiʼ hombre», laabe nga Jesús. Xi dxiiñaʼ cudiicabe guni hombre riʼ yaʼ. Cayuuyabe modo cayaca dxiiñaʼ ndaaniʼ xquidxi Dios ni nuu lu Guidxilayú. Cadi chupa chonna si iza nga chiguni mandar Jesús, purtiʼ Stiidxaʼ Dios na: «Guendaruni mandar stibe nga ti guendaruni mandar ni qué zaluxe diʼ ne ni qué zadiʼdiʼ, ne reinu stibe tobi ni qué zanitilú» (Dan. 7:13, 14). Cadi dxandíʼ racané ndiʼ laanu guni crenu Jiobá ne gusisácanu guiráʼ ni cayúnibe la? Bidiibe Jesús derechu para guni mandar, purtiʼ bisihuinni qué zusaana de guni ni na Bixhoze. Racá ridúʼyanu runi cré Jiobá zanda guni Xiiñiʼ dxiiñaʼ bisaanabe lu náʼ. Laanu laaca naquiiñeʼ guni crenu Jesús, xaíque stinu.

8. Xi biʼniʼ Ezequiel ne Isaías ora bíʼyacaʼ visión bidii Jiobá laacaʼ, ne xi naquiiñeʼ gucaani laanu gúninu.

 ⁸ Ximodo naquiiñeʼ guni sentirnu yanna ra maʼ nánnanu modo runi xquidxi Jiobá ni nuu guibáʼ dxiiñaʼ yaʼ. Cásica Ezequiel, laaca ridxagayaanu ora gúʼyanu xi guiráʼ cayuni Jiobá ne racaneni laanu para cadi gudxíʼbanu laca laanu (Ezeq. 1:28). Ora guiníʼ íquenu lu ni cayuni xquidxi Jiobá, riguuni gana laanu gúninu dxiiñaʼ né stale gana, cásica biʼniʼ Isaías. Ora biʼniʼ invitárcabe laabe chitídxibe binni xi cayuni Jiobá, nagueendaca gucuaabe invitación que ne qué liica niníʼ íquebe ni chupa biaje. Biblia na: «Ne binadiagaʼ ridxi stiʼ Jiobá ora guníʼ: “Tu guseendaʼ, ne tu cheʼ pur laanu yaʼ”. Óraque gudxeʼ laabe: “¡Raríʼ nuaaʼ! Biseendaʼ naa”» (Isaías 6:8; Is. 6:5). Nánnabe zanda gacané Jiobá laabe para gudxiilube intiica guendanagana. ¡Nabé riéchenu ora ridúʼyanu ximodo cayuni xquidxi Jiobá ni nuu guibáʼ dxiiñaʼ, qué ruzuhuaadxini ne nuuni para gúninu guiráʼ ni maʼ gudixhe ique Dios!

9, 10. Xiñee naquiiñeʼ gata chaahuiʼ modo runi xquidxi Jiobá dxiiñaʼ lu Guidxilayú.

⁹ Biquiiñeʼ Jiobá Xiiñiʼ para quixhe chaahuiʼ ximodo gaca dxiiñaʼ lu Guidxilayú riʼ. Pur ni bíʼnibe riʼ, zanda guni ca xpinni Dios ni nuu lu Guidxilayú ne cani nuu guibáʼ dxiiñaʼ casi ti grupu si, ne racanésaacaʼ ti gúnicaʼ ni na Mateo 24:14. Xiñee yaʼ. Guidúʼyanu chonna razón.

¹⁰ Primé la? maca guníʼ Jesús zucheeche ca discípulo stiʼ diidxaʼ lu «idubi naca guidxilayú» (Hech. 1:8). Guiropa, caquiiñeʼ gata chaahuiʼ ximodo nga jma jneza guiziidiʼ ca xpinni Cristu de Dios ne caquiiñecaʼ chuʼ tu gapa laacaʼ (Juan 21:15-17). Ne últimu la? napa xidé guidagulisaacabe ti guni adorárcabe Jiobá ne guiziidicabe ximodo gucheechecabe diidxaʼ (Heb. 10:24, 25). Nin tobi de cani bizéʼtenu riʼ qué ñanda ñaca pa cada xpinni Cristu niguixhe ximodo ñuni dxiiñaʼ. Para ganda cueendú ca xpinni Cristu ni galán ora maʼ canagucheechecaʼ diidxaʼ la? naquiiñeʼ gata chaahuiʼ modo gácani.

11. Ximodo zanda gusihuínninu zinándanu guiráʼ ni riguixhe xquidxi Jiobá.

¹¹ Ximodo zanda gusihuínninu zinándanu guiráʼ ni riguixhe xquidxi Jiobá yaʼ. Tobi de ca modo rúninu ni nga ora guzúʼbanu stiidxaʼ ca binni ni maʼ bisaana Jiobá ne Jesús guʼyaʼ modo guireeche diidxaʼ lu Guidxilayú riʼ. Ñanda niquiiñeʼ ca xpinni Cristu riʼ tiempu ne stipa sticaʼ para ñacané ñaca chaahuiʼ guiráʼ ni cayaca lu guidxilayú riʼ. Peru xii nga cá ique xquidxi Jiobá ni nuu ndaaniʼ Guidxilayú riʼ yaʼ.

12, 13. Ximodo runi ca binnigola dxiiñaʼ bisaanané Dios laacaʼ, ne xiñee riguu nga gana lii.

¹² Lu guidubi Guidxilayú maʼ gulí Jiobá binnigola lade ca binni ridagulisaa para guluiʼcaʼ ximodo guireeche stiidxaʼ Reinu ne para sanírucaʼ lu dxiiñaʼ riʼ ndaaniʼ guidxi ra nabézacaʼ. Ximodo cayúnicabe ni yaʼ. Ora maʼ chitíxhecabe xi naquiiñeʼ gaca la? ruyúbicabe xiná lu Stiidxaʼ Dios, purtiʼ ruuyacabe ni casi «ti biaaniʼ para [ñeecabe], ne [casi] ti biaaniʼ para neza [ra rizácabe]» (Sal. 119:105). Laaca rinábacabe Jiobá gusiene laacabe xi naquiiñeʼ gúnicabe (Mat. 7:7, 8).

¹³ Ca binnigola ni guzaniruʼ lade ca xpinni Cristu lu primé siglu que, bicheechecaʼ diidxaʼ né stale gana, ne ngaca nga ni cayuni ca binnigola ni nuu yanna riʼ (Hech. 6:4). Riéchecabe stale ora ruuyacabe modo careeche diidxaʼ ndaaniʼ ca guidxi ra ruuyacabe gaca dxiiñaʼ riʼ, ne laaca riuucabe nayecheʼ ora gánnacabe pabiáʼ caroobaʼ xhiiñaʼ Reinu lu guidubi Guidxilayú (Hech. 21:19, 20). Lugar de quíxhecabe stale modo para guireeche diidxaʼ, ruuyacabe xiná Stiidxaʼ Dios ne  rudiicabe lugar gabi espíritu santu laacabe xi naquiiñeʼ gúnicabe (biindaʼ Hechos 15:28). Ora runi ca xpinni Cristu ni zaniruʼ riʼ zacá, reeda gácacaʼ ti ejemplu para ca neza binni ridagulisaa (Efes. 4:11, 12).

14, 15. 1) Xi guiráʼ dxiiñaʼ cayuni xquidxi Dios para ganda guireeche diidxaʼ lu guidubi Guidxilayú. 2) Ximodo runi sentirluʼ pur ndaayaʼ ni nápaluʼ de gacaneluʼ guireeche stiidxaʼ Reinu.

¹⁴ Stale tu qué ganna pabiáʼ naroʼbaʼ dxiiñaʼ runi ca xpinni Cristu para gaca guiráʼ libru ne revista ni rusiidiʼ laanu de Dios, para gaca guiráʼ guendaridagulisaa stinu, cásica ni nahuiiniʼ ne ni naroʼbaʼ. Stale mil de xpinni Cristu cayúnicaʼ dxiiñaʼ nadipaʼ para guni traducircaʼ guiráʼ libru ne revista lu jma de xhoopaʼ gayuaa diidxaʼ. Xi para rúnicabe ni yaʼ. Para gacanécabe stale binni guiziidiʼ de guiráʼ «enda nandxóʼ ni biʼni Dios [lu] diidxa» gulenecaʼ (Hech. 2:7-11). Laaca nuu stale hombre ne gunaa, neca nahuiinirucaʼ peru maʼ riquiiñecaʼ máquina naroʼbaʼ ni runi imprimir nagueenda ne riquiiñecaʼ máquina ni runi encuadernar libru. Ora maʼ biluxe cani, ruseendacabe cani dede ndaaniʼ ca guidxi huiiniʼ ni nuu jma zitu.

¹⁵ Xquidxi Dios caguixhe ximodo gaca stale de ca dxiiñaʼ runi ca xpinni Cristu ti ganda quixhe íquenu gucheechenu diidxaʼ ne ca binni ni ridagulisaanenu. Guzéʼtenu ti ejemplu. Nuu stale tu cayacané para cuí ca Yoo stiʼ Reinu ne ca Yoo ra raca ca guendaridagulisaa roʼ sin guiáxacaʼ. Ne laacaʼ nuu tu rigacané ora guizaaca ti desgracia xiixa lugar, ora caquiiñeʼ chinécabe tuuxa ra nuu doctor, ne laaca nuu tu riguixhe chaahuiʼ ximodo gaca ti guendaridagulisaa roʼ o xcaadxi scuela ni runi xquidxi Dios. Ndiʼ nga chupa chonna de ca dxiiñaʼ ni zándaca qué ridúʼyanu. Peru xiñee rúnicabe ni yaʼ. Rúnicabe cani para ganda guireeche ca diidxaʼ nacubi ne galán, para chuʼ ca xpinni Cristu jma gaxha de Dios ne para gacanecaʼ jma binni guiziidiʼ de Dios. Racá ridúʼyanu cayuni xquidxi Jiobá ni nuu lu Guidxilayú riʼ ca cosa ni dxandíʼ risaca.

16. Xi zanda gúʼndaneluʼ binnilídxinu ora maʼ cayuni adorartu Dios ne ora maʼ cayuundaluʼ stúbiluʼ.

¹⁶ Ñee ribeenu tiempu gatigá para guiníʼ íquenu lu guiráʼ dxiiñaʼ ni cayuni xquidxi Jiobá la? Nuu xpinni Cristu ribee ti tiempu huiiniʼ ora maʼ cayuni adorar Dios né binnilidxi ne ora maʼ cayuundaʼ laasi para ganna jma de laani ne para guiníʼ ique ximodo cayuni xquidxi Dios dxiiñaʼ. Nabé sicarú nga guidúʼndanu ne guiénenu ca visión gucuaa Isaías, Ezequiel, Daniel ne Juan. Cásica libru Los testigos de Jehová, proclamadores del Reino de Dios ne xcaadxi guiʼchiʼ ne DVD ni nápanu zanda gacanécani laanu gunibiáʼ chaahuinu xquidxi Dios.

17, 18. 1) Xi guleenduluʼ ra bíʼndaluʼ tema riʼ. 2) Xi caquiiñeʼ guinabadiidxanu laca laanu.

¹⁷ Zabeendunu stale cosa galán pa guiníʼ íquenu ximodo caquiiñeʼ Jiobá xquidxi para guireeche diidxaʼ. Nga runi, cásica cayuni xquídxibe, laanu laaca naquiiñeʼ quixhe íquenu gúninu cani dxandíʼ risaca. Zacá zinándanu ejemplu stiʼ Pablu, laa bicaa sicaríʼ: «Dios bisaana dxiiña ri ladxi ná du purti guca nachaʼhui ne laadu. Nga runi qué riréʼ du gana» (2 Cor. 4:1). Laabe guluube gana ca xcompañérube ora guniʼbe ca diidxaʼ riʼ: «Cadi iréʼ nu gana de guni nu jneza purti zadxiña dxi iree ndu ni bini nu, pa qué cui sa nu atrá» (Gál. 6:9).

¹⁸ Pa nuunu stúbinu o pa maʼ nápanu familia, ñee nuu xiixa ra caquiiñeʼ guchaʼnu ti gusihuínninu naguixhe íquenu cani dxandíʼ risaca la? Ñee zanda guibaninenu ni caquiiñesinu ne cadi gudiʼnu lugar chuʼ xcaadxi cosa ni cueechú laanu ti ganda gápanu jma tiempu para gucheechenu diidxaʼ la? Lu sti tema ca zadúʼyanu gaayuʼ cosa ni zanda gacané laanu para chuunu biaʼ zeʼ xquidxi Jiobá.