1, 2. 1) Xiñee rusisácanu ca xhamígunu ni qué rusaana laanu ne nuuca listu para gutiidilaʼdxiʼ donda stinu. 2) Xi zacábinu lu tema riʼ.

 XIMODO rusihuinni tuuxa dxandíʼ xhamigu sti binni. Ti gunaa xpinni Cristu láʼ Ashley guníʼ: «Para naa la? tuuxa ni dxandíʼ xhamíguluʼ, qué zaxeleʼ de lii ne zutiidilaʼdxiʼ donda stiluʼ». Guiranu rusisácanu ti xhamígunu ni qué rusaana laanu ne nuuca listu para gutiidilaʼdxiʼ donda stinu, purtiʼ nánnanu zacanebe laanu ne nadxiibe laanu (Prov. 17:17).

² Jiobá nga Xhamígunu ni qué rusaana laanu ne nuuca listu para gutiidilaʼdxiʼ donda stinu. Salmista que guníʼ sicaríʼ: «Lii, Jiobá, nacháʼhuiluʼ ne nuuluʼ listu para gutiidiláʼdxiluʼ donda; ne nápaluʼ stale guendarannaxhii ni qué rusaana para guiráʼ ca binni ni rucaa ridxi lii» (Sal. 86:5). Ximodo nga tuuxa ni qué rixeleʼ de ti xhamigu ne rutiidilaʼdxiʼ donda stibe yaʼ. Ximodo rusihuinni Jiobá ca guenda sicarú riʼ. Ne ximodo zanda gúninu casi rúnibe. Ora guicábinu ca guendarinabadiidxaʼ riʼ, jma zucaani laanu gannaxhiinu Jiobá, Xhamígunu ni jma risaca, ne jma zaca xhamígunu ca xpinni Cristu (1 Juan 4:7, 8).

3. Ximodo rusihuinni tuuxa qué zusaana ti xhamigu.

³ Pa nadxiinu ti xhamígunu la? qué ziuu dxi gusaananu laa. Zusihuínninu pabiáʼ nadxiinu laabe, purtiʼ qué zusaana de gacanenu laabe. Ne neca tiidibe ra nagana, qué zaxélenu de laabe. Biblia na Jiobá nga tobi lucha Dios ni qué huayuu dxi gusaana laanu (Apoc. 16:5).

4, 5. 1) Ximodo rusihuinni Jiobá qué rusaana ca xpinni. 2) Xiñee ratadxí ladxidoʼno ora guiníʼ íquenu modo qué nusaana Jiobá ca xpinni.

⁴ Ximodo rusihuinni Jiobá qué rusaana ca xpinni. Rusihuínnibe ni purtiʼ racanebe laacaʼ guiráʼ ora. Ne rey David nga tobi de ca binni ni biʼyaʼ dxandíʼ qué nusaana Jiobá laa. Biblia na: «Tuuxa ni qué gusaana lii laaca  qué zusaanaluʼ laa» (2 Samuel 22:26). Biiyaʼ David ximodo biʼniʼ Jiobá guiráʼ ni maʼ guníʼ, purtiʼ biluíʼ laabe xi naquiiñeʼ gúnibe, gupa ne bilá laabe dxi gudíʼdibe ra nagana (2 Sam. 22:1). Xiñee qué nusaana Jiobá laabe yaʼ. Purtiʼ laaca qué nusaanabe Jiobá. Racá ridúʼyanu nabé rusisaca Dios ca xpinni ni qué rixeleʼ de laa, nga runi, laaca qué rixélebe de laacaʼ (Prov. 2:6-8).

⁵ Ora guiníʼ íquenu modo qué nusaana Jiobá ca xpinni riguuni gana laanu. Guidúʼyanu xi guníʼ Reed, ti xpinni Cristu ni qué huaxeleʼ de Dios: «Riuuladxeʼ guundaʼ ca relatu ni caníʼ modo gucané Jiobá David ora gudiʼdiʼ ra nagana, purtiʼ riguucani gana naa. Bidxibalunáʼ Jiobá laabe guiráʼ ora, dede né dxi bicaachilube ndaaniʼ cueva. ¡Nabé riguixhedxí nga ladxiduáʼ! Rusietenaláʼdxini naa ti cosa: neca tiideʼ ra jma nagana, qué ziuu dxi guixeleʼ Jiobá de naa pa guzuubaʼ stiidxaʼ». Cadi ngaca nga ni runi sentirnu la? (Rom. 8:38, 39.)

6. 1) Ximódoruʼ rusihuinni Jiobá qué rusaana ca xpinni. 2) Xi ribeendunu pur laani.

⁶ Ximódoruʼ rusihuinni Jiobá qué rusaana ca xpinni. Rusihuínnibe ni purtiʼ rúnibe ni na guiráʼ ca ley ni gudíxhebe. Laapebe cayábibe laanu: «Dede guioʼxhoʼ ti binni laca naa nga Dios» (Is. 46:4). Ma gudíxhebe ley ra cá xii nga jneza ne xii nga ni cadi jneza, ne cada biaje quixhe íquebe gúnibe xiixa, qué rucheenebe ca ley stibe (Mal. 3:6). Ne laaca rúnibe guiráʼ ni riniʼbe (Is. 55:11). Cumu rúnibe guiráʼ ni riniʼbe la? ribeendú ca xpínnibe stale cosa galán. Ximodo  yaʼ. Ora rúninu stipa pur chinándanu ni na ca ley stibe, riguube ndaayaʼ laanu, purtiʼ qué  rusaanabe ca xpínnibe ni ruzuubaʼ diidxaʼ (Is. 48:17, 18).

7. Bizeeteʼ xi zanda gúninu para gusihuínninu zinándanu ejemplu stiʼ Jiobá.

 ⁷ Ora racanenu ca xpinni Cristu ni cadiʼdiʼ ra nagana, rusihuínninu zinándanu ejemplu stiʼ Jiobá (Prov. 3:27). Zándaca gánnanu de ti xpinni Cristu ni nuu triste purtiʼ huará, pur rucaalú binnilidxi laa o pur bichee. Galán gúninu pa chuunu ra nuube ne gábinu laabe caadxi «diidxaʼ sicarú ni quixhedxí» ladxidoʼbe (Zac. 1:13). * Tuuxa ni guni zacá, zusihuinni qué rusaana ca xhamigu ne jma zacanú laacabe «que ti biʼchiʼ» (Prov. 18:24).

8. Ximodo zanda gusihuínninu qué zaxélenu de xheelanu ne de xcaadxi xpinni Cristu.

⁸ Laaca rinándanu ejemplu stiʼ Jiobá ora qué rixélenu de ca binni ni nadxiinu. Pa maʼ bichagananu la? nánnanu cadi naquiiñeʼ gusaananu xheelanu (Prov. 5:15-18). Nga runi, qué liica ridiʼdiʼ ndaaniʼ íquenu gúninu xiixa ni gucaa laanu gápanu jnadxiinu (Mat. 5:28). Ne laaca rusihuínninu nadxiinu ne qué rixélenu de ca xpinni Cristu ora qué rininu xiixa chisme de laacaʼ ne ora qué rucaadiáganu tuuxa ni guiníʼ mal de laacabe, purtiʼ zuninanu laacabe pa gúninu zacá (Prov. 12:18).

9, 10. 1) Xi ndiʼ jma naquiiñeʼ quixhe íquenu gúninu. 2) Xiñee nuu tiru raca nagana para laanu guzúʼbanu stiidxaʼ Jiobá.

⁹ Peru jma naquiiñeʼ gúninu stipa para cadi guixélenu de Jiobá. Ximodo yaʼ. Ora gúninu stipa pur gúʼyanu ca cosa ca casi ruuyabe cani ne ora rinándanu ni cayábibe laanu. Para ganda gúninu zacá, naquiiñeʼ gannaxhiinu ca cosa ni nadxiibe ne gacananaláʼdxinu ca cosa ni nanaláʼdxibe. Biblia na: «Laatu cani nadxii Jiobá, lagacananalaʼdxiʼ ni cadi jneza. Laabe cayápabe xhialma cani qué rusaana laabe, de lu náʼ ca binni qué iquiiñeʼ rulabe laacaʼ» (Salmo 97:10). Pa gúninu stipa pur guiníʼ íquenu ne guni sentirnu ni runi sentir Jiobá la? qué zaca nagana para laanu guzúʼbanu stiidxabe (Sal. 119:104).

 ¹⁰ Nuu tiru zaca nagana para laanu gúninu ni na ca ley stiʼ Dios. Nga runi, naquiiñeʼ gúninu stipa para cadi guchéʼnenu laabe. Nuu xpinni Cristu maʼ rapa gana guichaganáʼ peru qué ganda guidxela tobi ni riuulaʼdxiʼ lade ca xpinni Jiobá (1 Cor. 7:39). Guzéʼtenu de ti gunaa Testigu ni caʼruʼ guichaganáʼ. Ra rúnibe dxiiñaʼ nabé racalaʼdxiʼ ca xcompañérube ni cadi Testigu guquiidxicaʼ laabe tuuxa. Neca nuu biaje runi sentirbe stúbibe, maʼ gudixhe íquebe cadi gucheenebe Dios. Cadi dxandíʼ rusisácanu ejemplu stiʼ cani runi stipa pur cadi guixélecaʼ de Jiobá, casi baʼdudxaapaʼ riʼ la? Nánnanu riguu Jiobá ndaayaʼ cani ruzuubaʼ diidxaʼ neca cadíʼdicaʼ ra nagana (Heb. 11:6).

11. Ximodo nga rutiidilaʼdxiʼ tuuxa donda stiʼ stobi.

¹¹ Riuuláʼdxinu chuʼnu gaxha de Jiobá purtiʼ rutiidiláʼdxibe donda stinu. Ximodo nga rutiidilaʼdxiʼ binni donda stiʼ tuuxa yaʼ. Ora rusiaandaʼ xiixa ni bíʼnicabe laa. Qué riníʼ diʼ nga cayuulaʼdxiʼ binni ni bíʼnicabe laa o guiníʼ ique casi ora gastiʼ qué ñaca, sínuque rúnibe stipa para cadi gutópabe xiana ndaaniʼ ladxidoʼbe. Biblia rusiidiʼ laanu nuuca Jiobá listu para gutiidilaʼdxiʼ donda stiʼ cani raca arrepentir de guidubi ladxidóʼ (Sal. 86:5).

12. 1) Ximodo rusihuinni Jiobá nuuca listu para gutiidilaʼdxiʼ donda. 2) Xi cusiene Pedru ora guníʼ zanda guixiá donda stiʼ tuuxa.

¹² Ximodo rusihuinni Jiobá nuuca listu para gutiidilaʼdxiʼ donda stinu yaʼ. Rusihuínnibe ni ora rusiaandabe «guiráʼ donda» stinu ne maʼ qué rietenaláʼdxibe cani (Is. 55:7). Ximodo nánnanu rusiaandaʼ Jiobá guiráʼ donda stinu. Guiníʼ íquenu lu ca diidxaʼ ni zeeda lu Hechos 3:19 (biindaʼ ni). Apóstol Pedru gudxi cani cucaadiaga laa ca diidxaʼ riʼ: «Lainaba perdón Dios, laudxii lú [gúnitu ni] jneza». Ti binni ni dxandíʼ maʼ guca arrepentir, riuubaʼ ladxidóʼ pur ni biʼniʼ ne riguixhe ique maʼ cadi guchee sti biaje (2 Cor. 7:10, 11). Laaca runi stipa pur gusaana modo canazá ne ribani modo riuulaʼdxiʼ Dios. Xi  zabeendú ca binni cucaadiaga Pedru pa gusihuínnicaʼ dxandíʼ maʼ guca arrepentircaʼ yaʼ. Apóstol que na zaxiá donda stícabe. Diidxaʼ «ixá stonda tu» riʼ lu griegu riquiiñecabe ni para guiníʼcabe de tuuxa ni riquiiñeʼ ti borrador para guxhiá xiixa ni bicaa. Nga runi, ora rutiidilaʼdxiʼ Jiobá donda stiʼ tuuxa, zeeda gácani casi ora nuxhiabe ra bichee ne maʼ qué rietenaláʼdxibe ni (Heb. 10:22; 1 Juan 1:7).

13. Xi cusiene ca diidxaʼ riʼ laanu: «Maʼ qué zietenalaʼdxeʼ ca donda stitu».

¹³ Ximodo rusihuinni Jiobá maʼ qué rietenalaʼdxiʼ ca donda stinu yaʼ. Guidúʼyanu xi guníʼ Jeremías ora bizeeteʼ de pactu cubi ni guca né ca xpinni Cristu ni bibí, pactu ni zanda iquiiñeʼ para guixiá donda stiʼ cani gapa fe lu guendaguti stiʼ Jesús. Biblia na: «Ne maʼ qué zusiidiʼ cada binni xcompañeru ne qué zusiidiʼ biʼchiʼ, ne guiníʼ: “¡Lagunibiáʼ Jiobá!”, purtiʼ guirácabe zunibiáʼcabe naa, dede ni jma nahuiiniʼ hasta ni jma huaniisi —nga nga ni maʼ guníʼ Jiobá—. Purtiʼ zutiidelaʼdxeʼ stóndatu, ne maʼ qué zietenalaʼdxeʼ ca donda stitu» (Jeremías 31:34). Jiobá guníʼ: «Zutiidelaʼdxeʼ stóndatu, ne maʼ qué zietenalaʼdxeʼ ca donda stitu». Racá ridúʼyanu ti cosa, ora maʼ bitiidilaʼdxiʼ Dios donda stinu la? maʼ qué riquiiñebe cani para ugaanibe donda íquenu o para guni castigarbe laanu cada biaje, sínuque rutiidiláʼdxibe donda stinu ne rusiaandabe cani, casi ora nuxhiabe cani (Rom. 4:7, 8).

14. Xiñee ratadxí ladxidoʼno ora guiníʼ íquenu rutiidilaʼdxiʼ Jiobá donda stinu. Bizeeteʼ ti ejemplu.

¹⁴ Nabé ratadxí ladxidoʼno ora guiníʼ íquenu rutiidilaʼdxiʼ Jiobá donda stinu. Guzéʼtenu de ti gunaa xpinni Cristu ni biree de ndaaniʼ xquidxi Jiobá maʼ raca stale iza, peru gudiʼdiʼ si caadxi iza bibiguétabe. Laabe rietenaláʼdxibe: «Riníʼ iqueʼ maʼ bitiidilaʼdxiʼ Jiobá donda stinneʼ ne laaca rabeʼ ni xcaadxi binni, peru runeʼ sentir nuube zitu de naa ne riníʼ iqueʼ jma nadxiibe xcaadxi xpinni Cristu que naa». Peru gutadxí ladxidóʼ gunaa riʼ ora biʼndaʼ ca relatu ni zeeda lu Biblia ra rihuinni ximodo rutiidilaʼdxiʼ Jiobá donda. Laabe guniʼbe: «Óraque bidieeʼ cuenta pabiáʼ nadxii Jiobá naa». Ne laaca bicaani laabe guiénebe sti cosa jma risaca: «Pa maʼ bitiidilaʼdxiʼ Jiobá donda stinu la? cadi jneza nga guiníʼ íquenu náparunu donda pur cani bíninu». * Sicaríʼ biluxe guniʼbe: «Oraqueruʼ nga bieneʼ dxandíʼ maʼ bisiaandaʼ Jiobá ca donda stinneʼ, naa ndaʼ rabeʼ ziananiáʼ yuubaʼ que biaʼ dxi nabaneʼ. Nannaʼ zadiʼdiʼ tiempu para tiidiʼ ni naa, peru yanna maʼ runeʼ sentir zanda chuaaʼ gaxha de Jiobá, casi ora nindísacabe xiixa ni naʼni naa». ¡Nabé nadxii Jiobá laanu ne rutiidilaʼdxiʼ donda stinu! (Sal. 103:9.)

15. Ximodo zanda gutiidiláʼdxinu donda casi runi Jiobá.

¹⁵ Zanda gúninu cásica runi Jiobá ora quixhe íquenu gutiidiláʼdxinu donda stiʼ stobi ni gucheené laanu (biindaʼ Lucas 17:3, 4). Bietenalaʼdxiʼ modo rutiidilaʼdxiʼ Jiobá donda stinu, laabe rusiaandacabe guiráʼ xixé ni bíninu ne maʼ qué rietenaláʼdxibe cani. Laanu laaca naquiiñeʼ gusiáʼndanu guiráʼ ni bíʼnicabe laanu ne cadi guietenaláʼdxinu cani.

16. 1) Xi cadi naquiiñeʼ guiníʼ íquenu ora gutiidiláʼdxinu donda stiʼ stobi. 2) Xi naquiiñeʼ gúninu pa racaláʼdxinu gutiidilaʼdxiʼ Dios donda stinu.

 ¹⁶ Ora maʼ bitiidiláʼdxinu donda stiʼ stobi, qué riníʼ diʼ nga guyuuláʼdxinu ni bíʼnicabe laanu o guiníʼ íquenu casi ora gastiʼ qué ñaca, sínuque rúninu stipa para cadi gutópanu xiana ndaaniʼ ladxidoʼno. Cadi guiaandaʼ ndiʼ laanu, para ganda gutiidilaʼdxiʼ Dios donda stinu la? laaca naquiiñeʼ gutiidiláʼdxinu donda stiʼ stobi (Mat. 6:14, 15). Riene Jiobá laanu ne «rietenaláʼdxibe de yú laanu» (Sal. 103:14). Ñee cadi laaca  naquiiñeʼ guiníʼ íquenu binni ruchee laacabe ne gutiidiláʼdxinu donda stícabe de guidubi ladxidoʼno la? (Efes. 4:32.)

17. Pa guniná ti xpinni Cristu laanu, xi zanda gacané laanu para cadi gápanu xiana laabe ndaaniʼ ladxidoʼno.

 ¹⁷ Nuu biaje raca nagana para laanu gutiidiláʼdxinu donda stiʼ stobi. Dede ca xpinni Cristu ni bibí ni bibani lu primé siglu que guca nagana para laacaʼ ñuni chaahuicaʼ guendanagana sticaʼ (Filip. 4:2). Pa guniná ti xpinni Cristu laanu, xi zanda gacané laanu para cadi gápanu xiana laabe ndaaniʼ ladxidoʼno yaʼ. Guidúʼyanu xi biʼniʼ Job. Nabé gucaná ladxidoʼbe ora guníʼ Elifaz, Bildad ne Zofar nápabe donda pur cani cadíʼdibe (Job 10:1; 19:2). Despué guluu jneza Jiobá guionnaʼ hombre que ne biʼniʼ mandarbe laacaʼ checaʼ ra nuu Job para gudiicaʼ ti ofrenda pur donda sticaʼ (Job 42:7-9). Peru laaca gunabaʼ Jiobá Job guni xiixa: naquiiñeʼ guni orar pur laacabe. Biʼniʼ si Job ni, guluu Jiobá ndaayaʼ laa pur bitiidilaʼdxiʼ donda stícabe. Biblia na: «Gulee Jiobá guiráʼ guendananá ni gupa Job que ora biʼniʼ orar pur ca compañeru stiʼ, ne bizulú Jiobá bidii laabe doble de biaʼ gúpabe primé que» (Job 42:10). Xi rusiidiʼ ndiʼ laanu yaʼ. Pa de guidubi ladxidoʼno guni orarnu pur tuuxa ni biʼniʼ laanu xiixa la? zacaneni laanu para cadi gápanu xiana laabe.

18, 19. Xi zanda gúninu para gunibiáʼ chaahuinu ca guenda sicarú napa Jiobá.

¹⁸ Nabé galán runi sentirnu purtiʼ maʼ bizíʼdinu stale de ca guenda sicarú ni napa Jiobá. Maʼ bidúʼyanu riuuláʼdxibe guidxiña binni laabe, rusisácabe guiráʼ binni, riuuláʼdxibe gudiibe, riénebe binni, qué rusaanabe ca xpínnibe ne rutiidiláʼdxibe donda. Peru nuuruʼ jma ni zanda guizíʼdinu de Jiobá ne nayecheʼ nuunu purtiʼ qué ziuu dxi gusaana de gunibiaʼnu laabe (Ecl. 3:11). Apóstol Pablu guníʼ: «Nabé riene Dios, iruti ru nuu xpiaani biaʼ nuu xpiaani be, ne iruti ru riene biaʼ riene be». Ne runi stinu ca diidxaʼ guníʼ Pablu riʼ ora riníʼ íquenu pabiáʼ nadxii Jiobá laanu, ne ora riníʼ íquenu lu xhoopaʼ guenda ni maʼ bidúʼyanu lu ca tema riʼ (Rom. 11:33).

¹⁹ Guiráʼ dxi naquiiñeʼ gúninu stipa para gunibiáʼ chaahuinu ca guenda sicarú napa Jiobá. Ne zanda gúninu ni pa guiene chaahuinu cani, guiníʼ íquenu de laacani ne gúninu cani lu xquendanabáninu (Efes. 5:1). Zacá zadúʼyanu biaʼsi nga ni biʼndaʼ salmista que: «Guizáʼ galán runeʼ sentir chuaaʼ gaxha de Dios» (Sal. 73:28).