Rietenalaʼdxuʼ la?
Ñee maʼ biindaluʼ ca últimu tema ni bedané revista Torre stiʼ ni rapa la? Yanna biiyaʼ pa zanda guicábiluʼ ca guendarinabadiidxaʼ riʼ:
Xii nga bibliomancia, ne ximodo ruuyaʼ ti xpinni Cristu ni.
Laani nga ni runi binni ora guxheleʼ Biblia, guʼndaʼ primé versículo ni guidxela ne guiníʼ ique zanda gacaneni laa para ganna xi guni. Cani dxandíʼ xpinni Cristu qué ruuyacaʼ Biblia casi ti libru ni napa poder, sínuque ruundacaʼ ne riénecaʼ ni para gunibiáʼ chaahuicaʼ Dios ne rudiicaʼ lugar gábibe laacaʼ xi gúnicaʼ (15/12, yaza 3).
Gunáʼ nga «guidxilayú» ni chiguinitilú.
Laani nga ca binni ni cadi cayuni ni na Dios (1 Juan 2:17). Peru Guidxilayú riʼ qué ziuu dxi guinitilú ni, cásica qué zanitilú guiráʼ binni ni ruzuubaʼ diidxaʼ (1/1, yaza 5 dede 7).
Pa maʼ guti Abel, ximodo ndiʼ riníʼrube dede yanna (Heb. 11:4, TNM).
Pur fe ni gúpabe. Zanda guidúʼndanu ximodo bisihuínnibe fe ne gúninu stipa pur chinándanu ejemplu stibe. Zacá nga casi ñaca riníʼrube neca maʼ gútibe (1/1, yaza 12).
Gunáʼ nga caadxi cosa ni cadi naquiiñeʼ gudiʼnu lugar guxheleʼ laanu de Jiobá.
Ndiʼ nga caadxi de laacani: ora maʼ cuyúbinu dxiiñaʼ, ora gúninu xiixa para chuʼnu nayecheʼ, ni gúninu ora guiree ti binnilídxinu ndaaniʼ xquidxi Dios, modo riquiiñenu computadora ne ca aparatu casi laani, chúʼpenu xizaa pur guendanazaaca stinu, gudiʼnu lugar quite bidxichi laanu, gudxíʼbanu laca laanu ne guiníʼ íquenu nánnanu biaʼca nanna Jiobá (15/1, yaza 12 dede 21).
Xi rusiidiʼ ejemplu stiʼ Moisés laanu purtiʼ qué nudxiibaʼ laca laa.
Qué nuchabe bi yánnibe pur guzanírube lade ca israelita, sínuque biʼniʼ crebe zacané Dios laabe. Qué chuʼ dxi guchanu bi yánninu purtiʼ si nápanu xiixa dxiiñaʼ ni risaca o purtiʼ laasinu nánnanu gúninu xiixa cosa; naquiiñeʼ gánnanu Jiobá nga racané laanu (Prov. 3:5, 6) (1/2, yaza 5).
Paraa chindeza ca binni ni guiasa lade gueʼtuʼ.
Caadxi de laacaʼ —144,000— zabánicaʼ guibáʼ. Peru jma stale de cani chiguiasa zabánicaʼ ndaaniʼ ti paraísu lu Guidxilayú (1/3, yaza 6).
Xiñee zanda guininu «caʼruʼ gaca circuncidar» ladxidóʼ ca israelita bibani dxiqué (Jer. 9:26).
Maʼ qué riná ladxidóʼcabe guzuubaʼ diidxaʼ, ngue runi caquiiñeʼ cueecabe ca cosa malu nuu ndaaniʼ ni: gusaana de gúnicabe cosa malu, guchaacabe modo riníʼ íquecabe ne chinándacabe ca ley stiʼ Dios (Jer. 5:23, 24) (15/3, yaza 9 ne 10).
Xiñee zanda guininu dxandíʼ bibani Jesús nayecheʼ.
Purtiʼ maca nánnabe ximodo iquiiñebe xquendanabánibe: gúnibe ni na Dios, gunnaxhiibe Bixhózebe de guidubi ladxidoʼbe ne gunnaxhiibe binni, ngue runi nánnabe nadxii Bixhózebe laabe ne riuulaʼdxiʼ cani rúnibe. Ndiʼ nga cani naquiiñeʼ guni binni ti ganda guibani nayecheʼ (1/4, yaza 4 ne 5).
Tuu nga ca binni ni nuu ndaaniʼ xquidxi Dios ni nuu lu Guidxilayú.
Grupu ni Zaniruʼ, Grupu ni Ruuyaʼ Modo Raca Dxiiñaʼ Betel, ca binnigola ni riganna ca neza binni ridagulisaa, ca grupu de binnigola, ca neza binni ridagulisaa ne cani rucheeche diidxaʼ (15/4, yaza 29).
Ñee rusihuinni ca castigu biseendaʼ Dios dxiqué malu laa la?
Qué riecheʼ Jiobá ora gatiʼ ca binni malu (Ezeq. 33:11). Guiráʼ ni bíʼnibe dxiqué rusihuínnicani nadxiibe binni ne riguixhenabe laacaʼ ante guseendabe ti castigu. Ni bizéʼtenu riʼ racané laanu gánnanu zanda guilanu ora guseendaʼ Dios xcaadxi castigu despué (1/5, yaza 5 ne 6).
Ñee bicaa ca israelita que binni malu lu yaga para gáticaʼ la?
Coʼ. Xcaadxi guidxi guyuu dxiqué nga biʼniʼ zacá, peru ca israelita qué ñuni ni. Tiempu bibani ca binni ni ruzeeteʼ Stiidxaʼ Dios ni gucuá lu diidxaʼ hebreu, primeru nga ruuticabe ti binni malu, zándaca ruchácabe guié laabe (Lev. 20:2, 27). De racá zándaca rugaandacabe xcuerpu gueʼtuʼ que lu ti yaga para guʼyaʼ binni laabe ti cadi guni casi bíʼnibe (15/5, yaza 13).
Xiñee qué ganda chuʼ binni de guiráʼ guidxi tobi si.
Neca maʼ biʼniʼ binni stale cosa para ganda chuʼ tobi si, qué nuzáʼ diʼ Dios laanu para quíxhenu ximodo naquiiñeʼ guibáninu (Jer. 10:23). Ne laaca nuu guidxilayú riʼ ndaaniʼ naʼ Binidxabaʼ. Nga runi, qué zanda diʼ chuʼ binni tobi si (1 Juan 5:19) (1/6, yaza 16).
