1, 2. Tu caquiiñeʼ Jesús para guyaanaʼ o gusiidiʼ laanu de Dios, ne xiñee naquiiñeʼ gánnanu tuu nga mozo riʼ.

 «BIZÁNACAʼ, dede maʼ biaandaʼ naa panda biaje maʼ huayeeda xiixa tema ni caníʼ de ni caquiiñepeʼ gannaʼ ne huayeeda ni órapeʼ caquiiñeʼ ni.» Zacá nga bisihuinni ti gunaa Testigu pabiáʼ riuulaʼdxiʼ dxiiñaʼ ni runi Grupu ni Zaniruʼ ora biseendaʼ ti carta ra nuucabe. Ñee huayuni sentirluʼ casi biʼniʼ sentir Testigu riʼ la? Stale de laanu huayuni sentirnu zacá. Ne cadi guendaridxagayaa diʼ ni.

² Guiráʼ ni nápanu para guiniisinu lu stiidxaʼ Dios, rusihuinni cani Jesús nga Xaíque stiʼ ca neza binni ridagulisaa ne zacá nga cayúnibe ni maca guniʼbe. Tu riquiiñebe para gudiibe ni caquiiñenu yaʼ. Ora guniʼbe xi seña guihuinni ora gueedabe, guniʼbe zaquiiñebe «mozo ni nuu xpiaani ne ni runi jneza» para «gudii ni iquiiñe» ca domésticu stibe (biindaʼ Mateo 24:45-47). * Lu ca últimu dxi riʼ, caquiiñeʼ Jesús mozo ni nuu xpiaaniʼ riʼ para guyaanaʼ o gusiidiʼ ca discípulo stiʼ ni cá lu Biblia. Para ganda guzuhuaʼnu dxiichiʼ lu Stiidxaʼ Dios ne chuʼnu gaxha de Jiobá la? caquiiñeʼ gánnanu tuu nga mozo riʼ (Mat. 4:4; Juan 17:3).

3. Ximodo huasiene ca libru ne ca revista stinu ejemplu stiʼ mozo ni nuu xpiaaniʼ.

³ Yanna, ximodo guiénenu ejemplu ni caníʼ de mozo ni nuu xpiaaniʼ ne ni runi jneza que yaʼ. Sicaríʼ nga bisiene ca libru ne ca revista stinu ni dxiqué: bisaana Jesús mozo ni nuu xpiaaniʼ riʼ para guʼyaʼ ca domésticu stiʼ dede lu Pentecostés iza 33; laaca bisiene cani zeeda gaca mozo ca guiráʼ ca xpinni Cristu ni bibí ni nabani lu Guidxilayú dede iza 33; ne laaca bisiene cani puru si xpinni Cristu ni bibí nga ca domésticu que, peru ora maʼ cuzéʼtenu cada tobi de laacabe; ne lu iza 1919 bisaana Jesús «irá ni napa» lu náʼ mozo ni nuu xpiaaniʼ, laacani nga guiráʼ cani riquiiñeʼ para gaca xhiiñaʼ Reinu ndaaniʼ Guidxilayú. Peru despué de biʼniʼ orardu ne biindaʼ chaahuidu de laani sti biaje, bidiʼdu cuenta caquiiñeʼ guchaʼnu modo  riénenu ca diidxaʼ guníʼ Jesús ora bizeeteʼ tuu nga mozo ni nuu xpiaaniʼ ne ni runi jneza (Prov. 4:18). Guiduʼndaʼ chaahuinu ejemplu riʼ ne guiénenu pabiáʼ risaca ni para laanu, gastiʼ naca pa cabézanu chuunu guibáʼ o pa cabézanu guibáninu ndaaniʼ Guidxilayú.

4-6. Xiñee zanda guininu bizulú guca ejemplu ni guníʼ Jesús de mozo ni nuu xpiaaniʼ que despué de 1914.

⁴ Lu xcaadxi versículo ra bizeeteʼ Jesús ejemplu stiʼ mozo ni nuu xpiaaniʼ ne ni runi jneza, rusihuínnicani qué nuzulú ñaca ni na ca diidxaʼ riguixhená riʼ lu iza 33, sínuque tiempu riʼ nga cayaca cani. Guidúʼyanu ximodo cayacané Biblia laanu para guiénenu ni.

⁵ Ejemplu riʼ laaca zeeda ni lu ca diidxaʼ riguixhená stiʼ Jesús ora guníʼ «xi seña zusihuinni maʼ [nuu lade binni] ne ora maʼ chiguiluxe guidxilayú» (Mat. 24:3, TNM). Primé ndaa stiʼ ca diidxaʼ riguixhená zeeda lu Mateo 24:4-22, gúcani lu iza 33 dede 70, ne yanna nga cayaca ni sti biaje, peru maʼ lu guidubi Guidxilayú. Ñee laaca chupa biaje nga chigaca ni na ejemplu guníʼ Jesús ora bizeeteʼ de mozo ni nuu xpiaaniʼ ne ni runi jneza que la? Coʼ.

⁶ Ora guníʼ Jesús ca diidxaʼ ni ridúʼndanu lu Mateo 24:29, caniʼbe de caadxi cosa ni chiguizaaca lu ca dxi stinu riʼ (biindaʼ Mateo 24:30, 42, 44). Ora guniʼbe de ca dxi jma nagana ca, guniʼbe «zuuya» binni guidxilayú laabe ora maʼ «zeda yete be de ibáʼ lade za». Despué gúdxibe cani guibani lu ca últimu dxi riʼ gatanacaʼ ora guniʼbe ca diidxaʼ riʼ: «Qué ganna tu pora gueeda Señor stitu», nga runi, «naquiiñe gataná tu. Pacaa mala zuhuaa [o «guedandá», TNM] Hombre Biseenda Dios». * Lu textu riʼ, ora guníʼ Jesús de cani chiguizaaca lu ca últimu dxi riʼ, bizeetebe ejemplu stiʼ mozo ni nuu xpiaaniʼ. Nga runi, zanda guininu bizulú guca ni guniʼbe de mozo ni nuu xpiaaniʼ que despué de iza 1914, dxi bizulú ca últimu dxi. Xiñee zanda guininu zacá yaʼ.

7. Xi gunabadiidxaʼ binni dxi bizulú biasa cosecha, ne xiñee.

⁷ Guníʼ ique guendarinabadiidxaʼ biʼniʼ Jesús riʼ: «Uná nga mozo [ni nuu xpiaaniʼ ne ni runi jneza]» yaʼ. Qué ñuu nin ti razón para ninabadiidxacabe nga lu primé siglu que. Casi bidúʼyanu lu tema gudiʼdiʼ que, ca apóstol que nabé bíʼnicaʼ milagru ne dede bidiicaʼ poder binni para guni milagru, zaqué bihuinni laacabe nga biquiiñeʼ Dios para guni xhiiñaʼ (Hech. 5:12). Nga runi, xiñee ndiʼ chuʼ tuuxa guinabadiidxaʼ tupeʼ nga bisaana Jesús para gapa ca dendxuʼ stiʼ yaʼ. Peru bidxaa ca cosa ca lu iza 1914. Iza que nga bizulú biasa cosecha, ne caquiiñeʼ guiree guiʼxhiʼ malu que lade trigu (Mat. 13:36-43). Peru ora bedandá tiempu guiasa cosecha, bihuinni nuu stale binni ni cadi dxandíʼ xpinni Cristu, neca gucaláʼdxicaʼ nusihuínnicaʼ dxandíʼ xpinni Jesús laacaʼ. Nga runi caquiiñeʼ guicábinu guendarinadiidxaʼ nabé risaca riʼ: ximodo zanda ganna binni tuu nga ca xpinni Cristu ni bibí ni zeeda gaca casi trigu yaʼ. Ejemplu bidii Jesús que nga gacané laanu. Ca xpinni Cristu ni bibí nga ca binni ni caziidiʼ de Jiobá ne cayúnicaʼ ni nabe.

8. Xiñee puru si xpinni Cristu ni bibí nga naquiiñeʼ gaca mozo ni nuu xpiaaniʼ que.

⁸ Puru si xpinni Cristu ni bibí ni guibani lu Guidxilayú riʼ nga gaca mozo ni nuu xpiaaniʼ que. Laaca biree lácabe «sacerdote para [gúnicabe] xhiiña rey» ne biaana lu nácabe gábicabe «binni rihuinni pabiáʼ nandxóʼ be pur ni runi be, purti ulee be [laacaʼ] lu guelacahui ne uluu be [laacaʼ] lu biaani sicarú stibe» (1 Ped. 2:9). Nga runi, chupa chonna si de cani naca «sacerdote para [guni] xhiiña rey» nga cani zanda gusiidiʼ xcaadxi xpinni Cristu (Mal. 2:7; Apoc. 12:17).

9. Ñee guiráʼ ca xpinni Cristu ni bibí ni nabani lu Guidxilayú nga mozo ni nuu xpiaaniʼ la? Bisiene ni guicábiluʼ.

⁹ Yanna, ñee guiráʼ ca xpinni Cristu ni  bibí ni nabani lu Guidxilayú nga mozo ni nuu xpiaaniʼ que la? Coʼ, xiñee yaʼ. Purtiʼ cadi guiráʼ ca xpinni Cristu ni bibí nga riguixhe xi guiziidiʼ ca biʼchiʼ ne ca bizaʼnaʼ ni nuu lu guidubi Guidxilayú. Lade cani bibí ni zeeda gaca casi trigu ca nuu siervu ministerial ne binnigola. Dxandíʼ rusiidicabe de yoo pur yoo ne ora rudiicabe libana ra ridagulisaacabe ne laaca ruzuubacabe stiidxaʼ Grupu ni Zaniruʼ cásica rúninu, peru qué riuucabe lade cani riguixhe xi guiziidiʼ guiráʼ ca xpinni Dios ni nuu lu Guidxilayú. Ne laaca nuu gunaa ni bibí pur espíritu ládecabe, laacaʼ qué rudxiibacaʼ laca laacaʼ, nga runi qué liica ninacaʼ nicaacaʼ ti dxiiñaʼ ni naquiiñeʼ guni ca hombre si lade ca binni ridagulisaa (1 Cor. 11:3; 14:34).

10. Tuu nga mozo ni nuu xpiaaniʼ ne ni runi jneza.

¹⁰ Yanna, tuu nga mozo ni nuu xpiaaniʼ ne ni runi jneza yaʼ. Lu primé siglu que biquiiñeʼ Jesús chupa chonna si binni para gudii ni caquiiñeʼ guiráʼ ca xpinni, ne zacaca nga riquiiñebe mozo ni nuu yanna riʼ, mozo ca nga ti grupu huiiniʼ de xpinni Cristu ni bibí pur espíritu ni napa dxiiñaʼ de quixhe ne gudii guiráʼ ni caquiiñenu para guizíʼdinu de Dios tiempu maʼ nuu Cristu lade binni. Lu ca últimu dxi riʼ, ca xpinni Cristu ni bibí ni naca mozo ni nuu xpiaaniʼ cayúnicaʼ dxiiñaʼ juntu ndaaniʼ ca oficina ra ruuyacabe ximodo cayaca dxiiñaʼ stiʼ ca Testigu guidubi Guidxilayú. Yanna riʼ, mozo ni nuu xpiaaniʼ ca nga Grupu ni Zaniruʼ stiʼ ca Testigu stiʼ Jiobá. Peru cadi guiaandaʼ ndiʼ laanu: neca nuu chupa chonna binni lade mozo riʼ, Jesús guníʼ nácacabe ti mozo si. Nga runi, ora si maʼ dagulisaa Grupu ni Zaniruʼ riʼ para quixhe xi dxiiñaʼ gaca nga zanda guininu nácacabe mozo ni nuu xpiaaniʼ ne ni runi jneza.

11, 12. 1) Xi chupa dxiiñaʼ nga gucuaa mozo ni nuu xpiaaniʼ ne ni runi jneza. 2) Padxí bisaana Jesús mozo ni nuu xpiaaniʼ que para guʼyaʼ ca domésticu stibe, ne tuu nga ca binni ni gulibe.

¹¹ Cadi guiaandaʼ ndiʼ laanu: ora bizeeteʼ Jesús ejemplu que guniʼbe ricaa mozo ni nuu xpiaaniʼ ne ni runi jneza que chupa dxiiñaʼ. Primé dxiiñaʼ riʼ nga gúʼyabe guiráʼ ca domésticu stiʼ Jesús ne stobi nga ricaabe guirá ni napa xpixuaanabe. Cumu lu ca últimu dxi riʼ nga cayaca ni na ejemplu guníʼ Jesús que la? zanda guininu zacaa mozo riʼ guiropaʼ dxiiñaʼ que tiidiʼ si iza 1914, dxi bizulú cayuni mandar Jesús casi Rey.

¹² Padxí nga bisaana Jesús mozo ni nuu xpiaaniʼ riʼ para guʼyaʼ ca domésticu stiʼ yaʼ. Para gánnanu padxí la? naquiiñeʼ guietenaláʼdxinu caadxi cosa ni guca lu iza 1914, dxi bizulú  tiempu guiasa cosecha. Casi maʼ bizíʼdinu, tiempu que guyuu stale grupu ni guníʼ xpinni Cristu laacaʼ. Tu grupu nga cuí Jesús para guiaana casi mozo ni nuu xpiaaniʼ yaʼ. Bihuinni tu grupu que ora beeda Jesús ne Bixhoze ndaaniʼ yuʼduʼ stiʼ —laani nga modo maʼ gudixhe Dios guni adorárcabe laa—, ne guca nga dede iza 1914 hasta ra bizulú iza 1919 (Mal. 3:1). * ¡Guizáʼ biéchecabe ora bíʼyacabe nuu ti grupu huiiniʼ de Binni Ruundaʼ Biblia ni ruzuubaʼ diidxaʼ ne cusihuínnicaʼ nadxiicaʼ Jiobá ne nadxiicaʼ Stiidxabe! Dxandíʼ caquiiñeʼ gusiá Dios laacabe, peru qué nudxiibacabe laca laacabe ne bidiicabe lugar gacané Jiobá laacabe guchaacabe ora gudíʼdicabe lu caadxi guendanagana ra bihuinni ximodo nuu fe stícabe (Mal. 3:2-4). Ca Binni Ruundaʼ Biblia que nga cani dxandíʼ zeeda gaca casi trigu chaʼhuiʼ ni bizeeteʼ Jesús que. Iza 1919 que nga jma bizulú careeche diidxaʼ né stale gana, ne gulí Jesús caadxi de ca xpinni ni bibí pur espíritu para gácacaʼ mozo ni nuu xpiaaniʼ ne ni runi jneza, ne bisaanabe laa para guʼyaʼ ca domésticu stibe.

13. Tuu nga ca domésticu, ne xiñee.

¹³ Yanna, tuu nga ca domésticu que yaʼ. Laacabe nga guiráʼ ca binni ni caziidiʼ de Dios. Dxi bizulú ca últimu dxi, guiráʼ ca xpinni Cristu ni bibí que nga nácacaʼ domésticu. Peru despué laaca maʼ guyuu xcaadxi dendxuʼ lade ca domésticu que, laacabe nga ca binni ni chiguibani lu Guidxilayú riʼ. Guiráʼ ca binni riʼ zeeda gácacaʼ ti grupu de dendxuʼ ne nuucaʼ «tobi si» (Juan 10:16). Guiropaʼ grupu riʼ, ca xpinni Cristu ni bibí ne xcaadxi dendxuʼ ca ricaacaʼ ni rudii mozo ni nuu xpiaaniʼ para guiziidicaʼ de Dios órapeʼ caquiiñecaʼ ni. Yanna, xi zanda guininu de cada binni ni nuu lu Grupu ni Zaniruʼ ni zeeda gaca mozo ni nuu xpiaaniʼ ne ni runi jneza riʼ yaʼ. Laacabe laaca caquiiñeʼ guiziidicabe de Dios, nga runi qué rudxiibacabe laca laacabe ne rudiicabe cuenta de ti cosa: ora cadi dagulisaacabe casi grupu la? laaca domésticu laacabe cásica guiráʼ cani dxandíʼ xpinni Cristu.

14. 1) Xi dxiiñaʼ risaca maʼ bisaanacabe lu náʼ mozo ni nuu xpiaaniʼ, ne xi dxiiñaʼ rúnibe. 2) Xi gudxi Jesús mozo ni nuu xpiaaniʼ que para gudixhenabe laa (biiyaʼ cuadru ra na «Pa qué iquiiñe [mozo que]»).

¹⁴ Nabé risaca dxiiñaʼ bidii Jesús mozo ni nuu xpiaaniʼ ne ni runi jneza. Ti mozo o ti mayordomo ni bibani tiempu gucuá Biblia, nabé risaca dxiiñaʼ gupa, purtiʼ laa nga biaana para guʼyaʼ guiráʼ ca binni runi xhiiñaʼ xpixuaanaʼ (Luc. 12:42). Zacaca nga mozo nuu xpiaaniʼ ne ni runi jneza riʼ, laabe nga cayápabe guiráʼ ca xpinni Jiobá. Ndiʼ nga caadxi de ca dxiiñaʼ rúnibe: gúʼyabe guiráʼ ni napa xquidxi Dios ne ximodo caquiiñeʼ bueltu napa,  gúʼyabe guireeche diidxaʼ, quíxhebe ximodo gaca guiráʼ guendaridagulisaa roʼ ne guiráʼ libru ne revista ni riquiiñenu para gucheechenu diidxaʼ, ne laaca rudiibe ni caquiiñeʼ gúʼndanu ne ni riquiiñenu lu ca guendaridagulisaa stinu. Ca domésticu riʼ riquiiñecaʼ guiráʼ ni rudii mozo ni nuu xpiaaniʼ para guiziidicaʼ de Dios.

15, 16. Padxí nga gusaana Jesús guiráʼ ni napa lu náʼ mozo ni nuu xpiaaniʼ.

¹⁵ Yanna, padxí nga guiaanané mozo riʼ «irá ni napa» Jesús yaʼ. Jesús guníʼ: «Dichoso de mozo que pa cayuni zacá ora gueeda xpixuaanaʼ. Gabe caʼ laatu zusaana né xpixuaana be laabe irá ni napa» (Mat. 24:46, 47). Lu textu ca ridúʼyanu bisaana Jesús guiráʼ ni napa ndaaniʼ náʼ mozo riʼ ora bedandá ne biʼyaʼ cudiibe ni caquiiñeʼ guiráʼ ca xpinni para guiziidicaʼ de Dios. Racá ridúʼyanu zadiʼdiʼ ti tiempu dede dxi gucuaabe primé dxiiñaʼ que ne dxi gucuaabe stobi. Yanna, padxí ne ximodo nga gusaana Jesús guiráʼ ni napa lu náʼ mozo ca yaʼ. Para guicábinu ni gunabadiidxanu ca, naquiiñeʼ gánnanu chupa cosa: padxí nga gueeda Jesús ne xi guiráʼ nga nápabe.

¹⁶ Padxí gueeda Jesús. Zánnanu ni pa guidúʼndanu ca primé versículo ni zeeda ra bizulú capítulo 24 stiʼ Mateo. Bietenalaʼdxiʼ ndiʼ: ora riníʼ ca versículo ca de dxi «gueeda» Jesús, caníʼ cani de dxi guni juzgarbe ne gusabanabe binni dxi guiluxe guidxilayú (Mat. 24:30, 42, 44). * Nga runi, ora gueeda Jesús casi bizeetebe ni lu ejemplu ra guniʼbe de mozo ni nuu xpiaaniʼ que zácani lu ca dxi jma nagana.

17. Xi guiráʼ nga napa Jesús.

¹⁷ Yanna, gunáʼ nga «irá ni napa» Jesús yaʼ. Caniʼbe de guiráʼ xixé ni nápabe ndaaniʼ Guidxilayú ne guibáʼ. Jesús guníʼ: «Irá xixé ni nuu ibáʼ ne ni nuu guidxilayú ma nexhe ladxi nayaʼ» (Mat. 28:18; Efes. 1:20-23). Yanna laaca maʼ nuu Reinu stiʼ Cristu lade guiráʼ cani  nápabe, ni gucuaabe dede iza 1914 ne zudiibe lugar guni mandar ca xpínnibe ni bibí luni (Apoc. 11:15).

18. Xiñee ziuulaʼdxiʼ Jesús gusaana guiráʼ ni napa ndaaniʼ náʼ mozo ni nuu xpiaaniʼ.

¹⁸ Yanna, xi naquiiñeʼ gúninu pur guiráʼ ni maʼ biénenu riʼ yaʼ. Ora gueeda Jesús casi Juez lu ca dxi jma nagana ca, zuuyabe dxandíʼ cudii mozo ni nuu xpiaaniʼ ca guiráʼ ni caquiiñeʼ ca xpínnibe para guiziidicaʼ de Dios ne cudiibe ni órapeʼ caquiiñecaʼ ni. Óraca nga ziuulaʼdxiʼ Jesús gudii laabe sti dxiiñaʼ que: zusaanané laabe guiráʼ ni napa. Ca binni ni naca mozo ni nuu xpiaaniʼ ca zacaacaʼ dxiiñaʼ riʼ ora checaʼ guibáʼ ne gácacaʼ rey né Cristu.

19. Ñee jma risaca ndaayaʼ chiguicaa mozo ni nuu xpiaaniʼ ca guibáʼ que xcaadxi de cani bibí la?

¹⁹ Ñee jma risaca ndaayaʼ chiguicaa mozo ni nuu xpiaaniʼ riʼ guibáʼ que ni guicaa xcaadxi xpinni Cristu ni bibí la? Coʼ, cadi zacá diʼ ni. Neca ti grupu huiiniʼ si nga chiguni dxiiñaʼ risaca bidii Jesús laa ti tiempu si, laaca zanda guicaa xcaadxi binni ni. Guníʼ ique ni gudxi Jesús 11 apóstol stiʼ gueelaʼ ante gatiʼ (biindaʼ Lucas 22: 28-30). Gúdxibe ca hombre ni ruzuubaʼ diidxaʼ que zadxiña dxi zacaacaʼ ti ndaayaʼ nabé naroʼbaʼ. Zácacabe rey né laabe guibáʼ. Peru gudiʼdiʼ si caadxi iza bisihuínnibe ti cosa: guiráʼ cani naca de 144,000 binni ni bibí nga zabí lu trono ne zácacaʼ rey né laabe (Apoc. 1:1; 3:21). Ngaca nga ni cuzeeteʼ Mateo 24:47, ra guníʼ Jesús zusaana guiráʼ ni napa lu náʼ ti grupu huiiniʼ de binni, laacabe nga ca xpinni Cristu ni bibí ni naca mozo ni nuu xpiaaniʼ. Peru guiráʼ cani naca de 144,000 binni nga chiguni mandarné Cristu guibáʼ (Apoc. 20:4, 6).

20. Xi para bisaana Jesús ti mozo ni nuu xpiaaniʼ, ne xi maʼ gudixhe íquenu gúninu.

²⁰ Lu primé siglu que biquiiñeʼ Jesús ti grupu huiiniʼ si de binni para bisiidiʼ guiráʼ ca xpinni, ne ngaca nga ni cayúnibe yanna, caquiiñebe ti mozo ni nuu xpiaaniʼ ne ni runi jneza para gusiidiʼ ca xpínnibe de Dios. Bisaanabe mozo riʼ para gudii guiráʼ ni caquiiñeʼ ca discípulo stibe, cani bibí ne cani zeeda gaca casi xcaadxi dendxuʼ, ti gápacaʼ guiráʼ ni caquiiñecaʼ para guiziidicaʼ de Dios lu ca últimu dxi riʼ. Cadi dxandíʼ riéchenu pur guiráʼ ni cayuni mozo riʼ la? Nga runi, gusihuínninu dxandíʼ zacá ni ora gacanenu ca xpinni Cristu ni bibí ni zeeda gaca mozo ni nuu xpiaaniʼ ne ni runi jneza (Heb. 13:7, 17).