1. 1) Gunáʼ nga ca tema ni ridúʼndanu gatigá. 2) Xi ribeendunu ora ridúʼndanu cani sti biaje.

 ORA maʼ cayuundaluʼ revista Torre stiʼ ni rapa ni riuundaʼ ora ridagulisaanu, ñee huayuu dxí guiníʼ íqueluʼ: «Maca bidúʼndanu tema riʼ» la? Pa maʼ zineluʼ chupa chonna iza de rieluʼ ca guendaridagulisaa ni rapa ca testigu stiʼ Jiobá, zudiiluʼ cuenta nuu chupa chonna tema ni riuundaʼ gatigá. Stale biaje huadúʼndanu de Reinu stiʼ Dios, ni bíʼnibe para gulabe binni, laaca huadúʼndanu ximodo gucheechenu diidxaʼ, ne ximodo gápanu fe ne gannaxhiinu binni. Ora guidúʼndanu ca tema riʼ sti biaje, racanécani laanu gaca fe stinu naguidxi ne rusietenaláʼdxicani laanu naquiiñeʼ «[gúninu] ni na ca diidxa ca, ne cadi [gucadiágasinu] cani»  (Sant. 1:22).

2. 1) Xi riníʼ diidxaʼ rusietenalaʼdxiʼ ni rieeteʼ lu Biblia. 2) Xiñee maʼ gadxé ca ley ni riguixhe binni Guidxilayú de ca ley stiʼ Dios.

² Diidxaʼ hebreu ni biquiiñecabe para guiníʼcabe «rusietenalaʼdxiʼ» stale biaje caniʼni de ca ley ni rudii Dios xquidxi. Ne gadxepeʼ ca ley stiʼ Dios de ca ley ni riguixhe binni, purtiʼ ca ley stiʼ binni Guidxilayú nabé ruchaa cani, peru ca ley stiʼ Jiobá qué ziuu dxi guchaacaʼ cani, nga runi zanda guni crenu zacané cani laanu. Nécapeʼ guyuu chupa chonna de laacani guca cani para xiixa guendanagana o biquiiñeʼ cani para ti tiempu si la? qué ziuu dxi gusaana de iquiiñenu cani ne gacané cani laanu. Ti salmista guníʼ: «Jneza cani rusietenaláʼdxiluʼ ne qué ziuu dxi gusaana de gaca ni zacá» (Sal. 119:144).

3, 4. 1) Xi para biquiiñeʼ Jiobá ca profeta stiʼ dxiqué. 2) Xi guleendú ca israelita ora bíʼnicaʼ ni gudxi Dios laacaʼ.

³ Guyuu biaje biquiiñeʼ Jiobá ca profeta stiʼ para guiniʼcaʼ xi zazaaca guidxi Israel pa qué guzuubacaʼ stiidxabe. Casi dxi mayaca chuʼ ca israelita lu Layú ni Bizabiruaa Dios gudii laacaʼ, gudxi Moisés laacaʼ ca diidxaʼ  riʼ: «Lagapa laatu para cadi quite ladxidoʼto laatu, ne dxandipeʼ guixéletu ne guni adorartu xcaadxi dios ne guzuxíbitu xañeecaʼ ne dxandipeʼ guidxiichiné Jiobá laatu» (Deut. 11:16, 17). Lu Biblia zeeda stale cosa ni bisietenalaʼdxiʼ Jiobá binni xquidxi para gucané ni laacaʼ.

⁴ Stale biaje gudxi Jiobá ca israelita guidxíbicaʼ laabe, guzuubacaʼ stiidxabe ne gusisácacaʼ labe (Deut. 4:29-31; 5:28, 29). Ne ora rúnicabe ni gudxi Dios laacabe la? ricaacabe stale ndaayaʼ (Lev. 26:3-6; Deut. 28:1-4).

5. Xiñee gucané Jiobá rey Ezequías.

⁵ Neca gudiʼdiʼ ca israelita que lu guendanagana, biʼniʼ Dios ni maca bizabiruaa. Casi dxi biseegunáʼ Senaquerib, rey stiʼ Asiria, Judá ne guníʼ zabee Ezequías de gaca rey, biseendaʼ Jiobá ti ángel para gacané xquidxi. Ti gueelaʼ si binitilú ángel que «guiráʼ hombre nadipaʼ ne nadxibalú» ni nuu lu ejércitu stiʼ ca siriu, ngue runi, gupa xidé bibiguetaʼ Senaquerib xquidxi (2 Rey. 19:35; 2 Crón. 32:21). Yanna, xiñee gucané Dios rey Ezequías yaʼ. Purtiʼ «qué ñuu dxi nixélebe de Jiobá. Qué ñuu dxi nusaana de ninándabe laa, sínuque bíʼnibe guirá ni na ca mandamientu ni bidii» (2 Rey. 18:1, 5, 6).

6. Ximodo bisihuinni rey Josías qué ziuu dxi guixeleʼ de Jiobá.

⁶ Sti rey ni bizuubaʼ stiidxaʼ Dios nga Josías. Dxi deruʼ nápabe xhono iza «bíʼnibe ni jneza nezalú Jiobá [...] ne qué niree cueebe nin ladu bigaʼ nin ladu derechu» (2 Crón. 34:1, 2). Bisihuínnibe qué ziuu dxi guixélebe de Dios ra binitilube bidóʼ xquídxibe ne gucanebe binni guni adorar Jiobá. Pur ni bíʼnibe ca bidii Jiobá laabe ndaayaʼ, ne cadi laasibe, sínuque né guiráʼ ca binni xquídxibe. Biblia na: «Despué, guxha Josías guiráʼ cosa yuudxuʼ lu ca layú stiʼ ca xiiñiʼ Israel, ne bicaabe ca binni ni nuu Israel gúnicaʼ ni na Jiobá, Dios sticaʼ. Biaʼ dxi bibánibe, qué nusaanacaʼ de ninándacaʼ Jiobá, Dios stiʼ ca bixhozegolacaʼ» (2 Crónicas 34:33).

7. Xi bizaaca ca israelita ora qué rinándacaʼ ca ley stiʼ Jiobá.

⁷ Triste guininu ni, peru cadi guiráʼ biaje biʼniʼ cré xquidxi Dios cani rusietenaláʼdxibe laacaʼ. Ra zidiʼdiʼ iza, stale biaje qué nuzuubacabe stiidxaʼ Dios. Ne apóstol Pablu bicaa xi bizaacacabe dxi maʼ qué ñaca fe stícabe naguidxi. Laa guníʼ biʼniʼ crécabe «intiica nacubi ni canausiidi binni» (Efes. 4:13, 14). Ne casi gudxi Jiobá laacabe, gucanácabe ora qué ninándacabe ca ley stiʼ (Lev. 26:23-25; Jer. 5:23-25).

8. Xiñee cásica bibani ca israelita que nga nabáninu yanna.

 ⁸ Xiñee cásica bibani ca israelita que nga nabáninu yanna. Purtiʼ laaca rudii Dios conseju ne laaca rulidxe laanu tiempu riʼ (2 Ped. 1:12). Cada biaje guidúʼndanu Biblia, rusietenalaʼdxiʼ Jiobá laanu ca ley stiʼ. Peru cumu zanda cuinu xi gúninu la? zanda quixhe íquenu guzúʼbanu stiidxabe o gúninu ni gápanu gana (Prov. 14:12). Yanna, guidúʼyanu ximodo zanda gacané cani rusietenalaʼdxiʼ Jiobá laanu ne xi zabeendunu ora chinándanu ni na cani.

9. Ximodo bisietenalaʼdxiʼ Jiobá ca israelita que zacanebe laaca dxi guzacaʼ lu desiertu.

⁹ Ora guzá ca israelita que cuarenta iza lu ti «desiertu naroʼbaʼ ne ruchibi», qué nusiene diʼ Jiobá laacabe ximodo chisaniruʼ nezalúcabe ne ximodo chigapa laacabe. Peru stale biaje biluiʼbe laacaʼ zanda guni crecaʼ laabe ne zanda chinándacaʼ ni gábibe laacaʼ. Ne biquiiñeʼ Jiobá ti za ridxíʼ, ne huaxhinni biquiiñebe ti columna de guí para gusietenaláʼdxibe laacaʼ zacanebe laacaʼ ne zazanírube lucaʼ ora tiidicaʼ desiertu que (Deut. 1:19; Éx. 40:36-38). Ne laaca bidiibe guiráʼ ni iquiiñecaʼ. Stiidxaʼ Dios na: «Qué ñuxe xhábacabe, ne qué nidxá guí batañecabe». Rihuinni dxíchica «gastiʼ qué ñaadxaʼ laacabe» (Neh. 9:19-21).

10. Ximodo racané Jiobá xquidxi ca dxi stinu riʼ.

¹⁰ Ca dxi stinu riʼ, mayaca guibáninu ndaaniʼ ti guidxilayú cubi ra zaca puru si ni jneza. Yanna, ñee runi crenu cudii Jiobá guiráʼ ni iquiiñenu para ganda guilanu lu ca dxi jma nagana ni zeeda ca la? (Mat. 24:21, 22; Sal. 119:40, 41.) Ca dxi stinu riʼ maʼ qué riquiiñeʼ Jiobá ti za ne ninca qué riquiiñebe ti columna de guí para gacanebe laanu chuʼnu lu guidxilayú cubi stibe, peru xquídxibe cayabi laanu naquiiñeʼ gatananu. Xquídxibe rusietenalaʼdxiʼ laanu naquiiñeʼ chuʼnu jma gaxha de Dios ra guidúʼndanu Biblia, guni adorarnu Jiobá né binnilídxinu, cadi guiaadxanu ca guendaridagulisaa ca ne gucheechenu diidxaʼ. Ñee rúninu ni cayabi xquídxibe laanu la? Ñee maʼ bidúʼyanu ximodo zanda gúninu cani la? Pa gúninu cani, zacané cani laanu iguidxi fe stinu, ne ngapeʼ nga ni naquiiñeʼ gúninu ti ganda guibáninu ndaaniʼ guidxilayú cubi stiʼ Dios.

11. Ximodo rusihuinni Jiobá racalaʼdxiʼ guibáninu galán.

¹¹ Guiráʼ cani cayabi Dios laanu gúninu racanécani laanu chuʼnu jma gaxha de laabe, peru cadi ngasi, laacaʼ racanécani laanu lu xquendanabáninu. Racaneni laanu cadi chúʼpenu xizaa ra guicá íquenu gápanu stale cosa risaca. Ne laaca racaneni laanu para gúʼyanu xi lari zanda gácanu, modo guzuchaahuinu, xi zanda gúninu para chuʼnu nayecheʼ ne pa naquiiñeʼ guidúʼndanu scuela roʼ. Zaqueca rudiʼnu xquíxepeʼ Jiobá pur ca conseju ni rudii xquídxibe laanu de cani naquiiñeʼ gúninu ndaaniʼ lídxinu ne xcárrunu ne xi zanda gúninu ndaaniʼ Yoo stiʼ Reinu ne xi zanda gúninu ora guizaaca xiixa desgracia. Ca conseju riʼ rusihuínnicani racalaʼdxiʼ Jiobá guibáninu galán.

12. 1) Xi bisiidiʼ Jesús ca discípulo stiʼ stale biaje. 2) Xi biʼniʼ Jesús ni qué ñuu dxi ñanda Pedru. 3) Ne xi rusiidiʼ ejemplu stiʼ Jesús laanu.

¹² Lu primé siglu, gatigá bisietenalaʼdxiʼ Dios xquidxi xi naquiiñeʼ guni. Stale biaje, bisiidiʼ Jesús ca discípulo stiʼ cadi naquiiñeʼ gudxiibacaʼ laca laacaʼ. Peru cadi guníʼsibe ni, sínuque biluiʼbe laacaʼ ximodo zanda gácacaʼ biaritiʼ. Últimu dxi bibani Jesús lu Guidxilayú riʼ bitagulisaa ca apóstol stiʼ para gúnicaʼ Pascua. Ora cayoxhícabe, biásabe ne gudiibibe ñeecaʼ, ne bíʼnibe dxiiñaʼ riʼ, neca ti mozo nga rúnini (Juan  13:1-17). Qué ziuu dxi gusiándacabe ni biʼniʼ Jesús gueelaʼ que. Cumu guyuu apóstol Pedru lu guendaroxhi que la? ngue runi treinta iza despué, guluube gana ca xpinni Cristu ti cadi gudxiibacaʼ laca laacaʼ (1 Ped. 5:5). Ejemplu stiʼ Jesús riʼ, rusiidini laanu cadi gudxíʼbanu laca laanu ora guidxaaganu xcaadxi binni (Filip. 2:5-8).

13. Xi guenda bisiidiʼ Jesús ni naquiiñeʼ gápanu.

¹³ Sti cosa ni nabé guniʼné Jesús ca discípulo stiʼ nga pabiáʼ risaca gaca fe sticaʼ naguidxi. Dxi qué ñanda nibeecabe Binidxabaʼ luguiáʼ ti hombrehuiiniʼ, gunabadiidxaʼ ca discípulo que Jesús: «Xiñee laadu qué ñanda nibee du binidxaba que pue». Laabe bicábibe laacaʼ: Purtiʼ «huaxiéʼ napa tu fe xa. Laucaa diaga chaahui ni chi tidxe laatu riʼ: Pa ñapa tu fe, neca biaʼ ti biidxi mostaza la? [...] gasti qué ñaca nagana para laatu» (Mat. 17:14-20). Biaʼ tiempu bicheeche Cristu diidxaʼ bisiidibe binni naquiiñeʼ gápacaʼ fe (biindaʼ Mateo 21:18-22). Ñee rúninu stipa pur chuunu ca guendaridagulisaa ne ca guendaridagulisaa roʼ ni racané laanu iguidxi fe stinu la? Cadi raca si cani para chuʼnu nayecheʼ, sínuque para gusihuínninu runi crenu zacané cani rusiidiʼ Jiobá laanu.

14. Xiñee nabé caquiiñeʼ gannaxhiisaanu yanna cásica gunnaxhii Cristu.

¹⁴ Lu Stiidxaʼ Dios ni gucuá lu diidxaʼ griegu zeeda stale ni rusietenalaʼdxiʼ Dios laanu de modo naquiiñeʼ gannaxhiisaanu. Jesús guníʼ: «Gunaxhii stobi cásica nadxii lu lii», ne bisiénebe nga nga guiropa mandamientu jma risaca stiʼ ley (Mat. 22:39). Santiagu, biʼchiʼ Jesús neza jñaa, guníʼ laani nga Ley «ni jma risaca» (Sant. 2:8). Ne apóstol Juan bicaa: «Hermanu caʼ, cadi caguixhe xiixa nacubi guni tu, sínuque cucaa ni maca nanna tu dede dxi bizulú tu bicaa diaga tu stiidxa Dios. [...] Peru casi ñaca nacubi ni yanna» (1 Juan 2:7, 8). Yanna, xi gucalaʼdxiʼ Jesús niníʼ né ca diidxaʼ «ni maca nanna tu» ca yaʼ. Caniʼbe de ley ra na gannaxhii binni stobi. Maca nánnacabe ni, purtiʼ maca bisiene Jesús ni laacabe «dede dxi bizulú» biziidicabe de Dios. Peru «nacubi» ni purtiʼ naquiiñeruʼ gusihuínnicabe ni ora guidxagalúcabe guendanagana. Cumu laaca nácanu discípulo stiʼ Cristu la? nga runi rudiʼnu xquíxepeʼ Dios pur rusietenalaʼdxiʼ laanu pabiáʼ risaca nga gannaxhiinu binni ne cadi guyúbinu para laasinu, casi runi binni ni qué runibiáʼ Dios.

15. Gunáʼ nga dxiiñaʼ jma risaca beeda guni Jesús lu Guidxilayú.

¹⁵ Dxandipeʼ bizaalaʼdxiʼ Jesús binni. Ne bisihuínnibe ni ora bisiándabe binni huará ne bisibánibe cani maʼ guti. Peru cadi para nga diʼ nga beedabe ndaaniʼ Guidxilayú, sínuque beedabe para gucheechebe  diidxaʼ ne gusiidibe binni, ne jma risaca ni que gusiándabe laacaʼ. Xiñee rininu zacá yaʼ. Purtiʼ ca binni ni bisibánibe que bióʼxhocaʼ ne gúticaʼ, peru ca binni ni yenanda cani bisiidibe, zanda guibánicaʼ sin qué chuʼ dxi gáticaʼ (Juan 11:25, 26).

16. Xiñee zanda guininu maʼ biroobaʼ dxiiñaʼ ni bizulú Jesús.

¹⁶ Maʼ lu guidubi naca Guidxilayú cayaca dxiiñaʼ ni bizulú Jesús lu primé siglu que. Jesús gudxi ca discípulo stiʼ: «Laché irá xixé guidxi, lachiusiidi irá xixé binni sa nanda naa» (Mat. 28:19). Ne zacapeʼ nga bíʼnicabe dxiqué, ne zacaca cayúninu ni yanna. Ndaaniʼ jma de 230 guidxi, jma de gadxe millón de Testigu cucheechecaʼ stiidxaʼ Reinu né stale gana ne laaca cayuundanecaʼ millón de binni Biblia. Dxiiñaʼ riʼ cusihuínnini maʼ nabáninu lu ca últimu dxi.

17. Xi conseju bidii Pablu ne Pedru ca xpinni Cristu.

¹⁷ Rihuinni dxíchica gucané cani rusietenalaʼdxiʼ Dios ca primé xpinni Cristu, ti gaca fe sticaʼ naguidxi. Dxi deguyoo Pablu ndaaniʼ guidxi Roma, bisietenaláʼdxibe Timoteu ca diidxaʼ riʼ: «Yenanda ni bisiide lii purti nga nga ni dxandíʼ» (2 Tim. 1:13). ¡Nanna pabiáʼ gucané ca diidxaʼ riʼ Timoteu yaʼ! Despué, gudxi si apóstol Pedru ca xpinni Cristu guni huantarcaʼ ora gápacaʼ guendanagana, gannaxhiisaacaʼ ne gucueezacaʼ laca laacaʼ, guniʼbe: «Qué ziaana dxie de usietenaladxe irá ndi laatu, neca ma ucuaa tu ni dxandí ne ma zuhuaa chaahui tu lú ni» (2 Ped. 1:5-8, 12).

18. Ximodo biiyaʼ ca primé xpinni Cristu cani bisietenaláʼdxicabe laacaʼ.

¹⁸ Lu ca carta ni bicaa Pablu ne Pedru bizeetecaʼ ni maca «uníʼ ca profeta sti Dios chiqué» (2 Ped. 3:2). Ñee bidxichi ca xpinni Cristu ni bibani lu primé siglu que pur bisietenaláʼdxicabe ni laacaʼ la? Coʼ, purtiʼ nánnacabe zaqué nga cusihuinni Dios nadxii laacabe, ne gudxi apóstol riʼ laacabe: «Lauyubi gunibiáʼ chaahui tu Señor Jesucristu ni bilá laanu, ne laca lauyubi gaca tu nachaʼhui casi laabe» (2 Ped. 3:18).

19, 20. Xiñee zanda guni crenu zacané cani rusietenalaʼdxiʼ Jiobá laanu, ne xi zabeendunu pa gúninu cani.

¹⁹ Ca dxi stinu riʼ, nápanu stale razón para guni crenu guiráʼ cani rusietenalaʼdxiʼ Jiobá laanu ne zeeda cani lu Biblia, Stiidxaʼ Dios ni qué ziuu dxi guchee. Biblia na: «Yanna, ¡laguuyaʼ! Yannadxí chaaʼ ra rié guiráʼ binni. Ne laatu nanna dxíchitu de guidubi ladxidoʼto ne guidubi xhiálmatu huayaca guiráʼ diidxaʼ sicarú ni huayabi Jiobá, Dios stitu, laatu. Maʼ guca guirácani para laatu. Nin tobi de laacani qué liica huachee» (Josué 23:14). Lu Stiidxaʼ Dios ridúʼndanu ximodo huayacanebe binni ruchee biaʼ dxi huabánicaʼ lu Guidxilayú. Guiráʼ ca relatu riʼ gucuácani para gacanécani laanu (Rom. 15:4; 1 Cor. 10:11). Guiráʼ ni cayúʼyanu cayaca yanna riʼ, rusietenaláʼdxicani laanu ca diidxaʼ riguixhená ni maca gucuá dxiqué, racá ridúʼyanu qué rusaana de guni Jiobá cani maʼ guníʼ. Tobi de laacani rusiene ziuu millón de binni ni zuni adorar Jiobá «ra maʼ ziluxe ca dxi» riʼ (Is. 2:2, 3). Ne maca gucuá lu Biblia jma feu zabani binni ra tiidiʼ dxi, ne ngapeʼ nga ni cayaca yanna. Lu tobi de ca párrafo ni gudídinu cayeeteʼ careeche diidxaʼ lu guidubi naca Guidxilayú, ne nga cusihuinni cayaca ca diidxaʼ ni guníʼ Jesús (Mat. 24:14).

²⁰ Lu Biblia rieeteʼ guiráʼ ni huayuni Dios para gacané xquidxi. Yanna, ñee runi crenu laaca zanda gacané cani laanu la? Ti gunaa xpinni Cristu láʼ Rosellen guníʼ: «Ora bineʼ cré de guidubi ladxiduáʼ zanda gacané Jiobá naa, biiyaʼ dxiicheʼ ximodo biquídxibe fe stinneʼ, casi ora ninaazebe nayaʼ». Laanu laaca zanda cueendunu stale ni galán pa gúninu cani rusietenalaʼdxiʼ Jiobá laanu lu xquendanabáninu.