Stale binni na Jesús nga Maestru ni jma nanna gusiidiʼ ni huabani lu Guidxilayú. Ñee zacaca riníʼ íqueluʼ la? Pa zacá ni, zándaca rúniluʼ stipa gusiidiluʼ cásica bisiidiʼ Jesús, laabe biquiiñebe ejemplu ne gunabadiidxabe. Peru ñee huayuuyaluʼ laaca biquiiñeʼ Jesús ca diidxaʼ ni rusihuinni gadxé xiixa idea para bisiidiʼ binni la?

Ora ruinu diidxaʼ riquiiñenu ca diidxaʼ ca sin gudiʼnu cuenta. Nuu biaje riníʼcabe sicaríʼ: «Guníʼcabe maʼ nagüí guiráʼ cuananaxhi riʼ, peru ca ndiʼ nayaarucaʼ» o «Dxiqué nabé natuíʼ baʼdudxaapaʼ ca, peru yanna nabé maʼ riniʼbe».

Casi ca ejemplu ni bizéʼtenu ca ne lu xcaadxi, primeru rieeteʼ de ti cosa, ne despué riquiiñeʼ ca diidxaʼ casi ni gúnitu, peru o sínuque para guieeteʼ de sti cosa. Ne nuu biaje laaca riquiiñecabe ca diidxaʼ ca para gusiene chaahuicabe xiixa ni guiníʼcabe primé. Zacá nga rininu, ne riquiiñenu ca diidxaʼ ca para guiene binni laanu.

Nécapeʼ lu caadxi diidxaʼ huaxiéʼ riquiiñecabe diidxaʼ ni gúnitu, peru ne sínuque, galán gánnanu pabiáʼ risaca cani. Xiñee yaʼ. Purtiʼ nabé rieeteʼ cani lu Biblia. Jesús nabé biquiiñeʼ cani. Guidúʼyanu ca ejemplu riʼ: «Qué rucaa gui cabe lámpara ne cuʼ cabe laa xaʼna dxumi, sínuque ruzuhuaa cabe ni lu ti mexaʼ»; «Cadi zácaxa tu zeda uchiaya ley [...,] sínuque zeda gune cumplir irá xixé ni bicaa cabe»; «Laatu nanna tu xi na ley: Iruti chuʼ né ni cadi xheelaʼ. Peru naa rabe laatu, neca chuʼlaʼdxi si tuuxa ti gunaa [...]», ne «Huayuna diaga tu xi cá lu ley: “Pa gaxha cabe ti chu lú lu la? guxha ti chu lú cabe. Ne pa gaxha cabe ti laya lu la? guxha ti laya cabe.” Peru naa cayabe laatu, pa ucaa lú cabe laatu la? cadi ucaa lú tu laacabe. Ne pa chuʼ tu capa ti ladu xhaga tu la? laudii ca né sti ladu» (Mat. 5:15, 17, 27, 28, 38, 39).

Laaca zeeda xcaadxi ejemplu ra biquiiñecabe ca diidxaʼ ca lu xcaadxi libru ni zeeda lu Biblia. Ca diidxaʼ ca zanda gacanécani laanu guiene chaahuinu xiixa o gánnanu ximodo nga jma jneza gúninu xiixa. Pa nápaluʼ xiiñiluʼ guníʼ ique ca diidxaʼ riʼ: «Hermanu caʼ, cadi guni tu xiixa para uchiichi si tu xiiñi tu, sínuque lausiidi laacabe ne laulidxe laacabe. Lausiniisi laacabe modo na Señor» (Efes. 6:4). Ñanda niníʼ apóstol Pablu naquiiñeʼ gusiniisi binni xiiñiʼ modo na ca ley stiʼ Jiobá, ne biaʼsi conseju ca. Peru ra guniʼbe cadi «uchiichi si tu xiiñi tu, sínuque lausiidi laacabe ne laulidxe laacabe. Lausiniisi laacabe modo na Señor», bisihuínnibe xii nga ni nuube guiene cani napa xiiñiʼ.

Despué laaca lu capítulo ca guníʼ Pablu ca diidxaʼ riʼ: «Purti cadi binni guidxilayú cadinde né nu, sínuque [...] irá ca espíritu malu ni nuu neza ibáʼ» (Efes. 6:12). Ra biquiiñebe diidxaʼ «sínuque» ca bisihuínnibe naroʼbaʼ stipa cayúninu, purtiʼ cadi binni  guidxilayú nga cudxíʼlunu, sínuque ca espíritu malu ca.

Lu carta bicaa Pablu ra nuu ca xpinni Cristu de Éfeso biquiiñebe xcaadxi diidxaʼ ni rusihuinni gadxé xiixa idea. Pa guidúʼndanu ra zeedacani, zacanécani laanu guiene chaahuinu xii nga nuu apóstol Pablu gusiidiʼ laanu ne gánnanu xi naquiiñeʼ gúninu.

Pa gúʼyaluʼ cuadru ni zeeda lu tema riʼ, ra cá ximodo biquiiñeʼ Pablu ca diidxaʼ ni rusihuinni gadxé xiixa idea ni zeeda lu capítulo 4 ne 5 stiʼ Efesios la? ziuuláʼdxiluʼ cani ne zacanécani lii. Ora maʼ cayuundaluʼ cani gunabadiidxaʼ laca lii: «Ñee zacá naa la? Xi runeʼ ora guizaacaʼ ndiʼ. Ximodo runibiáʼ xcaadxi binni naa, casi ni rieeteʼ primé ca la? o guiropa ca». Pa gúʼyaluʼ cucaa cani zeeda lu cuadru ca lii guchaaluʼ modo lii la? biʼniʼ ni.

Laaca zanda iquiiñeluʼ cani zeeda lu cuadru ca ora guni adorarluʼ Dios né binnilídxiluʼ. Primeru zanda gúʼndatu guiráʼ ni zeeda lu cuadru ca, de racá zanda guʼndaʼ tobi de laatu guiráʼ cani cá primé ne xcaadxi de laatu guni stipa pur guietenalaʼdxiʼ guiropa ndaa stícani. Pa gúnitu zacá, zacaneni laatu guiniʼtu ximodo jma galán chinándatu ca conseju ca. Ca diidxaʼ ni rusihuinni gadxé xiixa idea, zacanécani guiráʼ binnilídxiluʼ, pa nahuiinicabe o pa huaniisicabe, gánnacabe ximodo gaca xpiáʼcabe ralídxitu o ratiica nuucabe.

Ora gudiiluʼ cuenta xi pur riquiiñeʼ ca diidxaʼ ni rusihuinni gadxé xiixa idea la? jma nagueenda zuuyaluʼ paraa zeedacani lu Biblia ne pabiáʼ zacanécani lii ora gucheecheluʼ diidxaʼ. Zanda gábiluʼ binni: «Stale tu riníʼ ique nápanu ti alma ni qué rati, peru biiyaʼ xiná Stiidxaʼ Dios». Ne zanda guinabadiidxaluʼ ti binni ni cayuundaneluʼ Biblia: «Raríʼ stale binni runi cré laaca Jesús nga Dios; peru, casi maʼ bidúʼndanu ca, xi cusiene Biblia de laani yaʼ. Yanna, lii xi rábiluʼ yaʼ».

Casi maʼ bidúʼyanu ca, nabé rieeteʼ lu Biblia ca diidxaʼ ni rusihuinni gadxé xiixa idea ne zanda gacanécani laanu gúninu ni na Jiobá ne gusíʼdinu binni cani dxandíʼ rusiidiʼ Biblia.