Ti película sin ridxi ni láʼ A Trip Down Market Street (Paseo por la calle Market) rusihuinni ximodo bibani binni ndaaniʼ guidxi San Francisco (Estados Unidos) ra bizulú siglu XX. Para biʼniʼ grabárcabe película ca bicaacabe ti cámara lucuá ti trenhuiiniʼ ni rizá ndaaniʼ calle Market ra nabé rizá binni. Lu película ca rihuinni caadxi carretón ne carru, laaca rihuinni binni riguiizíʼ periódicu ne xcaadxi binni ni zisíʼ o ni zeʼ xiixa mandadu.

Ti cosa ni nabé triste de película ca nga purtiʼ zándaca guca grabar ni lu beeu abril iza 1906, caadxi dxi ante gaca ti xu roʼ ne guicá guí lugar que 18 stiʼ abril ra guti jma de chonna mil binni, ne binitilú ti ndaa de guidxi que. Zándaca caadxi de ca binni nazaaca dxichi ni rihuinni lu película que maʼ xhupa xhonna gubidxa si nabánicaʼ. Scott Miles, ti hombre ni za de tobi de ca binni biʼniʼ película que, guníʼ sicaríʼ: «Ora guuyaʼ ca binni que luni ne qué gánnacaʼ xi chiguizaaca la? rucaani naa guiaʼyaʼ laacaʼ».

Laanu laaca rianu ca binni ni nabeza gaxha de laanu. Laacabe cayúnicabe xhiiñacabe ne qué liica gánnacabe xi chiguizaaca: chiguinitilú guiráʼ cosa malu ni cayaca lu Guidxilayú. Ni chiguizaaca riʼ cadi casi ti xu ni, purtiʼ ti xu qué ganna binni pora gaca, nga runi laanu zanda chitídxinu binni zedadxiña ti dxi guni juzgar Jiobá binni. Nga runi, nécapeʼ guiranu maca naguíxhenu pabiáʼ gucheechenu diidxaʼ de yoo pur yoo guiráʼ semana, ñee zanda gúninu xcaadxi stipa para quíxhenanu binni la?

Nabé risaca ejemplu bisaana Jesús purtiʼ guníʼnebe guiráʼ binni bidxaagabe, dede ti hombre ni ruquixe impuestu ne ti gunaa ni biiyabe biaʼ galaa dxi laga caziiláʼdxibe ruaa ti bizé (Luc. 19:1-5; Juan 4:5-10, 21-24). Stale biaje bisiidiʼ Jesús binni dxi naguixhe guiziilaʼdxiʼ, ne bíʼnibe ni de guidubi ladxidoʼbe. Qué nibí Jesús pora si zanda gucheeche diidxaʼ, sínuque bíʼnibe ni guiráʼ hora purtiʼ nabé biabe binni (Mar. 6:30-34). Ximodo rusihuinni stale xpinni Cristu caquiiñeʼ quixhenacaʼ binni cásica bíʼnibe yaʼ.

Melika nabeza ndaaniʼ ti edificiu ra qué randa diʼ riuu tutiica binni. Stale de ca xpecínube baʼduscuela ni zeeda de sti guidxi laacaʼ ne cadi cá lácabe lu directorio ni nuu ra recibidor stiʼ edificiu que ne qué zanda ganna binni xi númeru de celular stícabe. Para laabe  nabé risaca güínebe ca xpecínube de stiidxaʼ Dios ora guidxaagabe laacaʼ ra recibidor stiʼ edificiu que ne lu elevador. Sicaríʼ guníʼ Melika: «Ra nabezaʼ riʼ, ruuyaʼ ni casi ñaca bidiicabe ni naa para gucheecheʼ diidxaʼ». Cumu rizanebe libru ne revista de gadxé gadxé diidxaʼ la? huasaananebe binni stale tratadu ne revista. Ne laaca ruluiʼbe laacaʼ sitiu ni nápanu lu Internet jw.org. Maʼ bizulú Melika cayuundané stale binni de Biblia.

Sonia laaca runi stipa pur guiniʼné tutiica binni de stiidxaʼ Dios. Rúnibe dxiiñaʼ ndaaniʼ ti clínica ne gudixhe íquebe guiníʼnebe guiráʼ cani runinebe dxiiñaʼ de stiidxaʼ Dios. Primeru biyúbibe gánnabe xi caquiiñeʼ cada tobi de laacaʼ ne xi riuuláʼdxicaʼ. Despué biyúbibe cada tobi de laacaʼ ora maʼ chitócabe gueta para güínebe laacaʼ de stiidxaʼ Dios. Pur modo runi Sonia maʼ cayuundané chupa binni Biblia. Yanna maʼ naguixhe íquebe iquiiñebe tiempu riziiláʼdxibe ra dxiiñaʼ para guiníʼnebe ca binni ni cabeza tiidiʼ ra nuu doctor.

Ti binni ni bilá dxi guca xu roʼ lu iza 1906 que guníʼ laani nga «ti desgracia ni jma naxoo ne qué huayuu dxi guizaaca ndaaniʼ sti guidxi». Peru qué zanda guchaaganu guiráʼ desgracia ni cayaca yanna né ni chigaca dxi naguixhe Jiobá gusabanáʼ ca binni ni qué niná ñunibiáʼ laa (2 Tes. 1:8). Jiobá racalaʼdxiʼ guchaa binni modo nabani ne quixhe íquecaʼ chinándacaʼ ni gusiidiʼ ca Testigu stibe laacaʼ (2 Ped. 3:9; Apoc. 14:6, 7).

Nápanu ti dxiiñaʼ nabé risaca, gacanenu binni gudii cuenta nabáninu lu ca últimu dxi, ne gacanenu laacaʼ maʼ cadi guyúbicaʼ ni riuuláʼdxisicaʼ, sínuque guyúbicaʼ Jiobá (Sof. 2:2, 3). Ñee zanda guyúbinu gucheechenu diidxaʼ ratiica nuunu, casi pa nuunu lade cani runinenu dxiiñaʼ, ca xpecínunu ne xcaadxi binni ni ridxaaganu ora maʼ ziuunu paxaraa la? Ñee zanda gúninu xcaadxi stipa para quíxhenanu binni la?