1. Xi zándaca gucaa laanu guireʼnu gana.

 LU IZA 1914, bizulú ca últimu dxi stiʼ guidxilayú stiʼ Binidxabaʼ ne guca Cristu rey guibáʼ. Ne laaca iza riʼ nga guca ti guerra guibáʼ ne bisaba Jesús Binidxabaʼ ne ca demonio stiʼ lu Guidxilayú (biindaʼ Apocalipsis 12:7-9). Biblia riníʼ «ma huaxiéʼ dxi napa» Binidxabaʼ (Apoc. 12:12). Cumu maʼ stale iza nga nabáninu lu ca últimu dxi la? zándaca guiníʼ ique chupa chonna de ca xpinni Dios nabé maʼ bindaani. Laanu yaʼ, ñee maʼ careʼnu gana laga cabézanu gunitilú Jiobá guidxilayú stiʼ Binidxabaʼ la?

2. Xi zazíʼdinu lu tema riʼ.

² Cadi galán diʼ guireʼnu gana, purtiʼ zándaca gucaa ni laanu gúninu ni cadi jneza. Ximodo zanda cuézanu dxi stiʼ Jiobá sin guireʼnu gana yaʼ. Lu tema riʼ zacábinu ca guendarinabadiidxaʼ riʼ: 1) Xi rizíʼdinu de Miqueas pur qué niree gana. 2) Xi zazaaca ora mayaca guiluxe guidxilayú malu riʼ. 3) Ximodo zanda gudiʼnu xquíxepeʼ Jiobá pur paciencia stiʼ.

3. Ximodo nabani ca israelita que ca dxi bibani Miqueas.

³ Biblia na: «Cadi gápatu fe ti xcompañérutu. Cadi gápatu confianza ti binni ni nabé xhamígutu. Guyuu cuidadu né ni gaʼbuʼ binni ni raʼtaʼ cueʼluʼ. Purtiʼ qué rusisaca xiiñiʼ binni bixhoze; rucaalú xiiñidxaapaʼ binni jñaa, rucaalú xuaalidxi binni suegra; ca xhenemigu ti hombre nga ca binni ni nuu ndaaniʼ lidxi» (Miqueas 7:5, 6). Ca dxi biʼniʼ mandar Acaz biiyaʼ Miqueas ximodo zixeleʼ ca israelita que de Dios dede bidxiidéchecaʼ laabe. Ni riguixhená que guníʼ zeeda gaca ca israelita ni qué nuzuubaʼ diidxaʼ que casi «yaga guichi» ne casi «leʼ de guichi». Cásica ti yaga guichi runiná tuuxa ni cánani, zacaca nga bininá ca israelita que ca binni ni guidxiña laacaʼ. Dede né binnilídxicaʼ  maʼ qué ñannaxhiicaʼ. Cumu nanna Miqueas qué zanda guni chaahuiʼ guendanagana que la? guníʼnebe Jiobá de guidubi ladxidoʼbe ne gulézabe guni chaahuiʼ Jiobá guendanagana que. Miqueas nanna zuni Jiobá ni ora guʼyaʼ maʼ caquiiñeʼ gácani.

4. Xi guendanagana ridxaagalunu.

⁴ Cásica modo bibani Miqueas, laanu laaca nabáninu lade binni ni racalaʼdxiʼ puru si para laa. Stale de laacaʼ nabánicaʼ «modo na ique caʼ» ne qué rannaxhiicaʼ binni (2 Tim. 3:2, 3). Nuu biaje ra rúninu dxiiñaʼ o ra scuela ridúʼyanu nuu binni ni ruyubi puru si para laa ne riuʼnu triste ora guidúʼyanu zacá laacabe. Peru nuu xpinni Jiobá ridxaagalucaʼ sti guendanagana jma naroʼbaʼ. Jesús gudxi ca discípulo stiʼ zucaalú ca binnilídxicaʼ laacaʼ. Gúdxibe laacaʼ cásica ca diidxaʼ ni zeeda lu Miqueas 7:6 para guiniʼbe xi zadxaagalucaʼ. Jesús guníʼ: «Purti zeda ndaa saa hombre ne bixhoze, ne badu dxaapa ne jñaa, ne gunaa ne suegra. Ne ca binni lidxi pe hombre zaca nanalaʼdxi laa» (Mat. 10:35, 36). ¡Nabé nagana nga guni huantarnu ora gucaalú ca binnilídxinu laanu ne guni búrlacaʼ laanu pur ni runi crenu! Pa guidxaagalunu guendanagana riʼ, cadi naquiiñeʼ gudiʼnu lugar cueecabe gana laanu, sínuque gúninu ni na Jiobá ne cuézanu dede ora guni chaahuibe guendanagana stinu. Pa guinábanu laabe gacanebe laanu la? zudiibe stipa ne guendabiaaniʼ laanu para guni huantarnu.

5, 6. Xi ndaayaʼ bidii Jiobá Miqueas, peru xi guníʼ Jiobá zazaaca ni qué ñuuyaʼ Miqueas.

⁵ Gucuaa Miqueas stale ndaayaʼ purtiʼ gulézabe guni chaahuiʼ Jiobá guendanagana que. Xi ndaayaʼ gucuaabe yaʼ. Biiyabe guti rey Acaz ne biluxe modo biʼniʼ mandar, ne laaca bíʼyabe guca Ezequías, xiiñiʼ Acaz, rey ne laa gucané ca israelita guni adorarcaʼ Jiobá si. Laaca biiyaʼ Miqueas binitilú ca asiriu 10 tribu stiʼ Israel cásica maca guníʼ Jiobá zazaaca ni (Miq. 1:6).

⁶ Peru qué ñuuyaʼ Miqueas ora guca guiráʼ ni gudxi Jiobá laa gucaa. Casi ora bicaabe ca diidxaʼ riʼ: «Ra mayaca guiluxe ca dxi ca dani ra nuu lidxi Jiobá napa xidé guzuhuaa dxiichiʼ ni luguiáʼ stuudxi dani ne ra nuuni zadxiña stale guidxi. Ne stale guidxi dxandipeʼ ziecaʼ ne zaniʼcaʼ: “Latáʼ, ne quíbanu lu dani stiʼ Jiobá”» (Miq. 4: 1, 2). Neca qué ñuuyaʼ Miqueas dxi guca ni na ca diidxaʼ riguixhená riʼ, purtiʼ gútibe ante gácacani la? qué ñuu dxi nusaanabe Jiobá, neca qué ñuni xcaadxi binni ni na Jiobá. Ne laaca guniʼbe: «Purtiʼ guiráʼ ca guidxi ca la? cada tobi zazá lu lá dios stiʼ; peru laadu la? qué ziuu dxi gusaanadu de sadu lu lá Jiobá, Dios stidu» (Miq. 4:5). Qué niree Miqueas gana ca dxi nagana gudiʼdiʼ que, purtiʼ biʼniʼ crebe de guidubi ladxidoʼbe zuni Jiobá guiráʼ ni maʼ bizabiruaa. Racá ridúʼyanu dxandipeʼ biʼniʼ cré Miqueas Jiobá.

7, 8. 1) Xi razón nápanu para guni crenu Jiobá. 2) Xi naquiiñeʼ gúninu ti guiluíʼ nagueenda zidiʼdiʼ tiempu ca.

⁷ Ñee runi crenu Jiobá cásica biʼniʼ cré Miqueas la? Nápanu stale razón para guni crenu Dios, purtiʼ maʼ cadúʼyanu ximodo cayaca ca diidxaʼ riguixhená ni bicaa Miqueas. «Ra mayaca guiluxe ca dxi ca», millón de binni de guiráʼ guidxi roʼ, tribu ne diidxaʼ riníʼ binni casi ñaca dxíʼbacaʼ «dani ra nuu lidxi Jiobá». Stale de ca binni riʼ nuucaʼ ndaaniʼ ca guidxi ni cadindesaa, neca zacá, maʼ bíʼnicabe «espada stícabe cubu ni riuu ruaa aradu» ne qué nacaʼ guiziidicaʼ para checaʼ lu guerra (Miq. 4:3). ¡Ti ndaayaʼ naroʼbaʼ nga nuunu lade ca xpinni Jiobá, purtiʼ nuucaʼ tobi si!

⁸ Guiranu nga racaláʼdxinu pa ñanda si maʼ nunitilú Jiobá guidxilayú malu stiʼ Binidxabaʼ. Peru para cadi guireʼnu gana, naquiiñeʼ guiníʼ íquenu modo riníʼ ique  Dios. Maʼ gulibe ti dxi para cuídxibe cuenta binni ne «ma ulí be tobi hombre guni ni», ne hombre ca nga Jesucristu (Hech. 17:31). Peru ante guedandá dxi ca cudiibe lugar guiráʼ clase binni «ganna ca ni dxandíʼ», gúnicaʼ ni caziidicaʼ lu xquendanabánicaʼ ne zacá ganda guilacaʼ. Naquiiñeʼ guietenaláʼdxinu zándaca gueeda gatiʼ binni pa qué gacanenu laacaʼ (biindaʼ 1 Timoteo 2:3, 4). Maʼ cadi candaa zedandá dxi stiʼ Jiobá, nga runi pa iquiiñenu tiempu stinu para gusíʼdinu sti binni gunibiáʼ chaahuiʼ Dios la? nin qué zudiʼnu cuenta zadiʼdiʼ tiempu ca. Ne ora gueeda dxi stiʼ Dios la? ¡guizáʼ ziéchenu purtiʼ bíninu xhiiñaʼ Reinu biaʼ gúndatiʼ!

9-11. Ñee maʼ guca ni na ca diidxaʼ riguixhená ni zeeda lu 1 Tesalonicenses 5:3 la?

⁹ (Biindaʼ 1 Tesalonicenses 5:1-3.) Maʼ cadi candaa ziuu tu zaníʼ: «Gasti chi gaca, nuu dxí guidxi». Pa qué racaláʼdxinu quítecabe laanu ora gunadiáganu ca diidxaʼ riʼ la? naquiiñeʼ chinándanu conseju stiʼ Pablu ni zeeda lu 1 Tesalonicenses 5:6 ra na: «Gataná nu ne cuʼ xpiaani nu». Yanna, chiguidúʼyanu caadxi cosa ni maʼ guca ne zanda gacané laanu guiénenu ca diidxaʼ riguixhená ni chiguizaacaruʼ.

¹⁰ Gudiʼdiʼ si cada tobi de ca guendaridinde ni guca lu guidubi naca Guidxilayú, ca guidxi que gucaláʼdxicaʼ maʼ ñuudxí guiráʼ guidxi. Gudiʼdiʼ si primé guendaridinde que guyuu ti grupu ni runibiáʼcabe casi Liga de Naciones, ne guyuuni para gacaneni chuʼ binni tobi si. Ne gudiʼdiʼ si guiropa guendaridinde que, stale binni biʼniʼ cré zacané Naciones Unidas laacaʼ. Cásica ca gobiernu, zaqueca ca xaíque yuʼduʼ runi crecaʼ zacané guiropaʼ grupu ca para chuʼ guendariuudxi. Ca xaíque stiʼ Naciones Unidas guniʼcaʼ 1986 nga naquiiñeʼ guietenalaʼdxiʼ binni casi Año Internacional de la Paz. Iza que stale de ca xaíque stiʼ ca guidxi ca ne ca religión ca bidagulisaanecaʼ xaíque stiʼ religión Católica ndaaniʼ guidxi Asís, Italia, para guni orarcaʼ ne guinábacaʼ maʼ cadi tinde ca guidxi ca.

 ¹¹ Peru cadi ni guníʼcabe iza riʼ ne ni huaníʼcabe xcaadxi iza nga ni caníʼ 1 Tesalonicenses 5:3. Xiñee yaʼ. Purtiʼ caʼruʼ gaca ni na ca diidxaʼ riʼ: «Mala inaaze be laaca».

12. Xii nga ni nánnanu ora guiníʼcabe «gasti chi gaca, nuu dxí guidxi».

¹² Tuu nga guiníʼ: «Gasti chi gaca, nuu dxí guidxi» yaʼ. Xi zuni ca xaíque ca religión ni na zinanda Cristu ne xcaadxi religión yaʼ. Xi zuni ca xaíque guidxi ca para gaca ni na ca diidxaʼ riguixhená ca yaʼ. Qué ricabi diʼ Biblia cani. Modo tiica gaca cani ne neca guluíʼ dxandíʼ ni caníʼcabe, ni nánnanu nga caguítecabe binni. Guidxilayú malu riʼ nuuruʼ ni lu náʼ Binidxabaʼ. Maʼ binitilú ni ne maʼ qué zaca chaahuiʼ ni. Nga runi, nabé triste nga pa tobi de ca xpinni Cristu guni cré ora guiníʼcabe «gasti chi gaca, nuu dxí guidxi» ne pur laani gudxiidéchecaʼ Dios.

13. Xiñee cucueeza ca ángel stiʼ Jiobá ca dxi jma nagana ca.

¹³ (Biindaʼ Apocalipsis 7:1-4.) Laga cabézanu gaca ni na 1 Tesalonicenses 5:3, ca ángel stiʼ Jiobá cucueezacaʼ ca dxi jma nagana ni gueeda ca. Xiñee cayúnicabe ni yaʼ. Purtiʼ apóstol Juan guníʼ cabézacabe dede ora guiluxe guicá sellu stiʼ Dios lucuá «ca xpinni», o cani bibí pur espíritu santu. * Ora maʼ biluxe gucuácabe sellu ca, zudii ca ángel lugar guinitilú guidxilayú malu riʼ. Xi zazaaca despué yaʼ.

14. Xi rusihuinni mayaca guinitilú Babilonia guidxi roʼ.

¹⁴ Maʼ cadi candaa zanitilú Babilonia guidxi roʼ, xaíque stiʼ guiráʼ religión ni cadi dxandíʼ. Maʼ cahuinni mayaca guinitilú ni ne qué zanda gacané ca «guidxi ne binni ni riníʼ adxé adxé idioma» ni ora guinitilú ni (Apoc. 16:12; 17:15-18; 18:7, 8, 21). Ne rihuinni zacá ni, purtiʼ lu ca noticia ca nabé nga riníʼcabe mal de ca xaíque yuʼduʼ ne ca religión ca. Neca zacá, ca xaíque stiʼ ca religión ca riníʼ íquecaʼ qué zazaacacaʼ gastiʼ. ¡Peru cadi jneza modo riníʼ íquecabe! Despué de guieeteʼ «gasti chi gaca, nuu dxí guidxi», ca gobiernu ni nuu lu náʼ Binidxabaʼ málasi zucaalucaʼ ca religión ni cadi dxandíʼ ne zunduuxecaʼ laacabe: maʼ qué ziuu dxi guibiguétacabe. Nga runi, naquiiñeʼ cuézanu ti guidúʼyanu guiráʼ ni chiguizaaca ca (Apoc. 18:8, 10).

15. Xiñee caʼruʼ guedané Jiobá dxi stiʼ.

¹⁵ Neca stale binni riníʼ mal de lá Jiobá ne ñanda nunitilube laacaʼ, peru cabézabe dxi naguíxhebe gúnibe ni. Xiñee yaʼ. Purtiʼ qué racaláʼdxibe guinitilú binni ni nayá ladxidóʼ (2 Ped. 3:9, 10). Ñee ngaca nga ni racaláʼdxinu la? Ante guedandá dxi stibe naquiiñeʼ gusihuínninu rudiʼnu xquíxepeʼ laabe pur paciencia stibe, ximodo zanda gúninu ni yaʼ. Guidúʼyanu.

16, 17. 1) Xiñee naquiiñeʼ gacanenu ca binni ni maʼ bixeleʼ de Jiobá. 2) Xiñee nagueenda caquiiñeʼ guibiguetaʼ cani maʼ bixeleʼ de Jiobá ndaaniʼ xquidxi Dios.

¹⁶ Gacanenu cani maʼ bixeleʼ de xquidxi Dios. Jesús na riecheʼ Dios ne ca ángel stiʼ ora guidxélacabe ti dendxuʼ huiiniʼ ni maʼ biniti (Mat. 18:14; Luc. 15:3-7). Nabé nga rizaalaʼdxiʼ Jiobá guiráʼ binni ni nadxii laabe neca cadi cayúnicaʼ ni nabe yanna. Ora racanenu tuuxa guibiguetaʼ ndaaniʼ xquidxi Jiobá la? nabé riéchebe ne laaca riecheʼ ca ángel stibe.

¹⁷ Ñee lii nga tobi de ca binni ni maʼ cadi cayuni ni na Jiobá yanna la? Zándaca maʼ qué ridagulisaaluʼ pur xiixa ni biʼniʼ ti xpinni Cristu lii. Ñee maʼ xadxí de bizaacaluʼ ni la? Pa zacá ni, gunabadiidxaʼ laca lii: «Ñee jma galán nabaneʼ yanna riʼ la?  Ñee jma nayecheʼ nabaneʼ la? Ñee Jiobá nga biʼniʼ naa xiixa la? o ti binni ni gulené donda bininá naa. Ñee huayuu dxi guniná Jiobá naa la?». Ni nánnanu nga nabé nachaʼhuiʼ Jiobá né laanu. Neca qué gúninu ni jneza, rudiibe lugar guiechenenu ca cosa sicarú ni rudiibe laanu (Sant. 1:16, 17). Peru cadi guiaandaʼ laanu maʼ gaxha nuu dxi stiʼ Jiobá. Yanna nga tiempu guibiguétanu ndaaniʼ náʼ Bixhózenu ni nadxii laanu ne ndaaniʼ xquidxi, purtiʼ raríʼ si nga zanda guilanu lu ca últimu dxi riʼ (Deut. 33:27; Heb. 10:24, 25).

18. Xiñee naquiiñeʼ gacanenu cani zaniruʼ ra ridagulisaanu.

¹⁸ Gacanenu cani zaniruʼ ndaaniʼ neza binni ridagulisaa. Jiobá rapa laanu ne rabi laanu paneza chuunu, cásica runi ti pastor ni nadxii ca dendxuʼ huiiniʼ stiʼ. Ne Pastor ni maʼ bisaanabe para gapa laanu nga Xiiñibe, Jesucristu (1 Ped. 5:4). Ne nuu xcaadxi pastor ni cayapa cada tobi de ca dendxuʼ huiiniʼ stiʼ Dios ndaaniʼ jma de ti gayuaa mil neza binni ridagulisaa (Hech. 20:28). Ora ruzúʼbanu stiidxaʼ cani zaniruʼ ra ridagulisaanu rusihuínninu cudiʼnu xquíxepeʼ Jiobá ne Jesús pur guiráʼ ni cayúnicaʼ pur laanu.

19. Ximodo zanda chuʼnu jma gaxha de xcaadxi xpinni Cristu.

¹⁹ Chuʼnu gaxha de ca xpinni Cristu. Ximodo zanda gúninu nga yaʼ. Quíxhenu ti ejemplu, ora gucaalúcabe ti ejércitu, ca soldadu ca rúnicaʼ ti fila ne rácacaʼ tobi si. Zacá zanda gucueezacabe intiica gulaa ca xhenemígucabe luguiácabe. Laga zeʼ dxi jma nadipaʼ cani rulaa Binidxabaʼ luguiáʼ xquidxi Dios. Nga runi, cadi naquiiñeʼ chuʼdindenenu ca xpinni Cristu, sínuque chuʼnu gaxha de laacabe ne gutiidiláʼdxinu laacabe pa gúnicabe laanu xiixa ne gudiʼnu gábibe laanu xi naquiiñeʼ gúninu.

20. Xi naquiiñeʼ gúninu yanna.

²⁰ Naquiiñeʼ gatananu ne cuézanu gulá Dios laanu. Cadi guireʼnu gana laga cabézanu guiníʼcabe «gasti chi gaca, nuu dxí guidxi» ne ora guiluxe guicá cani bibí né espíritu santu sellu. Óraque zudii ca ángel lugar guinitilú guidxilayú malu riʼ ne guinitilú Babilonia guidxi roʼ. Laga cabézanu guizaaca guiráʼ ndiʼ, guzúʼbanu stiidxaʼ cani zaniruʼ ndaaniʼ xquidxi Jiobá. Chuʼnu tobi si para gucáʼlunu Binidxabaʼ ne ca demonio stiʼ para cadi guninácabe laanu, ne chinándanu conseju ni bicaa salmista riʼ: «Lagaca nadxibalú, ne laguni ladxidoʼto naguidxi, purtiʼ cabézatu gacané Jiobá laatu» (Sal. 31:24).