Ñee maʼ biindaluʼ ca últimu tema ni bedané revista Torre stiʼ ni rapa la? Yanna biiyaʼ pa zanda guicábiluʼ ca guendarinabadiidxaʼ riʼ:

Padxí nga «yegüí né [Jesús] ca espíritu yeguyoo diidxaʼ» (1 Ped. 3:19).

Zándaca despué de biasa Jesús lade gueʼtuʼ gúdxibe ca ángel malu que xi castigu caquiiñeʼ guicaacaʼ (15/6, yaza 23).

Xi chonna cosa zanda gacané cani guichaganáʼ sti biaje guibánicaʼ nayecheʼ.

Cadi naquiiñeʼ guiníʼ íquecabe jma nayecheʼ bibaninécabe primé xheelacabe, gacanécabe ca xhamígucabe ti gánnacaʼ ximodo guiníʼnecaʼ xheelacabe ne naquiiñeʼ guni crécabe xheelacabe neca primé binni bichaganácabe que bicheené laacabe (1/7, yaza 9 ne 10).

Padxí guni juzgar Jesús ca «dendxuʼ» ne ca «chiba» (Mat. 25:32).

Zuni juzgar Jesús binni ora maʼ guzulú ca dxi jma nagana, guinitilú si ca religión ni qué rusiidiʼ ni dxandíʼ (15/7, yaza 6).

Padxí nga zuunaʼ ne zoyaa ca xpinni Cristu ni zeeda gaca casi guiʼxhiʼ malu guidi ruaacaʼ (Mat. 13:36, 41, 42).

Zúnicabe ni lu ca dxi jma nagana, ora gudiicabe cuenta zanitilúcabe ne qué zanda guilácabe (15/7, yaza 13).

Padxí gaca ni na ejemplu ni cusiene de mozo ni nuu xpiaaniʼ ne ni runi jneza (Mat. 24:45-47).

Qué nuzulú ñaca ni na ca diidxaʼ riguixhená riʼ lu Pentecostés stiʼ iza 33, sínuque guca ni na cani despué de iza 1914. Lu iza 1919 bisaana Jesús mozo ni nuu xpiaaniʼ riʼ para guʼyaʼ ca domésticu stiʼ, laacabe nga guiráʼ ca binni ni caziidiʼ de Dios (15/7, yaza 21 dede 23).

Padxí nga guiaanané mozo ni nuu xpiaaniʼ guiráʼ ni napa Jesús.

Zácani lu ca dxi jma nagana, ora cheʼ ca binni ni naca mozo ni nuu xpiaaniʼ ca guibáʼ (15/7, yaza 25).

Ñee qué ruzeeteʼ Biblia lá caadxi binni ni bibani dxiqué, purtiʼ gúcacaʼ malu o huaxiéʼ risácacaʼ la?

Coʼ, cadi naquiiñeʼ guiníʼ íquenu zacá, purtiʼ ndaaniʼ Biblia qué rieeteʼ lá stale binni neca gúcacaʼ nachaʼhuiʼ o malu (Rut 4:1-3; Mat. 26:18). Ne chupa si ángel nga rieeteʼ lá ndaaniʼ Biblia (1/8, yaza 10).

Neca bidii Dios stipa 230 Testigu ni biseguyoocabe ndaaniʼ campu de concentración ni guyuu Sachsenhausen, xiruʼ gucané laacaʼ.

Neca maʼ qué gápacabe stipa, candaanacabe ne huarácabe, qué nusaanaʼ de niguusaacabe gana laacabe para gunda biʼniʼ huantárcabe (15/8, yaza 18).

Ximodo racané ejemplu stiʼ ca israelita que laanu ora gudíʼdicaʼ guiiguʼ Jordán para chuʼcaʼ lu Layú ni bizabiruaa Jiobá gudii laacaʼ.

Neca caree guiiguʼ que, bicueezadxí Jiobá nisa que para gunda gudiʼdiʼ xquidxi ndaaniʼ ni. Nabé biguidxi fe sticaʼ ne gúpacaʼ confianza Jiobá, ne zacaca nga zanda gacané ni laanu yanna (15/9, yaza 16).

Xi rusihuinni Biblia ora ruzeeteʼ gatigá de ca color ca.

Rusihuínnini nanna dxichi Dios xi rucaacani binni guni sentir, ne laaca rusihuínnini nánnabe racané cani laanu guietenaláʼdxinu cani jma risaca (1/10, yaza 14 ne 15).

Ximodo cayaca ni na ca diidxaʼ riguixhená ni zeeda lu Miqueas 5:5 ora ruzeeteʼ de xhono xaíque ne gadxe pastor.

Gadxe pastor ne xhono xaíque ni rieeteʼ lu Miqueas 5:5 ca nga ca binnigola ni nuu ndaaniʼ ca neza binni ridagulisaa, ne laacaʼ racanecaʼ xquidxi Dios ti ganda guni huantarcaʼ ca dxi nagana zeeda ca (15/11, yaza 20).

Gunáʼ nga chupa chonna razón ni rusihuinni riquiiñeʼ binni Dios.

Caquiiñeʼ gábibe laanu xi naquiiñeʼ gúninu ne racanebe laanu para gaca chaahuiʼ xiixa guendanagana gápanu. Racalaʼdxiʼ Dios chuʼnu nayecheʼ, nga runi, racanebe laanu ne zúnibe guiráʼ ni maʼ bizabiruaabe ni zeeda lu Biblia (1/12, yaza 4 dede 6).