1, 2. Xiñee nabé rusiguii binni tiempu riʼ, ne ximodo rireeche cani. (Biiyaʼ dibuju ni cá ra ruzulú tema riʼ.)

 LU GUIDXILAYÚ malu nabáninu riʼ, nabé rusiguii binni. Ne qué ridxagayaanu ora ridúʼyanu ni, purtiʼ Biblia na Binidxabaʼ nga cayuni mandar guidxilayú riʼ, ne laa nga jma nanna modo gusiguii binni (1 Tim. 2:14; 1 Juan 5:19). Cumu maʼ cadi candaa para guinitilú guidxilayú stiʼ Binidxabaʼ la? nga runi yanna nga jma cadxiichibe: purtiʼ nánnabe «ma huaxiéʼ dxi napa [be]» (Apoc. 12:12). Nga runi, guiráʼ binni ni runi ni nabe zeʼ dxi jmaruʼ si rusiguiicaʼ ne racaláʼdxicaʼ quítecaʼ ique ca xpinni Dios ni dxandíʼ.

² Stale biaje, riquiiñecabe televisión, periódicu ne Internet para guiníʼcabe mal de ca testigu stiʼ Jiobá ne cani runi crecaʼ ti zacá quítecabe binni. Nga runi nuu binni ridxiichi purtiʼ runi cré guiráʼ ni riníʼcabe ca.

3. Xi zacané laanu para cadi chuʼ tu gusiguii laanu.

³ Peru nuu ti cosa ni zanda gacané laanu para cadi guni crenu guiráʼ ni runi Binidxabaʼ. Ne nayecheʼ riuʼnu gánnanu Stiidxaʼ Dios nga ni racané laanu, purtiʼ nuu ni «para gabi ni laanu paraa cuchéʼ nu» (2 Tim. 3:16). Pur ni bicaa apóstol Pablu rihuinni guyuu chupa chonna de ca xpinni Cristu de Tesalónica ni biʼniʼ cré guiráʼ ca cosa ni cadi dxandíʼ guníʼ ca binni que. Nga runi guniʼbe: «Rinaba du laatu cadi chuʼ tuuxa utiixhi ique tu» (2 Tes. 2:1, 2). Xi rusiidiʼ ca diidxaʼ guníʼ Pablu ca laanu, ne ximodo zanda gúninu ni na cani tiempu riʼ yaʼ.

4. 1) Ximodo gudixhená Pablu ca xpinni Cristu de Tesalónica. 2) Ximodo riguixhenácabe laanu yanna.

⁴ Lu primé guiʼchiʼ bicaa Pablu ra nuu ca xpinni Cristu de Tesalónica, gúdxibe laacaʼ xi naquiiñeʼ gúnicaʼ ti cadi guinaazeʼ dxi stiʼ Jiobá laacaʼ. Qué ninabe ñuucaʼ ra «nacahui», ngue runi, gúdxibe laacaʼ  «casi ñaca cuzaani» Dios laacaʼ. De raqué guniʼbe: «Gataná nu ne cuʼ xpiaani nu» (biindaʼ 1 Tesalonicenses 5:1-6). Ca dxi stinu riʼ cabézanu guinitilú Babilonia Guidxi roʼ, laani nga guiráʼ religión ni qué rusiidiʼ ni dxandíʼ. Ne ra guinitilú ni nga guzulú dxi stiʼ Jiobá. Yanna maʼ riénenu ximodo nga chiguni Dios ni na. Ne ra ridagulisaanu nga gatigá rábicabe laanu xi naquiiñeʼ gúninu para cadi gusaana de gatananu. Pa laanu gúninu ni gábicabe laanu ra ridagulisaanu ne guiníʼ íquenu jneza la? zacané cani laanu para cadi gusaana de gúninu xhiiñaʼ Jiobá (Rom. 12:1).

5, 6. 1) Xi bizeeteʼ Pablu lu guiropa carta ni bicaa ra nuu ca xpinni Cristu de Tesalónica. 2) Xi zuni Jesús maʼ cadi candaa. 3) Xi naquiiñeʼ guiníʼ íquenu.

⁵ Qué nindaa de biseendaʼ Pablu primé carta ra nuu ca xpinni Cristu de Tesalónica, bicaabe guiropa carta stibe ra nuucaʼ. Luni guniʼbe de ca dxi jma nagana ni zeeda ora «usaba ná [Jesús] cani qué nicaa stiidxaʼ, ne qué ñunibiáʼ Dios» (2 Tes. 1:6-8). Lu guiropa capítulo stiʼ carta riʼ rieeteʼ bidxibi chupa chonna de ca xpinni Cristu que purtiʼ guníʼ íquecaʼ mápeca zeeda dxi stiʼ Jiobá tiempu que (biindaʼ 2 Tesalonicenses 2:1, 2). Ca primé xpinni Cristu qué ñene chaahuicaʼ ximódopeʼ chigaca ni na Dios. Ora bizeeteʼ Pablu ni na chupa chonna diidxaʼ riguixhená, guníʼ sicaríʼ: «Caadxi si riene nu nagasi riʼ, ne zacaca rui nu ni gabi Dios laanu biaʼ randa si, peru zadxiña dxi ihuinni irá ni nayaʼniʼ, ne dxi que ma qué zaquiiñe di ni nanna nu yanna riʼ» (1 Cor. 13:9, 10). Neca zacá, biguidxi fe stiʼ ca xpinni Cristu que, purtiʼ gucané ca diidxaʼ ni bicaa Pablu laacabe, ne ca diidxaʼ ni bicaa Pedru ne ni bicaa xcaadxi xpinni Cristu ni bibí pur espíritu santu.

⁶ Para ganda guiníʼ ique ca xpinni Cristu que jneza, gudxi Pablu laacaʼ ante gueeda dxi stiʼ Jiobá ziuu stale binni ni zaxeleʼ de Dios ne zaniʼcaʼ mal de laabe ne zahuinni «hombre nuu né binidxabaʼ». * Despué ora maʼ bizaa dxi ca, «zunitilú» Jesús cani bidii lugar quite «hombre nuu né binidxabaʼ» ca laacaʼ. Pablu guníʼ xiñee zanitilú tuuxa binni, purtiʼ «qué niná nicaa ni dxandí para nilá»  (2 Tes. 2:3, 8-10). Nga runi, galán guiníʼ íquenu: «Pabiáʼ risaca para naa ni riziideʼ de Dios. Ñee ruundaʼ revista riʼ ne xcaadxi libru ne revista para gannaʼ xii nga ni jma nacubi cusiene xquidxi Dios la?».

7, 8. 1) Xi guendanagana bidxaagalú ca primé xpinni Cristu. 2) Xi guendanagana cadxaagalú cani dxandíʼ xpinni Cristu tiempu riʼ.

⁷ Ca xpinni Cristu que gupa xidé bidxiilucaʼ ca binni ni maʼ bidxiideche Dios ne riníʼ mal de laabe ne cani rusiidicaʼ, peru cadi ngasi, sínuque bidxiilurúcabe xcaadxi cosa. Pablu bicaa ra nuu Timoteu ca diidxaʼ riʼ: «Enda ranaxhii bidxichi nga xcu enda ruchee», ne guniʼbe «nuu tu huaree chu de Dios pur laani ne nabé huayacaná» (1 Tim. 6:10). Sti cosa ni naquiiñeʼ gápacabe cuidadu nga cadi chuuláʼdxicabe gúnicabe cosa ni cadi jneza (Gál. 5:19-21).

⁸ Peru zanda guiénenu xiñee gudxi Pablu ca xpinni Cristu de Tesalónica chuʼcaʼ cuidadu laacaʼ ti cadi guni crecaʼ cani «cadi dxandíʼ apóstol laacaʼ». Lade ca xpinni Cristu que guyuu tu guníʼ stale cosa para «usiguii ca xcaadxi para chi nanda laacaʼ» (2 Cor. 11:4, 13; Hech. 20:30). Despué gudxi Jesús neza binni ridagulisaa ni nuu Éfeso jneza ni cayúnicaʼ, purtiʼ «qué ridxaaga [caʼ] cani nadxabaʼ». Ca xpinni Cristu de Éfeso biiyacaʼ cadi dxandíʼ naca ca hombre que apóstol, ne «cadi dxandí ni» riniʼcaʼ (Apoc. 2:2). Nabé risaca nga ni guníʼ Pablu lu guiropa carta bicaa ra nuu ca xpinni Cristu de Tesalónica. Pablu bicaa: «Cayabi du laatu casi ñaca Señor Jesucristu ñabi ni laatu, laixele de tutiica hermanu ni qué na guni dxiiña» (2 Tes. 3:6, 10). Pa cadi naquiiñeʼ guidxaagacabe cani qué runi dxiiñaʼ, jmaruʼ si cadi naquiiñeʼ guidxaagacabe cani maʼ cuzulú caníʼ mal de Dios. Pa nabé guidxaagacabe ca binni riʼ, zuxhélecaʼ laacabe de Dios, nga runi cadi lica naquiiñeʼ guidxaagacabe laacaʼ. Ne ngaca nga naquiiñeʼ gúninu yanna (Prov. 13:20).

9. Xiñee naquiiñeʼ chuʼnu cuidadu ora tuuxa guiníʼ xiixa ni qué rusiene Biblia o guiníʼ mal de xquidxi Dios.

⁹ Maʼ zeeda dxiña ca dxi jma nagana ne mayaca guinitilú guidxilayú malu stiʼ Binidxabaʼ, nga runi, yanna nga jma caquiiñeʼ chinándanu ca conseju ni gucuaa ca xpinni Cristu ni bibani lu primé siglu que. Qué racaláʼdxinu gusiáʼndanu xiñee guca Jiobá nachaʼhuiʼ né laanu, purtiʼ pa qué gusiáʼndanu ni qué zunítinu ni maʼ bizabiruaa Dios gudii laanu: guibáninu sin qué chuʼ dxi gátinu, guibáʼ la? o lu Guidxilayú riʼ (2 Cor. 6: 1). Naquiiñeʼ chuʼnu cuidadu pa nuu tuuxa ra ridagulisaanu gacalaʼdxiʼ gucaa laanu guni crenu xiixa ni qué rusiene Biblia o guiníʼ mal de xquidxi Dios (2 Tes. 3:13-15).

10. Xi gudxi Pablu ca xpinni Cristu de Tesalónica cadi gusaana de gúnicaʼ.

¹⁰ Guluu Pablu gana ca xpinni Cristu de Tesalónica guzuhuaacaʼ dxiichiʼ ne cadi gusaana de gúnicaʼ ni maʼ biziidicaʼ (biindaʼ 2 Tesalonicenses 2:15). Xii nga cani biziidicabe yaʼ. Laacani nga cani bisiidiʼ Jesús, cani gudxi Dios apóstol Pablu ne xcaadxi xpinni Cristu gucaacaʼ lu Biblia, ne cadi cani rusiidiʼ ca religión ni cadi dxandíʼ. Ca xpinni Cristu ni nuu Corinto, biechené Pablu laacabe ne gudxi laacabe ca diidxaʼ riʼ: «Qué riuu dxi usiaanda tu naa, ne de yanna zinanda tu irá ni bisiide laatu, casi bisiide ni laatu» (1 Cor. 11:2). Guiráʼ ni biziidicabe que zanda guni crécabe cani, purtiʼ nánnacabe zeedacani de Dios.

11. Ximodo zanda guixeleʼ binni de Jiobá pa gudii lugar gusiguiicabe laa.

¹¹ Lu carta ni bicaa Pablu ra nuu ca  hebreu gúdxibe laacaʼ nuu chupa cosa ni zanda gusirá fe stiʼ ca xpinni Cristu ne guxheleʼ laacaʼ de Jiobá (biindaʼ Hebreos 2:1; 3:12). Pablu guníʼ: «Zándaca ixele nu de [cani bizíʼdinu] chaahui chaahuiʼ», ne zándaca guixélenu de Jiobá. Ora dxiʼbaʼ tuuxa ndaaniʼ ti canuá, zándaca qué zudii cuenta chaahuiʼ chaahuiʼ maʼ ziné ni laa ra ziáʼ. Peru pa laapebe gucaanabe canuá que, laaca ziné ni laabe ra ziáʼ. Guiropaʼ ejemplu riʼ rusihuínnicani xi maʼ bizaaca cani maʼ bidii lugar gusiguiicabe laacaʼ ne maʼ bisaana de guni cré cani rusiidiʼ xquidxi Dios.

12. Xii nga cani zándaca guxheleʼ laanu de Dios.

¹² Zándaca chupa chonna de ca xpinni Cristu de Tesalónica bidiicaʼ lugar gusiguiicabe laacaʼ. Ñee zanda gueeda guizaacanu casi bizaacacabe ca la? Nuu stale cosa ni zanda cuee tiempu stinu, casi nuu binni nabé runiti tiempu stiʼ lu xiixa cosa ni riuulaʼdxiʼ guʼyaʼ o riuulaʼdxiʼ quite, nuu tu laa guizáʼ xadxí maʼ nuu lu ca yaza ni riquiiñeʼ para gunibiáʼ binni stobi (redes sociales), maʼ cuseendacaʼ correu sticaʼ ne maʼ cacábicaʼ cani, o nuu tu nisi noticia de deporte maʼ cayuuyaʼ. Zanda gunítinu tiempu stinu lu tobi de ca cosa ni bizéʼtenu riʼ ne zándaca maʼ qué zúninu xhiiñaʼ de Dios né stale gana. Ne pur laacani ngueca ca ngueca zaninu lu ca oración stinu, maʼ qué zadúʼndanu Biblia, maʼ qué ziuunu guendaridagulisaa ne maʼ qué zucheechenu diidxaʼ. Xi zanda gúninu para cadi quítecabe laanu yaʼ.

13. 1) Casi bizeeteʼ apóstol Pedru, ximodo xpiaʼ stale binni. 2) Xi zacané laanu para gaca fe stinu naguidxi.

¹³ Ti cosa ni zacané laanu nga gánnanu mayaca guiluxe guidxilayú stiʼ Binidxabaʼ ne cadi naquiiñeʼ guidxaaganu ca binni ni qué runi cré pa maʼ nabáninu lu ca últimu dxi. Apóstol Pedru bicaa xi zaca tiempu riʼ: «ziasa caadxi ni nabani casi na ique, ne zuni burla Dios. Zaná caʼ: “Cadi na be zeeda be la? xi guca xa yanna caʼru gueeda be. Ma guti ca bixhoze gola du, peru ze ru guidxilayú cásica laa dxi nabani cabe ne dede dxi uyáʼ ni”» (2 Ped. 3:3, 4). Pa guidúʼndanu Biblia guiráʼ dxi, zacané ni laanu para cadi guiaandaʼ laanu maʼ nabáninu lu ca últimu dxi. Maʼ raca stale iza nga guyuu ca binni ni bidxii deche Dios ne guniʼcaʼ mal de laabe ne dede yanna nuucaʼ. «Hombre nuu né binidxabaʼ» riʼ dede yanna cucaalú ca xpinni Dios. Nga runi, cadi naquiiñeʼ guiaandaʼ laanu guizáʼ maʼ gaxha nuu dxi stiʼ Jiobá (Sof. 1:7).

14. Ora rucheechenu diidxaʼ, ximodo racané ni laanu.

¹⁴ Sti cosa ni zanda gacané laanu para gatananu ne cadi chuʼ tu quite laanu nga cadi gusaana de gucheechenu stiidxaʼ Reinu. Jesucristu biʼniʼ mandar ca discípulo stiʼ: «Laché irá xixé guidxi, lachiusiidi irá xixé binni sa nanda naa» ne laaca guniʼbe «lausiidi laaca guni ca irá ni ma gudxe laatu», ora gúnicabe dxiiñaʼ ca zacané ni laacabe para cadi chuʼ tu quite laacabe (Mat. 28:19, 20). Para ganda gúninu dxiiñaʼ riʼ, naquiiñeʼ gúninu ni né stale gana. Ñee ruxuíʼlunu ca xpinni Cristu de Tesalónica cucheechecaʼ diidxaʼ para si guʼyaʼ binni cayúnicaʼ ni la? Guietenaláʼdxinu ca diidxaʼ ni gudxi apóstol Pablu laacabe. Laa guníʼ: «Laudii lugar guni Espíritu Santu dxiiña luguiá tu. Laicaa stiidxa cani ruiʼ né laatu ni rabi Dios laa» (1 Tes. 5:19, 20). Cadi dxandíʼ laaca ratananu ora rinínenu binni de Reinu stiʼ Dios la?

15. Xi guiráʼ zanda guidúʼndanu ora guni adorarnu Dios né binnilídxinu.

 ¹⁵ Guiranu nga racaláʼdxinu gacanenu ca binnilídxinu gánnacaʼ modo gucheechecaʼ diidxaʼ. Nga runi, chupa chonna xpinni Cristu ribeecaʼ ti tiempuhuiiniʼ ora runi adorarcaʼ Dios né binnilídxicaʼ para gánnacaʼ modo guiníʼnecaʼ binni ora maʼ chigucheechecaʼ diidxaʼ. Zanda guidúʼndanenu binnilídxinu ximodo gacanenu binni ni riuulaʼdxiʼ guiziidiʼ jma de Dios. Xi zanda guinínenu laacabe ora chigánnanu laacabe sti biaje yaʼ. Xi tema ziuuláʼdxicabe. Pora nga jma galán chigánnanu laacabe. Nuu xcaadxi xpinni Cristu ribeecaʼ ti tiempuhuiiniʼ ora runi adorarcaʼ Dios né binnilídxicaʼ para gúʼndacaʼ cani chiguieeteʼ lu ca guendaridagulisaa ne gánnacaʼ xi guicábicaʼ lúcani. Ñanda ñúninu zacaca la? Ora guicábinu lu ca guendaridagulisaa ca zaguidxi fe stinu ne zacá guirutiʼ tu zaguite laanu (Sal. 35:18). Ora runi adorarnu Dios né binnilídxinu racaneni laanu guni crenu guiráʼ ni rusiidiʼ Biblia ne laaca racaneni laanu para cadi guiníʼ íquenu ca cosa ni qué rusiene Biblia.

16. Xi racané ca xpinni Cristu ni bibí guiníʼ íquecaʼ jneza ne cadi chuʼ tu quite laacaʼ.

¹⁶ Ra zidiʼdiʼ iza, maʼ guluu Jiobá ndaayaʼ xquidxi. Ximodo yaʼ. Ra maʼ bisiénebe laanu modo chigaca ca diidxaʼ riguixhená ni zeeda lu Biblia. Ora guiníʼ íquenu ndiʼ racaneni laanu guni crenu zudiibe laanu ti ndaayaʼ nabé sicarú. Casi ca xpinni Cristu ni bibí pur espíritu santu zuni mandárnecaʼ Cristu guibáʼ. Ne ndiʼ racaneni laacabe guiníʼ íquecabe jneza ne cadi chuʼ tu quite laacabe. Nga runi, párapeʼ laacabe nga ca diidxaʼ ni gudxi Pablu ca xpinni Cristu de Tesalónica: «Nadxii [Jiobá] laatu, hermanu caʼ, ne naquiiñe cadi guiaana dxí du de udíʼ du diuxquixe Dios pur laatu, purti maca gulí be laatu [...] para ilá tu ra usiá Espíritu Santu ladxidóʼ to ne guni cre tu ni dxandíʼ» (2 Tes. 2:13).

17. Ximodo ruquidxi ca diidxaʼ ni zeeda lu 2 Tesalonicenses 3:1-5 fe stinu.

¹⁷ Guiráʼ cani chiguibani lu Guidxilayú riʼ laaca cadi naquiiñeʼ gudiicaʼ lugar chuʼ tu gusiguii laacaʼ. Pa lu Guidxilayú riʼ nga cabézaluʼ guibániluʼ sin qué chuʼ dxi gátiluʼ la? zaguidxi fe stiluʼ ora gúʼndaluʼ ca diidxaʼ ni guníʼ apóstol Pablu lu 2 Tesalonicenses 3:1-5 (biindaʼ ni). Cadi dxandíʼ rudiʼnu xquíxepeʼ pur ca diidxaʼ ni riguu gana laanu ca la? Ca guiʼchiʼ ni bicaa Pablu ra nuu ca xpinni Cristu de Tesalónica riguixhená cani laanu para cadi guni crenu ca cosa ni qué rusiene Biblia ne xcaadxi cosa cadi jneza ni rusiidiʼ binni. Cumu nabáninu lu ca últimu dxi riʼ la? ¡rudiʼnu xquíxepeʼ Jiobá purtiʼ dede ca yanna caguixhená laanu!