1. Xi runi stale binni pur xiixa ni jma risaca para laa, ne xiñee.

 STALE binni nabé runi stipa pur xiixa ni jma risaca para laa. Cani napa xiiñiʼ ribeecaʼ tiempu, runíticaʼ xpuéltucaʼ ne rúnicaʼ stipa para ganda gusiniisicaʼ xiiñicaʼ. Ne stale de cani racalaʼdxiʼ chichite lu olimpiada la? ribeecaʼ stale tiempu para guni practicarcaʼ, ne pur nga maʼ qué randa ridxaagacaʼ ca xhamígucaʼ. Jesús laaca bisaana de guni caadxi cosa para ganda guni cani jma risaca para laa. Ñanda ñácabe ti binni ricu o nichaganabe ne ñápabe xiiñibe, peru lugar de nga biquiiñebe guiráʼ stipa stibe para guiniʼbe de Reinu stiʼ Dios (Mat. 4:17; Luc. 9:58). Ca discípulo stibe laaca bisaanacaʼ stale cosa pur Reinu stiʼ Dios. Cumu nabé risaca ni para laacabe la? ngue runi, bíʼnicabe guiráʼ ni gunda pur laani (Mat. 4:18-22; 19:27). Nga runi, galán guinabadiidxanu laca laanu: «Xii nga ni jma risaca para naa yaʼ».

2. 1) Xi naquiiñeʼ guni ca xpinni Cristu. 2) Xi xcaadxi dxiiñaʼ zanda guni ca xpinni Cristu.

² Guiráʼ ca xpinni Cristu napa xidé gúnicaʼ caadxi cosa pa racaláʼdxicaʼ gaca xhamígucaʼ Jiobá. Naquiiñeʼ cueecabe tiempu ne gúnicabe stipa para ganda guni orárcabe, gúʼndacabe Biblia, guni adorárcabe Dios né binnilídxicabe, chécabe ca guendaridagulisaa ca ne gucheechecabe diidxaʼ (Jos. 1:8; Mat. 28:19, 20; Heb. 10:24, 25). * Pur stipa stinu ne ndaayaʼ cudii Jiobá laanu nabé nagueenda careeche ca diidxaʼ nacubi ne galán stiʼ Reinu, ne stale nga tu zeʼ lu «dani ra zuba lidxi Jiobá» (Is. 2:2). Zaqueca stale tu runi stipa para guni dxiiñaʼ Betel, gucuí Yoo stiʼ Reinu ne gucuí ra raca ca guendaridagulisaa roʼ, quixhe chaahuicabe modo gaca ca guendaridagulisaa ca ne chigacanécabe ra guca xiixa desgracia. Cadi cayabi Jiobá laanu naquiiñeʼ gúninu  ca dxiiñaʼ riʼ para ganda guicaanu guendanabani ni qué zaluxe, peru cani bizéʼtenu riʼ racanécani para gaca xhiiñaʼ Reinu.

3. 1) Xi zabeendunu pa gúninu xhiiñaʼ Jiobá de guidubi ladxidoʼno. 2) Xi guendarinabadiidxaʼ zacábinu.

³ Yanna nga jma caquiiñeʼ gúninu biaʼ gándatiʼ pur Reinu stiʼ Dios. Cadi dxandíʼ guizáʼ nayecheʼ riuʼnu ora ridúʼyanu nuu stale xpinni Cristu ni cayuni xhiiñaʼ Jiobá de guidubi ladxidóʼ la? Biblia na: «Zudieeʼ ofrenda lii de guidubi ladxiduáʼ. Zusisacaʼ laluʼ, Jiobá, purtiʼ galán para naa guneʼ ni» (Salmo 54:6). Pa gúninu xhiiñaʼ Jiobá de guidubi ladxidoʼno, zabáninu nayecheʼ ne zacaanu stale ndaayaʼ laga cabézanu gueeda Reinu stiʼ Dios (Deut. 16:15; Hech. 20:35). Yanna, galán guiníʼ íquenu: «Ñee zándaruʼ guneʼ jma pur Reinu stiʼ Dios la? Ximodo caquiiñeʼ tiempu stinneʼ, xpuéltuaʼ, stipa stinneʼ ne ca guenda ni napaʼ yaʼ. Xi cadi naquiiñeʼ gusaana de guneʼ yaʼ». Guidúʼyanu xi zanda guizíʼdinu de ca ofrenda ni biʼniʼ binni dxiqué. Ora guidúʼndanu modo biʼniʼ ca binni riʼ zacané ni laanu chuʼnu nayecheʼ.

4. Xi guleendú ca israelita que pur bidiicaʼ ofrenda Dios.

⁴ Dxiqué, ca binni ni bibani ndaaniʼ guidxi Israel gupa xidé bidiicaʼ ofrenda para gutiidilaʼdxiʼ Jiobá stóndacaʼ ne zacá gápacaʼ ndaayaʼ stibe. Nuu de ca ofrenda que naquiiñepeʼ gudiicabe ni, ne xcaadxi de laacani rudiicabe ni purtiʼ riale de laacabe gúnicabe ni (Lev. 23:37, 38). Tobi de ca ofrenda ni riale de laacabe gudiicabe Dios nga ra ruzaaquicabe guidubi ti maniʼ. Dxi biluxe yuʼduʼ ni bicuí Salomón que, nabé stale ofrenda bidiicabe Jiobá (2 Crón. 7:4-6).

5. Xi biʼniʼ Jiobá para ganda gudii binni pobre ofrenda.

⁵ Nanna Jiobá cadi guiráʼ diʼ binni zanda gudii biaʼ queca, ngue runi, gunábabe ca israelita biaʼ nánnabe zanda gudiicaʼ. Ley que na naquiiñeʼ gudiicabe ti maniʼ ne guxhiicabe rini stime, purtiʼ ca ofrenda riʼ zeeda gácacani «casi bandá sti ni qué nihuinni chiqué», ne laani nga ni chiguni Jesús (Heb. 10:1-4). Peru qué ñaca Jiobá naguidxi né laacabe, sínuque biene laacabe.  Quíxhenu ti ejemplu, pa qué ganda gudii ti israelita ti dendxuʼ o ti yuze la? zanda gudiicabe laabe chupa guuguhuiiniʼ. Zacá, dede ca binni pobre zanda gudiicaʼ ofrenda Jiobá (Lev. 1:3, 10, 14; 5:7). Neca zanda gudiicabe gadxé gadxé maniʼ, nuu chupa cosa ni rinabaʼ Jiobá laacabe gúnicabe ora gudiicabe ofrenda ni riale de laacabe.

6. Xi chupa cosa gunabaʼ Jiobá ca israelita que ora gudiicaʼ ti ofrenda ni riale de laacaʼ, ne xiñee nabé risaca gúnicabe cani.

⁶ Primé, naquiiñeʼ gudii binni ca ofrenda ni jma galán. Jiobá ricaa maniʼ ni nazaaca casi ofrenda (Lev. 22:18-20). Nga runi, pa huará ti maniʼ ni chigudii tuuxa Jiobá la? qué ziuuláʼdxibe ni. Guiropa, binni ni chigudii ofrenda ca naquiiñeʼ chuʼ nayá nezalú Dios casi na Ley que, peru pa maʼ bicheebe la? primeru napa xidé gudiibe ti ofrenda pur pecadu o ti ofrenda pur donda stibe (Lev. 5:5, 6, 15). Nabé risaca guni tuuxa cásipeʼ rinabaʼ Dios laa, purtiʼ pa maʼ bicheebe ne gobe ofrenda ni bidiibe de guidubi ladxidoʼbe para chuʼbe galán ne Jiobá la? Ley que na naquiiñeʼ gátibe (Lev. 7:20, 21). Peru pa nuube nayá nezalú Dios ne nazaaca maniʼ ni chigudiibe, zanda chuʼbe nayecheʼ ne qué zuchiiñaʼ xquendabiaanibe laabe. Biblia na: «Ne guyuu guidxi que nayecheʼ purtiʼ de laacaʼ biale gudiicaʼ ofrenda, purtiʼ de guidubi ladxidóʼcabe nga bidiicabe ofrenda Jiobá; ne laaca nabé biecheʼ rey David» (1 Crónicas 29:9).

7, 8. 1) Ximodo runi sentir stale xpinni Cristu ora rúnicaʼ stipa pur gúnicaʼ xhiiñaʼ Reinu. 2) Xi zanda gudii guiráʼ xpinni Cristu Jiobá.

⁷ Ca dxi stinu riʼ, stale xpinni Cristu rúnicaʼ stipa de guidubi ladxidoʼcaʼ para gúnicaʼ xhiiñaʼ Jiobá, ne riuulaʼdxiʼ Jiobá ora rúnicabe zacá. Ne casi riecheʼ Jiobá ora rúnicabe ni na la? laaca nabé ridxá tipa ladxidóʼcabe ora racanécabe sti binni. Ti xpinni Cristu ni racané ra ribí Yoo stiʼ Reinu ne racané binni ni gucaná ora guizaaca xiixa desgracia guníʼ raca nagana para laa gusiene pabiáʼ nayecheʼ riuu ora gacané sti binni. Laa guníʼ sicaríʼ: «Ora ruuyaʼ pabiáʼ nayecheʼ riuu ca xpinni Cristu ora maʼ gurí Yoo stiʼ Reinu sticaʼ o pur gucanedu laacaʼ ora guizaaca xiixa desgracia, racá nga rudiee cuenta pabiáʼ risaca dxiiñaʼ bínidu».

 ⁸ Ca dxi stinu riʼ, nabé nga ruyubi xquidxi Jiobá modo gaca xhiiñaʼ Reinu. Lu iza 1904, bizeeteʼ Charles T. Russell naquiiñeʼ ganna guiráʼ ca xpinni Cristu iquiiñecaʼ tiempu sticaʼ, ne pa runibiaʼcaʼ tuuxa ni zanda gudii náʼ laacaʼ la? iquiiñecaʼ ni gudiibe ca para gaca xhiiñaʼ Reinu, iquiiñecaʼ xpuéltucaʼ, ne cada tobi naquiiñeʼ guni stipa pur iquiiñeʼ cani maʼ bizéʼtenu riʼ para gusisácacaʼ Xpixuaanacaʼ. Neca ricaanu stale ndaayaʼ ra gúninu xhiiñaʼ Jiobá, naquiiñeʼ gúninu stipa pur gúninu ni nabe (2 Sam. 24:21-24). Nga runi, galán guiníʼ íquenu: «Ñee zanda iquiiñeʼ guiráʼ ni napaʼ para guneʼ xhiiñaʼ Jiobá la?».

9. Xi zanda gusiidiʼ ca diidxaʼ ni ruzeeteʼ Lucas 10:2-4 laanu.

⁹ Tiempu stinu. Nabé ribee ca xpinni Cristu stale tiempu ne rúnicaʼ stipa para ganda gutiixhicaʼ ca guiʼchiʼ stinu lu xcaadxi diidxaʼ, para gaca imprimir cani, ne ribeecabe tiempu para gucuícabe Yoo stiʼ Reinu, quixhe chaahuicabe cani chitiidiʼ lu ca guendaridagulisaa roʼ ca, gacanecaʼ binni ni gucaná pur xiixa desgracia ne gúnicabe xcaadxi cosa ni caquiiñeʼ gaca. Cumu veinticuatro hora si nga napa ti dxi stinu la? xi zanda gúninu para iquiiñenu tiempu stinu jneza yaʼ. Guidúʼyanu xi gudxi Jesús ca discípulo stiʼ ora biseendabe laacaʼ chigucheechecaʼ diidxaʼ. Laabe guniʼbe: «Ne cadi ma ziyaana tu neza güi né tu binni diidxaʼ» (Luc. 10:2-4). Xiñee guníʼ Jesús ca diidxaʼ riʼ yaʼ. Ti hombre ni ruundaʼ de Biblia guníʼ sicaríʼ: «Lade ca binni ni nabeza neza Oriente, qué rugapadiúxicaʼ casi rúninu, purtiʼ laanu runiibi íquenu o ruzabi násinu lú tuuxa, peru ca binni que riguiidxicaʼ stale biaje, rindeteʼ íquecaʼ ne ruzuxíbicaʼ dede riguixhe íquecaʼ layú. Nabé runíticabe stale tiempu ora rúnicabe zacá». Cadi cayabi diʼ Jesús laacabe cadi ugapadiúxicabe binni, sínuque racaláʼdxibe gudiicaʼ cuenta huaxiéʼ tiempu nápacaʼ ne iquiiñecaʼ ni para ca cosa ni jma risaca (Efes. 5:16). Ñee zanda gúninu ni na ca diidxaʼ riʼ ne zacá gúninu jma lu xhiiñaʼ Reinu la?

10, 11. 1) Ximodo riquiiñeʼ bueltu ni rudiʼnu para gaca xhiiñaʼ Reinu. 2) Ximodo zanda gacané principiu ni zeeda lu 1 Corintios 16:1, 2 laanu.

¹⁰ Xpuéltunu. Nabé stale bueltu riquiiñeʼ para ganda gaca ca dxiiñaʼ ni raca ndaaniʼ xquidxi Dios. Cada iza riquiiñecabe millón de dólar para gacanécabe ca binnigola ni riganna ca neza binni ridagulisaa, ca precursor especial ne misioneru. Dede lu iza 1999 maʼ gurí jma de 24,500 Yoo stiʼ Reinu ndaaniʼ ca guidxi ra huaxiéʼ napa binni bueltu, ne caquiiñeʼ cuí sti 6,400 Yoo stiʼ Reinu. Ne cada beeu raca imprimir biaʼ 100 millón de revista Torre stiʼ rapa ne ¡Despertad! Randa raca ca dxiiñaʼ riʼ pur bueltu ni rudii binni biaʼ naʼ ladxidóʼ.

¹¹ Apóstol Pablu bidii ti principiu ni zanda gacané laanu ora gudiʼnu bueltu biaʼ naʼ ladxidoʼno (biindaʼ 1 Corintios 16:1, 2). Jiobá gudxi apóstol Pablu gabi ca xpinni Cristu de Corinto cueecaʼ ti ndaa bueltu ra ruzulú semana ne cadi cuézacabe dede guiluxe semana para gúʼyacabe pa biaana xiixa. Zacaca nga rúninu yanna, dede ante riguíxhenu pabiáʼ zanda gudiʼnu (Luc. 21:1-4; Hech. 4:32-35). Nabé riuulaʼdxiʼ Jiobá ora ruuyaʼ rudiʼnu biaʼ nápanu.

12, 13. 1) Xi cadi naquiiñeʼ guiaandaʼ laanu pa riníʼ íquenu qué zanda gúninu xhiiñaʼ Reinu. 2) Ximodo zanda gacané Jiobá laanu.

¹² Stipa stinu ne cani nánnanu gúninu. Racané Jiobá laanu ora riquiiñenu stipa stinu ne cani nánnanu gúninu pur xhiiñaʼ Reinu. Maʼ bidii stiidxabe zudiibe stipa laanu ora maʼ bidxáganu (Is. 40:29-31). Yanna, pa riníʼ íquenu qué zanda gúninu xhiiñaʼ Dios, ne rábinu nuu xcaadxi binni ni jma nanna gúnini la? cadi guiaandaʼ laanu zanda gacané Jiobá laanu para gúninu ni, cásica gucanebe Bezalel ne Oholiab  (Éx. 31:1-6; biiyaʼ dibuju ni zeeda ra ruzulú tema riʼ).

¹³ Jiobá, Dios stinu, cayabi laanu gudiʼnu guiráʼ ni nápanu laa (Prov. 3:27). Dxi cabí yuʼduʼ stiʼ Jerusalén sti biaje, gudxi Jiobá ca judíu que ca diidxaʼ riʼ: «Laquixhe ladxidoʼto lu ca neza stitu». Ni racalaʼdxiʼ Jiobá nga guiníʼ ique chaahuicabe cani cayúnicabe (Ageo 1:2-5). Maʼ gadxé ni cayuni ca judíu que ne maʼ cadi cazaaláʼdxicaʼ gúnicaʼ xhiiñaʼ Jiobá. Nga runi, galán guiníʼ íquenu: «Ñee ni jma risaca para naa nga guneʼ xhiiñaʼ Jiobá la? Ñee zanda quixheʼ ladxiduáʼ lu ca neza stinneʼ ti ganda guneʼ xhiiñaʼ Reinu biaʼ gándatiʼ lu ca últimu dxi riʼ la?».

14, 15. 1) Ximodo racané ejemplu stiʼ ca xpinni Cristu laanu, neca pobre laacaʼ. 2) Xi naquiiñeʼ quixhe íquenu gúninu.

¹⁴ Stale xpinni Cristu nabézacaʼ ndaaniʼ guidxi ra nabé pobre binni ne ra nabé nuu guendanagana, peru xquidxi Jiobá runi stipa pur gacané laacabe (2 Cor 8:14). Neca huaxiéʼ bueltu nápacabe, riuuláʼdxicabe gudiicabe biaʼ nápacabe. ¡Guizáʼ riuulaʼdxiʼ Jiobá ora ruuyaʼ rudiicabe biaʼ nápacabe de guidubi ladxidóʼcabe! (2 Cor. 9:7.)

¹⁵ Ndaaniʼ ti guidxi stiʼ África ra nabé pobre binni, chupa chonna xpinni Cristu rucaacaʼ ti seña lu layú sticaʼ ti guiráʼ ni guiasa biaʼ ra nucaacabe seña ca, gutoocabe ni ne gudiicabe bueltu ca para gacanécabe gaca xhiiñaʼ Reinu. Laaca caquiiñeʼ cuiʼ ti Yoo stiʼ Reinu ndaaniʼ guidxi ca. Ca xpinni Cristu ni nabeza ndaaniʼ guidxi riʼ racaláʼdxicaʼ gacanecaʼ cuiʼ Yoo stiʼ Reinu riʼ, peru bizulú dxiiñaʼ que tiempu rudxiibacabe biidxiʼ. Xi biʼniʼ ca xpinni Cristu riʼ yaʼ. Ridxíʼ rigacanécabe ra cabí Yoo stiʼ Reinu, ne huaxhinni rudxiibacabe biidxiʼ. ¡Guizáʼ riuuláʼdxicabe gacanécabe! Zacapeʼ nga biʼniʼ ca xpinni Cristu ni bibani Macedonia. «Neca huaxiéʼ napa cabe», gunábacabe apóstol Pablu gudii lugar gacanécabe xcaadxi xpinni Cristu (2 Cor. 8:1-4). Zacaca nga naquiiñeʼ gúninu, Biblia na «cada tobi naquiiñeʼ gudii biaʼ ndaayaʼ cudii Jiobá laa, Dios stiluʼ» (Deuteronomio 16:17).

16. Xi naquiiñeʼ guiduʼyaʼ chaahuinu para gánnanu pa riuulaʼdxiʼ Jiobá cani rudiʼnu laa.

¹⁶ Peru nuu ti cosa ni cadi naquiiñeʼ guiaandaʼ laanu. Naquiiñeʼ guiduʼyaʼ chaahuinu pa riuulaʼdxiʼ Jiobá cani rudiʼnu laa, cásica biʼniʼ ca israelita que. Peru cadi naquiiñeʼ gusaana de gúninu ca cosa ni jma risaca. Xi laacani yaʼ. Gudiʼnu ni caquiiñeʼ binnilídxinu ne cadi gusaana de guni adorarnu Dios. Cadi galán diʼ iquiiñenu tiempu stinu para gacanenu xcaadxi binni ne gusaana de gudiʼnu ni caquiiñeʼ binnilídxinu. Purtiʼ pa gúninu zacá, casi ñaca cudiʼnu tiempu ni qué gápanu Dios (biindaʼ 2 Corintios 8:12). Laaca cadi naquiiñeʼ gusaana de chuʼnu gaxha de Jiobá (1 Cor. 9:26, 27). Peru pa chinándanu ca conseju ni rudii Biblia, ziuʼnu nayecheʼ ne zadxá tipa ladxidoʼno ora gúninu xhiiñaʼ Reinu, ne «ziulaʼdxi Dios» cani gúninu.

17, 18. 1) Xi runi sentirnu pur ca xpinni Cristu ni runi stipa pur guni jma lu xhiiñaʼ Reinu. 2) Xi naquiiñeʼ guiníʼ íquenu.

¹⁷ Lu guidubi naca Guidxilayú nuu xpinni Cristu, hombre ne gunaa, riquiiñecaʼ tiempu sticaʼ, stipa sticaʼ ne xpuéltucaʼ para gúnicaʼ xhiiñaʼ Reinu; zanda guininu zeeda gaca ni rúnicabe ca «casi ti ofrenda» (Filip. 2:17). Ñee cadi rusisácanu cani rúnicabe ca la? Laaca rusisácanu ni runi xheelaʼ ne xiiñiʼ ca binni ni zaniruʼ lu xhiiñaʼ Reinu.

¹⁸ Nápanu stale dxiiñaʼ gúninu lu xhiiñaʼ Reinu. Guni orarnu Jiobá ne guiníʼ íquenu ximodo zanda gúninu jma lu xhiiñaʼ Dios. Zanda guni crenu zacaanu stale ndaayaʼ yanna ne zacaarunu jma stale «dxi usulú guidxilayú cubi» ca (Mar. 10:28-30).