Lu iza 1985, dxi napaʼ 10 iza, yendá caadxi hombrehuiiniʼ de Camboya ra scuela stinneʼ ndaaniʼ guidxi Columbus (Ohio, Estados Unidos). Tobi de laacabe nanna guiníʼ chupa chonna diidxaʼ inglés, ne biquiiñeʼ caadxi dibuju para bisiene naa pabiáʼ feu modo bibani binni xquidxi, modo biiticabe laacaʼ ne modo bixooñelucaʼ de guidxi que. Nabé ruunaʼ guiráʼ gueelaʼ ora rietenalaʼdxeʼ ca xcuidihuiiniʼ que. Racalaʼdxeʼ güeniáʼ laacabe de Paraísu ne gabeʼ laacabe zadxiña dxi guiasa gueʼtuʼ, peru qué riénecabe inglés. Neca nahuiineruáʼ, gudixheʼ iqueʼ guiziideʼ camboyano ti ganda guinieniáʼ laacabe de Jiobá. Qué niníʼ iqueʼ pabiáʼ risaca ni gudixheʼ iqueʼ guneʼ que.

Guca nagana para naa guiziideʼ camboyano. Chupa biaje gucalaʼdxeʼ nusaanaʼ de niziideʼ ni, peru biquiiñeʼ Jiobá bixhozeʼ ne jñaaʼ para uguucaʼ gana naa ti cadi gusaanaʼ de guiziideʼ diidxaʼ que. Despué, gudxi ca maestru stinneʼ ne ca xcompañeruaʼ naa guiziideʼ ti dxiiñaʼ ra guneʼ ganar stale bidxichi. Peru naa racalaʼdxeʼ gacaʼ precursor, ngue runi, gudixhe iqueʼ guiziideʼ ti dxiiñaʼ ni guneʼ galaa dxi ti ganda gacaʼ precursor. Ora rireeʼ de scuela, rigucheecheniáʼ caadxi precursor diidxaʼ. Ne laaca gucaniáʼ caadxi baʼduscuela ni caziidiʼ inglés, ne guizáʼ gucané ni naa despué.

Dxi napaʼ 16 iza gúdxicabe naa nuu ti grupu de xpinni Cristu ni riníʼ camboyano ndaaniʼ guidxi Long Beach (California, Estados Unidos). Ngue runi, yegannaʼ ca xpinni Cristu de guidxi que, ne raqué biziideʼ guundaʼ camboyano. Cásipeʼ binduuxeʼ scuela gucaʼ precursor ne bicheecheʼ diidxaʼ ra nuu ca binni de Camboya ni nabeza gaxha de ra lidxeʼ. Dxi napaʼ 18 iza guníʼ iqueʼ chindezaʼ Camboya. Nabeza 10 millón de binni ndaaniʼ guidxi que. Neca malu binni raqué, peru gudixhe iqueʼ chaaʼ guidxi que, purtiʼ nannaʼ chupa chonna si de laacaʼ maʼ binadiágacaʼ stiidxaʼ Reinu. Ca dxi que ti neza binni ridagulisaa si nuu ndaaniʼ guidubi naca guidxi que ne 13 si ni rucheeche diidxaʼ nuu ndaaniʼ ni. Napaʼ 19 iza primé biaje guyaaʼ guidxi que, ne chupa iza despué maʼ yendezaʼ raqué. Bidxelaʼ ti dxiiñaʼ ni guneʼ galaa dxi si, bitiixheʼ sti diidxaʼ ne gucaʼ maestru de inglés, ngue gucané naa para cadi gusaanaʼ de gucheecheʼ diidxaʼ. Despué bichaganayaʼ ti gunaa xpinni Cristu ne laaca riuulaʼdxiʼ gucheecheʼ diidxaʼ. Guizáʼ stale binni de Camboya maʼ gucanedu para gácacaʼ xpinni Dios.

Jiobá maʼ bidii naa guiráʼ ni gunabaʼ ladxiduáʼ (Sal. 37:4). Ne dxiiñaʼ ni jma rusiecheʼ ladxidóʼ binni nga gacané stobi gaca xpinni Cristu. Maʼ dieciséis iza de nuaaʼ Camboya, ne maʼ cadi 13 si xpinni Jiobá nuu ndaaniʼ guidxi riʼ, sínuque maʼ nácacabe 12 neza binni ridagulisaa ne tapa grupu. (Jason Blackwell guníʼ ni bizaaca.)