1, 2. 1) Xiñee nuu tiru qué rudiʼnu cuenta de xiixa cosa. 2) Xi nánnanu de Reinu stiʼ Dios.

ZÁNDACA huadiiluʼ cuenta, gadxé gadxé modo rietenalaʼdxiʼ binni xiixa ni bizaaca. Zacaca raca ti binni despué de gabi ti doctor laa xi guendahuará napa, qué rietenalaʼdxiʼ guiráʼ ni gábibe laa. Nuu tiru qué ridxela binni llave o lente stiʼ neca nexheʼ ni nezalú. Xiñee rizaaca cani bizéʼtenu riʼ yaʼ. Ca científicu ca nacaʼ rácani purtiʼ cayúninu ti cosa ne racaláʼdxinu gúninu sti cosa. Nga runi qué zanda diʼ guni binni ti cosa jneza pa gadxé ra nuu ique.

² Tiempu riʼ laaca zacaca cazaaca stale binni, gadxé ra nuu íquecaʼ ne qué rudiicaʼ cuenta xiñee nuu stale guendanagana lu Guidxilayú. Zándaca rudiicabe cuenta bichaa modo nabani binni dede lu iza 1914, peru qué gánnacabe xiñee cazaaca cani. Cumu ridúʼndanu Biblia la? nánnanu bizulú biʼniʼ mandar Reinu stiʼ Dios lu iza 1914, iza guca Jesús Rey guibáʼ. Peru laaca nánnanu caʼruʼ gaca guiráʼ ni rinábanu Dios ora runi orarnu: «Biseendaʼ reinu stiluʼ. Gaca ni naluʼ cásica guibáʼ zaqueca lu guidxilayú» (Mat. 6:10, TNM). Para ganda gaca ni na Dios ndaaniʼ Guidxilayú cásica rácani guibáʼ la? primé naquiiñeʼ guinitilú binni malu.

3. Xii nga ni maʼ nánnanu purtiʼ ridúʼndanu Stiidxaʼ Dios.

 ³ Cumu qué rusaana de guidúʼndanu Stiidxaʼ Dios la? zanda guidúʼyanu cayaca ni na caadxi diidxaʼ riguixhená tiempu riʼ. Peru ca binni ni qué ruundaʼ Stiidxaʼ Dios qué gánnacaʼ de laani. Cumu jma nga riníʼ íquecabe de modo guibánicabe ne gúnicabe ni riuuláʼdxicabe la? qué rudiicabe cuenta bizulú Cristu cayuni mandar dede lu iza 1914 ne maʼ cadi candaa zunitilube guidxilayú malu riʼ. Yanna, pa maʼ xadxí de cayúniluʼ xhiiñaʼ Dios, galán guiníʼ íqueluʼ: «Ñee runeʼ cré mayaca guinitilú ca cosa malu riʼ, cásica bineʼ cré ni dxiqué la?». Ne pa cadi xadxí de nácaluʼ Testigu, guníʼ ique: «Xii nga ni jma cá iqueʼ yaʼ». Intiica guiníʼ íquenu, guidúʼyanu chonna razón nabé risaca ni rusihuinni maʼ cadi candaa zaca ni na Dios lu Guidxilayú riʼ.

4, 5. 1) Xi huayuni Jesús dede lu iza 1914. (Biiyaʼ dibuju ni zeeda ra ruzulú tema riʼ.) 2) Xi zeeda gaca guionnaʼ hombre dxiʼbaʼ maniʼ ni nanda Jesús. 3) Ximodo maʼ guca ni na diidxaʼ riguixhená riʼ.

⁴ Lu iza 1914, guca Jesucristu Rey, ne lu Biblia rieeteʼ dxíʼbabe ti maniʼ quichiʼ. Oraqueca bireebe para gunduuxebe guidxilayú malu stiʼ Binidxabaʼ ne guseguyoobe laa ndaaniʼ ti bizé roʼ (biindaʼ Apocalipsis 6:1, 2). Guiráʼ ni rieeteʼ lu capítulo 6 stiʼ Apocalipsis rusihuinni cani nagueenda zadale cosa malu despué de gaca Jesús Rey. Zadinde ca guidxi ca, ziaadxaʼ ni gó binni, ziuu guendahuará ne xcaadxi cosa ni ruuti binni ni qué huayuu dxi guihuinni. Lu Biblia rieeteʼ zeeda gaca ca guendanagana riʼ casi chonna hombre dxiʼbaʼ maniʼ ne nándacaʼ Jesucristu (Apoc. 6:3-8).

⁵ Maca bieeteʼ ziuu guendaridinde lu Guidxilayú ne maʼ qué ziuu binni tobi si. Ne guyuu guendaridinde neca stale guidxi guniʼcaʼ chuʼcaʼ tobi si ti zacá chuʼ dxi ca guidxi ca. Guca si primé guendaridinde lu guidubi Guidxilayú, guca xcaadxi guendaridinde, ne zaqué maʼ qué ñuu binni tobi si. Neca maʼ ricu stale guidxi ne stale ni maʼ biʼniʼ ca científicu ca dede iza 1914, nuuruʼ binni qué gapa ni gó ne pur riaadxaʼ ni gó binni nga nuu guendaridinde lu guidubi naca Guidxilayú. Ñee cadi dxandíʼ cadúʼyanu guiráʼ clase guendahuará, desgracia ne xcaadxi cosa ni cayuuti millón de binni guiráʼ iza la? ne yanna nga jma malu ca guendahuará ca, jma stale binni cayuuti cani ne qué huayuudxí gácacani biaʼ cayaca cani yanna. Ñee rudiiluʼ cuenta xiñee cayaca guiráʼ cani la?

6. 1) Tuu nga cani bidii cuenta maʼ cayaca ca diidxaʼ riguixhená ni zeeda lu Biblia. 2) Xi gudixhe íquecabe gúnicabe.

⁶ Stale binni jma nga guyuucaʼ xizaa pur primé guendaridinde ni guca lu guidubi Guidxilayú ne pur guendahuará ni binibiáʼ binni casi gripe española. Peru ca xpinni Cristu ni bibí pur espíritu santu gulézacaʼ niluxe tiempu gudixhe Dios guni mandar «cani cadi judíu» lu iza 1914 (Luc. 21:24). Ca xpinni Cristu ni bibí né espíritu santu qué ganna chaahuicaʼ xi guiráʼ zazaaca, peru nánnacaʼ zaca xiixa lu Reinu stiʼ Dios lu iza 1914. Cásipeʼ bidiicabe cuenta maʼ cayaca ni na ca diidxaʼ riguixhená ni zeeda lu Biblia, qué nidxíbicabe ora guníʼcabe maʼ bizulú cayuni mandar Reinu stiʼ Dios. Pur ni bíʼnicabe ca nabé guzananda binni laacabe, ne cumu gúcani ndaaniʼ stale guidxi la? bihuinni cayaca ni na ca diidxaʼ riguixhená ni zeeda lu Biblia. Stale iza despué, gudixhe ca enemigu stiʼ Reinu riʼ caadxi ley para gucaalucaʼ ca xpinni Dios. Ne laaca gudíñecabe laacaʼ, biteguyoocabe laacaʼ, bigaandacabe laacaʼ lu yaga, biʼniʼ fusilárcabe laacaʼ ne  gúxhacabe yánnicaʼ (Sal. 94:20; Apoc. 12:15).

7. Xiñee stale binni qué rudii cuenta xi pur cayaca stale cosa lu Guidxilayú riʼ.

⁷ Pa maʼ bizaaca stale cosa ni bisihuinni maʼ cayuni mandar Reinu stiʼ Dios guibáʼ, xiñee stale binni cadi cudii cuenta de laani yaʼ. Xiñee qué ganda guni crécabe maʼ cayaca ca diidxaʼ riguixhená ni zeeda lu Biblia casi maca caníʼ ca xpinni Dios yaʼ. Ñee runi crécabe ni ruuyaʼ sícabe la? (2 Cor. 5:7.) Ñee jma nuucabe xizaa pur ca cosa ni caquiiñecabe ne pur nga qué ganda gúʼyacabe ni cayuni Dios la? (Mat. 24:37-39.) Ñee rúnicabe modo riníʼ ique guiráʼ binni ne ricá íquecabe ugaandacabe guiráʼ ni culuíʼ guidxilayú stiʼ Binidxabaʼ laacabe la? (2 Cor. 4:4.) Naquiiñeʼ gápanu fe ne guiníʼ íquenu xi guiráʼ cayuni Reinu stiʼ Dios yanna. ¡Guizáʼ nayecheʼ riuʼnu purtiʼ nánnanu xi pur cayaca guiráʼ cosa riʼ!

8-10. 1) Ximodo cayaca ni na 2 Timoteo 3:1-5. 2) Xi rusihuinni zeʼ dxi jma nagana modo nabani binni.

⁸ Guiropa razón nápanu para guni crenu mayaca guni mandar Reinu stiʼ Dios nga purtiʼ zeʼ dxi jma zidale guendaquéiquiiñeʼ. Maʼ biaʼ ti gayuaa iza de cadúʼyanu cayaca ni na 2 Timoteo 3:1-5 lu guidubi naca Guidxilayú ne zeʼ dxi jma zidale cani. Ñee laaca rudiiluʼ cuenta zacá ni la? Guidúʼyanu chupa chonna ejemplu ni rusihuinni zacá ni (biindaʼ 2 Timoteo 3:1, 13).

⁹ Maʼ gadxé modo bibani binni lu ca iza 1940 ne 1950 de modo nabani binni yanna, purtiʼ lu ca iza que nabé bidxagayaa binni ora ganna cadi jneza modo nabani tuuxa runiné dxiiñaʼ, modo nabani ca binni ni ridiʼdiʼ lu televisión, cani riguite xiixa deporte ne cani rinanda moda. Ca dxi riʼ, maʼ qué ridxagayaanu ora ridúʼyanu guiráʼ ladu cadinde binni ne riuunecaʼ ni cadi xheelacaʼ. Ne zeʼ dxi jma ruyubi binni guniná stobi, ne nuu nisi ruyubi chuʼné stobi para si gaca xcustu o qué riacaʼ guirutiʼ. Guiráʼ cosa ni cadi jneza biiyaʼ binni lu televisión lu ca iza 1950, tiempu riʼ maʼ qué ridxagayaacabe gúʼyacabe cani. Ca dxi riʼ, maʼ bichaa ca muxeʼ ca modo riníʼ ique binni, purtiʼ laacabe nga riguíxhecabe  stale de cani ridiʼdiʼ lu televisión ne cani caree de moda ne maʼ bicaacabe binni guiníʼ ique biaʼsi nga modo nabánicabe. ¡Guizáʼ riéchenu ora gánnanu xi riníʼ ique Dios de laani! (Biindaʼ Judas 14, 15.)

¹⁰ Laaca galán guchaaganu modo guca xpiaʼ cani nahuiiniʼ lu ca iza 1950 ne xpiaʼ cani nahuiiniʼ tiempu riʼ. Dxiqué, ca binni ni napa xiiñiʼ nabé riuucaʼ xizaa pa cubaʼ ca xiiñicaʼ gueza, xhúdxicaʼ o guyaacaʼ casi ora cayúnicaʼ cosa dxabaʼ. Yanna riʼ nabé ridxíbinu ora runadiáganu cani cazaaca guiráʼ dxi, guzéʼtenu chonna ejemplu. Ti baʼduscuela de 15 iza bicuaagu ca xcompañeru, biitibe chupa ne bininabe 13. Chupa chonna hombrehuiiniʼ ni naxudxi biiticaʼ ti dxaapahuiiniʼ de gaʼ iza ne gudíñecaʼ bixhoze dxaapahuiiniʼ ca ne ti xprimu. Sti noticia na biaʼ galaa de guiráʼ guendaquéiquiiñeʼ ni huayaca lu ca últimu chii iza ndaaniʼ ti guidxi stiʼ Asia, ca hombrehuiiniʼ ca nga bíʼnicaʼ ni. Cadi dxandíʼ guiráʼ binni nga rudii cuenta zeʼ dxi jma nagana modo nabáninu la?

11. Xiñee stale binni qué rudii cuenta pa zeʼ dxi jma nagana modo nabáninu.

¹¹ Biáʼsipeʼ ni guníʼ apóstol Pedru. Laa na: «Dxi mayaca gueeda Señor ziasa caadxi ni nabani casi na ique, ne zuni burla Dios. Zaná caʼ: “Cadi na be zeeda be la? xi guca xa yanna caʼru gueeda be. Ma guti ca bixhoze gola du, peru ze ru guidxilayú cásica laa dxi nabani cabe ne dede dxi uyáʼ ni”» (2 Ped. 3:3, 4). Xiñee nuu binni riníʼ ique zacá yaʼ. Purtiʼ maʼ qué ridxagayaanu ora guizaaca xiixa pa guiráʼ dxi cayunadiáganu de laani. Zándaca zadxagayaanu pa málasi guchaa xpiaʼ tuuxa ni jma xhamígunu, peru pa ra zidiʼdiʼ iza chaahuiʼ chaahuiʼ ziguchaa xpiaʼ binni la? qué zudiʼnu cuenta. Zándaca qué zadxagayaapenu pur cani cazaaca riʼ, peru naquiiñeʼ chuʼnu cuidadu.

12, 13. 1) Xiñee cadi naquiiñeʼ gusaana de gúninu ni na Jiobá neca nagana nabáninu tiempu riʼ. 2) Xi zacané laanu gudxiilunu ca dxi nagana bizeeteʼ Pablu.

¹² Apóstol Pablu maca guníʼ «jma nagana zaca ni ora mayaca izaa xhi guidxilayú» (2 Tim. 3:1). Peru neca nagana ca dxi riʼ cadi naquiiñeʼ guidxíbinu ni guizaaca ne cadi gusaana de gúninu ni na Jiobá. Zanda gudxiilunu intiica guendanagana, purtiʼ zacané Jiobá laanu, espíritu stiʼ ne ca xpinni Cristu. «Dios cayuni irá ni ne enda nandxóʼ stiʼ», ne cadi laanu (2 Cor. 4:7-10).

¹³ Ra bizulú Pablu bizeeteʼ xi guiráʼ zazaaca lu ca últimu dxi riʼ la? guníʼ «laca naquiiñe gannu». Ca diidxaʼ riʼ rusihuínnicani zaca guiráʼ ni bizeetebe. Nga runi, nanna dxíchinu zúniruʼ binni guendaquéiquiiñeʼ dede dxi gunitilú Jiobá laacaʼ. Ca binni ni ruundaʼ de historia ruzeetecaʼ binitilú caadxi guidxi dxiqué purtiʼ nabé bíʼnicaʼ cosa dxabaʼ. Qué huayuu dxi guni binni cosa dxabaʼ biaʼ cayácani yanna riʼ. Zándaca stale binni qué riníʼ ique xiñee cazaaca cani, peru guiráʼ ni cayaca dede iza 1914 rusihuinni cani maʼ cadi candaa zunitilú Reinu stiʼ Dios guiráʼ cosa malu riʼ.

14-16. Gunáʼ nga guionna razón nápanu para guni crenu mayaca gueeda Reinu stiʼ Dios.

¹⁴ Guionna razón nápanu para guni crenu maʼ cadxiña dxi gunitilú Dios guiráʼ cosa malu nga ni cazaaca xquidxi. Ante gaca Jesús Rey guibáʼ, maca nuu ti grupu de xpínnibe ni bibí né espíritu santu ni cayuni xhiiñaʼ Dios né stale gana. Xi bíʼnicabe ora bíʼyacabe qué nizaaca chupa chonna de cani guníʼ íquecabe zazaaca lu iza 1914 yaʼ. Stale de laacabe bíʼnirucabe ni na Jiobá.  Neca guzananda binni laacabe ne gúpacabe guendanagana casi guirácabe biʼniʼ huantárcabe ne qué nusaana de ñúnicabe xhiiñaʼ Jiobá biaʼ dxi bibánicabe lu Guidxilayú.

¹⁵ Jesús bizeeteʼ xi zazaaca ora maʼ guiluxe guidxilayú stiʼ Binidxabaʼ, laa guníʼ: «Zaca irá nga ante gati ca binni nuu yanna riʼ» (biindaʼ Mateo 24:33-35). Ora guniʼbe de «ca binni nuu yanna riʼ», caniʼbe de chupa grupu de ca xpínnibe ni bibí. Ca xpínnibe ni nuu lu primé grupu ca biiyacaʼ guiráʼ ni bizaaca lu iza 1914 ne biénecaʼ maʼ bizulú Cristu cayuni mandar iza ca. Primé grupu riʼ bibícabe né espíritu santu lu iza 1914 o ante para gácacabe xiiñiʼ Dios (Rom. 8:14-17).

¹⁶ Guiropa grupu ni nuu lade «ca binni nuu yanna riʼ» ni guníʼ Jesús laaca bibicaʼ né espíritu santu stiʼ Dios dxi nabániruʼ xcaadxi xpinni Cristu de primé grupu que lu Guidxilayú. Nga runi, cadi guiráʼ diʼ xpinni Cristu ni bibí né espíritu santu ni nabani yanna nga nácacaʼ de «ca binni nuu yanna riʼ» casi guníʼ Jesús que. Cani bibí ni nuu lu guiropa grupu ca maʼ huaniisicaʼ. Peru ca diidxaʼ ni guníʼ Jesús ni zeeda lu Mateo 24:34 ruzeeteʼ: «Zaca irá nga ante gati ca binni nuu yanna riʼ», nga runi, zanda guininu nabániruʼ chupa chonna de ca xpinni Cristu ni nuu lu guiropa grupu ca lu Guidxilayú ante guzulú ca dxi jma nagana. Nga rusihuinni maʼ cadi candaa para gunitilú Jesucristu, Rey stiʼ Reinu stiʼ Dios, guiráʼ binni malu ne guzulú guidxilayú cubi stiʼ Dios (2 Ped. 3:13).

17. Xi rusihuinni ca diidxaʼ riguixhená ni maʼ bidúʼndanu riʼ.

¹⁷ Xi riníʼ íquenu ora ridúʼyanu maʼ cayaca guionnaʼ diidxaʼ riguixhená riʼ. Jesús guníʼ qué gánnanu padxí ne pórapeʼ nga guiluxe guidxilayú malu riʼ (Mat. 24:36; 25:13). Peru nánnanu «ma ora ireeche bacaandaʼ» casi guníʼ apóstol Pablu (biindaʼ Romanos 13:11). Nga rusihuinni maʼ nabáninu lu ca últimu dxi riʼ. Pa guiduʼndaʼ chaahuinu ca diidxaʼ riguixhená zeeda lu Biblia ne cani cayuni Jiobá ne Jesús, qué zaca nagana para laanu gudiʼnu cuenta maʼ cadxiña dxi guinitilú guidxilayú stiʼ Binidxabaʼ riʼ.

18. Xi zazaaca ca binni ni qué runi cré pa maʼ cayuni mandar Reinu stiʼ Dios.

¹⁸ Ca binni ni qué runi cré pa maʼ naca Jesucristu, Rey ni dxiʼbaʼ ti maniʼ quichiʼ, maʼ cadi candaa zudiicaʼ cuenta cadi jneza ni biʼniʼ crecaʼ. Qué zanda guilácabe dxi cuidxi Dios cuenta binni. Ora gueeda dxi stiʼ Dios, stale binni zucaa ridxi: «Tuu ndi zanda guni huantar ni» yaʼ (Apoc. 6:15-17). Capítulo 7 stiʼ Apocalipsis cacabi ni. Ca xpinni Cristu ni bibí né espíritu santu ne cani chiguibani lu Guidxilayú riʼ nga zuni «huantar» dxi stiʼ Jiobá ne laacaʼ nga cani guilacaʼ, purtiʼ guyuulaʼdxiʼ Dios ni bíʼnicaʼ. Despué zalá «jma binni» ni zeeda gaca casi xcaadxi dendxuʼ lu ca dxi jma nagana ca ne zabánicaʼ lu guidxilayú cubi stiʼ Dios (Apoc. 7:9, 13-15).

19. Xi cabeza guiráʼ cani runi cré maʼ cadxiña dxi guinitilú guidxilayú stiʼ Binidxabaʼ.

¹⁹ Pa guni crenu de guidubi ladxidoʼno cayaca ca diidxaʼ riguixhená ni zeeda lu Biblia ca dxi stinu riʼ, qué zudiʼnu lugar quite guidxilayú stiʼ Binidxabaʼ laanu ne zánnanu xiñee cazaaca guiráʼ ni cadúʼyanu tiempu riʼ. Maʼ cadi candaa zunitilú Jesús guiráʼ binni malu riʼ lu guerra ni láʼ Armagedón (Apoc. 19:11, 19-21). ¡Bixuiʼlú pabiáʼ nayecheʼ zabáninu despué! (Apoc. 20:1-3, 6; 21:3, 4.)