BIXUIʼLÚ cayuuyaluʼ ti viuda pobre guiidxi dxiichiʼ tobi lucha xiiñiʼ. ¡Qué guirá guidxagayaabe ni guca que! Cadi xadxí de guti xiiñibe ne yanna maʼ nabani ne cuxidxiné laabe. Nabé nayecheʼ guyuube ora gudxi hombre ni nuu de biuuzaʼ ra lídxicabe que laabe: «Biiyaʼ, maʼ nabani xiiñiluʼ».

Maʼ raca biaʼ chonna mil iza de bizaaca ni bizéʼtenu riʼ ne relatu riʼ zeeda ni lu 1 Reyes capítulo 17. Biuuzaʼ que nga Elías, ti profeta stiʼ Dios, ne jñaa baʼduhuiiniʼ que nga ti viuda ni qué rieeteʼ lá de guidxi Sarepta. ¡Nanna pabiáʼ biguidxi fe stiʼ gunaa riʼ ora biʼyaʼ bibani baʼduhuiiniʼ que sti biaje! Guidúʼyanu xi zanda guizíʼdinu de gunaa riʼ.

Ca dxi biʼniʼ mandar Acab, ti rey malu, ndaaniʼ guidxi Israel. Maca guníʼ Jiobá zandaa para guiaba nisaguié. Despué de guníʼ Elías maʼ qué ziaba nisaguié, gupa Jiobá laabe para cadi ñuuti Acab laabe ne biʼniʼ Dios ti milagru para biyaanaʼ laabe. Biseendaʼ caadxi biaʼquiʼ para yené pan ne beela para gobe. Óraque gudxi Jiobá laabe: «Biasa, guyé ndaaniʼ guidxi Sarepta de Sidón, ne napuʼ xidé guiaanuʼ raqué. ¡Biiyaʼ! Dxandipeʼ zabeʼ ti gunna, ti viuda, gudii ni goloʼ» (1 Rey. 17:1-9).

Ora yendá Elías ndaaniʼ guidxi Sarepta, biiyabe ti viuda pobre ni canatopa yaga. Zándaca guníʼ íquebe pa gunaa que nga gudii ni gobe. Peru ruluíʼ nabé pobre gunaa riʼ para gúnini. Neca zaqué guníʼ ique Elías, guníʼnebe gunaa que ne gúdxibe laa: «Rinabaʼ lii chicaaluʼ caadxi nisa gueeʼ». Biree si gunaa que zicaa nisa que, gúdxibe laa: «Rinabaʼ lii guedaneluʼ ti ndaa pan gahuaʼ» (1 Rey. 17:10, 11). Gunaa que na zudii nisa ni gunábabe que, peru gudii ni gobe la? nagana huiiniʼ nuuni.

 Gunaa que bicabi laabe: «Cásica dxandíʼ nabani Jiobá Dios stiluʼ, qué gápadiaʼ nin ti pan, ni nápasiaʼ nga caadxi harina ndaaniʼ guisu naroʼbaʼ ca ne caadxi aceite ndaaniʼ guisuhuiiniʼ ca; ne yetopaʼ chupa ndaa yaga, para guneʼ ni gahuaniáʼ xiiñeʼ, guidoʼdo ni ne cuézadu gátidu» (1 Rey. 17:12). Xi rizíʼdinu de ni guníʼ Elías ne ni guníʼ viuda riʼ yaʼ.

Ora guníʼ gunaa riʼ «cásica dxandíʼ nabani Jiobá Dios stiluʼ», rusihuínnicani nanna viuda que naca Elías ti israelita ni runi ni na Dios. Zándaca nánnabe caadxi de Dios stiʼ guidxi Israel, peru qué ganna chaahuibe de Jiobá para niniʼbe «Dios stinneʼ». Nabeza gunaa riʼ Sarepta, nácabe nácani ti guidxihuiiniʼ stiʼ Sidón ni riaana Fenicia. Zándaca ca binni de Sarepta biʼniʼ adorarcaʼ Baal. Neca zaqué, biiyaʼ Jiobá nuu xiixa cosa galán ndaaniʼ ladxidóʼ viuda pobre riʼ.

Neca guiráʼ binni guidxi que runi adorarcaʼ bidóʼ la? laabe nápabe fe Dios ni runi adorar ca israelita. Xiñee biseendaʼ Jiobá Elías ra lidxi gunaa riʼ yaʼ. Bíʼnibe ni para gacanebe profeta stibe, peru laaca bíʼnibe ni para gacanebe gunaa riʼ. Relatu riʼ rusiidiʼ ni laanu ti cosa nabé risaca.

Cadi guiráʼ diʼ binni de guidxi Sarepta, ra runi adorárcabe Baal, que nga feu modo nabánicaʼ. Ora biseendaʼ Jiobá Elías ra lidxi viuda que, bisihuínnibe nuu binni nayá ladxidóʼ ni caʼruʼ guni ni nabe. Dxandíʼ, «tutiica idxibi laabe ne guni jneza, runi xiiñi be laa, gasti naca xi raza laa» (Hech. 10:35).

Panda binni ni zeeda gaca casi viuda de Sarepta que nuu neza ra rucheechenu diidxaʼ yaʼ. Neca nabézacabe lade binni ni nuu ndaaniʼ xiixa religión ni cadi dxandíʼ, zándaca chupa chonna de laacabe cuyúbicabe religión ni dxandíʼ. Zándaca nánnacabe caadxi cosa de Jiobá o qué lica gánnacabe gastiʼ, nga runi caquiiñecabe chuʼ tu gacané laacabe guni adorárcabe Jiobá. Ñee cuyúbinu ca binni ca ne cayacanenu laacaʼ la?

Yanna, guidúʼyanu xi gunabaʼ Elías. Nin cadi xadxí de gudxi viuda que laabe napa para ti guendaró si, ne gósicaʼ ni cuézacaʼ gáticaʼ. Óraque gudxi Elías laabe: «Cadi guidxíbiluʼ. Guyuu ne biʼniʼ casi modo maʼ guniʼluʼ ca. Xi si la? primeru biʼniʼ ti panhuiiniʼ para naa, ne guedaneluʼ ni raríʼ, oracaruʼ maʼ zanda gúniluʼ ni góneluʼ xiiñiluʼ. Purtiʼ ndiʼ nga ni maʼ guníʼ Jiobá, Dios stiʼ Israel: “Qué zará harina ni nuu ndaaniʼ guisu naroʼbaʼ ca, ne qué zabidxi aceite ni daʼ ndaaniʼ guisuhuiiniʼ ca dede dxi gusaba Jiobá nisaguié lu guidxilayú”» (1 Rey. 17:11-14).

Zándaca guiníʼ íquenu: «Xiñee canabaʼ Elías gunaa riʼ ni gó pa maʼ ni gonésibe xiiñibe nápabe yaʼ». Peru, xi biʼniʼ viuda riʼ yaʼ. Neca qué gánnabe stale de Jiobá, biʼniʼ crebe Elías ne bíʼnibe ni gunabaʼ laabe. ¡Nabé nagana guca para gunaa riʼ gusihuinni fe stiʼ, peru jneza ni gudixhe íquebe gúnibe!

Qué nusaana Dios laabe. Ne casi gudxi Elías laabe que, bidii Jiobá ni gudócabe biaʼ tiempu qué ñaba nisaguié. Ne zaqué gúcani, «qué nirá harina ndaaniʼ guisu naroʼbaʼ que ne qué nibidxi aceite ndaaniʼ guisuhuiiniʼ que, cásipeʼ modo gudxi Jiobá ni Elías» (1 Rey. 17:16; 18:1). Pa qué ñuni viuda que ni gudxi Elías laa, ñándaca nirá harina  stibe ne aceite que ne ngue nga últimu pan ñócabe. Peru bisihuínnibe nápabe fe ne nápabe confianza Jiobá, ngue runi bidiibe ni gudó Elías primé.

Ti cosa nabé risaca ni rizíʼdinu lu relatu riʼ nga riguu Dios ndaayaʼ cani napa fe. Ora ridídinu lu xiixa guendanagana ra guihuinni pa nápanu fe la? racané Jiobá laanu. Rudiibe laanu ni caquiiñenu, rápabe laanu ne raca Xhamígube laanu para ganda guni huantarnu (Éx. 3:13-15).

Lu iza 1898, biree ti revista láʼ Zionʼs Watch Tower (La Torre del Vigía de Sión) ni caníʼ de relatu stiʼ viuda ca: «Pa gunaa que gusihuinni napa fe ne guzuubaʼ diidxaʼ la? zaquiiñeʼ Señor profeta stiʼ para gacané laabe; peru pa gusihuínnibe qué gápabe fe la? ñanda nidxela sti viuda ni napa fe. Zacaca nga rizaacanu. [...] Pa nápanu fe la? zacaanu stale ndaayaʼ; ne pa qué gápanu fe la? qué zacaanu ndaayaʼ.»

Ora ridxaagalunu xiixa guendanagana, naquiiñeʼ guidúʼndanu Biblia ne ca libru ne revista ni nápanu para gánnanu xi gúninu. De racá, naquiiñeʼ gúninu ni gabi Jiobá laanu neca gácani nagana para laanu. Nanna dxíchinu zudii Dios laanu stale ndaayaʼ pa chinándanu conseju riʼ: «Gulaʼquiʼ guidubi ladxidoʼloʼ lu náʼ Jiobá, ne cadi gúniluʼ ni na si xpiaaniluʼ. Lu guiráʼ ni gúniluʼ guníʼ ique laabe, ne laabe zúnibe ca neza stiluʼ derechu» (Prov. 3:5, 6).

Bizaaca sti cosa para guihuinni pa dxandíʼ napa viuda riʼ fe. Relatu riʼ na: «Guca si ngue, guca huará xiiñiʼ gunaa que, ne guyuu xiiñibe malu dede guti». Cumu nuu gunaa riʼ ganna xiñee guti xiiñiʼ la? gúdxibe Elías: «Xi bineʼ lii pue hombre biseendaʼ Dios ni dxandíʼ. Ñee para gusietenaláʼdxiluʼ naa paraa bicheeʼ ne para guutiluʼ xiiñeʼ nga beeduʼ ra nuaa la?» (1 Rey. 17:17, 18). Xi bicaa gunaa riʼ guiníʼ sicaríʼ yaʼ.

Zándaca bietenalaʼdxiʼ viuda riʼ ra bichee dxiqué ne pur ngue cuchiiñaʼ xquendabiaaniʼ laa. Ñee guníʼ íquebe cayuni castigar Dios laabe ora guti xiiñibe, ne biseendaʼ Dios Elías ra lídxibe para gatiʼ xiiñibe la? Biblia cadi cusiene pa guníʼ íquebe zacá, peru ni nánnanu nga qué nugaanibe donda Dios pur cani cazaacabe.

Zándaca bidxibi Elías ora biʼyaʼ guti xiiñiʼ viuda que ne guníʼ íquebe pa pur nuube raqué nga guti xiiñiʼ gunaa que. Despué de yené Elías xcuerpu baʼduhuiiniʼ que lu guiropa pisu que, biʼniʼ orarbe: «Jiobá, Dios stinneʼ, ñee laaca zuninaluʼ viuda ni nabezaʼ ra lidxi riʼ, ra guutiluʼ xiiñiʼ la?». Qué ganda guni cré Elías xiñee cudii Jiobá lugar gacaná gunaa ni cudii guiráʼ ni caquiiñebe. Ne laaca qué zanda guni huantarbe xi guiráʼ guiníʼ ique gunaa riʼ de Jiobá. Ngue runi guniʼbe: «Jiobá, Dios stinneʼ, canabaʼ lii gudiiluʼ lugar guibani hombrehuiiniʼ riʼ sti biaje. Bisibani laabe» (1 Rey. 17:20, 21).

Bicaadiaga Jiobá oración stiʼ Elías. Viuda que biyaanaʼ profeta que, ne maʼ bisihuinni napa fe. Ruluíʼ si qué nusianda Dios baʼduhuiiniʼ riʼ purtiʼ nánnabe zanda gusibánibe laa sti biaje. Ra gusibani Dios baʼduhuiiniʼ riʼ —primé binni ruzeeteʼ Biblia bisibani Dios sti biaje— zaguixhedxini ladxidóʼ xcaadxi binni ora gánnacaʼ zanda guindisaʼ Dios binni lade gueʼtuʼ. Despué de biʼniʼ orar Elías, bisibani Jiobá baʼduhuiiniʼ que sti biaje. Guxuíʼlunu pabiáʼ nayecheʼ guyuu gunaa riʼ ora gudxi Elías laa: «Biiyaʼ, maʼ nabani xiiñiluʼ». Óraque bicabi gunaa que: «Yanna huaxa maʼ nannaʼ dxandíʼ Dios biseendaʼ lii, ne guiráʼ ni guiniʼluʼ chiguni Jiobá dxandíʼ cani» (1 Rey. 17:22-24).

Maʼ qué rieeteʼ de viuda riʼ lu relatu cadúʼndanu ca. Peru cumu bizeeteʼ Jesús gúcabe ti gunaa nachaʼhuiʼ la? zanda guininu bíʼnibe xhiiñaʼ Jiobá biaʼ dxi bibánibe (Luc. 4:25, 26). Historia stibe rusihuinni riguu Dios ndaayaʼ ca binni ni raca nachaʼhuiʼ né ca xpínnibe (Mat. 25:34-40). Ne laaca rusihuínnini rudiibe guiráʼ ni caquiiñeʼ ca xpínnibe ni qué rusaana laabe neca cadíʼdicaʼ ra nagana (Mat. 6:25-34). Laaca rusiidiʼ ni laanu zanda guindisaʼ Jiobá ca binni ni maʼ guti ne racaláʼdxibe gúnibe ni (Hech. 24:15). Dxandíʼ, nápanu stale razón para guietenaláʼdxinu viuda de Sarepta que.