Ora ridxaagalunu guendanagana rucaani laanu chuʼnu xizaa, runi sentirnu maʼ qué gápanu stipa ne riníʼ íquenu xi para ndiʼ nabáninu. Zacá nga bizaaca rey David, purtiʼ laa bidxaagalú stale guendanagana. Ximodo bidxiilube cani yaʼ. Zánnanu ximodo bidxiilube ca guendanagana ca ora guidúʼndanu tobi de ca salmo ni bicaabe: «Bicaaʼ ridxi Jiobá gacané naa; bicaaʼ ridxi Jiobá guiá naa. Nezalube bisaanaʼ guiráʼ ni riguu xizaa naa, gudxeʼ laabe guiráʼ guendanagana ni cadideʼ, ora birá stipa stinneʼ ndaaniʼ ladxiduáʼ. Binibiaʼluʼ neza stinneʼ». Racá ridúʼyanu gunabaʼ David gacané Dios laa (Sal. 142:1-3).

Lu sti salmo stiʼ David guníʼ sicaríʼ: «Ti cosa maʼ gunabaʼ Jiobá... ne laani nga chiyubeʼ, cuezaʼ ndaaniʼ lidxi Jiobá biaʼ dxi guibaneʼ, ti guuyaʼ pabiáʼ nacháʼhuibe ne chuaaʼ nayecheʼ guuyaʼ yuʼduʼ stibe» (Sal. 27:4). Guxuíʼlunu cayuuyadxí David patiu stiʼ tabernáculo que, lugar ra biʼniʼ adorárcabe Dios dxiqué. Cumu cadi de tribu stiʼ Leví laabe la? dede fuera si randa ruuyabe tabernáculo que. Neca zaqué nabé nayecheʼ riuube ne ñuuláʼdxibe ñaanabe raqué guiráʼ dxi ne gúʼyabe pabiáʼ nachaʼhuiʼ Jiobá.

Diidxaʼ nachaʼhuiʼ riniʼni chuuláʼdxinu modo naca ti binni. David nabé guyuulaʼdxiʼ modo gudixhe Jiobá guni adorar ca xpinni laa. Ñee runi sentirnu cásica biʼniʼ sentir David la?

Ca dxi stinu riʼ, cadi caquiiñeʼ diʼ chuʼnu ndaaniʼ ti yuʼduʼ casi biʼniʼ ca israelita que dxiqué para guni adorarnu Jiobá, sínuque gúninu o chinándanu guiráʼ ni maʼ gudixhe Dios para guni adorarnu laa, ni zeeda gaca casi yuʼduʼ stiʼ Dios yanna riʼ. * Pa chuʼnu nayecheʼ ora gúʼyanu ni zeeda gaca casi yuʼduʼ stibe yanna riʼ, zúʼyanu pabiáʼ nachaʼhuiʼ Jiobá cásica biʼyaʼ David.

Guiníʼ íquenu xi bisihuinni altar ra bizaaquicabe ofrenda o altar de cobre ni guyuu neza ra ziyuucabe ndaaniʼ tabernáculo que (Éx. 38:1, 2; 40:6). Altar que bisihuínnini racalaʼdxiʼ Dios guicaa xquendanabani Jesús casi ti ofrenda (Heb. 10:5-10). Xiñee risaca ni biʼniʼ Jesús riʼ para laanu yaʼ. Apóstol Pablu bicaa: «Gunda bicueeza enda guti sti Xiiñi Dios de nidxiichi né Dios laanu» (Rom. 5:10). Pa gápanu fe lu guendaguti stiʼ Jesús, ziuulaʼdxiʼ Jiobá cani gúninu ne ziuube gaxha de laanu. Ne zacá jma zaca xhamígunu laabe (Sal. 25:14).

«Zusieche [Jiobá] ladxidóʼ [no]» ora guxhá ca stóndanu (Hech. 3:19). Zanda guchaaganu laanu né ti binni ni maʼ gudíxhecabe gatiʼ, peru ante gátibe que guca arrepentirbe de ca cosa ni maʼ bíʼnibe ne bichaabe modo nabánibe. Ora biiyaʼ ti juez nachaʼhuiʼ maʼ bichaabe la? bicaani laa guiníʼ maʼ cadi gátibe. ¡Nanna pabiáʼ nayecheʼ guyuu hombre que ora gunna ni biʼniʼ juez riʼ yaʼ! Jiobá nga zeeda gaca casi juez que, purtiʼ riabe ca binni ni raca arrepentir ne rulabe laacaʼ ti cadi gáticaʼ.

Biiyaʼ David stale modo biʼniʼ adorárcabe Jiobá ndaaniʼ yuʼduʼ que. Chupa chonna de laacani nga ora ridagulisaa guidxi que, ora ruundacaʼ  Ley stiʼ Dios nezalú binni ne rusiénecaʼ de laani, modo ruzaaquicabe guʼxhuʼ ne ca dxiiñaʼ ni biʼniʼ ca sacerdote ne ca levita (Éx. 30:34-38; Núm. 3:5-8; Deut. 31:9-12). Ca dxi stinu riʼ, laaca rúninu caadxi cosa cásica bíʼnicabe dxiqué.

Cásica dxiqué, laanu laaca rininu ca diidxaʼ «¡pabiáʼ galán ne sicarú nga chuʼ ca bíʼchinu ne ca bizáʼnanu tobi si!» (Sal. 133:1). Nabé maʼ bidale «ca hermanu» lu guidubi Guidxilayú (1 Ped. 2:17). Ora ridagulisaanu riuundaʼ Stiidxaʼ Dios nezalú binni ne rusiénecabe ni. Riquiiñeʼ Jiobá xquidxi para gusiidiʼ laanu ni zeeda lu Biblia. Ne laaca nápanu stale libru ne revista ni zanda iquiiñenu ora guni adorarnu Dios né binnilídxinu ne ora gúʼndanu laasinu. Ti xpinni Cristu ni nuu lu Grupu ni Zaniruʼ guníʼ: «Ora riníʼ iqueʼ ni na Stiidxaʼ Jiobá, ruyubeʼ xi riníʼ cani cayuundaʼ, ximodo zanda gacané ni naa guneʼ ni jneza ne guieneʼ xi nani, racané cani naa chuaaʼ jma gaxha de Jiobá ne riguu cani naa nayecheʼ». Nanna dxíchinu, ¡guiráʼ ni rizíʼdinu rusiecheʼ cani ladxidoʼno! (Prov. 2:10.)

Ca dxi stinu riʼ, guiráʼ dxi runi orar ca xpinni Jiobá laa, cásica dxiqué. Ne ca oración riʼ reeda gácacani casi ti xhoʼ naxhi para laabe (Sal. 141:2). ¡Nabé ratadxí ladxidoʼno gánnanu riuulaʼdxiʼ Jiobá gucaadiaga ca oración ni rúninu!

Sicaríʼ biʼniʼ orar Moisés: «Gaca Jiobá, Dios stidu, nachaʼhuiʼ né laadu, guluu ndaayaʼ guiráʼ ni rúnidu né nadu» (Sal. 90:17). Riguu Jiobá ndaayaʼ laanu ora rucheechenu diidxaʼ, purtiʼ rúninu ni né stale gana (Prov. 10:22). Zándaca maʼ gucanenu tuuxa binni gunibiáʼ Dios, o zándaca maʼ stale iza zinenu de cucheechenu diidxaʼ neca qué riná binni gucaadiaga laanu, neca huaranu, neca riuʼnu triste o neca rizanándacabe laanu (1 Tes. 2:2). Peru ridúʼyanu pabiáʼ nachaʼhuiʼ Jiobá né laanu ne nánnanu rusisaca Bixhózenu ni nuu guibáʼ stipa ni rúninu.

Sicaríʼ biʼndaʼ David: «Jiobá nga herencia stinneʼ ne copa stinneʼ. Naaze dxiichiluʼ herencia stinneʼ. Ca doo ni riguubiáʼ maʼ biábacani ti lugar nabé galán» (Sal. 16:5, 6). Nabé bisisaca David «herencia» stiʼ, laani nga gúnibe xhiiñaʼ Jiobá ne chuulaʼdxiʼ ni cayúnibe. Zándaca guidxaagalunu guendanagana cásica bidxaagalú David. Peru nápanu stale ndaayaʼ stiʼ Jiobá, cásica David. Nga runi, cadi gusaana de chuʼnu nayecheʼ ora guni adorarnu Jiobá modo maʼ gudixhe gúninu ni.