Lu tobi de ca Salmo biindaʼ rey David, guníʼ ca diidxaʼ riʼ: «Riecheʼ ora guneʼ ni naluʼ, Dios stinneʼ, ne nuu ca ley stiluʼ ndaaniʼ ladxiduáʼ» (Sal. 40:8). Neca gupa David stale guendanagana, guizáʼ nayecheʼ guyuu ora biʼniʼ ni na Dios. Peru laaca guyuu xcaadxi binni ni guyuu nayecheʼ ora biʼniʼ adorarcaʼ Dios.

Ora bizeeteʼ apóstol Pablu ca diidxaʼ ni zeeda lu Salmo 40:8, guniʼbe Mesías, o Cristu nga cayeeteʼ luni. Ngue runi bicaabe ca diidxaʼ riʼ: «Dxi bedandá Cristu ndaani guidxilayú, na rabi Bixhoze: “Qué ñuulaʼdxu nicoou rini sti maniʼ, nin xiixa nusigaʼde cabe lii, sínuque gudixhe lu naa gueda aca binni guidxilayú. Ne qué ñuulaʼdxi lu irá ni ruzuaaqui cabe, ne rini ni ruxhii cabe para guiaxa stonda cabe. Nga runi rabe lii: «Dios stinneʼ, rarí nuaa para gune ni na luʼ, casi cá ni lu Xquiʼchi lu de naa»”» (Heb. 10:5-7).

Dxi guyuu Jesús lu Guidxilayú riʼ guyuuláʼdxibe gúʼyabe cani bizáʼ Dios, guyuuláʼdxibe chuʼbe né ca xhamígube ne gónebe ca binni ni nadxiibe (Mat. 6:26-29; Juan 2:1, 2; 12:1, 2). Peru ni jma bizaaláʼdxibe ne ni jma bisiecheʼ laabe nga gúnibe ni na Bixhózebe. Ne laabe guniʼbe: «Endaró stinne nga gune ni na ni biseenda naa, ne gunduuxe dxiiña stiʼ» (Juan 4:34; 6:38). Pur cani biʼniʼ Jesús biziidiʼ ca discípulo que xii nga ni dxandíʼ rusiecheʼ binni. Nabé nayecheʼ bicheechecabe ca diidxaʼ nacubi ne galán ca ne bíʼnicabe ni de guidubi ladxidóʼcabe (Luc. 10:1, 8, 9, 17).

Biʼniʼ mandar Jesús ca discípulo stiʼ: «Laché [...] ne lachigusiidiʼ binni de guiráʼ guidxi sananda naa, ne lacuunisa laacaʼ lu lá Bixhozeʼ, ne lu lá Xiiñiʼ ne lu lá espíritu santu, ne lagusiidiʼ laacaʼ gúnicaʼ guiráʼ ni maʼ gudxeʼ laatu ne gánnacatu qué ziuu dxi guixeleʼ de laatu dede dxi guiluxe guidxilayú» (Mat. 28:19, 20, TNM). Para ganda  gúninu dxiiñaʼ ca naquiiñeʼ guinínenu binni ra tiica nuu ne guibiguétanu ra nuu cani chuulaʼdxiʼ guiziidiʼ ne guidúʼndanenu laacaʼ Biblia. Ora rúninu dxiiñaʼ riʼ guizáʼ nayecheʼ riuʼnu.

Ni zacané laanu chuʼnu nayecheʼ nga modo ridúʼyanu dxiiñaʼ ni cayúninu riʼ neca qué naʼ binni gucaadiaga laanu. Yanna, xiñee qué rusaananu de gucheechenu diidxaʼ neca nuu binni qué riná gucaadiaga ne nuu tu dede ridxiichi ora rigánnanu laacaʼ yaʼ. Purtiʼ nánnanu ora rucheechenu diidxaʼ ne ora racanenu binni chinanda Cristu rusihuínninu nadxiinu Dios ne nadxiinu laacaʼ. Ne pa qué gúninu ni zándaca gueeda gati binni ne dede né laanu (Ezeq. 3:17-21; 1 Tim. 4:16). Guidúʼyanu xi huayacané stale de cani rucheeche diidxaʼ para cadi gusaanacaʼ de chuʼcaʼ nayecheʼ ora gúnicaʼ dxiiñaʼ riʼ ra nuu binni ni huaxiéʼ riuulaʼdxiʼ.

Jma riuulaʼdxiʼ binni gucaadiaga laanu ora ruyúbinu xi guinabadiidxanu laacaʼ. Ti siadóʼ, ora biiyaʼ Amalia ti hombre cayuundaʼ periódicu ra parque, bidxíñabe ra nuu ne gunabadiidxabe laa pa zeeda xiixa noticia galán luni. Hombre que gudxi laabe coʼ, para gúdxibe laa: «Naa niáʼ caadxi diidxaʼ sicarú ni caníʼ de Reinu stiʼ Dios». Nga bicaa hombre que chuulaʼdxiʼ guiziidiʼ jma, ne bizulú biindanécabe laa Biblia. Biaʼsi chonna binni biindané Amalia ra parque que.

Ti gunaa xpinni Cristu láʼ Janice, laa riuu listu para gucheeche diidxaʼ ora zanda gúnini ra runi dxiiñaʼ. Ora biiyabe guyuulaʼdxiʼ tobi de ca hombre ni rapa ra rúnibe dxiiñaʼ ne tobi de ca xcompañérabe ti tema stiʼ revista Torre stiʼ ni rapa la? gúdxibe laacaʼ zinebe ca revista ca ra nuucaʼ cada guireecani. Ne zaqueca bíʼnibe né sti hombre ni runinebe dxiiñaʼ, hombre riʼ guyuulaʼdxiʼ revista Torre stiʼ ni rapa ne ¡Despertad! purtiʼ gadxé gadxé tema nécani. Ora biʼyaʼ sti xcompañérabe ca revista que laaca gunabaʼ guicaa cani. Nga runi, guníʼ Janice: «¡Naroʼbaʼ ndaayaʼ bidii Jiobá naa!». Yanna maʼ rinebe revista ra nuu 11 binni runinebe dxiiñaʼ gatigá.

Ti binnigola ni riganna ca binni ridagulisaa guníʼ cadi naquiiñeʼ si gábinu binni zabiguétanu sti dxi. Lugar de guininu zacá, ñanda ninabadiidxanu binni: «Ñuuláʼdxiluʼ nuluéʼ lii ximodo ridúʼndanedu binni Biblia la?». O «padxí ne pora ñuuláʼdxiluʼ nibiguetaʼ para ninírunu de tema riʼ». Binnigola que na, zacá biʼniʼ caadxi xpinni Cristu para bizulú biindanecaʼ 44 binni semana yegánnabe laacaʼ.

Zabeendunu ni galán pa guibiguétanu ra nuu binni nagueendaca, neca deruʼ chupa o chonna gubidxa de guninenu laacaʼ. Xiñee yaʼ. Purtiʼ zacá zusihuínninu dxandíʼ rizaaláʼdxinu gacanenu binni guiene Biblia. Dxi gunabadiidxacabe ti gunaa  xiñee guná chiguundanécabe laa Biblia, guníʼ sicaríʼ: «Bizuluáʼ biindaʼ Biblia purtiʼ dxandipeʼ biluíʼcabe rizaaláʼdxicabe naa ne nadxiicabe naa».

Chupa chonna gubidxa si de guyé Madaí Scuela stiʼ ca Precursor, mápeca bizulú biindané 15 binni ne bidiibe xcaayu xcaadxi de cani rucheeche diidxaʼ. Caadxi de cani ruundanebe bizulú guyecaʼ guendaridagulisaa gatigá. Ximodo gunda bizulú biindané Madaí stale binni yaʼ. Scuela que gucané laabe gúʼyabe naquiiñeʼ guibiguétabe ra nuu ca binni ni bisihuinni racaláʼdxicaʼ guiziidicaʼ dede ra guidxélabe laacaʼ. Sti gunaa Testigu, ni maʼ gucané stale binni guiziidiʼ cani dxandíʼ zeeda lu Biblia, guníʼ: «Maʼ biziideʼ cadi naquiiñeʼ gusaanaʼ de chigannaʼ ca binni ni racalaʼdxiʼ gunibiáʼ Jiobá».

Naquiiñeʼ gúninu stale stipa para ganda guibiguétanu ra nuu binni ne guzulú guidúʼndanenu laacaʼ. Peru pa gúninu stale stipa, jma stale ni zabeendunu. Pa gucaa íquenu gucheechenu stiidxaʼ Reinu la? zanda gacanenu binni «ganna ca ni dxandíʼ», ne dede zanda guilácabe (1 Tim. 2:3, 4). Ne ora gúninu ni dede zadxá tipa ladxidoʼno ne guizáʼ nayecheʼ ziuʼnu.