1. Xi guidxi gulí Jiobá para guiaana lugar stiʼ ca israelita. (Biiyaʼ dibuju ni zeeda ra ruzulú tema riʼ.)

CA DXI riʼ, ca xpinni Jiobá runi adorarcaʼ laabe modo riuuláʼdxibe. Dxiqué gulibe ca israelita para gácacaʼ xpínnibe. Peru despué bidxiidéchecaʼ laabe. Ngue runi gulí Jiobá ca xpinni Cristu para guiaana lugar stícabe. Cumu gucané Jiobá laacabe la? ngue runi bilácabe dxi binitilú Jerusalén lu iza 70 (Luc. 21:20, 21). Guiráʼ ni bizaaca lu primé siglu que bisihuínnicani xi guiráʼ zadxaagalú ca xpinni Jiobá ca dxi riʼ. Maʼ cadi candaa zanitilú guidxilayú stiʼ Binidxabaʼ, peru xquidxi Dios zalá «ora mayaca izaa xhi guidxilayú» (2 Tim. 3:1). Xiñee nánnanu zazaaca nga yaʼ.

2. 1) Xi guníʼ Jesús zazaaca ca últimu dxi riʼ. 2) Ximodo zuzulú gran tribulación.

² Jesús guníʼ ni zazaaca lu ca últimu dxi riʼ: «Nabé naná zaca ni ca dxi que. Qué huayuu dxi gaca ni naná biaʼ qué, dede dxi bizáʼ Dios guidxilayú, ne ma qué ziuu ru dxi aca ni sti tiru» (Mat. 24:3, 21). Zuzulú ca dxi jma naná o gran tribulación ora iquiiñeʼ Jiobá ca gobiernu ca para gunitilucaʼ «Babilonia, guidxi roʼ», xaíque stiʼ guiráʼ religión ni cadi dxandíʼ (Apoc. 17:3-5, 16). Xi zazaaca despué yaʼ.

3. Xi zazaaca xquidxi Jiobá ora maʼ binitilú guiráʼ religión ni cadi dxandíʼ.

³ Ora maʼ binitilú ca religión ni cadi dxandíʼ, zucaalú Binidxabaʼ ne ca xpinni xquidxi Jiobá. Biblia maca guníʼ de «Gog de guidxi stiʼ Magog» sicaríʼ: «Ne dxandipeʼ zucaaluluʼ, casi ora rundubi ti bi yooxhoʼ né nisa. Casi za ni ruchii guidxilayú zeeda gácaluʼ, lii ne guiráʼ xpínniluʼ ne stale guidxi ni nuuné lii». Cumu ruluíʼ guirutiʼ cayapa ca xpinni Jiobá ne qué ridíndecaʼ la? ruluíʼ qué zaca nagana para laacabe gunduuxecabe laacaʼ. Peru qué gánnacabe xi zazaacacabe pa gucaalúcabe ca Testigu (Ezeq. 38:1, 2, 9-12).

4, 5. Xi zuni Jiobá ora gacalaʼdxiʼ Binidxabaʼ gunitilú ca xpinni.

⁴ Xi zuni Jiobá ora gacalaʼdxiʼ Binidxabaʼ gunitilú xquídxibe yaʼ. Zusihuinni laa nga Dios ni runi mandar guibáʼ ne lu guidubi naca Guidxilayú ora gacané laanu. Pa gucaalúcabe ca xpínnibe la? cucaalúcabe laabe. Biblia na: «Purtiʼ ndiʼ nga ni guníʼ Jiobá xaíque stiʼ guiráʼ ángel: “Para guisaca labe nga biseendabe naa ca guidxi ni raxha laatu guiráʼ ni nápatu; ni cagaʼnaʼ laatu cagaʼnaʼ guié bezaluaʼ[”]» (Zacarías 2:8). Nga runi, Bixhózenu ni nuu guibáʼ nagueendaca zulá laanu. Ne despué de gulá Dios xquidxi zunitilú guidxilayú stiʼ Binidxabaʼ lu Armagedón (Apoc. 16:14, 16).

⁵ Sicaríʼ ruzeeteʼ Biblia de guerra riʼ: «Zindá ti ridxi dede lugar jma zitu de guidxilayú, purtiʼ zucaalú Jiobá ca guidxi roʼ ca. Laapebe zuni juzgarbe guiráʼ binni. Peru ca binni malu zuutibe laacaʼ, nga nga ni maʼ guníʼ Jiobá. Ndiʼ nga ni maʼ guníʼ Jiobá xaíque stiʼ guiráʼ ángel: ¡Laguuyaʼ! Zuniná ti desgracia guiráʼ xixé guidxi ne zácani tobi pur tobi, ne zundubi ti bi yooxhoʼ né nisa dede ca lugar jma zitu de guidxilayú. Ca binni ni guuti Jiobá dxi ca, ziaanacaʼ dede ti ladu guidxilayú hasta sti ladu guidxilayú. Guirutiʼ tu zuunaʼ pur laacaʼ, qué zutópacabe laacaʼ ne qué zagaachicaʼ. Ziaanacaʼ casi guíʼ lu guidxilayú» (Jer. 25:31-33). Lu Armagedón, zanitilú guidxilayú stiʼ Binidxabaʼ. Peru xquidxi Dios zalá.

6, 7. 1) Padé zeeda guiráʼ ca binni ni nuu lu gran muchedumbre. 2) Ximodo cadale ca xpinni Dios lu ca iza maʼ gudídinu ca.

⁶ Cadale ca xpinni Dios lu Guidxilayú riʼ, purtiʼ riuuláʼdxibe ni cayúnicaʼ. Biblia na: «Rapa [Jiobá] cani runi jneza, ne rucaa diaga be laaca ora iníʼ né ca laabe» (1 Ped. 3:12). Ne laaca riníʼ Biblia ziuu ti gran muchedumbre o stálepeʼ binni ni zadiʼdiʼ lu gran tribulación (Apoc. 7:9, 14). Ñee riníʼ íqueluʼ lii nga tobi de ca binni ni nuu lade gran muchedumbre ni guilá lu gran tribulación ca la?

⁷ Yanna, padé zeeda guiráʼ ca binni riʼ yaʼ. Zeedacabe de guiráʼ guidxi roʼ ne zacá nga cayaca ni guníʼ Jesús ni cusihuinni maʼ nuunu lu presencia stiʼ: «Ne zuiʼ cabe stiidxa Dios de idubi naca guidxilayú para ganna irá xixé guidxi modo runi mandar, ne dxi que ru nga iluxe guidxilayú riʼ» (Mat. 24:14). Nga nga ti dxiiñaʼ nabé risaca ni cayuni xquidxi Dios lu ca últimu dxi riʼ; pur laani millón de binni caziidiʼ guni adorar Dios ne zinanda ni jneza ne cayuni ni de guidubi ladxidóʼ (Juan 4:23, 24). Dede iza dxiiñaʼ 2003  hasta 2012, jma de 2,707,000 binni bidiicaʼ xquendanabánicaʼ Dios ne guyuunísacaʼ. Ca dxi riʼ, lu guidubi naca Guidxilayú nuu jma de 7,900,000 Testigu, ne millón de binni rié ca guendaridagulisaa ni rápacabe, ne ca binni riʼ jma nga riecaʼ dxi rietenaláʼdxinu Guendaguti stiʼ Cristu. Nánnanu cadi pur stipa stinu nga caniisi xquidxi Dios, sínuque «Dios nga rusiniisi ni» (1 Cor. 3:5-7). ¡Guizáʼ riéchenu ora guidúʼyanu cadale gran muchedumbre riʼ guiráʼ iza!

8. Xiñee nabé caniisi xquidxi Jiobá yanna.

⁸ Modo zidale ca xpinni Dios ca dxi riʼ rusihuínnini laabe nga cayacanebe ca Testigu stibe. Biblia na: «Laatu nga ca testigu stinneʼ, na Jiobá, ne xpinneʼ ni maʼ gulieeʼ, ti gánnatu ne gápatu fe naa, ne para guiénetu Ngueca nga naa. Ante de naa qué ñaʼ diʼ sti Dios, ne despué de naa laaca qué ñuu diʼ nin  stobi. Naa... naa nga Jiobá, ne despué de naa guirútiruʼ tu gulá. Naapeʼ gunieeʼ ne maʼ bilayaʼ ne maʼ bicaa laacabe gunadiágacabe, dxi caʼruʼ chuʼ sti [dios] gadxé. Nga runi laatu nga testigu stinneʼ, na Jiobá, ne naa nga Dios» (Isaías 43:10-12). Maca bieeteʼ: «Guidxihuiiniʼ riʼ zácani ti mil, ne zácani ti guidxi guizáʼ nadipaʼ. Naa, Jiobá, naa chigutaleʼ ni ora gacalaʼdxeʼ» (Is. 60:22). Primé, ca xpínnibe ni bibí beeda gácacaʼ casi ti «guidxihuiiniʼ», peru Jiobá guluu ndaayaʼ dxiiñaʼ bíʼnicabe ra bicheechecabe diidxaʼ. Zacá bidale cani bibí né espíritu santu (Gál. 6:16). Ra zidiʼdiʼ iza stale de ca binni ni chiguibani lu Guidxilayú riʼ laaca caziidicaʼ de Dios.

9. Xi naquiiñeʼ gúninu para ganda icaanu ni chigudii Dios laanu.

⁹ Nabé sicarú nga ni chigudii Jiobá laanu, pa nácanu de cani bibí né espíritu santu o de cani nuu lade gran muchedumbre. Peru para ganda icaanu ni chigudii Dios laanu naquiiñeʼ gúninu ni na (Is. 48:17, 18). Guzéʼtenu ejemplu stiʼ ca israelita. Gunabaʼ Jiobá laacabe chinándacabe Ley stiʼ, purtiʼ zapa Ley que laacabe. Ximodo yaʼ. Zaziidicabe guibaninécabe familia stícabe nayecheʼ, zánnacabe cuícabe tu guidxaagacabe, ximodo gúnicabe negocio jneza ne ximodo gácacabe nachaʼhuiʼ né sti binni (Éx. 20:14; Lev. 19:18, 35-37; Deut. 6:6-9). Ca dxi stinu riʼ, guiráʼ ca ley stiʼ Jiobá ne ca principiu stiʼ laaca rápacani laanu. Ne cadi nagana para gúninu cani (biindaʼ 1 Juan 5:3). Ora ruzúʼbanu diidxaʼ riuʼnu nayecheʼ, peru ni jma risaca nga chuʼnu galán nezalú Jiobá (Tito 1:13).

10. Xiñee naquiiñeʼ cueenu tiempu para guidúʼndanu Biblia ne guni adorarnu Dios né binnilídxinu.

¹⁰ Stale modo ziniisi xquidxi Dios ni nuu lu Guidxilayú ca dxi riʼ. Racané ni laanu guiene chaahuinu cani rusiidiʼ Biblia. Biaʼsi nga gácani zacá, purtiʼ «neza stiʼ ca binni nachaʼhuiʼ zeeda gaca casi biaaniʼ ne zeʼ ora ziyácani jma nayaʼniʼ dede guiaaniʼ dxindxi» (Prov. 4:18). Nga runi, naquiiñeʼ guinabadiidxanu: «Ñee nannaʼ xii nga ni nacubi cusiene xquidxi Dios la? Ñee ruundaʼ Biblia guiráʼ dxi la? Ñee riuuladxeʼ guundaʼ ca libru ne ca revista nacubi caree la? Ñee ribee ti dxi guiráʼ semana para guneʼ adorarniáʼ binnilidxeʼ Dios la?». Dxandíʼ, cadi naganapeʼ nga gúninu cani bizéʼtenu ca; ni naquiiñeʼ si gúninu nga quixhe chaahuinu tiempu stinu. Nabé risaca nga guidúʼndanu Biblia, gúninu ni na ni ne chuunu biaʼ zeʼ xquidxi Dios, jmaruʼ  si yanna ra jma maʼ gaxha nuu gran tribulación.

11. Xiñee rié ca xpinni Jiobá guiráʼ guendaridagulisaa.

¹¹ Xquidxi Jiobá racalaʼdxiʼ guibáninu galán, nga runi gatigá rusietenalaʼdxiʼ ni laanu conseju stiʼ Pablu riʼ: «Naquiiñe ucáʼ ique nu acané saa nu para ganaxhii nu jma, ne guni nu ni nachaʼhuiʼ. Ne cadi guni nu casi cani rusaana de che cultu, sínuque cada tobi acané stobi para indisa ique, ne jma rusi yanna purti caduʼya nu ma zeda dxiña dxi gueeda Jesucristu Señor stícanu» (Heb. 10:24, 25). Ca dxi bidagulisaa ca israelita para guni adorarcaʼ Jiobá, gucaneni laacaʼ chuʼcaʼ gaxha de laabe. Ne riuucaʼ nayecheʼ. Guiníʼ íquenu pabiáʼ nayecheʼ guyuucabe dxi gúpacabe saa ra rucuícabe ranchuhuiiniʼ ca dxi bibani Nehemías (Éx. 23:15, 16; Neh. 8:9-18). Ca dxi riʼ, laaca ribeendunu ni galán ora riuunu guiráʼ guendaridagulisaa rápanu. Nga runi, cadi guiáʼdxanu nin tobi de laacani, purtiʼ zacané cani laanu chuʼnu gaxha de Jiobá ne ziuʼnu nayecheʼ (Tito 2:2).

12. Xiñee risaca dxiiñaʼ ni maʼ bidii Dios laanu gúninu.

¹² Cumu nuunu ndaaniʼ xquidxi Dios la? nápanu ti dxiiñaʼ risaca ni naquiiñeʼ gúninu: gusíʼdinu binni ca diidxaʼ nacubi ne galán stiʼ Dios (Rom. 15:16). Ora rucheechenu diidxaʼ, reeda gácanu ti binni ni runiné Jiobá dxiiñaʼ (1 Cor. 3:9; 1 Ped. 1:15). Ne laaca rusisácanu labe o xlabe. ¡Nabé nayecheʼ riuʼnu ora guininu ca diidxaʼ nacubi ne galán stiʼ Jiobá, «ti Dios nayecheʼ»! (1 Tim. 1:11, TNM.)

13. Xi naquiiñeʼ gúninu pa racaláʼdxinu chuʼnu gaxha de Jiobá ne pa racaláʼdxinu guibáninu.

¹³ Nabé nadxii Jiobá laanu. Nga runi, riuuláʼdxibe chuʼnu gaxha de laabe ne gaxha de xquídxibe. Moisés gudxi ca israelita que ca diidxaʼ riʼ: «Dxandipeʼ caquiiñeʼ guibáʼ ne guidxilayú casi testigu para laatu yannadxí, maʼ gudixheʼ guendanabani ne guendaguti nezaluluʼ, ndaayaʼ ne guendananá; ne nápaluʼ xidé cuiluʼ guendanabani ti cadi gátiluʼ, lii ne ca xiiñiluʼ, gannaxhiiluʼ Jiobá Dios stiluʼ, gucaadiágaluʼ stídxibe ne cadi guixéleluʼ de laabe; purtiʼ laabe nga guendanabani stiluʼ ne pur laabe zabániluʼ jma xadxí, para cuézaluʼ lu layú ni bizabiruaa Jiobá gudii ca bixhoze gólaluʼ Abrahán, Isaac ne Jacob» (Deut. 30:19, 20). Nga runi, pa racaláʼdxinu guibáninu la? naquiiñeʼ  gannaxhiinu Jiobá, cadi gusaananu laabe ne cadi gusaananu xquídxibe.

14. Xi guníʼ ti xpinni Cristu de xquidxi Dios.

¹⁴ Pryce Hughes, ti xpinni Cristu ni qué nusaana Dios ne qué nusaana xquídxibe, guníʼ sicaríʼ: «Rudieeʼ xquíxepeʼ Dios, purtiʼ yenandaʼ cani biziideʼ de laabe ante de 1914 [...]. Ti cosa ni jma risaca biziideʼ nga chuaaʼ gaxha de xquidxi Jiobá ne cadi guneʼ cré ni rusiidiʼ binni. Ndiʼ gucané naa para bidxieeluáʼ ca guendanagana ni gupaʼ pur cani runeʼ cré. Gástiruʼ sti modo zanda guicaanu ndaayaʼ stiʼ Jiobá que gúninu ni na xquídxibe».

15. Xi naquiiñeʼ gúninu ora guchaa xquidxi Dios modo riénenu xiixa ni zeeda lu Biblia. Bizeeteʼ ti ejemplu.

¹⁵ Pa racaláʼdxinu cuʼ Jiobá ndaayaʼ laanu, naquiiñeʼ gacanenu xquidxi ne chinándanu ora guchaacabe modo riénenu xiixa ni zeeda lu Biblia. Guidúʼyanu ti ejemplu. Guti si Jesús, stale de  ca judíu ni zinanda Cristu guca nagana para laacaʼ gusaanacaʼ Ley ni bidii Dios Moisés (Hech. 21:17-20). Lu carta ni bicaa Pablu ra nuu ca hebreu gucanebe laacaʼ gúʼyacaʼ jma risaca ni biʼniʼ Jesús que dxi biiticabe maniʼ para gudiicabe Dios, purtiʼ ra bidii Jesús xquendanabani gucané ni laacaʼ guixá stóndacaʼ (Heb. 10:5-10). Nannadxíchinu, stale de ca xpinni Cristu que yenándacaʼ conseju ni bidii Pablu laacaʼ ne bichaacaʼ modo riníʼ íquecaʼ. Xi rusiidiʼ nga laanu yaʼ. Laaca naquiiñeʼ guiduʼndaʼ chaahuinu Biblia ne ora guchaa xquidxi Dios modo riénenu xiixa ni zeeda lu Biblia, naquiiñeʼ chinándanu ni ne zaqueca ora guidxaa modo gucheechenu diidxaʼ.

16. 1) Xiñee nabé sicarú zabani binni ndaaniʼ guidxilayú cubi stiʼ Dios. 2) Xi jma riuuláʼdxiluʼ gúʼyaluʼ gaca lu guidxilayú cubi ca.

¹⁶ Guiráʼ cani qué gusaana Jiobá ne xquidxi la? zacaacaʼ stale ndaayaʼ. Ca xpinni Cristu ni bibí zacaacaʼ stale ndaayaʼ ora guni mandárnecaʼ Cristu guibáʼ (Rom. 8:16, 17). Ne cani chiguiaana lu Guidxilayú riʼ, nabé sicarú modo guibánicaʼ ndaaniʼ ti paraísu. Guiranu, ca xpinni Jiobá ni nuu lu Guidxilayú riʼ, zanda gábinu xcaadxi binni de guidxilayú cubi ni bizabiruaa Dios gudii laanu (2 Ped. 3:13). Dxi ca, «cani nadóʼ zacaacaʼ guidxilayú, ne zabánicaʼ nayecheʼ purtiʼ ziuu stale guendariuudxí» (Sal. 37:11). «Zucuícabe yoo, ne zabézacabe ndaaniʼ ni; ne dxiiñaʼ gúnicabe né nácabe» ziechenécabe ni (Is. 65:21, 22). Guirutiʼ zuniná binni, qué ziuu binni pobre ne maʼ qué ziaadxaʼ ni gó binni (Sal. 72:13-16). Ca religión ni cadi dxandíʼ maʼ qué zusiguiicaʼ binni, purtiʼ maʼ qué ziuucaʼ (Apoc. 18:8, 21). Zabani ca gueʼtuʼ sti biaje ne maʼ qué záticaʼ (Is. 25:8; Hech. 24:15). Pa chuʼnu gaxha de Jiobá ne chuunu biaʼ zeʼ xquídxibe la? zadúʼyanu ora gúnibe guiráʼ cosa sicarú riʼ.

17. Xi naquiiñeʼ gúninu pur Jiobá ne pur xquidxi.

¹⁷ Mayaca guinitilú guidxilayú stiʼ Binidxabaʼ riʼ. Nga runi, naquiiñeʼ gaca fe stinu naguidxi ne cadi gusaana de gúninu ni na Jiobá ne gúninu ni na xquidxi. Guni sentirnu cásica biʼniʼ sentir David ora biʼndaʼ: «Ti cosa maʼ gunabaʼ Jiobá... ne laani nga chiyubeʼ, cuezaʼ ndaaniʼ lidxi Jiobá biaʼ dxi guibaneʼ, ti guuyaʼ pabiáʼ nacháʼhuibe ne chuaaʼ nayecheʼ guuyaʼ yuʼduʼ stibe» (Sal. 27:4). Nga runi, cada tobi de laanu naquiiñeʼ chuʼ gaxha de Jiobá ne ca xpinni ne chuunu biaʼ zeʼ xquidxi.