Gacanenu ca hermanu iquiiñecaʼ stipa sticaʼ para gúnicaʼ xhiiñaʼ Dios
«Zudieeʼ conseju lii ne qué zaxhaluáʼ luguialuʼ.» (SAL. 32:8)
1, 2. Ximodo ruuyaʼ Jiobá ca xpinni.
ORA guʼyaʼ binni caguite ca xiiñiʼ, stale biaje ridxagayaacaʼ xi guiráʼ rúnicabe. Zándaca laaca huayuuyaluʼ ni. Nuu baʼduhuiiniʼ nabé nanna quite xiixa deporte, peru zándaca bíʼchibe riuulaʼdxiʼ cuee dibuju o guni sti cosa. Intiica ni riuuláʼdxicabe gúnicabe nabé riuulaʼdxiʼ binni gacané laacabe para gúnicabe ni jma galán.
2 Jiobá laaca nabé rizaalaʼdxiʼ ca xiiñiʼ. Ne ruuyabe ca xpínnibe casi «ca cosa ni jma risaca stiʼ guiráʼ guidxi» (Ageo 2:7). Nabé risácacabe pur fe ni nápacabe ne purtiʼ qué rixélecabe de Dios. Ne zándaca huayuuyaluʼ stale cosa nga ni randa runi ca Testigu ca dxi stinu riʼ. Nuu de laacaʼ nabé sicarú rudiicaʼ libana, ne nuu xcaadxi nanna quixhe chaahuiʼ ca dxiiñaʼ ni raca ndaaniʼ xquidxi Dios. Stale hermana nagueenda riziidiʼ sti diidxaʼ para ganda gacané binni ni riníʼ diidxaʼ ca, ne nuu xcaadxi nanna cuʼ gana sti binni o gápacaʼ cani huará (Rom. 16:1, 12). Cadi dxandíʼ nabé riéchenenu guiráʼ ca xpinni Cristu riʼ ra ridagulisaanu la?
3. Xi guendarinabadiidxaʼ zacábinu lu tema riʼ.
3 Peru nuu chupa chonna xpinni Cristu —cásica cani nahuiiniʼ o cani deruʼ guyuunisa— zándaca runi sentircaʼ cadi nácacaʼ casi ca binni ridagulisaa. Ximodo zanda gacanenu laacabe ti iquiiñecabe stipa stícabe para gúnicabe xhiiñaʼ Dios yaʼ. Xiñee naquiiñeʼ guidúʼyanu ca cosa galán ni rúnicabe casi runi Jiobá ni.
RUUYAʼ JIOBÁ NI GALÁN RUNI CA XPINNI
4, 5. Casi rieeteʼ lu relatu stiʼ Jueces 6:11, 12, 1) xi biiyaʼ Jiobá de Gedeón. 2) xi ruuyaʼ Jiobá de ca xpinni.
4 Stale relatu stiʼ Biblia rusihuinni qué ruuyaʼ si Jiobá ca cosa galán ni runi ca xpinni, sínuque ruuyabe xiruʼ zanda gúnicaʼ. Guidúʼyanu ejemplu stiʼ Gedeón. Ora gulí Dios laabe para chindeebe ca israelita lu náʼ ca madianita, bidxagayaabe modo bigapadiuxi ti ángel laabe: «Nuuné Jiobá lii, hombre nadxibalú ne nadipaʼ». Óraque qué lica ñuni sentir Gedeón pa naca ti hombre nadipaʼ, sínuque nuu stale cosa ni qué gánnabe ne guníʼ íquebe qué zanda gulabe xquidxi Dios. Peru gadxé modo biʼyaʼ Jiobá laabe, purtiʼ Dios biiyaʼ zanda gúnibe stale cosa, ngue runi gulí laabe para gulabe xquidxi. Biblia na: «Despué beeda ángel stiʼ Jiobá ne gurí xaʼnaʼ yaga roʼ ni nuu Ofrá, stiʼ Joás ni za de Abí-ézer, laga caguibi Gedeón xiiñibe trigu ndaaniʼ ti lagar, para ucaachibe ni nagueendaca ti cadi guʼyaʼ ca madianita ni. Óraque málasi biiyabe ángel stiʼ Jiobá ne gudxi laabe: “Nuuné Jiobá lii, hombre nadxibalú ne nadipaʼ”» (Jueces 6:11, 12).
5 Biiyaʼ Jiobá ca guenda stiʼ Gedeón, ngue runi gupa confianza laabe para gulabe guidxi Israel. Tobi de ca cosa ni biʼyaʼ ángel stiʼ Jiobá que nga caguíbibe trigu que né guiráʼ stipa stibe. Peru guyuu sti cosa ni bidxagayaa ángel que de laabe. Dxiqué, ca binni runi dxiiñaʼ lu layú riguíbicaʼ biidxiʼ sticaʼ ti lugar ra napampa ti ganda chiné bi guixi stini. Peru Gedeón caguibi trigu stiʼ ndaaniʼ ti lagar ra rúnicabe vinu para cadi guuyaʼ ca madianita que cosecha stibe ne cuánacaʼ ni. ¡Guizáʼ nuu xpiaaniʼ hombre riʼ! Ngue runi qué ñuuyaʼ si Jiobá laabe casi ti hombre ni nabé runi dxiiñaʼ, sínuque biiyaʼ laabe casi ti hombre ni rapa cuidadu ora runi xhiiñaʼ ne ni nanna xi guni para cadi gapa guendanagana. Cumu nanna Jiobá xi guiráʼ zanda gúnibe la? bidii laabe dxiiñaʼ que.
6, 7. 1) Ximodo biiyaʼ Jiobá Amós, neca gadxé modo biiyaʼ ca israelita laabe. 2) Xiñee zanda guininu gunna Amós stale cosa.
6 Zacaca nga bizaaca profeta Amós, biiyaʼ Jiobá xi guiráʼ zanda gúnibe, neca stale binni guníʼ ique qué risácabe. Amós peʼ guníʼ naca ti hombre ni rapa dendxuʼ ne ni riguiide duʼgaʼ stiʼ yaga sicómoro, ti cuananaxhi ni gudó binni pobre dxiqué. Ora gulí Jiobá laabe para chitídxibe 10 tribu stiʼ Israel zusabanáʼ Jiobá laacaʼ purtiʼ runi adorarcaʼ bidóʼ, chupa chonna israelita zándaca guníʼ ique cadi para laabe dxiiñaʼ que. Biblia na: «Óraque bicabi Amós Amasías ne gúdxibe laa: “Naa cadi nácadiaʼ ni riguixhená, ne cadi xiiñiʼ ni riguixhená diʼ naa; sínuque naa gucaʼ tobi ni gupa dendxuʼ ne ni gudxiide duʼgaʼ stiʼ yaga sicómoro”. Ne Jiobá maʼ qué niná ñapaʼ dendxuʼ ne gúdxibe naa: “Guyé, yetixhená xquidxeʼ, Israel”» (Amós 7:14, 15).
7 Amós naca de ti guidxihuiiniʼ zitu, peru nánnabe ca costumbre stiʼ ca binni que ne nánnabe de ca binni ni cayuni mandar tiempu que. Ne zándaca gúnnabe ximodo nuu guidxi Israel ne gúnnabe ximodo nuu xcaadxi guidxi pur ca binni ni riguni negocio xquídxibe (Amós 1:6, 9, 11, 13; 2:8; 6:4-6). Chupa chonna biblista riniʼcaʼ nabé nápabe gracia para gucaabe xiixa libru. Biquiiñebe diidxaʼ ni cadi nagana para guiene binni peru ni zanda gacané laacaʼ. Qué nidxíbibe ora gúdxibe sacerdote Amasías zusabanáʼ Jiobá laa, zacá bihuinni jneza ngue biʼniʼ Jiobá gulí laabe para chinebe stiidxaʼ. Profeta Amós gupa caadxi guenda ni qué ñuuyaʼ sti binni, peru biiyaʼ cani (Amós 7:12, 13, 16, 17).
8. 1) Xi gudxi Jiobá David. 2) Xiñee nabé riguu ca diidxaʼ ni cá lu Salmo 32:8 gana cani riníʼ ique qué zanda ugaanda cani maʼ gudixhe ique.
8 Racá ridúʼyanu, nanna Jiobá xi guiráʼ zanda guni cada tobi de ca xpinni. Gúdxibe rey David zábibe laa xi naquiiñeʼ guni ne zudiibe conseju laa ora iquiiñeʼ ni. Biblia na: «Zudieeʼ lii guendariene, ne zusiideʼ lii saluʼ lu neza ni naquiiñeʼ cheluʼ. Dxandipeʼ zudieeʼ conseju lii ne qué zaxhaluáʼ luguialuʼ» (Salmo 32:8). Ximodo riguu ca diidxaʼ riʼ gana laanu yaʼ. Zándaca riníʼ íquenu qué zanda gúninu xiixa cosa, peru Jiobá zanda gacané laanu ugaandanu ni gudixhe íquenu gúninu. Cásica racané ti binni xiiñiʼ para guiziidiʼ saʼ, laaca racané Jiobá laanu para ganda guiniisinu lu stiidxaʼ. Ne ti modo rúnibe ni nga riquiiñebe xcaadxi xpinni Cristu para gacanecaʼ laanu iquiiñenu guiráʼ stipa stinu para gúninu xhiiñaʼ Dios. Ximodo yaʼ.
GUIDÚʼYANU NI GALÁN RUNI CA XPINNI CRISTU
9. Xi rusiidiʼ conseju stiʼ Pablu ni zeeda lu Filipenses 2:3, 4 laanu.
9 Pablu guluu gana guiráʼ ca xpinni Cristu ti guizaaláʼdxicaʼ xcaadxi hermanu (biindaʼ Filipenses 2:3, 4). Xi rusiidiʼ ca diidxaʼ riʼ laanu yaʼ. Rusiidiʼ cani laanu naquiiñeʼ guidúʼyanu ca guenda ni napa xcaadxi xpinni Cristu ne gábinu laacaʼ galán ni cayúnicaʼ. Ximodo runi sentirnu ora gabi tuuxa laanu galán bíninu xiixa dxiiñaʼ yaʼ. Cadi dxandíʼ rucaani laanu gúninu jma lu xhiiñaʼ Dios la? Zacaca nga rizaaca ora rábinu tuuxa xpinni Cristu galán ni cayuni, laaca rucaani laacabe guiniisicabe jma lu stiidxaʼ Dios.
10. Tuu nga cani jma naquiiñeʼ gacanenu.
10 Tuu nga cani jma caquiiñeʼ guizaaláʼdxinu yaʼ. Guiranu nga caquiiñeʼ chuʼ tu guizaalaʼdxiʼ laanu gatigá. Peru ca hombrehuiiniʼ ne cani nacubi guyuunisa nga jma caquiiñeʼ gacanenu laacaʼ guni sentircaʼ caquiiñecaʼ ndaaniʼ neza binni ridagulisaa ne galán iquiiñenu laacaʼ lu ca dxiiñaʼ ni rúninu ra ridagulisaanu. Peru pa qué uguʼnu laacabe lu ca dxiiñaʼ ni rúninu ra ridagulisaanu la? maʼ qué ziuuláʼdxicabe guicaacabe xcaadxi dxiiñaʼ, ne Stiidxaʼ Dios cayabi laacabe gúnicabe jma lu xhiiñaʼ Dios (1 Tim. 3:1).
11. 1) Ximodo gucané ti binnigola ti hombrehuiiniʼ para biniisi lu stiidxaʼ Dios. 2) Xi rizíʼdinu de ni bizaaca Julien.
11 Ludovic, ti binnigola ni guleendú ni galán purtiʼ bizaaláʼdxicabe laa dxi nahuiiniʼ. Laa guníʼ: «Ora dxandíʼ rizaaladxeʼ tuuxa hermanu, jma nagueenda riniisi lu stiidxaʼ Dios». Óraque bizeetebe de ti hombrehuiiniʼ nabé natuí ni láʼ Julien, guniʼbe sicaríʼ: «Cumu ridxíbibe gúnibe caadxi cosa la? nuu biaje rúnibe xiixa para si guʼyaʼ binni laabe. Peru biiyaʼ nabé nacháʼhuibe ne nabé riuuláʼdxibe gacanebe ra ridagulisaadu. Ngue runi, lugar de niníʼ iqueʼ cadi jneza cani rúnibe la? ruuyaʼ ca guenda galán ni nápabe ne ruyubeʼ modo uguaaʼ gana laabe». Despué, beeda gaca Julien siervu ministerial, ne yanna maʼ naca precursor regular.
GACANENU CA HERMANU IQUIIÑECAʼ STIPA STICAʼ PARA GÚNICAʼ XHIIÑAʼ DIOS
12. Xi caquiiñeʼ gúninu para gacanenu ti xpinni Cristu. Bizeeteʼ ti ejemplu.
12 Para ganda gacanenu xcaadxi xpinni Cristu iquiiñecaʼ stipa sticaʼ para gúnicaʼ xhiiñaʼ Dios la? naquiiñeʼ guidúʼyanu cani rúnicabe. Casi bizaaca Julien, naquiiñeʼ guidúʼyanu ca guenda sicarú ni napa ca xpinni Cristu ne cadi ca cosa ni qué zanda gúnicaʼ. Ne ngapeʼ nga ni biʼniʼ Jesús né Pedru. Neca guyuu ora bicheebe, gulee lá Jesús laabe Cefas, ni riníʼ «guié». Zacá bisihuinni Jesús zeeda gaca Pedru naguidxi casi ti guié (Juan 1:42, TNM, nota).
13, 14. 1) Xi biʼyaʼ Bernabé de Marcos. 2) Ximodo gucané ti binnigola Alexandre. (Biiyaʼ foto ni zeeda ra ruzulú tema riʼ.)
13 Bernabé laaca gucané Juan, ni rábicabe Marcos (Hech. 12:25). Primé viaje guyé Pablu de misioneru ne Bernabé, yenebe Marcos para «gacané» laacabe. Peru ora yendácabe Panfilia bisaana Marcos laacabe sin ñabi laacabe, órapeʼ chécabe ladu guiaʼ ne zadíʼdicabe ti lugar ra nabé nuu binni malu (Hech. 13:5, 13). Xi biʼniʼ Bernabé yaʼ. Lugar de ñuuyaʼ ca cosa ni qué ñúnibe jneza, laga biiyaʼ ca guenda stibe, ne zándaca despué gucané laabe para guiziidibe jma (Hech. 15:37-39). Pur ni biʼniʼ Bernabé, beeda gaca Marcos ti xpinni Jiobá ni biʼniʼ xhiiñaʼ Dios jneza. Dxi deguyoo Pablu Roma, bicaa ti carta ra nuu ca xpinni Cristu de Colosas ne raqué nuu Marcos cayapa laabe. Lu carta que nga biseendaʼ Pablu diuxi stiʼ Marcos ne guníʼ stale cosa galán de laabe (Col. 4:10). Guxuíʼlunu pabiáʼ nayecheʼ guyuu Bernabé ora gunabaʼ Pablu cheʼ Marcos chigacané laa (2 Tim. 4:11).
14 Guidúʼyanu xi bizaaca ti xpinni Cristu ca dxi stinu riʼ. Alexandre, ti xpinni Cristu ni nacubi guca binnigola, rietenalaʼdxiʼ ximodo gucané ti xpinni Cristu ni nanna stale laa: «Dxi jma nahuiineʼ, nabé ridxibeʼ guneʼ orar nezalú binni. Gucané ti binnigola naa gannaʼ xi guiniéʼ ne cadi guidxibepiáʼ. Ñándaca nusaana de niquiiñebe naa, peru gatigá bidiibe lugar guneʼ orar ante chigucheechedu diidxaʼ. Pur ni biʼniʼ hermanu que, chaahuiʼ chaahuiʼ maʼ qué nidxibeʼ ora guneʼ orar».
15. Ximodo bisihuinni Pablu rizaalaʼdxiʼ ca hermanu stiʼ.
15 Xi rúninu ora ridúʼyanu napa ti xpinni Cristu ti guenda galán yaʼ. Ñee rábinu laabe galán cani rúnibe la? Lu capítulo 16 stiʼ carta ni bicaa Pablu ra nuu ca xpinni Cristu de Roma, gúdxibe jma de gande hermanu nadxiibe laacaʼ pur ca guenda ni nápacaʼ (Rom. 16:3-7, 13). Ora bizéʼtebe de Andrónico ne Junias, guniʼbe jma maʼ xadxí nácacaʼ xpinni Cristu que laabe ne guluube gana laacaʼ purtiʼ cayuni huantarcaʼ. Laaca bizeetebe de jñaa Rufo, purtiʼ zándaca gupa laabe.
Frédéric (ladu bigaʼ) guluube gana Rico para cadi gusaana de guni xhiiñaʼ Jiobá (Biiyaʼ párrafo 16)
16. Xi ribeendú ca hermanu stinu ora riguʼnu gana laacaʼ.
16 Ora de guidubi ladxidoʼno gábinu ti xpinni Cristu galán ni cayuni, stale nga ni ribeendú. Guiníʼ íquenu de ti hombrehuiiniʼ de Francia láʼ Rico. Cumu cadi xpinni Cristu bixhózebe la? qué niná ñuunísabe, ne ngue gulee gana laabe. Rico guníʼ ique naquiiñeʼ cueza dede ora gusaa 18 iza para guni xhiiñaʼ Jiobá de guidubi ladxidóʼ. Ne nabé riuube triste purtiʼ nabé runi burla ca xcompañérube ni rinebe scuela laabe. Frédéric, ti binnigola ni nuu ra ridagulisaabe gunábacabe laa chiguundané laabe. Frédéric guníʼ: «Guluaaʼ gana Rico purtiʼ bisihuínnibe nadxibalube ora rábibe ca xcompañérube de cani runi crebe, neca runi búrlacaʼ laabe». Nabé guluu ca diidxaʼ que gana laabe ne gucanécani laabe para guiniisibe jma lu stiidxaʼ Dios ne chúʼnebe bixhózebe tobi si. Rico guyuunisa dxi napa 12 iza.
Jérôme (ladu derechu) gucané Ryan gaca misioneru (Biiyaʼ párrafo 17)
17. 1) Ximodo zanda gacanenu ca xpinni Cristu guiniisicaʼ lu stiidxaʼ Dios. 2) Xi runi ti misioneru para gacané cani nahuiiniʼ, ne xi huabeendube.
17 Ora rábinu tuuxa hermanu nabé nayecheʼ riuʼnu pur ca cosa sicarú ni runi la? racanenu laa para guni jma lu xhiiñaʼ Jiobá. Sylvie, * ti gunaa xpinni Cristu ni maʼ xadxí de nuu Betel stiʼ Francia, guníʼ laaca zanda uguu ca hermana gana xcaadxi xpinni Cristu, purtiʼ ca gunaa ca jma ruuyacaʼ stale cosa ni qué ruuyaʼ ca hombre ca. Zacá «zanda gacanécabe ca hermanu ni riguu gana xcaadxi xpinni Cristu». Ne guníʼrube: «Para naa la? naquiiñeʼ uguaaʼ gana xcaadxi xpinni Cristu» (Prov. 3:27). Jérôme, ti xpinni Cristu ni naca misioneru Guayana Francesa, maʼ gucané stale hombrehuiiniʼ para gácacaʼ misioneru. Laa guníʼ: «Huadieeʼ cuenta, ora rabeʼ tuuxa xpinni Cristu galán xiixa ni biʼniʼ ora canagucheeche diidxaʼ ne ora ricabi jneza ra ridagulisaa, maʼ qué ridxibi ne runi ca cosa ca jma jneza».
18. Xiñee galán guninenu cani nahuiiniʼ dxiiñaʼ.
18 Laaca zanda uguʼnu gana ca xpinni Cristu ra guni invitarnu laacaʼ guninecaʼ laanu xiixa dxiiñaʼ. Pa ti hombrehuiiniʼ nabé riene de computadora, ñanda ninabaʼ ti binnigola laabe ñuni imprimirbe xiixa guiʼchiʼ lu jw.org ni gacané ca xpinni Cristu ni maʼ nagola ni qué gapa computadora. O pa cusianu o cayuni chaahuinu xiixa ra Yoo stiʼ Reinu, xiñee qué gábinu ti hombrehuiiniʼ gacané laanu yaʼ. Nga zacané laanu gúʼyanu ximodo laabe ne gábinu laabe galán dxiiñaʼ cayúnibe ne guidúʼyanu xi runi sentirbe ora gúnibe xiixa dxiiñaʼ (Prov. 15:23).
GÁCANENU XCAADXI XPINNI CRISTU
19, 20. Xiñee naquiiñeʼ gacanenu stobi guiniisi lu stiidxaʼ Dios.
19 Dxi gulí Jiobá Josué para sániruʼ nezalú guidxi Israel la? gúdxibe Moisés: «Guluu gana laabe ne bidii stipa laabe». Biblia na: «Ne biʼniʼ mandar Josué ne guluu gana laa ne bidii stipa laa, purtiʼ laa nga zazaniruʼ lu guidxi riʼ ne laa nga ni zacané laacabe chúʼcabe lu layú ni chiguuyaluʼ» (Deuteronomio 3:28). Cumu stale binni cayuu ndaaniʼ xquidxi Dios la? nga runi, guiráʼ ca xpinni Cristu ni maʼ xadxí nuu ndaaniʼ xquidxi Dios —ne cadi ca binnigola si— zanda gacanecaʼ cani nahuiiniʼ ne cani nacubi guyuunisa para iquiiñecaʼ guiráʼ stipa sticaʼ lu xhiiñaʼ Dios. Zacá jma zadale precursor ne ni «zanda usiidi» stobi (2 Tim. 2:2).
20 Pa nuunu ndaaniʼ ti neza binni ridagulisaa o nuunu lu ti grupuhuiiniʼ la? zanda gacanenu xcaadxi xpinni Cristu ti gacanecaʼ despué. Ne ni jma galán gúninu nga guidúʼyanu ca cosa galán ni runi ca hermanu stinu, casi runi Jiobá.
^ párrafo 17 Bidxaa laabe.
