DXI biree ca israelita Babilonia lu iza 537 ante de ca dxi stiʼ Jesús, nabé guyuu Jiobá xizaa pur neza ra chitiidicabe para guibiguétacabe Jerusalén. Ngue runi gúdxibe laaca: «Lacuee guiráʼ ni nuu lu neza stiʼ guidxi ca. Laguni chaahuiʼ, laguni chaahuiʼ neza ca. Lacuee ca guié ca luni» (Is. 62:10). Ximodo biʼniʼ ca judíu ni na ca diidxaʼ ca yaʼ. Zándaca guzaniruʼ chupa chonna grupu para guchiicaʼ ca barranca nuu neza que ne guni chaahuicaʼ ni, ti zacá ganda tiidiʼ cani zeeda atrá.

Neza gudiʼdiʼ ca israelita que zeeda gácani casi ti neza ra naquiiñeʼ chuunu para ugaandanu ni naguixhe íquenu. Jiobá racalaʼdxiʼ saʼ guiráʼ ca xpinni lu neza riʼ sin chuʼ xiixa ni guchiiñaʼ laa. Nga runi lu Stiidxabe cayábibe laanu: «Biiyaʼ chaahuiʼ paraa guzuhuaañeeluʼ ne gaca guiráʼ neza stiluʼ naguidxi» (Prov. 4:26). Zacané conseju riʼ laanu pa nahuiininu o pa maʼ huaniisinu.

Ora riniʼné tuuxa ti hombrehuiiniʼ o ti dxaapahuiiniʼ, riuu biaje riníʼ «zanda ugaandaluʼ guiráʼ ni racaláʼdxiluʼ». Riníʼcabe zacá purtiʼ cani nahuiiniʼ ca nazaacacaʼ, nuu xpiaanicaʼ ne riuuláʼdxicaʼ ugaandacaʼ cani naguixhe íquecaʼ. Biblia na: «Ni galán stiʼ cani nahuiiniʼ ca nga stipa sticaʼ» (Prov. 20:29). Pa ti hombrehuiiniʼ o ti dxaapahuiiniʼ iquiiñeʼ guiráʼ ni nanna ne guiráʼ stipa stiʼ para guni xhiiñaʼ Dios la? zanda ugaanda ni naguixhe ique ne zabani nayecheʼ.

Nabé rusisaca binni guidxilayú ca guenda stiʼ cani nahuiiniʼ. Ora ti hombrehuiiniʼ o ti dxaapahuiiniʼ Testigu nabé nuu xpiaaniʼ ra scuela, ca maestru stiʼ o cani riné scuela rucaacaʼ laabe gúʼndabe scuela roʼ ne gácabe tuuxa risaca lu guidxilayú riʼ. O pa nánnabe quítebe xiixa deporte,  zándaca gucaacaʼ laabe gácabe ti deportista profesional. Ñee huayuu tu huayabi lii zacá, o runibiaʼluʼ tuuxa ni huayábicabe laa zacá la? Xi zanda gacané ti xpinni Cristu quixhe ique guni ni jneza yaʼ.

Cani rusiidiʼ Biblia zanda gacané cani lii saluʼ lu neza ra naquiiñeʼ saluʼ. Eclesiastés 12:1 na sicaríʼ: «Bietenalaʼdxiʼ, yanna, de [Dios] ni jma Nandxóʼ ni Bizáʼ lii, ca dxi nahuiiniluʼ». Ximodo zanda guietenaláʼdxiluʼ de Dios ni bizáʼ lii yaʼ. Ne ximodo zanda gúninu ni yaʼ.

Guiníʼ íquenu ni bizaaca Eric, ti hermanu de África occidental. * Cumu nabé guyuuláʼdxibe quítebe fútbol la? ngue runi dxi nápabe 15 iza mápeca cuyúbicabe laabe para chuʼbe lu ti equipu nacional. Para ganda chuʼbe lu equipu ca naquiiñeʼ chebe Europa para guiziidiʼ chaahuibe ne gácabe ti futbolista profesional. Peru ñee zusihuínnibe cayetenaláʼdxibe de Dios ni Bizáʼ laabe pa gúnibe nga la? Guidúʼyanu xi biʼniʼ Eric ne xi rizíʼdinu de ejemplu stibe.

Dxi canazaruʼ Eric scuela bizulú biindané ca testigu stiʼ Jiobá laa Biblia ne biziidiʼ zuni chaahuiʼ Dios ca guendanagana ni napa binni. Bidiibe cuenta nabé risaca nga iquiiñebe tiempu stibe ne stipa stibe para gúnibe ni na Dios. Ngue runi, lugar de ñácabe ti deportista profesional, guyuunísabe ne gudixhe íquebe guiniisibe lu stiidxaʼ Dios. Qué nindaa beeda gácabe siervu ministerial, ne despué biʼniʼ invitárcabe laabe para chebe Scuela ra riziidiʼ ca hombre ni caʼruʼ guichaganáʼ gúnicaʼ xhiiñaʼ Dios.

Pa niguixhe íquebe ñácabe ti deportista, zándaca nabé ñunibiáʼ binni laabe ne ñápabe bidxichi. Peru laabe nánnabe dxandíʼ ni na Biblia: «Guiráʼ ca cosa risaca stiʼ ti ricu nácani guidxi nadipaʼ para laa, ne riníʼ ique zeeda gácani casi ti lindaa ni rapa laa» (Prov. 18:11). Racá ridúʼyanu, cadi dxandíʼ ribani binni galán ora napa bueltu. Dxandíʼ, tu racalaʼdxiʼ gapa bidxichi la? «nabé huayacaná» (1 Tim. 6:9, 10).

Peru nuu stale hombrehuiiniʼ ne dxaapahuiiniʼ nabé nayecheʼ modo nabánicaʼ purtiʼ nácacaʼ precursor. Eric guníʼ: «Guyuaaʼ lade stale precursor ni zeeda gaca casi ti equipu. Nga nga ti equipu jma galán ra nuaaʼ, ne rudieeʼ xquíxepeʼ Jiobá pur gucané naa cadi gusaana neza ni rusiecheʼ binni ne ra ribeendú ni galán».

Lii yaʼ, xi cá íqueluʼ gúniluʼ. Lugar de quixhe íqueluʼ ugaandaluʼ xiixa lu guidxilayú riʼ, xiñee qué gácaluʼ precursor ti gusihuínniluʼ naguidxi neza ra zizaluʼ. (Biiyaʼ cuadru ni láʼ « Ni qué zanda gudii scuela roʼ lii».)

Ti guendaxheelaʼ ni yeganna Betel ni nuu Estados Unidos bidxagayaacaʼ ora bíʼyacaʼ pabiáʼ nayecheʼ nuu ca betelita ni cayuni dxiiñaʼ raqué. Hermana que bicaa despué: «Nabánidu galán ne gastiʼ cayaadxaʼ laadu». Laabe ne xheelabe gudixhe íquecabe gúnicabe jma lu xhiiñaʼ Jiobá.

Nabé guyuucabe xizaa pur ni chigúnicabe que. Peru ti dxi guníʼ íquecabe ni na textu stiʼ dxi que. Ne textu ca nga Juan 8:31, ra guníʼ Jesús ca diidxaʼ riʼ: «Pa qué iree chu tu de lu stiidxa la? zaca xpinne piaʼ laatu». Oraqué guníʼ íquecabe: «Zabeendudu ni galán ra gúnidu intiica cosa para gápadu ni guibaninésidu». Bitoocabe yoo ngola stícabe, bíʼnicabe xcaadxi cosa ni caquiiñeʼ gúnicabe ne yegacanécabe sti neza binni ridagulisaa ra caquiiñeʼ tu gacané. Yanna maʼ nácacabe precursor, ne laaca racanécabe ra cabí Yoo stiʼ Reinu ne racanécabe ra chigaca guendaridagulisaa de chonna gubidxa. Ximodo runi sentírcabe yaʼ. Laacabe guníʼcabe: «Nabé ridxagayaadu ora ridúʼyadu pabiáʼ nayecheʼ nuudu pur nápadu ni nabaninésidu, ne nga nga ni rinabaʼ xquidxi Jiobá laanu gúninu».

Salomón bicaa sicaríʼ: «Cadi gusaana de guuyadxiluʼ ni nuu nezaluluʼ, biiyadxí guiráʼ ni nuu nezaluluʼ» (Prov. 4:25, La palabra de Dios para Todos). Cásica ti binni ni zigusá carru lu ti carretera cadi naquiiñeʼ gaxhalú neza zeʼ, zacaca nga laanu, cadi naquiiñeʼ guuyadxinu ca cosa ni zanda guxhaleʼ laanu de cani naguixhe íquenu ugaandanu ndaaniʼ xquidxi Dios.

 Xii nga cani zanda ugaandanu yaʼ. Tobi de laacani nga gácanu precursor. Stobi nga chuunu sti neza binni ridagulisaa ra caquiiñeʼ tu gucheeche diidxaʼ, o ra caquiiñeʼ jma binnigola o siervu ministerial. Ñee zanda chigacaneluʼ ca lugar ca la? Galán guiníʼneluʼ binnigola ni riganna ca neza binni ridagulisaa paraa zanda chigacaneluʼ. Pa riuuláʼdxiluʼ chigacaneluʼ ti lugar jma zitu, zanda guinabadiidxaluʼ xi neza binni ridagulisaa caquiiñeʼ tu gacané. *

Guidúʼyanu sti biaje ni rieeteʼ lu Isaías 62:10. Chupa chonna de ca judíu bíʼnicaʼ dxiiñaʼ nadipaʼ para cueecaʼ guiráʼ ni cuchiiñaʼ lu neza que ne guni chaahuicaʼ ni ti ganda guibiguetaʼ ca israelita que xquídxicaʼ. Pa cayúniluʼ stipa pur ugaandaluʼ xiixa guenda ndaaniʼ xquidxi Dios, cadi guireeluʼ gana. Zacané Jiobá lii para ganda ugaandaluʼ ni. Cadi gudiiluʼ lugar chuʼ xiixa gucueeza lii ne gunabaʼ Dios gudii lii guendabiaaniʼ. Ne zacanebe lii guʼyaʼ chaahuiluʼ «paraa guzuhuaañeeluʼ» (Prov. 4:26).