GULE bixhozeʼ ndaaniʼ guidxi Graz (Austria) lu iza 1899, ngue runi, nahuiinirube dxi bizulú Primera Guerra Mundial. Peru lu iza 1939, cadi xadxí de bizulú Segunda Guerra Mundial, guluucabe laabe lu ejércitu stiʼ Alemania. Gútibe lu iza 1943, dxi cadindenécabe guidxi Rusia. Dxiqué deruʼ chupa iza napaʼ, ngue runi qué ñunebiaʼyaʼ laabe. Dxi nahuiineʼ guyuuladxeʼ ñapaʼ bixhozeʼ, purtiʼ cani riniáʼ scuela nápacaʼ bixhózecaʼ ne naa coʼ. Despué, dxi maʼ ziniiseʼ, gutadxí ladxiduáʼ ora biziideʼ de Jiobá, Bixhozeʼ ni nuu guibáʼ ne qué ziuu dxi gatiʼ (Hab. 1:12).

Dxi napaʼ gadxe iza, guyuaaʼ lu ti grupu ni láʼ Movimiento Scout. Ca Boy Scouts ca nga ti grupu de hombrehuiiniʼ ni rié xiixa lugar para chigunibiáʼ, grupu ni nuu lu guidubi guidxilayú riʼ bizuluni lu iza 1908, ndaaniʼ guidxi Gran Bretaña. Robert Stephenson Smyth Baden-Powell, ti teniente general stiʼ ejércitu de Gran Bretaña, nga gundisastí grupu riʼ. Ne lu iza 1916 gundísabe sti grupu ni láʼ Wolf Cubs o Cub Scouts (laaca runibiáʼcabe laacaʼ casi Lobatos), ti grupu para ca hombrehuiiniʼ ni jma nahuiiniʼ biaʼ naa.

Nabé riuuladxeʼ ora riaanadu ndaaniʼ guiʼxhiʼ ca sábadu ne ca domingu: gásidu ndaaniʼ tienda de campaña, gácudu uniforme ne guni marchardu biaʼ zixidxi ca tambor que. Nabé rietenalaʼdxeʼ ora maʼ caguiteniáʼ xcaadxi hombrehuiiniʼ que ndaaniʼ guiʼxhiʼ ne ora maʼ zixhinni maʼ naguudu leʼ ti bele ne maʼ cadúʼndadu. Laaca bizíʼdidu stale de ca cosa ni nuu ndaaniʼ guiʼxhiʼ, ne nga gucané naa gannaxhieeʼ ca cosa ni bizáʼ Dios.

Riguucabe gana grupu Boy Scouts para gúnidu xiixa cosa galán guiráʼ dxi. Rietenalaʼdxeʼ rinidu: «Maʼ nuudu listu» ora rugapadiúxidu. Nabé guyuuladxeʼ guiniéʼ zaqué. Lu grupu stidu que nuu jma de ti gayuaa hombrehuiiniʼ: biaʼ galaa grupu que naca católicu, xcalaa que nácacaʼ protestante, ne tobi si naca budista.

Dede lu iza 1920, huadagulisaa ca grupu de Boy Scouts ni nuu lu guidubi guidxilayú, ca guendaridagulisaa ca runibiáʼcabe ni casi jamborees, ne rúnicabe ni cada chupa chonna iza. Lu beeu agosto iza 1951, guyaaʼ Bad Ischl (Austria) ra guca guendaridagulisaa lu guidubi guidxilayú númeru gadxe. Ne lu beeu agosto iza 1957 guca guendaridagulisaa númeru gaʼ ndaaniʼ guidxi Sutton Park, gaxha de Birmingham (Inglaterra). Lu guendaridagulisaa riʼ, guyé 33,000 Boy Scouts de 85 guidxi, ne guyé jma de 750,000 binni, ne ládecabe nuu reina Isabel de Inglaterra. Bineʼ sentir nuaaʼ lade ti familia ni nuu lu guidubi guidxilayú. Peru qué lica niníʼ iqueʼ pa maʼ  cadi candaa ziuaaʼ lade ti familia jma naroʼbaʼ ni nuu lu guidubi naca guidxilayú ne ni nadxii Dios.

Biaʼ lu beeu marzo o abril iza 1958 caziideʼ dxiiñaʼ de camareru ndaaniʼ Grand Hotel Wiesler de Graz (Austria). Maʼ xcaadxi si riaadxaʼ naa para guiluxe guiziideʼ dxiiñaʼ que, ora guniʼné Rudolf Tschiggerl naa de cani runi cré, laabe nga ti xhamiguaʼ ni rusiidiʼ modo raca pastel. Ndiʼ nga primé biaje binadiagaʼ ni dxandíʼ rusiidiʼ Biblia. Bizulú guniʼbe de Trinidad ne gúdxibe naa qué rusiidiʼ Biblia de laani. Gudxeʼ laabe rusiidiʼ Biblia de laani ne cadi jneza cani caniʼbe. Nabé guyuuladxeʼ modo naca Rudolf —rábidu laabe Rudi—, ngue runi gucalaʼdxeʼ nibigueta ñácabe católicu.

Guniʼbe zinebe ti Biblia para naa, peru gudxeʼ laabe zacaa ni pa gácani ti Biblia católica. Ora bidiibe ni naa ne bizulú biindaʼ ni la? bidxelaʼ ti tratadu stiʼ Sociedad Watchtower ni guluu Rudi ndaaniʼ ni. Qué ñuuladxeʼ ni bíʼnibe que, purtiʼ zándaca gusihuinni tratadu que dxandíʼ ni na neca cadi dxandíʼ ni. Peru riuuladxeʼ guinidu xiixa tema stiʼ Biblia. Bisihuinni Rudi nuu xpiaaniʼ, purtiʼ maʼ qué ñuu dxi nudii naa xiixa libru o revista. Peru biaʼ chonna beeu despué rinírudu de Biblia gatigá. Nuu ora riaanadu dede maʼ huaxhinni.

Despué de biluxe biziideʼ ndaaniʼ hotel ni nuu Graz que, biseendaʼ jñaaʼ naa ti scuela de hostelería. Scuela que riaana ni ndaaniʼ ti guidxihuiiniʼ ni láʼ Bad Hofgastein, ni riaana ndaaniʼ ti valle ni nuu Alpes. Cumu tobi si scuela que ne Grand Hotel ni nuu Bad Hofgastein que la? nuu biaje riguneʼ dxiiñaʼ ndaaniʼ hotel que para guiziideʼ jma.

Biseendaʼ Rudi dirección stinneʼ Betel ni nuu Viena, ne Betel que biseendaʼ chupa misionera, Ilse Unterdörfer ne Elfriede Löhr, para chiganna naa. * Ti dxi gudxi recepcionista stiʼ hotel que naa nuu chupa señora ndaaniʼ ti carru ne nuucaʼ guiníʼnecaʼ naa. Guizáʼ bidxagayaaʼ óraque, ngue runi yeguuyaʼ tu laacabe. Despué gunnaʼ, guiropaʼ hermana ni yeganna naa que biquiiñecabe laacaʼ para gutiidicaʼ libru ne revista tiempu bicueeza Alemania dxiiñaʼ stiʼ ca Testigu. Ante guzulú Segunda Guerra Mundial, gunaazeʼ Gestapo —puliciá de Alemania ni runi dxiiñaʼ nagaʼchiʼ— laacabe ne biseendaʼ laacabe ndaaniʼ campu de concentración ni riaana Lichtenburg. Ne dxi maʼ bizulú guerra que biseendacabe laacaʼ ndaaniʼ campu de concentración ni nuu Ravensbrück, gaxha de Berlín.

Ca hermana que casi biaʼca jñaaʼ laacaʼ. Runeʼ respetar laacabe ne qué racaladxeʼ guníticabe tiempu stícabe. Qué ñacalaʼdxeʼ gueedacabe chupa chonna semana o beeu para gabeʼ laacabe despué qué racaladxeʼ gastiʼ. Ngue runi gunabaʼ laacabe gudiicabe naa ti lista ra gucaacabe caadxi textu ra cusiene cadi dxandíʼ ni rusiidicabe de sucesión apostólica, ni runi cré ca católicu. Ne gudxeʼ laacabe zuluéʼ lista ca cura ni nuu guidxi que. Guníʼ  iqueʼ pa gabeʼ ni laabe zannaʼ tuu nga ni rusiidiʼ ni dxandíʼ.

Gadxé modo riene ca católicu ca ni zeeda lu Mateo 16:18, 19, para gusiidicaʼ de sucesión apostólica. Nácabe apóstol Pedru nga guca primé papa ne laa rusaanané dxiiñaʼ ca xcaadxi papa. Iglesia Católica laaca riniʼcaʼ qué ruchee ca papa ca ora maʼ cusiidicaʼ ni runi crecaʼ. Ngue runi, bineʼ cré Trinidad, purtiʼ papa peʼ nga bisiidiʼ ni, ne ca católicu nacaʼ laabe nga Santu Padre. Peru pa gueeda guchee papa ca la? zahuinni cadi dxandíʼ nuu Trinidad. Para ca católicu nabé risaca ni rusiidicabe de sucesión apostólica, purtiʼ de racá nga riree xcaadxi ni rusiidicabe ra yuʼduʼ stícabe.

Ora guyaaʼ ra nuu cura que, qué ñanda nicabi cani gunabadiidxaʼ laa, bidiibe naa ti libru ni caníʼ de sucesión apostólica. Yeniáʼ ni yoo casi gúdxibe naa, biindaʼ ni ne bibiguetaʼ ra nuube para guinabadiidxaʼ laa xcaadxi cosa. Peru cumu qué ñanda nicábibe naa la? gúdxibe naa: «Qué zanda ucuudxeʼ lii, ne qué zanda ucuudxiluʼ naa [...]. Sicarú guyé». Maʼ qué ninabe niníʼnebe naa de religión.

Despué, gudixhe iqueʼ guundaniáʼ Ilse ne Elfriede Biblia. Laacabe gucanécabe naa gunebiaʼyaʼ tupeʼ nga Santu Padre ni nuu guibáʼ ne labe Jiobá (Juan 17:11). Cumu caʼruʼ chuʼ nin ti neza binni ridagulisaa nezaqué la? guiropaʼ hermana que rúnicaʼ ca guendaridagulisaa ra lidxi ca binni ni riuulaʼdxiʼ ganna de Dios. Caadxi si binni rié. Ilse ne Elfriede rúnicaʼ guidubi guendaridagulisaa que, purtiʼ gastiʼ nin ti hermanu ni maʼ guyuunisa para gúnini. Nuu si tiru nga reeda tuuxa hermanu de sti ladu para gudii ti libana lugar ra riguíxecabe.

Bizulú biindané Ilse ne Elfriede naa lu beeu octubre iza 1958. Chonna si beeu despué guyuaanisaʼ, lu beeu enero iza 1959. Ante chuaanisaʼ gunabadiidxaʼ laacabe pa zanda chigucheecheniáʼ laacabe diidxaʼ de yoo pur yoo para guuyaʼ ximodo rúnicabe ni (Hech. 20:20). Despué de yegucheecheʼ diidxaʼ primé biaje, gunabaʼ gudiicabe naa ti lugar para chigucheecheʼ diidxaʼ. Bidiicabe naa guidubi ti guidxihuiiniʼ. Riaaʼ stubeʼ ne rucheecheʼ diidxaʼ stubeʼ de yoo pur yoo ne laaca rigannaʼ ca binni ni riuulaʼdxiʼ guiziidiʼ. Superintendente de circuito que nga primé hermanu ni yegucheecheniáʼ diidxaʼ ne despué yeganna laadu.

Lu iza 1960, despué de biluxe biindaʼ scuela de hostelería, bibiguetaʼ ra lidxeʼ para gacaniáʼ binnilidxeʼ gánnacaʼ guiráʼ ni maʼ biziideʼ de Biblia. Dede yanna, nin tobi de laacaʼ qué ninacaʼ niziidicaʼ de Biblia, neca nuu de laacaʼ riuuláʼdxicaʼ gucaadiagasicaʼ.

Lu iza 1961, Betel ni nuu Austria biseendaʼ carta ra nuu guiráʼ neza binni ridagulisaa ra caguucaʼ gana guiráʼ ca hermanu gácacaʼ precursor. Caʼruʼ guichaganaʼyaʼ ne nazaaca nuaaʼ, ngue runi guníʼ iqueʼ zanda gacaʼ precursor. Gunieniáʼ Kurt Kuhn, superintendente de circuito que, ne gudxeʼ laabe guneʼ dxiiñaʼ xhupa xhonna beeu ti ganda sieʼ ti carru, purtiʼ zaquiiñeʼ ni ora gacaʼ precursor. Para bicábibe naa: «Ñee biquiiñeʼ Jesús ne ca apóstol stiʼ ti carru para bíʼnicaʼ xhiiñaʼ Dios la?». Ninruʼ sti diidxaʼ qué niniéʼ. Oraqueca gudixhe iqueʼ gacaʼ precursor. Cumu 72 hora runeʼ dxiiñaʼ cada semana ndaaniʼ restaurán stiʼ hotel que la? naquiiñeʼ guchaa caadxi cosa.

 Gudxeʼ jefe stinneʼ pa zanda guneʼ dxiiñaʼ 60 hora si. Gúdxibe naa zanda guneʼ dxiiñaʼ que, ne cadi ngue si, gudíxebe naa biaʼ queca. Despué gunabaʼ laabe guneʼ dxiiñaʼ 48 hora si, laaca gunabe ne gudíxebe naa biaʼ queca. De raqué gunabaʼ laabe guneʼ dxiiñaʼ 36 hora —xhoopaʼ gubidxa ne cada dxi xhoopaʼ hora si— ne laaca gunabe. Ne guizáʼ bidxagayaaʼ purtiʼ gudíxebe naa biaʼ queca. Ruluíʼ qué nabe gusaanaʼ de guneniáʼ laabe dxiiñaʼ. Cumu maʼ huaxiéʼ hora runeʼ dxiiñaʼ la? gunda bizuluáʼ de precursor. Ca dxi que, ca precursor regular rucheechecaʼ diidxaʼ 100 hora guiráʼ beeu.

Tapa beeu despué, gucaʼ precursor especial ne siervu de congregación ndaaniʼ ti neza binni ridagulisaa nahuiiniʼ ni riaana provincia stiʼ Carintia, ndaaniʼ guidxi Spittal an der Drau. Dxiqué, ti precursor especial runi 150 hora guiráʼ beeu. Qué ñapaʼ nin ti compañeru para nucheecheniáʼ diidxaʼ, peru rudieeʼ xquíxepeʼ ti hermana láʼ Gertrude Lobner pur gucané naa. Hermana riʼ runi dxiiñaʼ stiʼ ti siervu auxiliar de congregación. *

Lu iza 1963, biʼniʼ invitárcabe naa para gacaʼ superintendente de circuito. Nuu biaje, riaaʼ lu tren para chigannaʼ ca neza binni ridagulisaa ne maʼ nuayaʼ ca maleta stinneʼ neca nabé nanaacaʼ. Cumu stale de ca hermanu qué gapa carru la? qué randa ricaacaʼ naa ra estación. Ñanda nicaaʼ ti taxi, peru zándaca guni sentir ca binni ra chiguiaanaʼ que mal, ngue runi guzayaʼ dede yendayaʼ ra lídxicabe.

Lu iza 1965, caʼruʼ guichaganaʼyaʼ, biʼniʼ invitárcabe naa clase 41 stiʼ Scuela stiʼ Galaad. Stale de ca xcompañeruaʼ laaca caʼruʼ guichaganacaʼ. Guizáʼ bidxagayaaʼ ora biseendacabe naa Austria sti biaje para gacaruáʼ superintendente de circuito, peru ante chaaʼ Austria gunábacabe naa chiniáʼ Anthony Conte Estados Unidos. Hermanu riʼ naca superintendente de circuito ladu guiaʼ stiʼ Nueva York, zona stiʼ Cornwall. Nabé guyuuladxeʼ modo bínidu dxiiñaʼ raqué. Guizáʼ nánnabe gucheechebe diidxaʼ ne nabé riuuláʼdxibe gúnibe ni, cásica naa.

Ora bibiguetaʼ Austria, gucaʼ superintendente de circuito, raqué binebiaʼyaʼ Tove Merete, ti baʼdudxaapaʼ nabé sicarú. Nápabe gaayuʼ iza dxi bizulú gúcabe xpinni Cristu. Ora rinabadiidxaʼ ca hermanu laadu ximodo binibiaʼdu, rábidu laacabe: «Pur Betel nga binibiaʼdu», ne rinidu zacá para gusixídxidu laacabe. Bichaganadu ti iza despué, lu beeu abril 1967, ne bínirudu dxiiñaʼ de circuito.

Sti iza que bidieeʼ cuenta gulí Jiobá naa para gacaʼ tobi de ca xiiñiʼ ni cheʼ guibáʼ. De raqué guyuaaʼ jma gaxha de Jiobá, Bixhozeʼ ni nuu guibáʼ, ne maʼ guniéʼ casi riníʼ xcaadxi xiiñibe casi na Romanos 8:15 ra na: «[Abba], Bixhoze».

Naa ne Merete bínirudu dxiiñaʼ de circuito ne distrito dede lu iza 1976. Tiempu nananda, nuu biaje rásidu ndaaniʼ cuartu ra gastiʼ ni guchaa laadu. Ti dxi bibánidu ne bidiʼdu cuenta nachonga nuu xhabagueeladu ne naquichiʼ be ni de hielu. ¡Bi stidu bíʼnini zaqué! De raqué maʼ rinedu ti  estufahuiiniʼ de biaaniʼ ti ganda gásidu nadxaa. Xcaadxi lugar gupa xidé bireʼdu ne guzadu lu hielu para chuudu bañu huaxhinni, ne ndaaniʼ ca bañu que nabé ridiʼdiʼ bi nanda. Cumu qué gápadu ti cuartu ra chindézadu la? ca lunes ca riaanadu ra lidxi ca binni ni yegánnadu ti semana ante. Biaʼsi martes siadóʼ maʼ riuudu sti neza binni ridagulisaa ni raca caber chigánnadu.

Nabé nayecheʼ runeʼ sentir purtiʼ qué rusaana xheelaʼ de gacané naa. Qué huayuudxí gabeʼ laabe naquiiñeʼ chigucheechebe diidxaʼ. ¡Guizáʼ riuuláʼdxibe gúnibe dxiiñaʼ riʼ! Laaca nabé nadxiibe ca xpinni Cristu ne rizaaláʼdxibe laacaʼ de guidubi ladxidoʼbe. Nabé huayacanebe naa.

Lu iza 1976, biʼniʼ invitárcabe laadu chigúnidu dxiiñaʼ ndaaniʼ Betel stiʼ Austria, ndaaniʼ guidxi Viena, ne raqué gucaʼ tobi de cani nuu lade Comité de Sucursal. Ca dxi que, Betel stiʼ Austria ruuyaʼ dxiiñaʼ ni runi caadxi guidxi ni nuu Europa del Este ne ruyubi modo chindá libru ne revista nagaʼchiʼ ndaaniʼ ca guidxi ca. Ne Jürgen Rundel nga biʼyaʼ gaca dxiiñaʼ riʼ, ne laaca bineniáʼ laa dxiiñaʼ. Despué, bidiicabe naa guuyaʼ dxiiñaʼ ni cayaca ra cabiʼxhiʼ 10 diidxaʼ ni riníʼcabe Europa del Este. Jürgen ne xheelabe Gertrude, de yanna rúnicaʼ xhiiñaʼ Jiobá; ne nácacaʼ precursor especial ndaaniʼ guidxi Alemania. Lu iza 1978, Betel stiʼ Austria bizulú biʼniʼ fotocomponer revista lu 6 diidxaʼ ne biʼniʼ imprimircaʼ ni lu ti prensahuiiniʼ offset. Ne laaca biséʼndadu revista ra nuu binni de sti guidxi. Nabé biquiiñecabe Otto Kuglitsch, ne xheelabe Ingrid para guca ca dxiiñaʼ riʼ, ne yanna cayúnicabe dxiiñaʼ Betel ni nuu Alemania.

Ca hermanu ni nuu ndaaniʼ ca guidxi stiʼ Europa del Este laaca biʼniʼ imprimircaʼ libru ne revista, ne biquiiñecaʼ mimeógrafo o caadxi cintahuiiniʼ stiʼ película para biʼniʼ imprimírcabe cani cá lúcani. Peru biquiiñecabe ca hermanu ni cadi nuu Betel para gacané laacabe. Jiobá guluu ndaayaʼ dxiiñaʼ ni bíʼnicabe, ne guiráʼ cani nuu Betel nabé gunnaxhiicabe ca hermanu riʼ, purtiʼ qué nusaanacaʼ Jiobá ca iza nagana dxi qué niná gobiernu nireeche diidxaʼ.

Lu iza 1989 yeniáʼ hermanu Theodore Jaracz, tobi de cani nuu lu Grupu ni Zaniruʼ, Rumania.  Guyuudu raqué para gacanedu stale hermanu guibiguétacaʼ ndaaniʼ xquidxi Dios. Ra bizulú iza 1949, ca hermanu riʼ bixélecaʼ de xquidxi Jiobá ne bíʼnicaʼ congregación sticaʼ. Peru rucheechecabe diidxaʼ ne riguunísacabe xcaadxi binni. Ne laaca biseguyoo gobiernu laacabe purtiʼ qué ninácabe ñécabe lu guerra cásica biseguyoocabe cani nuu ndaaniʼ xquidxi Dios. Cumu qué náʼ gobiernu guireeche diidxaʼ ndaaniʼ guidxi Rumania la? nagaʼchiʼ bidagulisaadu ra lidxi hermanu Pamfil Albu ne stapa binnigola ni maʼ xadxí de nuu ndaaniʼ xquidxi Dios ne xcaadxi binni biseendaʼ Comité stiʼ Rumania. Ne laaca yenedu Rolf Kellner, ti hermanu ni riníʼ stiidxaʼ ca binni que.

Guiropa gueelaʼ bidagulisaadu que, hermanu Albu bicuudxi stapa binnigola que para guidagulisaanecaʼ laadu sti biaje. Laabe guniʼbe: «Pa qué guidagulisaanu yanna, maʼ qué zanda guidagulisaanu sti dxi». Zacá nga bibiguetaʼ 5,000 hermanu ndaaniʼ xquidxi Dios. Zacá nga biʼniʼ ganar Jiobá ne casi ñaca nigápacabe xadiaga Binidxabaʼ.

Ra maʼ ziluxe iza 1989, biʼniʼ invitar Grupu ni Zaniruʼ naa ne xheelaʼ para gúnidu dxiiñaʼ Betel stiʼ Nueva York. ¡Guizáʼ bidxagayaadu! Bizulú bínidu dxiiñaʼ Betel stiʼ Brooklyn lu beeu julio iza 1990. Ne lu iza 1992 gucaʼ tobi de cani racané Comité de Servicio stiʼ Grupu ni Zaniruʼ, ne dede lu beeu julio iza 1994 maʼ gucaʼ tobi de cani nuu lu Grupu ni Zaniruʼ.

Maʼ xadxí nga bineʼ dxiiñaʼ de camareru ndaaniʼ hotel que. Yanna nuaaʼ nayecheʼ purtiʼ racaniáʼ para gapa ca xpinni Cristu ni gacané laacaʼ chuʼcaʼ gaxha de Dios (Mat. 24:45-47). Maʼ ziniáʼ jma de cincuenta iza de nuaaʼ lu serviciu especial, ne ora riníʼ iqueʼ ca iza riʼ, guizáʼ nayecheʼ riuaaʼ ne rudieeʼ xquíxepeʼ Jiobá purtiʼ cayuuyaʼ modo caguube ndaayaʼ ca hermanu ni nuu lu guidubi naca guidxilayú. Nabé riuuladxeʼ chaaʼ ca guendaridagulisaa roʼ ra rié binni de guiráʼ guidxi ra rusietenaláʼdxicabe laanu pabiáʼ risaca gunibiáʼ chaahuinu Jiobá, Bixhózenu ni nuu guibáʼ, ne guizíʼdinu ni dxandíʼ rusiidiʼ Stiidxabe.

Rinabaʼ Jiobá ganda guiziidiruʼ millón de binni ni rusiidiʼ Biblia, gánnacaʼ ni dxandíʼ ne chuʼcaʼ tobi si ne guiráʼ ca xpinni Dios ni nuu lu Guidxilayú (1 Ped. 2:17). Ne ora maʼ nuaaʼ guibáʼ, racaladxeʼ guuyaʼ ora guiasa gueʼtuʼ lu Guidxilayú ne gunebiaʼyaʼ bixhozeʼ. Ne laaca racaladxeʼ guni adorar bixhozeʼ, jñaa ne xcaadxi binnilidxeʼ Jiobá ndaaniʼ Paraísu.