NABÉ biinaʼ Pedru despué de guníʼ qué runibiáʼ Jesús; naquiiñeʼ gúnibe stipa pur chuʼbe galán nezalú Dios. Neca zaqué, Jesús biquiiñeʼ laabe para gacanebe xcaadxi discípulo. Ngue runi gudxi laabe: «Ne ora ma biasa lu sti tiru la? ucané ca hermanu stiuʼ uzuhuaa chaahui caʼ» (Luc. 22:32, 54-62). Pedru beeda gaca xaíque ndaaniʼ neza binni ridagulisaa ni guyuu lu primé siglu (Gál. 2:9). Zacaca nga tiempu riʼ, tobi ni guca binnigola lade ca binni ridagulisaa dxiqué zanda guibiguetaʼ guicaa dxiiñaʼ riʼ sti biaje ne ganda guquidxi fe stiʼ ca biʼchiʼ ne ca bizaʼnaʼ ne zacá ziuube nayecheʼ.

Nuu de ca xpinni Cristu ni maʼ cadi naca binnigola zándaca guiníʼ íquecaʼ maʼ gastiʼ nga laacaʼ. Guzeetenu ni bizaaca Julio, * ti xpinni Cristu ni guca binnigola ndaaniʼ guidxi Bolivia jma de gande iza guníʼ: «Nabé stale tiempu riniáʼ para quixhe chaahueʼ ca libana stinneʼ, chigannaʼ ca binni ridagulisaa ne gapaʼ laacaʼ. Peru málasi biniteʼ cani ne bineʼ sentir cayaadxaʼ xiixa naa. Nabé nagana gúcani para naa». Yanna, maʼ naca Julio binnigola sti biaje.

Discípulo Santiago bicaa ca diidxaʼ riʼ: «Hermanu caʼ, laguieche né intiica enda naná gueeda luguiá tu» (Sant. 1:2). Santiagu caníʼ de ca guendanagana ni reeda luguianu purtiʼ rizanándacabe laanu ne purtiʼ nácanu binni ruchee. Guniʼbe de cani ruyubi puru si para laa ne ora riuu tuuxa pur ti binni ne xcaadxi cosa (Sant. 1:14; 2:1; 4:1, 2, 11). Zándaca gacananu ora uguu jneza Jiobá laanu, peru cadi naquiiñeʼ chuʼnu triste (Heb. 12:11).

Pa binítinu xiixa dxiiñaʼ ni nápanu lade ca binni ridagulisaa, cadi naquiiñeʼ gusaana de guidúʼyanu ximodo nuu fe stinu ne gusihuínninu nadxiinu Jiobá. Laaca naquiiñeʼ guiníʼ íquenu xiñee bíninu  dxiiñaʼ ca. Ñee purtiʼ gucaláʼdxinu guyúbinu puru si para laanu la? O, purtiʼ nadxiinu Jiobá ne nánnanu stibe ca neza binni ridagulisaa ca ne caquiiñecaʼ chuʼ tu gapa laacaʼ jneza la? (Hech. 20:28-30). Ca hermanu ni guca binnigola dxiqué ne qué huasaana de gúnicaʼ xhiiñaʼ Dios, rusihuínnicaʼ nezalú guiráʼ binni dede nezalú Binidxabaʼ dxandíʼ nadxiicaʼ Jiobá.

Dxi bichee rey David, guluu jneza Jiobá laa, guniʼbe dxandíʼ bicheebe ne bitiidilaʼdxiʼ Dios donda stibe. Despué biindabe sicaríʼ: «Ti hombre gucaalú peru gutiidiláʼdxicabe ni biʼniʼ ne gutiidiláʼdxicabe donda stiʼ la? riuu nayecheʼ. Nayecheʼ nga ribani hombre ni qué ugaaniʼ Jiobá donda ique, ne nayecheʼ riuu hombre ni qué rusiguii» (Sal. 32:1, 2). Ni biʼniʼ Jiobá David que gucané ni laa ne zaqué gúpabe xquidxi Dios jneza.

Ca xpinni Cristu ni guibiguetaʼ gaca binnigola sti biaje jma jneza rápacaʼ ca binni ridagulisaa. Sicaríʼ guníʼ ti binnigola: «Yanna jma jneza modo racaniáʼ tuuxa ni bichee». Stobi guníʼ: «Yanna jma risaca para naa gapaʼ ca xpinni Cristu».

Salmista que guníʼ ca diidxaʼ riʼ: «Cadi guiráʼ ora ruluíʼnabe ra ruchee binni» (Sal. 103:9). Nga runi, cadi naquiiñeʼ guiníʼ íquenu maʼ qué zabiguetaʼ gapa Dios confianza ti binni ni maʼ bichee. Ti xpinni Cristu láʼ Ricardo guca binnigola stale iza ne despué maʼ qué ñácabe ni, laa guníʼ: «Nabé triste guyuaaʼ purtiʼ bicheeʼ. Nabé xadxí bineʼ sentir maʼ qué zanda guneʼ dxiiñaʼ que sti biaje. Guníʼ iqueʼ maʼ qué zapa ca hermanu que confianza naa. Peru cumu riuuladxeʼ gacaniáʼ binni la? yegannaʼ laacaʼ ra lídxicaʼ para guundaniáʼ laacaʼ, riguaaʼ gana ca xpinni Cristu ra Yoo stiʼ Reinu ne rucheecheniáʼ laacaʼ diidxaʼ. Cani bineʼ que gucané cani naa, yanna maʼ nacaʼ binnigola sti biaje».

Pa ti hermanu gapa xiana ndaaniʼ ladxidóʼ, jma nagana zaca para laa guibigueta gaca binnigola. Jma galán gácanu casi rey David, laa bixooñeʼ de Saúl, ti rey ni gupa envidia laabe. Neca stale biaje ñanda ñuuti David Saúl, qué niná ñúnini (1 Sam.  24:4-7; 26:8-12). Ne ora guti Saúl lu ti guerra, biinaʼ David ne guníʼ laabe ne xiiñibe Jonatán nga ca hombre ni gunnaxhiibe (2 Sam. 1:21-23). David qué ñapa xiana ndaaniʼ ladxidóʼ.

Pa runi sentirluʼ cadi jneza biʼniʼ juzgárcabe lii, cadi gudiiluʼ lugar chuʼ xiana ndaaniʼ ladxidoʼloʼ. Ti xpinni Cristu láʼ William, laa guca binnigola jma de treinta iza ndaaniʼ guidxi Gran Bretaña. Ra maʼ cadi nácabe binnigola, gúpabe xiana chupa chonna binnigola. Xi gucané William yaʼ. Laabe guniʼbe: «Biindaʼ libru stiʼ Job ne nabé gucané ni naa. Pa gucané Jiobá Job para bitiidilaʼdxiʼ donda stiʼ guionnaʼ xcompañeru, ñee qué zacanebe naa para chuaaʼ galán ne ca binnigola ni cayuni ni na Cristu la?» (Job 42:7-9).

Pa bisaanaluʼ de gácaluʼ binnigola lade ca binni ridagulisaa, galán guiníʼ íqueluʼ xiñee bíʼniluʼ ni. Ñee bireeluʼ gana pur xiixa guendanagana ni gúpaluʼ la? Ñee guyuu xiixa ni jma risaca lu xquendanabániluʼ la? Ñee bireeluʼ gana purtiʼ binni ruchee ca xpinni Cristu la? Neca intiica bizaacaluʼ, bietenalaʼdxiʼ ora gúcaluʼ binnigola jma gunda gucaneluʼ ca xpinni Cristu stale modo. Ca libana stiluʼ biquidxi ni fe sticaʼ, ejemplu stiluʼ guluu ni gana laacabe ne ora yegánnaluʼ laacabe ra lídxicabe gucané ni laacabe para biʼniʼ huantárcabe ca guendanagana stícabe. Laaca bisiecheʼ dxiiñaʼ ni bíʼniluʼ ladxidóʼ Jiobá ne laaca bisiécheni lii (Prov. 27:11).

Nabé stale xpinni Cristu maʼ gucané Jiobá laacaʼ para guibiguetaʼ chuʼcaʼ nayecheʼ ne gacaláʼdxicaʼ guibiguetaʼ gúnicaʼ jma dxiiñaʼ ra ridagulisaacaʼ. Pa lii si bisaanaluʼ de gácaluʼ binnigola o pur xiixa cosa maʼ cadi nácaluʼ ni, xiñee qué gúniluʼ stipa pur guibiguetaʼ gácaluʼ binnigola sti biaje yaʼ (1 Tim. 3:1). Pablu qué ñuu dxi nusaana de ñuni orar pur ca xpinni Cristu de Colosas para ganna chaahuicaʼ xii nga ni na Dios. Xiñee yaʼ. Para ganda sacaʼ «modo naquiiñe sa ca xpinni Señor ne [gúnicaʼ] ni jma chuʼlaʼdxiʼ» (Col. 1:9, 10). Pa guibiguetaʼ gápaluʼ ndaayaʼ de gácaluʼ binnigola sti biaje, gunabaʼ Jiobá gudii lii stipa, paciencia ne guendanayecheʼ. Ca últimu dxi riʼ, nabé caquiiñeʼ xquidxi Dios ca binnigola ca para gacané laacaʼ chuʼcaʼ jma gaxha de Dios. Ñee zanda uquídxiluʼ fe stiʼ ca hermanu stiluʼ la? Ñee rápaluʼ gana gúniluʼ ni la?