1, 2. Ximodo riniʼné Jiobá ca xpinni.

BIAʼ dxi huabani binni lu Guidxilayú, gadxé gadxé modo huayabi Jiobá ca xpinni xi gúnicaʼ. Biquiiñebe ca ángel, visión ne bacaandaʼ para gábibe ca xpínnibe xi chiguizaaca despué o gudiibe laacaʼ xiixa dxiiñaʼ (Núm. 7:89; Ezeq. 1:1; Dan. 2:19). Ne riuu biaje riquiiñebe binni para guiníʼ pur laabe o sániruʼ ndaaniʼ xquídxibe. Modo tiica biʼniʼ Jiobá para guniʼné binni, cani bizuubaʼ si stiidxabe nga cani gucuaa stale ndaayaʼ.

² Ca dxi riʼ, riquiiñeʼ Jiobá Biblia, espíritu santu stiʼ ne neza binni ridagulisaa para gabi laanu xi gúninu (Hech. 9:31; 15:28; 2 Tim. 3:16, 17). Nayaguieʼ nga guiráʼ ni rabi Jiobá laanu casi ñaca ñuu tuuxa neza déchenu ne ñabi laanu: «Ndiʼ nga neza ca. Lasá luni» (Is. 30:21). Ne laaca riquiiñebe Jesús para guiniʼné laanu purtiʼ maʼ gulibe laa para gaca xaíque stiʼ xquídxibe ne riníʼnebe laanu pur «mozo ni nuu xpiaani ne ni runi jneza» (Mat. 24:45). Naquiiñeʼ guzúʼbanu stiidxaʼ Jiobá, purtiʼ zacatiʼ nga zanda guibáninu sin chuʼ dxi gátinu (Heb. 5:9).

3. Xi zanda gucueeza laanu de gúninu ni na Jiobá. (Biiyaʼ foto ni zeeda ra ruzulú tema riʼ.)

³ Nanna Binidxabaʼ pa chinándanu ni gabi Dios laanu la? zanda gulanu xquendanabáninu, nga runi ruyúbibe modo para cadi gúninu ni na Dios. Ladxidoʼno laaca zanda quite laanu ne gucaani laanu guchéʼnenu Dios (Jer. 17:9). Lu tema riʼ zadúʼyanu  ximodo zanda gudxíʼlunu ca trampa ni rucueeza laanu para cadi gucaʼdiáganu ridxi stiʼ Dios. Laaca zadúʼyanu pabiáʼ risaca nga guinínenu Jiobá lu oración, purtiʼ nga zacané laanu cadi gusaana de gaca xhamígunu laabe, neca guidxaagalunu intiica guendanagana.

4. Ximodo riguite Binidxabaʼ xpiaaniʼ binni.

⁴ Riguite Binidxabaʼ xpiaaniʼ binni né guiráʼ cani riquiiñebe para gucaabe laacaʼ gucheecaʼ (biindaʼ 1 Juan 5:19). Lu guidubi Guidxilayú nuu periódicu, revista, libru, radiu, televisión ne Internet. Neca racané ca ndiʼ laanu, stale biaje rucaa cani binni guni ni na ique ne guibani modo riuulaʼdxiʼ ne qué rinándacaʼ ni na ca ley stiʼ Jiobá (Jer. 2:13). Rusiidicani gastiʼ naca guichaganáʼ hombre ne hombre ne gunaa ne gunaa, ne pur nga stale tu riníʼ ique nabé nagana nga chinanda binni ni rusiidiʼ Biblia (1 Cor. 6:9, 10).

5. Xi naquiiñeʼ gúninu para cadi guiábanu lu ca trampa ni riquiiñeʼ Binidxabaʼ para gucaa laanu guchéʼnenu Dios.

⁵ Ximodo zanda gucaanáʼ ca binni ni rinanda ca ley stiʼ Jiobá ca cosa ni riquiiñeʼ Binidxabaʼ para gucaa binni guchee yaʼ. Ximodo zanda ganna tuuxa xii nga ni jneza ne xii nga ni cadi jneza yaʼ. «Ra gúnibe guiráʼ ni na» Stiidxaʼ Dios (Sal. 119:9). Ca principiu ni zeeda lu Stiidxaʼ Dios racanécani laanu gánnanu xii nga ni zanda guni crenu ne xii nga cani riquiiñeʼ Binidxabaʼ para quite binni (Prov. 23:23). Jesús biquiiñeʼ Stiidxaʼ Dios para guníʼ naquiiñeʼ «ibani né binni [...] irá ca diidxaʼ ni iree de ruaa» Jiobá (Mat. 4:4). Nga rusihuinni naquiiñeʼ chinándanu ca principiu ni zeeda lu Biblia lu xquendanabáninu. Guzéʼtenu ti ejemplu, ante gucaa Moisés ley stiʼ Dios ra caníʼ cadi jneza nga gatané tuuxa ni cadi xheelaʼ la? José, dxi nahuiiniʼ, qué lica niná ñatané xheelaʼ Potifar ora gudxi gunaa riʼ laabe gatanebe laa, purtiʼ José nanna zucheené Dios pa gúnini. Qué lica niníʼ ique José nucheené Jiobá ora gucalaʼdxiʼ gunaa riʼ ñatané laabe. Biblia na: «Yanna, despué de guca guiráʼ cosa riʼ, xheelaʼ xpixuaanaʼ José bizulú guyuulaʼdxiʼ laabe ne gudxi laabe: “Gutané naa”. Peru laabe qué ninabe ne gúdxibe xheelaʼ xpixuaanabe: “Xheelaluʼ qué ganna xi guiráʼ napa ndaaniʼ yoo riʼ ne maʼ bisaana guiráʼ ni napa lu nayaʼ. Guirútiruʼ jma risaca que naa ndaaniʼ yoo riʼ, maʼ bidiibe naa guiráʼ cosa riʼ peru lii si qué nudiibe naa, purtiʼ lii nga xheelabe. Nga runi qué zanda diʼ guneʼ guendaquéiquiiñeʼ riʼ ne gucheeniáʼ Dios pur laani”» (Génesis 39:7-9). Neca qué nusaana gunaa que de ñabi ni laabe, José gudixhe ique gucaadiaga ridxi stiʼ Jiobá ne cadi stiʼ gunaa que. Xi rusiidiʼ ndiʼ laanu yaʼ. Rizíʼdinu naquiiñeʼ gucaʼdiáganu ridxi stiʼ Jiobá ne cadi gulábinu guiráʼ ni riquiiñeʼ Binidxabaʼ para gucaa laanu gucheʼnu, zacá zánnanu xii nga ni jneza ne xii nga ni cadi jneza.

6, 7. Xi zanda gúninu para cadi quite ca conseju stiʼ Binidxabaʼ laanu.

⁶ Ndaaniʼ guidxilayú riʼ gadxé gadxé  nga ni rusiidiʼ ca religión ca, ngue runi stale binni qué riná guyubi religión ni rusiidiʼ ni dxandíʼ. Peru pa racaláʼdxinu gucaʼdiáganu Jiobá la? cadi nagana para laabe guyúbibe modo gánnanu de laabe. Cumu nagana nga para gucaʼdiáganu chupa ridxi juntu la? nga runi, naquiiñeʼ gunibiaʼnu ridxi stiʼ Jesús ne gucaʼdiáganu laa, purtiʼ laabe nga maʼ gulí Jiobá para gápabe ca dendxuhuiiniʼ stiʼ (biindaʼ Juan 10:3-5).

⁷ Jesús guníʼ: «Laucaa diaga chaahui ni cayabe laatu» (Mar. 4:24). Cadi nagana para guiénenu ca conseju stiʼ Jiobá ne jneza cani, peru naquiiñeʼ uguʼnu listu ladxidoʼno para gucaʼdiáganu ca conseju ca ne chinándanu cani. Pa qué chuʼnu cuidadu, zándaca gucaʼdiáganu ca conseju ni cadi jneza stiʼ Binidxabaʼ ne cadi ca conseju stiʼ Dios ni nadxii laanu. Qué chuʼ dxi chinándanu modo runi binni guidxilayú, purtiʼ laacaʼ rúnicaʼ guiráʼ ni rieeteʼ lu ca saa ca, ni ruuyacaʼ lu videu, rúnicaʼ ni na ca xcompañérucaʼ, ca maestru sticaʼ o cani na nanna stale (Col. 2:8).

8. 1) Ximodo zanda gucaa ladxidoʼno laanu guiábanu lu ca trampa stiʼ Binidxabaʼ. 2) Xi zándaca guizaacanu pa qué gulábinu xquendabiaaninu.

⁸ Nanna Binidxabaʼ nácanu binni ruchee. Ora riquiiñebe ni para gucaalube laanu, raca nagana para laanu guzúʼbanu stiidxaʼ Jiobá (Juan 8:44-47). Guníʼ ique de ti binni ni bisaana de guni orar ne maʼ qué rucheechepeʼ diidxaʼ ne maʼ qué ridagulisaapeʼ. Ni rúnibe ca rusihuinni xi nuu ndaaniʼ ladxidoʼbe ne pa qué gulábibe ni zándaca gueeda gucheebe. Pa qué gatanabe, chaahuiʼ chaahuiʼ maʼ qué zucaadiágabe ridxi stiʼ Jiobá. Ne zándaca despué gúnibe xiixa cosa malu ni qué lica niníʼ íquebe pa ñuu dxi ñúnibe (Rom. 7:15). Xi zanda gúninu para cadi guizaacanu zacá yaʼ. Naquiiñeʼ gulábinu xquendabiaaninu ora gudiʼnu cuenta cadi jneza xiixa ni cayúninu ne nagueendaca naquiiñeʼ guchaʼnu. Pa rucaadiaga chaahuinu ridxi stiʼ Jiobá la? qué ziuu dxi gucaʼdiáganu ni riníʼ ca apóstata (Prov. 11:9).

9. Xiñee nagueendaca naquiiñeʼ gudiʼnu cuenta pa nuu xiixa ni cadi jneza cayúninu.

⁹ Ora gudii tuuxa cuenta deruʼ cuzulú xiixa guendahuará malu luguiáʼ la? jma nagueenda zianda. Zacaca pa nagueendaca gudiʼnu cuenta nuu xiixa ni cadi cayúninu jneza la? nagueendaca naquiiñeʼ guchaʼnu modo laanu ti cadi guiábanu «lu ná binidxaba» ne gúninu ni racalaʼdxiʼ (2 Tim. 2:26). Yanna, xi naquiiñeʼ gúninu pa gudiʼnu cuenta riníʼ íquenu ni cadi jneza ne riuuláʼdxinu gúninu xiixa ni zanda guxheleʼ laanu de Jiobá yaʼ. Nagueendaca naquiiñeʼ guibiguétanu ra nuube ne  chinándanu ca conseju stibe de guidubi ladxidoʼno (Is. 44:22). Pa quixhe íquenu gúninu xiixa ni cadi jneza zanda guniná ni laanu biaʼ dxi guibáninu lu guidxilayú stiʼ Binidxabaʼ riʼ. ¡Jma galán guyúbinu ni gacané laanu ante guiábanu lu trampa stiʼ Binidxabaʼ!

10, 11. 1) Ximodo rusihuinni tuuxa rudxiibaʼ laca laa. 2) Xi rizíʼdinu de Coré, Datán ne Abiram.

¹⁰ Naquiiñeʼ gánnanu zanda guxheleʼ ladxidoʼno laanu de Jiobá. Guiníʼ íquenu de ti binni ni rudxiibaʼ laca laa ne rachelú gapa jma. Chaahuiʼ chaahuiʼ maʼ qué zucaadiágabe ridxi stiʼ Jiobá ne zuxheleʼ ni laabe de laa. Ti binni ni rudxiibaʼ laca laa zanda guiníʼ ique guizáʼ risaca ne zanda guni intiica cosa ni racalaʼdxiʼ ne guirutiʼ zanda gabi laa xi guni. Ne pur nga zándaca guiníʼ íquebe cadi naquiiñeʼ chinándabe conseju stiʼ xcaadxi xpinni Cristu, ca binnigola o conseju ni rudii xquidxi Dios. Ti binni zacá, qué runadiaga chaahuiʼ ridxi stiʼ Jiobá.

¹¹ Dxi guleza guidxi Israel lu desiertu, Coré, Datán ne Abiram qué ninacaʼ nuzuubacaʼ stiidxaʼ Moisés ne Aarón ne bicaalucaʼ laacabe. Cumu rudxiibacabe laca laacabe la? gucaláʼdxicabe ñuni adorárcabe Jiobá modo nácabe. Xi biʼniʼ Jiobá yaʼ. Biiti laacabe ne zaqueca xcaadxi binni ni qué nuzuubaʼ diidxaʼ (Núm. 26:8-10). Ni bizaaca riʼ, rusiidini laanu ti cosa guizáʼ risaca. Xi laani yaʼ. Pa gudxii déchenu Jiobá la? qué zabeendunu gastiʼ. Ne laaca rusietenalaʼdxiʼ ni laanu ca diidxaʼ riʼ: «Ante gacaná ti binni la? rudxiibaʼ laca laa» (Prov. 16:18; Is. 13:11).

12, 13. 1) Bizeeteʼ ti ejemplu ni gusihuinni qué ribeendú binni gastiʼ ora gachelú stiʼ stobi. 2) Bisiene ximodo zanda gachelunu stiʼ stobi pa qué cueenu ni nagueendaca ndaaniʼ íquenu.

¹² Yanna, guininu de ti binni ni rachelú gapa jma. Ti binni zacá, riníʼ ique cadi para laa nga ca conseju ni rudii Jiobá ne riníʼ ique zanda guicaa stiʼ stobi. Dxi bianda Naamán —xaíque stiʼ ejércitu siriu— de lepra ni gupa, gucaláʼdxibe nusigáʼdebe stale cosa risaca profeta Eliseo, peru laa qué niná nicaa cani. Peru Guehazí, mozo stiʼ Eliseo, guchelú cani, ngue runi guníʼ ique: «Cásica nannaʼ dxandíʼ nabani Jiobá, dxandipeʼ ziugaandaʼ [Naamán] ne zacaaʼ xiixa gudiibe naa». Sin ñanna Eliseo biree guxooñebe ziugaandabe Naamán ne bisiguiibe laa para guinábabe laa «ti talentu de plata ne chupa muda lari». Ne despué laaca bisiguiibe profeta stiʼ Jiobá. Xi bizaaca Guehazí pur guchelú stiʼ stobi yaʼ. ¡Gucuá lepra stiʼ Naamán laa! (2 Rey. 5:20-27.)

¹³ Ruzulú rachelunu stiʼ stobi ora ruuyadxísinu xiixa cosa ni nápabe ne racaláʼdxinu ni. Peru pa qué cueenu ni ndaaniʼ íquenu la? zaniisi ni nagueenda ne dede zucaa ni laanu gucheʼnu. Historia stiʼ Acán rusihuinni pabiáʼ nadipaʼ nga gacalaʼdxiʼ binni stiʼ stobi ne nagueenda riniisi ni ndaaniʼ ladxidóʼ. Acán guníʼ: «Ora biiyaʼ guiráʼ ni guleecabe ndaaniʼ guidxi que, ti lari racu ca oficial stiʼ Sinar, ti lari nabé sicarú, ne chupa gayuaa ciclu de plata ne ti barra oro, ni nanaa cincuenta ciclu, guyuuladxeʼ cani ne gucuaaʼ cani». Lugar de nucaanabe cani guyuuláʼdxibe que la? laga gucuaabe cani ne bicaachibe cani ndaaniʼ tienda stibe. Dxi bihuinni xi biʼniʼ Acán, gudxi Jiobá Josué zuni castigar Acán. Ne zaqué gúcani, bichá guidxi que guié laabe ne binnilídxibe ne dxi queca gúticabe (Jos. 7:11, 21, 24, 25). Ora tiica si zanda gachelú binni stiʼ stobi. Nga runi, naquiiñeʼ gucáʼnanu «enda ruyubi gapa bidxichi» (Luc. 12:15). Zándaca ziuu biaje guiníʼ íquenu xiixa ni cadi jneza o guiníʼ íquenu cosa dxabaʼ, peru naquiiñeʼ gucueezanu cani riníʼ íquenu ne cadi gudiʼnu lugar gucaa ca cosa ni riuuláʼdxinu laanu guchéʼnenu Dios (biindaʼ Santiago 1:14, 15).

14. Xi naquiiñeʼ gúninu pa gudiʼnu cuenta cudxíʼbanu laca laanu o rachelunu stiʼ stobi.

 ¹⁴ Cásica tuuxa ni rudxiibaʼ laca laa ne tuuxa ni rachelú gapa jma la? zanda guxheleʼ ni laa de Jiobá. Pa guiníʼ íquenu ni ribeendú binni ora rúnicaʼ cani maʼ bizéʼtenu ca la? zacané cani laanu cadi gúninu xiixa cosa ni gucueeza laanu de gucaʼdiáganu ridxi stiʼ Jiobá (Deut. 32:29). Lu Biblia rabi Dios laanu xi zabeendunu pa gúninu ni jneza ne xi zazaaca pa gúninu ni cadi jneza. Pa gucaa ladxidoʼno laanu gúninu cosa malu purtiʼ rudxíʼbanu laca laanu o rachelunu stiʼ stobi la? galán guiníʼ íquenu xi zabeendunu, xi zazaaca de binnilídxinu pa gúninu cani ne ximodo zuuyaʼ Jiobá laanu.

15. Jesús qué nusaana de niniʼné Jiobá, xi rusiidiʼ ejemplu stibe laanu yaʼ.

¹⁵ Ni racalaʼdxiʼ si Jiobá nga guibáninu galán (Sal. 1:1-3). Rábibe laanu xi gúninu ne rúnibe ni órapeʼ caquiiñenu ni (biindaʼ Hebreos 4:16). Dede Jesús, neca qué ñuu dxi nuchee qué nusaana de niniʼné Jiobá. Ne Jiobá gucané laabe ne gudxi laabe xi gúnibe. Biseendabe ca ángel stibe para gacané Jesús, bidiibe espíritu santu stibe laa ne gucanebe laa para gulí ca 12 apóstol stiʼ. Dede guibáʼ guniʼbe para gusihuínnibe zacanebe Xiiñibe ne riuuláʼdxibe ni cayuni (Mat. 3: 17; 17:5; Mar. 1:12, 13; Luc. 6:12, 13; Juan 12:28). Cásica Jesús, laaca caquiiñeʼ guxhélenu ladxidoʼno nezalú Jiobá (Sal. 62:7, 8; Heb. 5:7). Zacá zanda guinínenu laabe ne guibáninu modo riuuláʼdxibe para gusisácanu laabe.

16. Xi naquiiñeʼ gúninu para gacané Jiobá laanu gucaʼdiáganu ridxi stiʼ.

¹⁶ Neca rudii Jiobá ca conseju stiʼ para guiráʼ xixenu, qué rucaabe laanu chinándanu cani. Peru para chinándanu cani naquiiñeʼ guinábanu espíritu santu stibe ne laabe zudiibe ni laanu (biindaʼ Lucas 11:10-13). Biblia na: «Laucaa diaga chaahuiʼ» (Luc. 8:18). Nga runi, cadi jneza diʼ nga guinábanu Jiobá gacané laanu para gusaana de gúninu xiixa cosa dxabaʼ ni riuuláʼdxinu gúninu ne despué guidúʼyanu pornografía o película ra ridiʼdiʼ cosa dxabaʼ. Ni jma galán gúninu nga cadi gusaana de chuʼnu ca lugar ra nuu espíritu santu stiʼ Jiobá. Nánnanu nuu espíritu stiʼ Dios ra ridagulisaanu. Nga runi, stale xpinni Cristu ora rucaadiágacaʼ ridxi stiʼ Jiobá ra ridagulisaacaʼ rudiicaʼ cuenta nuu xiixa cosa ni cadi jneza ndaaniʼ ladxidoʼcaʼ ne huachaacaʼ modo laacaʼ, zacá qué rápapecaʼ guendanagana (Sal. 73:12-17; 143:10).

17. Xiñee cadi jneza nga guni tuuxa ni na ique.

¹⁷ Guiníʼ íquenu ni bizaaca rey David de guidxi Israel. Dxi nahuiinibe biitibe Goliat, ti gigante de Filistea. Despué gúcabe soldadu ne rey stiʼ ti guidxi roʼ, gúpabe guidxi que ne ca cosa risaca gudixhe íquebe gaca ndaaniʼ guidxi que, biiyabe gácacani jneza. Peru dxi maʼ bíʼnibe ni na íquebe gudxite ladxidoʼbe laabe ne pur ngue bicheenebe Jiobá, purtiʼ guyuunebe Bat-seba ne biyúbibe modo guuticabe Urías, xheelaʼ gunaa que. Dxi gudxi Jiobá laabe cadi jneza ni bíʼnibe que, guniʼbe dxandíʼ bicheebe ne bibiguétabe ra nuu Jiobá (Sal. 51:4, 6, 10, 11).

18. Xi zacané laanu gucaʼdiáganu ridxi stiʼ Jiobá.

¹⁸ Galán chinándanu conseju ni zeeda lu 1 Corintios 10:12 ne cadi gúninu ni na si íquenu. Ne cumu «cadi lu náʼ diʼ binni nuu guni mandar ra guzuhuaa ñee» la? zándaca guzuubaʼ stiidxaʼ Jiobá o stiidxaʼ Binidxabaʼ (Jer. 10:23). Nga runi, cadi gusaana de guni orarnu ne chinándanu ni gabi espíritu santu laanu. Ne cadi gusaana de gucaadiaga chaahuinu ridxi stiʼ Jiobá.