Nabé risaca guendarinabadiidxaʼ riʼ, jmaruʼ si para cani maʼ guti xheelaʼ ne zándaca racalaʼdxiʼ guichaganáʼ laabe sti biaje ora guiásabe lade gueʼtuʼ ndaaniʼ guidxilayú cubi ca. Ti viudu guníʼ: «Naa ne xheelaʼ qué ñacaláʼdxidu niluxe xquendaxheeladu. De guidubi ladxidoʼdo gúpadu gana ñúnidu ni na Jiobá casi guendaxheelaʼ ne qué ñuu dxi nusaana de ñúnidu ni. Ne de nagasi runeʼ sentir zacá». Ñee nuu razón para cueza cani guiasa de lade gueʼtuʼ guichaganacaʼ sti biaje la? Qué gánnadinu.

Maʼ xadxí, ca libru ne ca revista stinu rusihuínnicani ni guníʼ Jesús de ora guiasa ca gueʼtuʼ ne de guendaxheelaʼ, ora guniʼbe maʼ qué zachaganáʼ binni, zándaca guniʼbe de cani guiasa lade gueʼtuʼ lu Guidxilayú riʼ (Mat. 22:29, 30; Mar. 12:24, 25; Luc. 20:34-36). * Neca qué zanda guininu zacapeʼ nga laani, zándaca guníʼ Jesús de cani guiasa cheʼ guibáʼ. Guidúʼyanu xi gucaláʼdxibe nusiénebe.

Guidúʼyanu xiñee guníʼ Jesús ca diidxaʼ ca (biindaʼ Lucas 20:27-33). Ca saduceu qué runi crecaʼ pa ziasa gueʼtuʼ, gucaláʼdxicaʼ nusábacaʼ Jesús lu ti trampa ora gunabadiidxacaʼ laabe de ora guiasa cani maʼ guti de lade gueʼtuʼ ne ora guichaganáʼ tuuxa ti xcuñadu. * Laabe bicábibe laacaʼ: «Laga nuu binni ndaani guidxilayú ri la? richaganá caʼ ne rucheela caʼ. Peru cani ma cá lá guiasa de lade gueʼtu para ibani ndaani guidxilayú cubi la? qué zachaganá ca ne qué zucheela caʼ; purti ma qué zati caʼ, sínuque ma naca ca casi ca ángel, ne zahuinni dxandí xiiñi Dios laaca ra usibani laacaʼ» (Luc. 20:34-36).

Xiñee lu ca libru ne ca revista stinu rieeteʼ zándaca guníʼ Jesús de ora guiasa tuuxa lade gueʼtuʼ lu Guidxilayú riʼ yaʼ. Nuu chupa razón. Primé, cumu ca saduceu que guníʼ íquecaʼ de ora guiásacabe lade gueʼtuʼ lu Guidxilayú riʼ la? zándaca guníʼ Jesús de laani. Guiropa, Jesús biluxe bicabi ca saduceu que ora guníʼ de Abrahán, Isaac ne de Jacob, ca hombre riʼ bíʼnicaʼ ni na Dios ne laacaʼ ziásacaʼ de lade gueʼtuʼ lu Guidxilayú riʼ (Luc. 20:37, 38).

Peru zándaca guníʼ ique Jesús de ora guiasa cani cheʼ guibáʼ. Xi razón nápanu para guiníʼ íquenu zacá yaʼ. Guidúʼyanu chupa razón.

«Cani maʼ biiyacabe zanda guiasa de lade gueʼtuʼ». Cani bibí né espíritu santu nga cani zanda chuʼ «ra runi mandar be» (2 Tes. 1:5, 11). Cani nachaʼhuiʼ, cani maʼ nuu listu para guibani ne maʼ qué chuʼ dxi gatiʼ pur guendaguti stiʼ Cristu. Qué záticabe casi chigati ca binni ni qué ñuni ni na Dios, purtiʼ Jiobá ruuyaʼ laacabe casi binni ni qué nuchee (Rom. 5:1, 18; 8:1). Cada tobi de laacaʼ riree lacaʼ o xlacaʼ «dichoso» ne laacaʼ nga chiguiásacaʼ para checaʼ guibáʼ (Apoc. 20:5, 6). Peru ziuu binni «ni cadi nachaʼhuiʼ»  lade cani guiasa lu Guidxilayú riʼ (Hech. 24:15). Ñee zanda guininu laacabe nga cani guiasa de lade gueʼtuʼ la?

«Laaca maʼ qué zanda gátibe.» Jesús qué niníʼ: «Ma qué zati caʼ», sínuque: «Laaca maʼ qué zanda» gáticaʼ. Pa qué gucheené cani bibí né espíritu santu Jiobá, ora gáticaʼ lu Guidxilayú riʼ zabánicaʼ sti biaje para checaʼ guibáʼ ne racá zápacaʼ ti «cuerpu ni qué ziuʼdxu ne ni qué zati» (1 Cor. 15:53, 54). Maʼ qué ziuu dxi gatiʼ cani guiasa para cheʼ guibáʼ. *

Pur cani guninu ca, xi riníʼ íquenu yanna. Zándaca ora guníʼ Jesús de guendaxheelaʼ ne de guiasa binni lade gueʼtuʼ caniʼbe de cani guiasa para cheʼ guibáʼ. Pa zacá ni, ca diidxaʼ guníʼ Jesús ca guniʼbe ni para cani cheʼ guibáʼ: qué zachaganacaʼ, maʼ qué zanda gáticaʼ ne lu caadxi cosa zácacaʼ casi ca ángel. Peru nuu xcaadxi guendarinabadiidxaʼ.

Primé, xiñee bizeeteʼ Jesús de ora guiasa gueʼtuʼ para cheʼ guibáʼ pa ca saduceu que guníʼ íquecaʼ de guiasa gueʼtuʼ para guibani lu Guidxilayú riʼ yaʼ. Purtiʼ Jesús cadi guiráʼ diʼ ora bicabi ca xhenemigu de ni riníʼ íquecaʼ. Guzéʼtenu ti ejemplu, ora gunabaʼ ca judíu que laabe ti señal gúdxibe laacaʼ: «Lauxhá yuʼdu riʼ, ne lu chonna gubidxa zandisa ni». Zándaca nanna Jesús caníʼ íquecabe de yuʼduʼ ni nuu raqué, «peru laabe cuchaaga be cuerpu stibe yuʼdu que» (Juan 2:18-21). Zándaca Jesús biiyaʼ cadi naquiiñeʼ guicabi ca saduceu que, purtiʼ laacaʼ rucaachicaʼ tu nácacaʼ ne qué runi crecaʼ pa ziasa ca gueʼtuʼ ca o qué runi crecaʼ pa nuu ca ángel (Prov. 23:9; Mat. 7:6; Hech. 23:8). Zándaca né ni guniʼbe que, nuube guiene ca discípulo stibe de cani guiasa para cheʼ guibáʼ, purtiʼ laacaʼ nayá ladxidoʼcaʼ ne nánnacaʼ ziuu dxi guiásacaʼ sti biaje para checaʼ guibáʼ.

Guiropa, xiñee ora biluxe bisiene Jesús ni, guníʼ de Abrahán, Isaac ne Jacob, cani guiasa para guibani lu Guidxilayú yaʼ (biindaʼ Mateo 22:31, 32). Guidúʼyanu ximodo bizulú guníʼ Jesús. Ora bisiénebe de «enda ribani de lade gueʼtuʼ» caniʼbe de ca bixhozegola ca israelita. Né ca diidxaʼ ca bichaabe de ni chiguiniʼbe ne bizulú guniʼbe de cani chiguibani lu Guidxilayú riʼ. Ne cumu nanna Jesús runi cré ca saduceu que cani bicaa Moisés la? biquiiñebe ca diidxaʼ ni gudxi Jiobá Moisés ra biiyaʼ yagahuiiniʼ naze bele que. Ngue nga sti razón biquiiñeʼ Jesús para guiníʼ naguixhe ique Dios guindisaʼ cani maʼ guti de lade gueʼtuʼ ne dxandíʼ zácani (Éx. 3:1-6).

Guionna, pa guibáʼ nga chigaca ca diidxaʼ guníʼ Jesús de guendaxheelaʼ ne de ora guiasa tuuxa lade gueʼtuʼ, ñee riníʼ nga zanda guichaganáʼ cani guiasa lade gueʼtuʼ para guibani lu Guidxilayú riʼ la? Stiidxaʼ Dios qué ricabi diʼ guendarinabadiidxaʼ riʼ. Yanna, cumu qué nuzeeteʼ Jesús de ca binni ni chiguiasa lade gueʼtuʼ para guibani lu Guidxilayú riʼ la? laaca qué nusiénebe pa zanda guichaganácabe o pa coʼ.

Ni nánnanu rusiene Biblia nga ora gatiʼ tuuxa ribiá xquendaxheelaʼ. Nga runi, ti viudu o ti viuda la? cadi naquiiñeʼ guiníʼ ique cuchee pa gacalaʼdxiʼ guichaganáʼ sti biaje. Cada tobi naquiiñeʼ guiníʼ ique pa zachaganáʼ sti biaje o coʼ ne guirutiʼ naquiiñeʼ guiníʼ mal de laabe (Rom. 7:2, 3; 1 Cor. 7:39).

Cadi guendaridxagayaa nga guiníʼ íquenu xi guiráʼ zazaaca lu guidxilayú cubi ca, peru cadi naquiiñeʼ guiníʼ ique xhaatanu xipeʼ nga cani chiguizaaca. Naquiiñeʼ cuézanu dxi chuʼnu racá para gánnanu xi guiráʼ zazaaca. Yanna, de ni zanda chuʼnu seguru nga: guiráʼ binni ni guni ni na Dios zabánicaʼ nayecheʼ, Jiobá zudii guiráʼ ni caquiiñecabe ne cani racaláʼdxicabe módopeʼ riuuláʼdxicabe (Sal. 145:16).