1. 1) Xi caquiiñeʼ guiráʼ binni. 2) Tuu nga cani zanda gudiini laanu.

GUIRANU nga caquiiñeʼ chuʼnu gaxha de xcaadxi binni. Nabé nayecheʼ riuʼnu ora nuunu gaxha de binnilídxinu, ca xhamígunu ni nadxii laanu, rusisácacaʼ laanu ne riénecaʼ laanu. Peru Jiobá, Dios ni Bizáʼ laanu, nga ni jma naquiiñeʼ chuʼnu gaxha de laa (Ecl. 12:1).

2. 1) Xi cudii stiidxaʼ Jiobá laanu. 2) Xiñee stale binni qué runi cré pa zanda chuʼ Dios gaxha de laacaʼ.

² Lu Biblia cayuni invitar Jiobá laanu gaca xhamígunu laa. Dios cayabi laanu pa guidxíñanu laa la? laaca «zadxiña» laanu (Sant. 4:8). ¡Nabé riguu ca diidxaʼ riʼ gana laanu! Peru stale binni raca nagana para laa guni cré racalaʼdxiʼ Dios chuʼ gaxha de laa, purtiʼ runi sentircaʼ nuu Dios zitu de laacaʼ ne qué zaná guidxiña laacaʼ. Ñee zanda chuʼnu gaxha de Jiobá la?

3. Xii nga ni naquiiñeʼ gánnanu.

³ Naquiiñeʼ gánnanu zanda gunibiaʼnu Jiobá, «purti cadi zitu nuu be» de ca binni ni cuyubi laabe. Biblia na: «Jiobá nuu gaxha de guiráʼ cani rinabaʼ ruaa laabe, de guiráʼ cani rinabaʼ ruaa laabe ne rúnicaʼ ni nabe» (Salmo 145:18; biindaʼ Hechos 17:26, 27). Racalaʼdxiʼ Dios stinu guidxíñanu laa ne gaca xhamígunu laa neca nácanu binni ruchee (Is. 41:8; 55:6). Pur ni bizaaca salmista que gunda bicaa ca diidxaʼ riʼ  de Jiobá: «Lii, Ni rucaadiaga oración, ra nuuluʼ zié guiráʼ xixé binni. Nayecheʼ ziuu binni ni cuiluʼ ne gucaaluʼ laa guidxiña» (Sal. 65:2, 4). Guidúʼyanu de ti binni ni bidxiña Dios, laabe nga rey Asá. Ne guidúʼyanu xi caníʼ Biblia de modo biiyaʼ Jiobá laabe. *

4. Xi ejemplu galán bidii rey Asá guidxi Judá.

⁴ Biiyaʼ rey Asá gaca adorar Dios jneza, guleebe guiráʼ binni ni riuuné ni cadi xheelaʼ ndaaniʼ yuʼduʼ que ne cani runi adorar bidóʼ, chupa cosa ni nabé biʼniʼ binni ndaaniʼ guidxi que (1 Rey. 15:9-13). Ngue runi, de guidubi ladxidoʼbe «gúdxibe Judá guyubi Jiobá Dios stiʼ ca bixhozegola ne guni ni na ley ne mandamientu stibe». Guluu Jiobá ndaayaʼ ca primé chii iza biʼniʼ mandar Asá, ne nin ti guidxi qué nucaalú xquídxibe. Nánnabe pur Jiobá ngue nuucabe zaqué. Ngue runi gúdxibe guidxi que: «Purtiʼ maʼ biyúbinu Jiobá Dios stinu. Maʼ biyúbinu, ne laa rudii laanu guendariziilaʼdxiʼ» (2 Crón. 14:1-7). Xi bizaaca despué yaʼ.

5. 1) Ximodo bisihuinni Asá napa confianza Dios. 2) Xi biʼniʼ Jiobá pur Asá.

⁵ Guníʼ ique lii nga Asá. Chigucaalú 1,000,000 hombre ne 300 carru ni rié lu guerra lii ne xaíque stiʼ ca hombre ca nga «Zérah ti etíope» para tindené Judá (2 Crón. 14:8-10). Peru lii nápaluʼ 580,000 soldadu si. ¡Jma stálecabe que laatu! Xi ñúniluʼ yaʼ. Ñee niníʼ íqueluʼ xiñee bidii Dios lugar gucaalú sti guidxi laatu la? Ñee niníʼ íqueluʼ zanda ucaaluluʼ laacabe lii si la? o zuni creluʼ zulá Jiobá lii. Ni biʼniʼ Asá bisihuínnini xhamígube Jiobá ne nápabe confianza laa. De guidubi ladxidoʼbe gunábabe Jiobá: «Gucané laadu, Jiobá Dios stidu, purtiʼ dxandíʼ runi credu lii, ne pur laluʼ nga biúpadu para gucáʼludu guiráʼ ca binni riʼ. Jiobá, lii nga Dios stidu. Cadi gudiiluʼ lugar gucaalú binni lii». Ximodo bicabi Dios oración stiʼ Asá yaʼ. Relatu riʼ na: «Biʼniʼ ganar Jiobá ca etíope» que. ¡Nin ti enemigu stícabe qué nilá! (2 Crón. 14:11-13.)

6. Ximodo zanda gúninu cásica biʼniʼ Asá.

⁶ Xiñee gunda gupa Asá confianza zacané Jiobá laa ne zabi laabe xi gúnibe yaʼ. Biblia na biʼniʼ Asá «ni jneza nezalú Jiobá» ne biʼniʼ «ni na Jiobá de guidubi ladxidóʼ» (1 Rey. 15:11, 14). Laanu laaca naquiiñeʼ gúninu ni na Dios de guidubi ladxidoʼno. Naquiiñepeʼ gúninu ni pa racaláʼdxinu chuʼnu gaxha de Jiobá yanna ne ca dxi zeeda ca. Nabé rudiʼnu xquíxepeʼ Jiobá purtiʼ maʼ bichiña laanu ra nuu ne maʼ gucané laanu chuʼnu jma gaxha de laa. Guidúʼyanu chupa cosa ni riquiiñeʼ Dios para guchiña laanu ra nuu.

7. 1) Xi guiráʼ cosa maʼ biʼniʼ Jiobá para cuidxi laanu ra nuu. 2) Xii nga ni jma riquiiñeʼ Jiobá para cuidxi laanu ra nuu.

⁷ Bisihuinni Jiobá nadxii laanu ra bizáʼ Guidxilayú sicarú riʼ. Ne guiráʼ dxi rusihuínnibe nadxiibe laanu ne nabé ridxagayaanu modo rudiibe guiráʼ ni caquiiñenu (Hech. 17:28; Apoc. 4:11). Ne ni jma risaca nga rudiibe laanu ni caquiiñenu para chuʼnu gaxha de laabe (Luc. 12:42). Ne nabe laapebe nga ni rucaadiaga oración stinu (1 Juan 5:14). Peru ni jma riquiiñebe para cuídxibe laanu ra nuube nga guendaguti stiʼ Xiiñibe, ne racá nga jma bisihuínnibe  nadxiibe laanu (biindaʼ 1 Juan 4:9, 10, 19). Biseendaʼ Jiobá Xiiñiʼ para gulá laanu de guendaruchee ne de guendaguti (Juan 3:16).

8, 9. Xi dxiiñaʼ runi Jesús para gaca ni na Jiobá.

⁸ Jiobá bidii Xiiñiʼ gatiʼ pur laanu. Ne ra bíʼnibe ndiʼ guníʼ íquebe zabeendú stale binni ni galán dede né cani bibani ante gati Jesús. Dede ora guníʼ Jiobá zeeda tuuxa ni gulá binni, para laabe casi ñaca maʼ biaxa pur donda stinu, purtiʼ nannadxíchibe zácani (Gén. 3:15). Gayuaa iza despué, apóstol Pablu bidii xquíxepeʼ Dios pur «bixhá [Jesús] stonda nu sin quixe nu laa, purti Jesucristu gudixe saca ni bichéʼ nu». Óraque guníʼrube: «Qué nuquixe be laacaʼ ni bichee caʼ» (Rom. 3:21-26). Qué zanda guidxíñanu Dios pa cadi pur Jesús.

⁹ Ca binni si ni qué rudxiibaʼ laca laa nga cani zanda gunibiáʼ Jiobá ne chuʼ gaxha de laabe pur Jesús. Ximodo rusihuinni Stiidxaʼ Dios dxandíʼ ni yaʼ. Pablu bicaa: «Peru Dios huaxa rusihuinni pabiáʼ nadxii laanu purti neca cuchéʼ né nu laa chiqué, biseenda Cristu guti pur laanu» (Rom. 5:6-8). Qué ñaxa diʼ stóndanu pur xiixa cosa galán ni bíninu, sínuque purtiʼ nadxii Jiobá ne Jesús laanu. Jesús guníʼ ca diidxaʼ riʼ: «Biseenda Bixhoze naa, ne iruti zanda gueeda ra nuaaʼ, pa qué cuidxi be laa». Ne despué laaca guniʼbe: «Iruti zie ra nuu Bixhoze pa cadi pur naa» (Juan 6:44; 14:6). Yanna, ximodo nga riquiiñeʼ Jiobá Jesús para cuidxi laanu ra nuu yaʼ. Riquiiñebe espíritu santu stibe para cuídxibe laanu ne gácanebe laanu para chuʼnu gaxha de laabe ti zacá ganda guibáninu sin qué chuʼ dxi gátinu (biindaʼ Judas 20, 21). Yanna, guidúʼyanu sti cosa ni riquiiñeʼ Jiobá para cuidxi laanu ra nuu.

10. Ximodo racané Biblia laanu chuʼnu gaxha de Dios.

¹⁰ Lu tema riʼ maʼ bidúʼyanu 14 versículo stiʼ Biblia. Ximodo ñánnanu zanda guidxíñanu Jiobá, Bixhózenu ni bizáʼ laanu pa qué ñápanu Biblia yaʼ. Ximodo nizíʼdinu xiñee guti Jesús pur laanu ne riquiiñeʼ Jiobá laabe para guidxíñanu Dios yaʼ. Pur espíritu stiʼ Jiobá gunda gucuá Biblia, ne riquiiñebe ni para gábibe laanu ximodo laabe ne xi naguixhe íquebe gúnibe. Casi lu Éxodo 34:6, 7 Jiobá bizeeteʼ ximodo laa nezalú Moisés ora gúdxibe laa nácabe «Dios ni rilaselaʼdxiʼ ne nachaʼhuiʼ, rindaa para guidxiichi ne napa stálepeʼ guendarannaxhii ni qué rusaana ne dxandíʼ, ni rapa guendanachaʼhuiʼ ne guendarannaxhii para mil, ni rutiidilaʼdxiʼ guendaruchee». Tu laa qué ñuulaʼdxiʼ nidxiña tuuxa zacá yaʼ. Jiobá nanna ra jma guizíʼdinu de laa lu Biblia, zadúʼyanu laa casi ti binni nabani ne ziuʼnu jma gaxha de laa.

11. Xiñee naquiiñeʼ gúninu stipa pur guidúʼndanu ca guenda stiʼ Dios ne gánnanu de ca neza stiʼ. (Biiyaʼ foto ni zeeda ra ruzulú tema riʼ.)

¹¹ Para ganda gusiénenu ximodo zanda gaca xhamígunu Dios, ra ruzulú libru Acerquémonos a Jehová na: «Para gaca xhamígunu tuuxa, primé runibiáʼ chaahuinu laa, riuuláʼdxinu ca guenda ni napa ne rusisácanu cani. Nga runi, naquiiñeʼ guidúʼndanu ca guenda stiʼ Dios ne gánnanu de ca neza stibe, casi modo zeeda ni lu Biblia». Biyubi Jiobá ximodo guicá Stiidxaʼ para ganda guiénenu ni. ¡Nabé rudiʼnu xquíxepeʼ laabe!

12. Xiñee biquiiñeʼ Jiobá binni guidxilayú para gucaa Biblia.

¹² Ñanda niquiiñeʼ Jiobá ca ángel stiʼ para nucaacaʼ Biblia. Laacabe nabé rizaaláʼdxicabe laanu ne cani rúninu (1 Ped. 1: 12). Ñanda nucaacabe stiidxaʼ Dios para laanu sin nucheecabe. Peru, ñee ñanda ñuuyacabe ca cosa ca casi ridúʼyanu cani la? Ñee ñanda nucaacabe xi runi sentir binni, xi caquiiñeʼ ne xi raca nagana para laa la? Coʼ, ne Jiobá nanna ni. Ngue runi gudixhe íquebe gucaa hombre de guidxilayú Biblia, ti ora guidúʼndanu ni guni sentirnu para laanu gucuá ni. Nga runi qué raca nagana para laanu guiénenu xi guníʼ ique ca binni ni bicaani ne ximodo biʼniʼ sentircaʼ ne ximodo biʼniʼ sentir ca binni ni bicaacabe de laacaʼ. Zanda guiene chaahuinu ca cosa ni qué niree modo cabézacabe, ora guníʼ íquecabe pa zaca xiixa cosa, ora bidxíbicabe, ra bicheecabe, ne laaca riuʼnu nayecheʼ ora guidúʼndanu de ca cosa ni bisiecheʼ laacabe. Cásica profeta Elías, guiráʼ hombre bicaa Biblia laaca «binni guidxilayú casi laanu» laacaʼ (Sant. 5:17).

13. Ximodo runi sentirluʼ ora ruundaluʼ oración ni biʼniʼ Jonás.

¹³ Guníʼ ique xi biʼniʼ sentir Jonás ora bixooñelú de dxiiñaʼ bidii Dios laa. Ñee ñanda nucaa ti ángel xipeʼ biʼniʼ sentirbe óraque la? Racá ridúʼyanu jma jneza biʼniʼ Jiobá ra biquiiñeʼ Jonás para gucaa ni bizaaca. ¡Pabiáʼ sicarú ca diidxaʼ biquiiñebe! Casi dxi nuube ndaaniʼ nisadóʼ que, gúdxibe Jiobá lu ti oración: «Ora bineʼ sentir maʼ chigateʼ, bietenaladxeʼ Jiobá» (Jon. 1:3, 10; 2:1-9).

14. Xiñee zanda guiénenu ni bicaa Isaías de ni biʼniʼ sentir.

¹⁴ Laaca zanda guiníʼ íquenu ni bicaa Isaías. Ora biiyabe Dios zuba lu trono stiʼ lu ti visión, bidiibe cuenta nácabe binni ruchee ne bicaani laabe guiniʼbe: «¡Pobre si de naa! ¡Para naa maʼ guteʼ purtiʼ cadi nayá ca diidxaʼ riree ruaaʼ, ne nabezaʼ lade binni ni cadi nayá ca diidxaʼ riree ruaa; purtiʼ bezaluáʼ maʼ biiyaʼ Jiobá, ni naca Rey ne xaíque stiʼ guiráʼ ángel!»  (Is. 6:5). Ñanda xa nucaa ti ángel ca diidxaʼ riʼ. Peru Isaías gunda bicaa cani, ne cumu nácanu binni ruchee cásica laabe la? zanda guiénenu xi biʼniʼ sentirbe.

15, 16. 1) Xiñee zanda guiene chaahuinu xi runi sentir xcaadxi binni. Bizeeteʼ ti ejemplu. 2) Xi zacané laanu chuʼnu jma gaxha de Jiobá.

¹⁵ Ñee ñanda niníʼ ti ángel qué risaca casi guníʼ Jacob, o niníʼ naca binni «ruchee» casi guníʼ Pedru la? (Gén. 32:10; Luc. 5:8.) Ñee nidxibi ángel que cásica bidxibi ca discípulo stiʼ Jesús la? Ñee naquiiñeʼ gácabe nadxibalú para nucheechebe ca diidxaʼ nacubi ne galán neca nizananda binni laabe, cásica guzanándacabe Pablu ne xcaadxi xpinni Cristu la? (Juan 6:19; 1 Tes. 2:2.) Coʼ, purtiʼ ca ángel cadi nácacaʼ binni ruchee ne jma nadípacaʼ que binni guidxilayú. Peru laanu nácanu binni ruchee. Nga runi, ora rusihuinni xcaadxi binni xi runi sentir, nagueendaca riénenu laacaʼ. Ora ridúʼndanu Stiidxaʼ Dios zanda guiechenenu cani cayecheʼ ne gúʼnanenu cani cayuunaʼ (Rom. 12:15).

¹⁶ Pa guiníʼ íquenu xi riníʼ Biblia de modo biʼniʼ tratar Jiobá ca xpinni ni bibani dxiqué, zazíʼdinu stale cosa de Dios stinu, ne laaca zánnanu modo gúpabe paciencia ca binni ruchee ne modo gunnaxhiibe laacaʼ. Zacá zunibiáʼ chaahuinu laabe, zannaxhiinu laabe de guidubi ladxidoʼno ne ziuʼnu jma gaxha de laabe. Biblia na: «Cani ridxibi Jiobá nuucaʼ gaxha de laabe ne zúnibe ti pactu para gunibiaʼcaʼ laabe» (Salmo 25:14).

17. 1) Xi conseju bidii Azarías rey Asá. 2) Padxí maʼ qué ninanda rey Asá conseju stiʼ Azarías, ne xi bizaacabe.

¹⁷ Biʼniʼ ganar si rey Asá ejércitu etíope que, bidii profeta Azarías laabe ne guidxi que conseju riʼ. Profeta riʼ guníʼ: «Jiobá nuuné laatu pa laatu nuunetu laa; pa guyúbitu laabe la? zudiibe lugar guidxélatu laabe; peru pa gusaanatu laabe la? laabe zusaanabe laatu» (2 Crón. 15:1, 2). Triste guininu ni, peru despué maʼ qué ninanda Asá conseju riʼ. Ora gúnnabe chigucaalú 10 tribu stiʼ Israel ni nuu ladu guiá laabe la? biyúbibe gacané guidxi Siria laabe. Lugar de nuyúbibe ñacané Jiobá laabe, laga biyúbibe gacané ti guidxi ni qué runi adorar Dios laabe. Ngue runi gudxi Dios laabe: «Ti guendahuati nga ni maʼ bíʼniluʼ, nga runi dede yanna qué ziaadxaʼ tu gucaalú lii». Ne zacapeʼ nga bizaaca (2 Crón. 16:1-9). Xi rusiidiʼ nga laanu yaʼ.

18, 19. 1) Xi naquiiñeʼ gúninu pa maʼ bixélenu de Jiobá. 2) Ximodo zanda guidxíñanu Jiobá.

¹⁸ Qué chuʼ dxi guixélenu de Jiobá. Ne pa maʼ caxélenu de laabe, galán chinándanu conseju ni zeeda lu Oseas 12:6 ra na: «Ra nuu Dios stiluʼ naquiiñeʼ guibiguétaluʼ, gápaluʼ guendarannaxhii ni qué rusaana ne guʼnuʼ ni jneza; ne [...] [naquiiñeʼ] cuezuʼ ni chiguni Dios». Nga runi, galán gúninu guiníʼ íquenu lu guendaguti stiʼ Cristu ne guidúʼndanu Stiidxabe, Biblia, ti zacá guidxíñanu jma gaxha de Jiobá. Biblia na: «Naquiiñeʼ chinándatu Jiobá, Dios stitu, ne naquiiñeʼ guidxíbitu laabe, ne naquiiñeʼ chinándatu ca mandamientu stibe, ne naquiiñeʼ gucaadiágatu stiidxabe, ne naquiiñeʼ gúnitu ni nabe, ne cadi naquiiñeʼ guixéletu de laabe» (Deuteronomio 13:4).

¹⁹ Salmista que bicaa: «Guizáʼ galán runeʼ sentir chuaaʼ gaxha de Dios» (Sal. 73:28). Ne zacaca runi sentirnu. Nga runi, cadi gusaana de guizíʼdinu jma de Jiobá. Ne zacá zápanu jma razón para gannaxhiinu laabe. ¡Pa guidxíñanu laabe, zadxíñabe laanu yanna ne biaʼ dxi guibáninu!