1, 2. 1) Ximodo bibani Adán ne Eva dxi bizáʼ Dios laacaʼ. 2) Xii nga ca guendarinabadiidxaʼ ni zacábinu lu tema riʼ.

DXI bizáʼ Dios Adán ne Eva, qué gápacaʼ enemigu. Gúcacabe binni ni qué ñalené donda ne bibánicabe ndaaniʼ ti paraísu. Cumu gúcacabe xiiñiʼ Dios la? guyuucabe gaxha de laa (Gén. 2:7-9; Luc. 3:38). Dxiiñaʼ bidii Dios laacabe bisihuínnini pabiáʼ tiempu chiguibánicabe. Biblia na: «Ne guluu Jiobá ndaayaʼ laacabe ne gudxi laacabe: “Lagapa xiiñitu ne lagaca stale ne laguchá guidxilayú riʼ ne laguni dxiiñaʼ luni, ne lagapa ca maniʼ nuu ndaaniʼ nisadóʼ ne ca maniʼ ripapa guibáʼ ne guiráʼ maniʼ ni nuu lu guidxilayú”» (Génesis 1:28). Pabiáʼ naquiiñeʼ guibánicabe para gúnicabe ni na ca diidxaʼ: «Lagapa xiiñitu ne lagaca stale ne laguchá guidxilayú riʼ» yaʼ. Cadi caquiiñeʼ diʼ nibánicabe sin qué ñuu dxi ñáticabe. Peru para gápacabe «guiráʼ maniʼ ni nuu lu guidxilayú» la? naquiiñeʼ gápacabe ti guendanabani ni qué zaluxe.

² Peru, xiñee qué ñaca ni gudixhe ique Dios que yaʼ. Xiñee nápanu stale enemigu ni rucueeza laanu para cadi chuʼnu  nayecheʼ yaʼ. Ximodo beeda chuʼ guendaguti, ni jma xhenemígunu. Xi chiguni Dios para gunitilú ni. Biblia cacabi ca guendarinabadiidxaʼ riʼ ne laaca ricabi ni xcaadxi. Guidúʼyanu xi nani.

3, 4. 1) Xi gudxi Jiobá Adán ne Eva. 2) Xiñee risaca ngue nuzuubacabe diidxaʼ.

³ Neca bidii Dios Adán ne Eva ti guendanabani ni qué zaluxe, naquiiñeʼ guicaacabe bi, gócabe, guécabe ne gásicabe ti guibánicabe, purtiʼ qué nuzáʼ diʼ Jiobá laacabe para cadi chuʼ dxi gáticabe. Peru jma risaca nga chúʼcabe gaxha de Jiobá, purtiʼ de laabe nga ridá guendanabani (Deut. 8:3). Para guibánicabe nayecheʼ la? naquiiñeʼ gúnicabe guiráʼ ni gabi Jiobá laacabe. Ante guzáʼ Jiobá Eva, gúdxibe Adán: «Guiráʼ cuananaxhi stiʼ yaga ni nuu ndaaniʼ jardín ca zanda goloʼ dede guidxá ndaaniluʼ. Peru cuananaxhi stiʼ yaga stiʼ guendananna ni jneza ne ni cadi jneza cadi lica goloʼ ni, purtiʼ dxi lii goloʼ ni, dxandipeʼ zátiluʼ» (Gén. 2:16, 17).

⁴ «Cuananaxhi stiʼ yaga stiʼ guendananna ni jneza ne ni cadi jneza» rusihuínnini derechu ni napa Dios para guiníʼ xii nga ni jneza ne xii nga ni cadi jneza. Adán maʼ nanna caadxi cosa ni zacané laa guni ni jneza, purtiʼ bizáʼ Dios laabe casi laa ne riníʼ íquebe xi gúnibe. Peru yaga que rusietenalaʼdxiʼ ni Adán ne Eva caquiiñecaʼ gabi Jiobá laacaʼ xi gúnicaʼ. Pa gócabe cuananaxhi stiʼ yaga que, casi ñaca ñábicabe Dios ni bizáʼ laacabe: «Cadi caquiiñedu ca ley stiluʼ». Pa gúnicabe ni nácabe, zedané ni stale guendanagana luguiácabe ne luguiáʼ ca xiiñicabe. Pa gócabe cuananaxhi que, záticabe, cásica maca gudxi Jiobá laacabe.

5. Xiñee qué nuzuubaʼ Adán ne Eva stiidxaʼ Jiobá.

⁵ Gudxi Adán Eva ni gudxi Dios laa. Nanna dxichi Eva ni, ngue runi gunda guniʼbe ni diidxaʼ pur diidxaʼ (Gén. 3:1-3). Ne gúdxibe ni ti beendaʼ. Peru Binidxabaʼ ngue caniʼné gunaa que. Laa guca ti xiiñiʼ Dios ne biʼniʼ ni gucalaʼdxiʼ ne bidiibe lugar guiniisi ndaaniʼ ladxidoʼbe gácabe tuuxa binni risaca (laaca zanda gúʼndaluʼ Santiago 1:14, 15). Para ganda gúnibe ni gucaláʼdxibe, guniʼbe rusiguii Dios. Gúdxibe Eva qué zati pa gucheené Dios. Ne laaca gúdxibe laa zaca casi Dios (Gén. 3:4, 5). Biʼniʼ cré Eva laabe ne gudó cuananaxhi que, zaqué bisihuinni qué racalaʼdxiʼ guni mandar Dios laa. Despué gudxi Eva Adán gó cuananaxhi que ne gudó ni (Gén. 3:6, 17). Gudxite Binidxabaʼ Eva (biindaʼ 1 Timoteo 2:14). Neca nanna Adán cadi jneza ngue gudó cuananaxhi que, biʼniʼ ni na xheelaʼ. Neca ruluíʼ nachaʼhuiʼ beendaʼ que, peru atrá de laame nuu ti enemigu ni nanna dxichi xi zazaaca pur bisiguiibe gunaa que.

6, 7. Ximodo biʼniʼ juzgar Jiobá Adán ne Eva.

⁶ Cumu biyubi Adán ne Eva para laasicaʼ la? bidxiidéchecaʼ Jiobá, ni bidii laacaʼ guendanabani ne guiráʼ ni nápacaʼ. Nanna dxichi Jiobá xi guiráʼ ngue cayaca. Biblia na: «Cayuuyaʼ guielú Jiobá guiráʼ ladu, ne cayuuyabe ni cayuni ca binni malu ne ca binni nachaʼhuiʼ» (Proverbios 15:3; 1 Crón. 28:9). Bidii Jiobá lugar gusihuinni Adán, Eva ne Binidxabaʼ xipeʼ runi sentircaʼ pur laabe. Cumu laabe nga Bixhoze ca binni ca la? nabé biuubaʼ ladxidoʼbe pur ni bíʼnicaʼ (laaca zanda gúʼndaluʼ Génesis 6:6). Peru cumu nácabe juez la? naquiiñeʼ gúnibe ni na ca ley stibe ne gusabanabe cani bichee que.

 ⁷ Dios maca gudxi Adán: «Dxi lii goloʼ [cuananaxhi stiʼ yaga stiʼ guendananna ni jneza ne ni cadi jneza], dxandipeʼ zátiluʼ». Zándaca guníʼ ique Adán «dxi» ni bizeeteʼ Dios nácani ti dxi de 24 hora ne zátibe ante guiaaziʼ Gubidxa. Peru despué, «neza ra rundubi bi nisa», bibiguetaʼ bicaa ridxi Jiobá Adán ne Eva (Gén. 3:8). Cumu nácabe ti juez nachaʼhuiʼ, primé bicaadiágabe xi guiníʼ cani bichee que (Gén. 3:9-13). Despué gúdxibe laacaʼ záticaʼ (Gén. 3:14-19). Yanna, pa ñuutibe laacaʼ oraqueca, qué ñaca diʼ ni gudixhe íquebe para binni guidxilayú (Is. 55:11). Neca nagueendaca gupa Adán ne Eva ca yuubaʼ stiʼ guendaruchee, bidii Jiobá lugar laacabe guibánicabe para gápacabe xiiñicabe ne laacaʼ zanda guibánicaʼ jma galán. Peru para Jiobá gúticabe dxi bicheecabe. Ne cumu para laabe ti dxi zeeda gaca casi ti mil iza la? gúticabe «dxi» bicheecabe (2 Ped. 3:8).

8, 9. Ximodo bininá guendaruchee stiʼ Adán ne Eva ca xiiñiʼ. (Biiyaʼ dibuju ni zeeda ra ruzulú tema riʼ.)

⁸ Ñee zacaná ca xiiñiʼ Adán ne Eva pur ni biʼniʼ bixhózecaʼ ne jñaacaʼ la? Zacanacaʼ. Lu Romanos 5:12 cusiene apóstol Pablu: «Pur tobi hombre biuu enda ruchee ndaani guidxilayú, ne guti be purti bichee be, ne zacá ucuá enda guti que irá xixé binni, purti laca bichee caʼ». Primé binni ni guti nga Abel (Gén. 4:8). Ca xiiñiʼ Adán ne ca xhiaga laaca bióʼxhocaʼ ne gúticaʼ. Ñee laaca gucuá guendaruchee que laacabe la? Pablu guníʼ: «Pur hombre ni qué nuzuuba diidxa que, uyuu stale tu bichee» (Rom. 5:19). Pur Adán ne Eva biaanané binni guidxilayú guendaruchee ne guendaguti, chupa enemigu ni qué zanda gusaana laanu. Neca qué gánnanu ximódopeʼ gucuá guendaruchee ne guendaguti ca laanu, peru guiranu runiná cani.

⁹ Nga runi, Biblia ruchaaga pecadu ne guendaguti casi ti «lari ni renda [...] luguiáʼ guiráʼ guidxi» ne casi ti «lari ni bidiibaʼ luguiáʼ guiráʼ guidxi roʼ» (Is. 25:7). Guiráʼ xixé binni nga runiná guendaruchee ne guendaguti. Stiidxaʼ Dios na: «Rati irá binni purti za de Adán» (1 Cor. 15:22). Ngue runi Pablu gunabadiidxaʼ: «Tuu nga cuee naa de enda guti ni naaze naa ri pue» (Rom. 7:24). Ñee nuu tu zanda gulá Pablu la? *

10. 1) Gunáʼ nga ca textu stiʼ Biblia ni cusiene zabee Jiobá guendaguti. 2) Xi cusiidiʼ ca versículo riʼ laanu de Jiobá ne Xiiñiʼ.

¹⁰ Jiobá nga ni zanda gulá Pablu. Despué de guníʼ Isaías de «lari ni renda» ni maca bizéʼtenu que bicaa: «Dxandipeʼ zábibe guendaguti ne maʼ qué ziuuruʼ ni, ne Jiobá, Señor Ni Jma Nandxóʼ, zuchaa nisa riete lú guiráʼ binni» (Is. 25:8). Cásica ribee ti binni xiixa ni cayuniná xiiñiʼ ne ruchaa lube ora maʼ cayuunabe, zacaca zabee Jiobá guendaguti ni bisaanané Adán laanu. Ne zacané Jesús laabe. Lu 1 Corintios 15:22 na: «Cásica rati irá binni purti za de Adán la? zaqueca zabani irá cani aca né Cristu tobi si». Ngaca nga ni bizaaca Pablu, despué de gunabadiidxabe tu zanda gulá laabe, laca laabe bicábibe: «Rudiee diuxquixe Dios purti Jesucristu zabee naa de laani. Laabe nga Señor stinu» (Rom. 7:24). Dxandíʼ, neca bidxiideche Adán ne Eva Jiobá, qué  nusaana de ñánnaxhii binni. Ne Jesús, ni gucané Bixhoze para guyáʼ Adán ne Eva, laaca qué nusaana de ñannaxhii binni (Prov. 8:30, 31). Peru, ximodo zanda gulácabe binni de lu náʼ guendaruchee ne guendaguti yaʼ.

11. Xi biʼniʼ Jiobá para gucané binni.

¹¹ Dxi bichee Adán, guníʼ Jiobá zátibe. Ne pur nga guiráʼ binni ruchee ne rati (Rom. 5:12, 16). Biblia na: «Udxiʼba donda ique irá xixé binni runi ti hombre ni bichee» (Rom. 5:18). Xi zanda guni Jiobá para cuee guendaguti ne cadi gusaana de guni ni na ca ley ni maʼ gudixhe yaʼ. Lu ca diidxaʼ ni guníʼ Jesús ridxélanu xi guicábinu. Laa guníʼ: «Naa nga Hombre Biseenda Dios ne benda [...] para udiee xpida para ilá stale binni» (Mat. 20:28). Cumu Jesús nga ti binni ni qué ñalené donda la? Laa nga zanda «ulá irá binni». Yanna, ximodo zanda guilá binni de lu náʼ guendaruchee ne guendaguti yaʼ (1 Tim. 2:5, 6).

12. Ximodo guca ni na ca ley stiʼ Jiobá ora bidii Jesús xquendanabani.

¹² Cumu guca Jesús ti hombre ni qué ñapa donda la? ñanda nibánibe cásica bibani Adán ante nucheené Dios. Peru ni gudixhe ique Jiobá nga guidxá Guidxilayú riʼ de ca xiiñiʼ Adán, ne gácacaʼ binni sin donda. Nga runi, cumu nadxii Jesús Bixhoze ne laaca nadxii ca xiiñiʼ Adán la? bidiibe guendanabani sin donda stibe para gudíxebe ni biniti Adán. Despué, gundisaʼ Jiobá laabe lade gueʼtuʼ ne bidii laabe ti cuerpu de espíritu (1 Ped. 3:18). Ñee biʼniʼ guendaguti stiʼ Jesús ni na ca ley stiʼ Jiobá la? Bíʼnibe ni, purtiʼ casi ñaca guyuu Jesús lugar stiʼ Adán. Ra bidii Jesús guendanabani sin donda stiʼ casi ñaca guziʼbe binni guidxilayú ne bidiibe laacaʼ guendanabani ni biniti Adán. Sicaríʼ bisiene Pablu: «Cá lu Xquiʼchi Dios: “Adán, primé hombre uca binni nabani.” Peru zanda gabi nu Cristu nga rairopa Adán, ne laa naca ti espíritu ni rudii enda nabani» (1 Cor. 15:45).

13. Xi zuni «rairopa Adán» pur ca binni ni maʼ guti.

¹³ Maʼ cadi candaa Jesús, «rairopa Adán», zudii «enda nabani» ca xiiñiʼ Adán. Ne cumu maʼ guti stale de laacabe la? zandisaʼ Jesús laacabe para guibánicabe lu Guidxilayú (Juan 5:28, 29).

14. Ximodo zanda gácanu binni ni qué gapa donda.

¹⁴ Ximodo zanda gueeda gácanu binni ni qué gapa donda yaʼ. Napa Jiobá ti Reinu guibáʼ, ne lu Reinu ca nuu «rairopa Adán» ne 144,000 binni ni maʼ gulibe de lade binni guidxilayú (biindaʼ Apocalipsis 5:9, 10). Cani chigaca rey guibáʼ nanna dxíchicaʼ ximodo nga ti binni ralené donda, purtiʼ laaca gúcacaʼ binni gulené donda. Lu ti mil iza guni mandar Jesús, laa ne 144,000 ni bibí zacanecaʼ binni ni guibani lu Guidxilayú riʼ para gácacaʼ binni sin donda (Apoc. 20:6).

15, 16. 1) Xii nga na Biblia zanitilú últimu, ne padxí gácani. 2) Casi na 1 Corintios 15:28, xi zuni Jesús óraca.

¹⁵ Ra guiluxe ti mil iza, binni ni guzuubaʼ diidxaʼ zalacaʼ de lu náʼ guendaruchee ne guendaguti. Pablu bisiene: «Cásica rati irá binni purti za de Adán la? zaqueca zabani irá cani aca né Cristu tobi si. Sicarí nga gudixhe Dios aca ni: nirudóʼ ibani Cristu, ne dxi gueeda la? óraque ibani ca xpinni. Ne raqué nga iluxe ni, ra quixhe dxí Cristu irá xixé ni runi mandar ndaani guidxilayú, purti zunitilú be irá ni cadi jneza ni nuu lu guidxilayú, ne óraque ma zudii be ca xpinni be Dios Bixhoze be  para guni mandar. Purti napa be xidé guni mandar be dede cuaqui dxí Dios irá cani cadi nuu né laabe tobi si. Ne ni unitilú be últimu nga enda guti» (1 Cor. 15:22-26). Zacá nga laani, zabeebe guendaguti ni bisaanané Adán laanu, ne maʼ qué ziuuruʼ dxi gatiʼ binni. Ne maʼ qué zácanu binni ruchee ni zeeda gaca casi ti «lari ni renda» guiráʼ binni guidxilayú (Is. 25:7, 8).

¹⁶ Apóstol Pablu guniʼruʼ: «Gudixhe Bixhoze be irá ni xa ñee be, ne ora ma runi mandar be irá ni la? laca zuni mandar Bixhoze be laabe, ti laa aca xaíque sti irá ni» (1 Cor. 15:28). Zacá nga zaca guiráʼ ni maʼ gudixhe ique Jiobá guni Reinu stiʼ Jesús. Nabé nayecheʼ ziuube ora gudxiguétabe Reinu ca Jiobá ne zudiibe laa ca binni ni maʼ qué gapa donda.

17. Xi zazaaca Binidxabaʼ.

¹⁷ Yanna, xi zazaaca né Binidxabaʼ, ni napa donda pur guiráʼ desgracia ni cadxaagalú binni yaʼ. Apocalipsis 20:7-15 cacabi guendarinabadiidxaʼ riʼ. Ora guiluxe ti mil iza, zuyubi Binidxabaʼ modo cueechú ca binni ni maʼ qué gapa donda últimu biaje. De racá, zanitilube ne guiráʼ cani runi ni nabe. Biblia ribee lani «rairopa enda guti» (Apoc. 21:8). Zanitilú «rairopa enda guti», purtiʼ guiráʼ tu gatiʼ luni maʼ qué zabiguetaʼ guibani. Peru para ca binni ni nadxii Jiobá ne rúnicaʼ ni nabe la? qué ruuyacaʼ «rairopa enda guti» casi ti enemigu.

18. Ximodo zaca dxiiñaʼ ni bisaanané Dios Adán.

¹⁸ Guiráʼ xixé binni ni guibani lu Guidxilayú zácacaʼ binni ni qué gapa donda ne zudii Jiobá laacabe guendanabani ni qué zaluxe. ¡Maʼ qué zápanu nin ti enemigu! Maʼ gadxé binni nga guni dxiiñaʼ ni bidii Jiobá Adán. Zadxá Guidxilayú riʼ de ca xiiñiʼ Adán, ne laacaʼ nga gápacaʼ guiráʼ maniʼ chuʼ ndaaniʼ ni ne xcaadxi ni guibani luni. ¡Guizáʼ riéchenu ora gánnanu zabee Jiobá guendaguti, últimu enemigu stinu!