1. Xi huayuni ca xaíque stiʼ ca religión ni na xpinni Cristu laa lu ca guerra ca.

ÑEE racalaʼdxiʼ Dios cheʼ ca xpinni lu guerra ne guuticaʼ binni de xcaadxi guidxi la? Nga nga ni huayuni stale binni ni na xpinni Cristu laa lu ti gayuaa iza ni maʼ gudiʼdiʼ ca. Ca xaíque stiʼ ca católicu huaguucaʼ ndaayaʼ ca soldadu ne guiibaʼ stícabe para guuticabe xcaadxi católicu de sti guidxi ni naca xhenemígucabe. Ne zaqueca huayuni ca xaíque stiʼ ca protestante. Zacá rihuinni ni pur guiráʼ binni ni guti lu Segunda Guerra Mundial.

2, 3. 1) Xi biʼniʼ ca testigu stiʼ Jiobá lu Segunda Guerra Mundial ne despué. 2) Xiñee bíʼnicabe zacá yaʼ.

² Xi biʼniʼ ca testigu stiʼ Jiobá lu Segunda Guerra Mundial yaʼ. Historia rusihuinni qué ñécabe lu guerra. Xiñee qué ñécabe yaʼ. Purtiʼ yenándacabe ejemplu stiʼ Jesús ne ni bisiidiʼ. Laa guníʼ: «Pa ganaxhii saa tu zacá la? zanna binni xpinne laatu» (Juan 13:35). Ne laaca bietenaláʼdxicabe ca diidxaʼ ni bicaa Pablu ra nuu ca xpinni Cristu de Corinto ne bíʼnicabe ni nani (biindaʼ 2 Corintios 10:3, 4).

³ Cumu riquiiñeʼ ca xpinni Cristu Biblia para gánnacaʼ xii nga ni jneza ne xii nga ni cadi jneza la? ngue runi qué  ninacaʼ ñecaʼ lu guerra. Cumu runi ca testigu stiʼ Jiobá stipa pur guibánicaʼ casi naquiiñeʼ guibani ti xpinni Cristu la? nga runi, stale de laacaʼ huazanándacabe laacaʼ, cásica ni nahuiiniʼ zaqueca ni maʼ huaniisi, hombre ne gunaa. Stale de laacaʼ huayeguyoocaʼ ne huaguucabe laacaʼ ca lugar ra raca dxiiñaʼ nadipaʼ ne dede huayuuticabe laacaʼ. Ne nga nga ni bizaacacabe lu Segunda Guerra Mundial dxi biʼniʼ mandar ca nazi. Neca birá si guendanagana gupa ca Testigu de Europa, qué ñuu dxi nusiaandacaʼ dxiiñaʼ ni bidii Jiobá laacaʼ de gucheechecaʼ ca diidxaʼ nacubi ne galán stiʼ Reinu. Ngue runi qué nusaana de nucheechecabe diidxaʼ neca biseguyoo binni laacabe, guyuucabe ndaaniʼ campu de concentración ne guyuucabe zitu de xquídxicabe. * Xcaadxi iza despué, lu iza 1994, laaca qué ñuucabe lu guendaridinde ni guca ndaaniʼ guidxi Ruanda ra guti stale binni. Ne laaca qué ñuucabe lu guendaridinde ni guca para bibiá Yugoslavia ra guti stale binni.

4. Xi huadii binni cuenta ora ruuyacaʼ qué riuunu lu guerra.

⁴ Ora ruuyaʼ binni qué riuunu lu guerra, racané ni laacabe gudiicabe cuenta dxandíʼ nadxiinu Dios, nadxiinu binni ne dxandíʼ xpinni Cristu laanu. Xi xcaadxi razón nuu para guni cré binni dxandíʼ nácanu xpinni Cristu yaʼ.

5. Xi gudxi Jesús ca primé xpinni naquiiñeʼ gúnicaʼ.

⁵ Dede dxi bizulú Jesús bicheeche diidxaʼ bisihuinni pabiáʼ risaca nga ganna binni de Reinu stiʼ Dios. Gulibe 12 discípulo para guzulucaʼ dxiiñaʼ ni chigaca lu guidubi Guidxilayú riʼ, ne despué bisiidibe sti 70 (Luc. 6:13; 10:1). Bisiidibe laacaʼ para gucheechecaʼ diidxaʼ nacubi ne galán. Primé naquiiñeʼ chigusiidicabe ca judíu, peru despué gúdxibe laacaʼ zigucheechecaʼ diidxaʼ ndaaniʼ xcaadxi guidxi. ¡Nabé bidxagayaa ca judíu que ora gúnnacaʼ naquiiñeʼ checaʼ xcaadxi guidxi! (Hech. 1:8.)

6. Xi gucané Pedru gudii cuenta qué ribí Jiobá tu guni ni na.

⁶ Biseendaʼ Jiobá apóstol Pedru cheʼ ra lidxi Corneliu, ti hombre ni cadi naca judíu. Raqué bidiibe cuenta qué ribí Dios tu guni ni na. Despué biʼniʼ mandarbe chúʼnisa Corneliu ne binnilidxi (Hech. 10:9-48). Pur ni bizaaca riʼ, maʼ zanda gunadiaga binni de guiráʼ guidxi stiidxaʼ Dios ne gácacaʼ xpínnibe.

7, 8. Xi huayuni xquidxi Dios para guiziidiʼ jma binni de stiidxaʼ Reinu. (Biiyaʼ foto ni zeeda ra ruzulú tema riʼ.)

⁷ Ca dxi stinu riʼ, ca xpinni Cristu ni ruuyaʼ gaca dxiiñaʼ stiʼ ca testigu stiʼ Jiobá ruuyacaʼ guireeche diidxaʼ né stale gana ne gusiidicaʼ binni de Dios lu guidubi naca Guidxilayú. Yanna maʼ nácanu biaʼ xhono millón de Testigu ni cucheeche diidxaʼ ndaaniʼ jma de xhoopaʼ gayuaa diidxaʼ, ne maʼ cadi candaa zareeche ni lu jma diidxaʼ. Nabé runibiáʼ binni laanu purtiʼ rucheechenu diidxaʼ de yoo pur yoo, lu calle ne nuu biaje ribeenu libru ne revista stinu lu ti mexaʼ o lu ti carruhuiiniʼ.

⁸ Jma de 2,900 traductor maʼ biziidicaʼ gutiixhicaʼ Biblia, libru ne revista lu xcaadxi diidxaʼ. Ne cadi ribíʼxhisini lu ca diidxaʼ ni nabé riníʼ binni, sínuque  laaca ribiʼxhiʼ ni lu gayuaa de diidxaʼ ni huaxiéʼ riníʼ binni. Casi España, riníʼcabe diidxaʼ catalán, laani nga diidxaʼ gulenécabe ne riníʼcabe ni guiráʼ dxi. Ne lu ca últimu iza ca nabé maʼ stale binni riníʼ diidxaʼ catalán. Ca testigu stiʼ Jiobá maʼ cabeecaʼ libru ne revista lu diidxaʼ catalán ne laaca maʼ rápacabe guendaridagulisaa lu diidxaʼ riʼ, diidxaʼ ni rindá dede ndaaniʼ ladxidóʼ ca binni que.

9, 10. Xiñee zanda guininu rizaalaʼdxiʼ xquidxi Jiobá ganna guiráʼ binni de Dios.

⁹ Ne ngaca nga ni cazaaca lu guidubi naca Guidxilayú. Casi Méjicu, diidxastiá nga ni jma riníʼ binni, peru nuu stale binni riníʼ xcaadxi diidxaʼ. Tobi de ca diidxaʼ ca nga maya. Cadi xadxí biseendaʼ Betel ti grupu de traductor lugar ra riníʼcabe maya purtiʼ raqué zanda guiníʼcabe ne gunadiágacabe diidxaʼ ca guiráʼ dxi. Stobi de ca diidxaʼ ca nga nepalés, ti diidxaʼ ni riníʼcabe Nepal, nuu jma de 29 millón de binni ni riníʼ diidxaʼ ca. Neca riníʼ ca binni que biaʼ ti gayuaa gande diidxaʼ, jma de 10 millón de binni riníʼ nepalés, ne nuuruʼ xcaadxi ni nápani casi guiropa stiidxaʼ. Yanna maʼ nuu libru ne revista stinu lu diidxaʼ ca.

¹⁰ Xiñee napa ca testigu stiʼ Jiobá stale grupu ni rutiixhi diidxaʼ yaʼ. Purtiʼ ruuyacabe risaca nga dxiiñaʼ ni gucuaabe de gucheechecabe stiidxaʼ Reinu ndaaniʼ guiráʼ guidxi. Ca testigu stiʼ Jiobá maʼ gudiizicaʼ lu guidubi naca Guidxilayú stale millón de tratadu, folletu ne revista. Riguíxecabe saca gaca cani né bueltu ni rudiicabe de guidubi ladxidóʼcabe, zacá zinándacabe mandatu ni bidii Jesús ra na: «Qué niguixe tu saca gudixhe irá ndi lu ná tu guni tu. Yanna laguni cani sin guiaxa tu» (Mat. 10:8).

11, 12. Ximodo ruuyaʼ binni dxiiñaʼ ni runi ca testigu stiʼ Jiobá.

¹¹ Ca testigu stiʼ Jiobá rucheechecaʼ diidxaʼ né gana ne riuuláʼdxicaʼ gusiidicaʼ binni. Cumu nánnacabe maʼ bidxélacabe ni dxandíʼ la? ngue runi rúnicabe stipa pur chinécabe stiidxaʼ Dios ra nuu binni de xcaadxi guidxi ne ni riníʼ xcaadxi diidxaʼ. Stale xpinni Cristu maʼ biziidicaʼ sti diidxaʼ ne huayecaʼ sti guidxi ra qué runibiaʼcaʼ para gacanecaʼ binni guiziidiʼ de Dios. Dxiiñaʼ ni  cayaca lu guidubi naca Guidxilayú riʼ huayacané ni stale binni gudii cuenta dxandíʼ discípulo stiʼ Jesús ca testigu stiʼ Jiobá.

¹² Rúninu guiráʼ ndiʼ purtiʼ nánnanu maʼ bidxélanu ni dxandíʼ. Yanna, xiruʼ racané xcaadxi xpinni Cristu gánnacaʼ ndiʼ nga religión ni dxandíʼ yaʼ (biindaʼ Romanos 14:17, 18).

13. Xi huayuni ca testigu stiʼ Jiobá para chuʼ xquidxi Dios nayá.

¹³ Xi razón napa chupa chonna xpinni Cristu para chuʼcaʼ seguru maʼ bidxélacaʼ ni dxandíʼ. Ti xpinni Jiobá ni maʼ xadxí de cayuni ni nabe guníʼ sicaríʼ: «Raca stale stipa para chuʼ xquidxi Jiobá nayá, neca tutiica gulídxecabe o uguu jnézacabe». Ximodo rúnicabe para chuʼ xquidxi Dios nayá yaʼ. Guiráʼ ca Testigu rúnicaʼ stipa pur chinándacaʼ ca ley ni zeeda lu Stiidxaʼ Dios ne rinándacaʼ ejemplu stiʼ Jesús ne ca discípulo stiʼ. Ne pur nga huaxiéʼ si tu riree de ndaaniʼ xquidxi Dios. Jma nga stale testigu stiʼ Jiobá nabánicaʼ jneza ne nácacaʼ ejemplu para xcaadxi neca chupa chonna de laacaʼ qué ñúnicaʼ ni jneza dxiqué (biindaʼ 1 Corintios 6:9-11).

14. Xi huayuni stale binni ni maʼ huaree ndaaniʼ xquidxi Dios, ne xi huabeenducaʼ.

¹⁴ Xi rizaaca de ca binni ni riree de ndaaniʼ xquidxi Dios yaʼ. Stale de laacaʼ huayaca arrepentircaʼ ne ribiguétacaʼ ndaaniʼ xquidxi Dios (biindaʼ 2 Corintios 2:6-8). Cumu runi ca Testigu ni na Biblia la? nga runi nayá riuu xquidxi Jiobá. Ndaaniʼ stale religión rudiicabe lugar guni binni intiica gapa gana, peru ca testigu stiʼ Jiobá rinándacaʼ ca ley stiʼ Dios. Ndiʼ rucaa stale binni gudii cuenta dxandíʼ runi ca xpinni Cristu ni na Biblia.

15. Xi huayacané ti xpinni Cristu ganna maʼ bidxelaʼ ni dxandíʼ.

¹⁵ Xiñee nanna dxichi xcaadxi Testigu ni maʼ xadxí nuu ndaaniʼ xquidxi Dios maʼ bidxélacaʼ ni dxandíʼ yaʼ. Ti hermanu de 54 iza guníʼ: «Dede dxi nahuiineʼ, guyuu chonna cosa ni huayacané naa iguidxi fe stinneʼ: 1) gannaʼ dxandíʼ nuu Dios; 2) laabe nga guniʼbe xi guicá lu Biblia, ne 3) caquiiñebe ne caguube ndaayaʼ ca testigu stiʼ Jiobá. Guiráʼ iza ni maʼ ziniáʼ de cayuundaʼ Biblia, runeʼ stipa pur guuyaʼ pa dxandíʼ cani runeʼ cré. Ne cada iza tiidiʼ ruuyaʼ nuu stale razón para guneʼ cré cani, ne huayacané cani naa para iguidxi fe stinneʼ ne guneʼ cré maʼ bidxelaʼ ni dxandíʼ».

16. Xi gucané ti hermana ganna maʼ bidxelaʼ ni dxandíʼ.

¹⁶ Ti hermana ni maʼ bichaganáʼ ni  cayuni dxiiñaʼ Betel ni nuu Nueva York, sicaríʼ guníʼ de xquidxi Jiobá: «Laasini nga rusiidini lá Jiobá. [...] ¡Ne ndaaniʼ Biblia zeeda lá Dios 7,000 biaje! Ne laaca racané ca diidxaʼ ni cá lu 2 Crónicas 16:9 ra na: “Guielú Jiobá cayuuyaʼ guiráʼ ni cayaca lu guidxilayú para guluiʼbe stipa stibe luguiáʼ cani runi cré laabe de guidubi ladxidóʼ”». Ne guníʼrube: «Cani maʼ biziideʼ de Dios huayacanécani naa guneʼ ni na Jiobá de guidubi ladxiduáʼ ti ganda iquiiñebe stipa stibe para gacanebe naa. Ni jma risaca para naa nga chuaaʼ gaxha de laabe. Ne laaca rudieeʼ xquíxepeʼ Jesús pur gucané naa gunebiaʼyaʼ Jiobá. Ne nga racané naa iguidxi fe stinneʼ».

17. Xi gucané ti xpinni Cristu ni qué ñuni cré pa nuu Dios ganna maʼ bidxela ni dxandíʼ.

¹⁷ Ti xpinni Cristu ni qué ñuni cré pa nuu Dios, guníʼ: «Ora ruuyaʼ guiráʼ ni bizáʼ Dios, rudieeʼ cuenta racaláʼdxibe guibáninu nayecheʼ; nga runi nannaʼ qué zudiibe lugar gacananu biaʼ dxi guibáninu. Laga jma zinitilú guidxilayú riʼ pur guiráʼ cosa malu nuu lu, xquidxi Jiobá jma ziguidxi fe stiʼ, runi xhiiñabe né stale gana ne jma nadxiisaa. Espíritu si stiʼ Jiobá zanda guni milagru riʼ» (biindaʼ 1 Pedro 4:1-4).

18. 1) Xi guníʼ chupa xpinni Cristu. 2) Ñee rábiluʼ jneza ni guníʼ ca hermanu riʼ la?

¹⁸ Sti hermanu ni maʼ xadxí de naca xpinni Cristu guníʼ xi gucané laa para ganna maʼ bidxela ni dxandíʼ, laa na: «Ca iza ni maʼ ziniáʼ de cayuundaʼ Biblia, huayacané cani naa guuyaʼ runi ca Testigu stipa pur gúnicaʼ casi biʼniʼ ca xpinni Cristu ni bibani lu primé siglu. Maʼ huayaaʼ stale guidxi ne maʼ biiyaʼ tobi si nuu xquidxi Dios. Guiráʼ cani maʼ biziideʼ de lu Biblia ruchátipa cani ladxiduáʼ ne nabé rusiecheʼ cani naa». Dxi gunabadiidxacabe ti hermanu ni napa jma de 60 iza xiñee nanna dxandíʼ religión stiʼ ca Testigu, laa guníʼ purtiʼ laacabe nga dxandipeʼ zinándacabe Jesús. Ne nabe: «Maʼ biindaʼ chaahuinu xquendanabani Jesús ne modo bicheeche diidxaʼ, ne nabé rusisácanu ejemplu stibe. Maʼ bichaʼnu stale cosa lu xquendanabáninu ne pur laabe zanda chuʼnu jma gaxha de Dios. Maʼ nánnanu zanda guilanu pur guendaguti stibe. Ne maʼ bizíʼdinu biásabe lade gueʼtuʼ, purtiʼ guyuu tu biiyaʼ ne guníʼ dxandíʼ gúcani» (biindaʼ 1 Corintios 15:3-8).

19, 20. 1) Xi guníʼ Pablu naquiiñeʼ guni ca xpinni Cristu de Roma. 2) Xi ndaayaʼ nápanu casi xpinni Cristu.

¹⁹ Cumu nadxiinu binni la? rucaa nga laanu gusíʼdinu laacabe ni maʼ bizíʼdinu de Dios. Pablu gudxi ca hermanu ni nuu ndaaniʼ neza binni ridagulisaa ni nuu Roma ca diidxaʼ riʼ: «Pa iníʼ lu Jesús nga xpixuaana irá xixé, ne guni cre lu de idubi ladxidóʼ lo dxandí undisa Dios laabe de lade gueʼtu la? zalá luʼ. Purti ndaani ladxidóʼ cabe runi cre cabe para ixá stonda cabe, ne ra iníʼ cabe ni nezalú binni la? zalá cabe» (Rom. 10:9, 10).

²⁰ Laanu ca testigu stiʼ Jiobá nanna dxíchinu maʼ bidxélanu ni dxandíʼ. Ne laaca nánnanu ti ndaayaʼ nga gusíʼdinu ca diidxaʼ nacubi ne galán stiʼ Reinu xcaadxi binni. Ora guinínenu laacabe de Stiidxaʼ Dios, guyúbinu modo chuuláʼdxicabe gucaadiágacabe ne gúninu stipa pur gusihuínninu maʼ bidxélanu ni dxandíʼ.