1, 2. 1) Xi gucalaʼdxiʼ caadxi xaíque yuʼduʼ ñanna. 2) Xi bicabi Pedru laacabe yaʼ. (Biiyaʼ dibuju ni zeeda ra ruzulú tema riʼ.) 3) Xiñee qué nidxibi Pedru ora bicabi.

CHUPA chonna gubidxa despué de guti Jesús, bisianda apóstol Pedru ti hombre ni qué randa rizá, ngue runi bicaalú ca xaíque yuʼduʼ laabe ne laaca ca binni riʼ nga biiti Jesús. Laacaʼ nuucaʼ gánnacaʼ tu bidii poder laabe para bíʼnibe ni. Qué nidxibi Pedru guníʼ: «Jesucristu ni bicaa tu lu [yaga] que, undisa Dios laa de lade gueʼtuʼ, ne laabe nga bisianda be hombre zuhuaa lú tu riʼ» (Hech. 4:5-10).

² Cadi xadxí guníʼ Pedru qué runibiáʼ Jesús chonna biaje purtiʼ bidxibi (Mar. 14:66-72). Xiñee maʼ qué nidxíbibe ora bicábibe ca xaíque yuʼduʼ que yaʼ. Purtiʼ gucané espíritu santu laabe, ne laaca nanna dxíchibe maʼ biasa Jesús lade gueʼtuʼ ne nabani. Xiñee nuube seguru yaʼ. Ne xiñee laaca zanda chuʼnu seguru.

3, 4. 1) Tuu nga ca binni biasa lade gueʼtuʼ ante gale ca apóstol que. 2) Tuu nga cani gundisaʼ Jesús lade gueʼtuʼ.

³ Stale iza ante gale ca apóstol stiʼ Jesús maca guyuu binni biasa lade gueʼtuʼ. Ngue runi nánnacabe zanda guiasa binni lade gueʼtuʼ. Nánnacabe bidii Dios poder profeta Elías ne Eliseo para guindísacaʼ gueʼtuʼ (1 Rey. 17:17-24; 2 Rey. 4:32-37). Ti hombre ni yegucaachicabe laa ndaaniʼ baʼ stiʼ Eliseo, bibani  ora bidiiñe ladi dxita ladi Eliseo (2 Rey. 13:20, 21). Guiráʼ ca xpinni Cristu de dxiqué biʼniʼ crecaʼ dxandíʼ ca relatu riʼ, cásica runi crenu dxandíʼ ni rusiidiʼ Stiidxaʼ Dios.

⁴ Cadi dxandíʼ guizáʼ riéchenu gánnanu gundisaʼ Jesús binni de lade gueʼtuʼ la? Guietenaláʼdxinu dxi bisibánibe tobi lucha xiiñiʼ ti viuda. Ñee ruxuíʼlunu pabiáʼ bidxagayaa gunaa riʼ ora gundisaʼ Jesús xiiñiʼ la? (Luc. 7:11-15.) Laaca gundisaʼ Jesús ti dxaapahuiiniʼ de 12 iza. ¡Pabiáʼ nayecheʼ guyuu bixhoze ne jñaa dxaapahuiiniʼ riʼ ora biiyacaʼ maʼ nabánibe sti biaje yaʼ! (Luc. 8:49-56.) Ne guiníʼ íquenu de ca binni ni biiyaʼ Lázaro ora zeeda guiree ndaaniʼ baʼ que nazaaca dxichi. ¡Guizáʼ bidxagayaacabe! (Juan 11:38-44.)

5. Xiñee maʼ gadxé modo biasa Jesús lade gueʼtuʼ.

⁵ Ca apóstol que nánnacaʼ maʼ gadxé modo biasa Jesús lade gueʼtuʼ. Ca binni ni biasa lade gueʼtuʼ dxiqué, biasanecaʼ ti cuerpu de beela ne dxita, ne despué gúticaʼ sti biaje. Peru Jesús biasané ti cuerpu de espíritu ni qué riuudxuʼ ne qué rati (biindaʼ Hechos 13:34). Pedru na «guti cuerpu sti [Jesús], peru qué ñati» espíritu stibe. Ne laaca guniʼbe «nuu Cristu ibáʼ zuba cueʼ Dios, ne irá ca ángel ne cani runi mandar ne cani nandxóʼ ruzuuba ca stiidxa be» (1 Ped. 3:18-22). Nabé bidxagayaa binni ora biiyaʼ biasa cani maʼ guti, peru milagru ni jma naroʼbaʼ guca dxiqué nga dxi biasa Jesús lade gueʼtuʼ.

6. Xi biʼniʼ sentir ca discípulo que ora gúnnacaʼ maʼ biasa Jesús de lade gueʼtuʼ.

⁶ Modo biasa Jesús lade gueʼtuʼ nabé gucané ni ca discípulo stibe. Neca ca xhenemígucabe nacaʼ qué ñásabe lade gueʼtuʼ, ca discípulo stibe nánnacaʼ maʼ nabani Jesús. Yanna maʼ nácabe ti espíritu ni napa stale poder ne guirutiʼ zanda guniná laa. Ne ora biásabe lade gueʼtuʼ laaca bisihuínnini laabe nga Xiiñiʼ Dios. Pur ngue, maʼ qué ñuu ca discípulo que triste ne maʼ qué nidxíbicaʼ, sínuque guyuucaʼ nayecheʼ ne gúcacaʼ nadxibalú. Ngue runi bicheechecabe stiidxaʼ Dios né stale gana. ¡Nabani Jesús ne zaca ni maʼ gudixhe ique Jiobá!

7. 1) Xi cayuni Jesús ca dxi riʼ. 2) Xi guendarinabadiidxaʼ zacábinu.

⁷ Laanu ca xpinni Jiobá nánnanu qué ñaca si Jesús ti binni nachaʼhuiʼ ni biʼniʼ stale milagru. Yanna riʼ, laabe zanírube lu dxiiñaʼ de guireeche diidxaʼ ni cayaca lu guidubi Guidxilayú. Ne casi Rey stiʼ Reinu stiʼ Dios, mayaca cueebe guiráʼ cosa malu ni nuu ndaaniʼ Guidxilayú riʼ ne zúnibe ni ti paraísu ra gapa binni guendanabani ni qué zaluxe (Luc. 23:43). Qué ñanda ñaca guiráʼ ndiʼ pa qué ñasa Jesús de lade gueʼtuʼ. Yanna, xi razón nápanu para guni crenu biasa Jesús lade gueʼtuʼ ne nabani yaʼ. Xiñee risaca para laanu gánnanu biasa Jesús lade gueʼtuʼ.

8, 9. 1) Xiñee gucalaʼdxiʼ ca xaíque yuʼduʼ chuʼ tu gapa ra baʼ stiʼ Jesús. 2) Xi bizaaca ora yendá ca gunaa que ra baʼ que.

⁸ Guti si Jesús, ca xaíque stiʼ ca sacerdote que ne ca fariseu bidagulisaacaʼ nezalú Pilatu ne gúdxicabe laa: «Señor, cayetenalaʼdxi du ni uníʼ hombre rusiguii que dxi nabani, na raguionna gubidxa ziasa de lade gueʼtuʼ. Nga runi canaba du lii guseendu tu chi gapa ra baʼ que dede ganda chonna gubidxa quenquita gueeda ca discípulu stibe cuana ca xcuerpu be ne gabi ca binni biasa be de lade gueʼtuʼ. Ne zacá jma rusi zusiguii cabe, que  dxi bizulú ni». Óraque bidii Pilatu lugar ca hombre que guseendacaʼ tu chigapa ra baʼ que (Mat. 27:62-66).

⁹ Bicaachicabe Jesús ndaaniʼ ti baʼ ni gundaacabe lu ti guié ne bitaaguʼ dxíchicabe ruaa ni né ti guié naroʼbaʼ. Raqué nga gucalaʼdxiʼ ca xaíque yuʼduʼ ñaanabe. Peru Jiobá gadxé ni cá ique guni. Lu guionna gubidxa que guyé María Magdalena ne sti María que ra gaʼchiʼ Jesús, biiyacaʼ maʼ gulee tuuxa guié ni daʼguʼ ruaa baʼ que ne zuba ti ángel lu guié que. Ángel que gudxi laacabe gúʼyacabe ndaaniʼ baʼ que ti gúʼyacabe guirutiʼ nuu ndaaniʼ ni. Óraque gúdxibe laacaʼ: «Qué guinni di be rarí purti ma bibani be» (Mat. 28:1-6). ¡Maʼ nabani Jesús!

10. Xi guiráʼ bizeeteʼ apóstol Pablu ni rusihuinni dxandíʼ maʼ biasa Jesús lade gueʼtuʼ.

¹⁰ Ni bizaaca lu cuarenta dxi que bisihuínnicani dxandíʼ maʼ biasa Jesús lade gueʼtuʼ. Lu primé carta ni bicaa apóstol Pablu ra nuu ca xpinni Cristu de Corinto guníʼ sicaríʼ: «Bisiide laatu ni biziideʼ. Ne ndi nga laani: guti Cristu para biaxa stonda nu, casi cá lu Xquiʼchi Dios aca ni. Bigaachi be ne bibani be rabionna gubidxa, casi cá lu Xquiʼchi Dios. Oraque uyé be ra nuu Pedru ne laca uyé be ra nuu irá ca apóstol. Laca uyé be ra nuu jma de gaayu gayuaa hermanu tobi si lugar. Stale de laaca nabani ru de yanna, ne xcaadxi de laaca ma guti. Ne uyé be ra nuu Jacobo ne óraque ra nuu irá ca apóstol. Naa zeda gaca casi baʼdu ni gule caʼru izaa xpeeu, purti de últimu bihuinni be ra nuaaʼ» (1 Cor. 15:3-8).

11. Ximodo biasa Jesús lade gueʼtuʼ casi na Stiidxaʼ Dios.

¹¹ Stiidxaʼ Dios rusihuinni dxandíʼ biasa Jesús lade gueʼtuʼ. Stiidxaʼ Dios maca bizeeteʼ ziasa Jesús lade gueʼtuʼ. David maca bizeeteʼ de ti binni ni «qué rusaana» Dios, qué ziaana diʼ «ndaaniʼ Seol», o baʼ. Biblia na: «Qué zusaanuʼ alma stinneʼ ndaaniʼ Seol. Qué zudiiluʼ lugar guuyaʼ tuuxa ni qué rusaana lii guiruyú» (Salmo 16:10). Tudé nga caniʼbe yaʼ. Lu Pentecostés ni guca iza 33 despué de ca dxi stiʼ Jesús, bisihuinni apóstol Pedru de Jesús ngue caníʼ, pur ca diidxaʼ riʼ: «Casi ñaca biiya [David] ra bibani Cristu ne uníʼ be qué ziaana di lade gueʼtuʼ ne qué ziuʼdxu cuerpu stiʼ» (Hech. 2:23-27, 31).

12. Tu guiráʼ biiyaʼ Jesús dxi biasa lade gueʼtuʼ.

¹² Stale binni biiyaʼ Jesús maʼ biasa lade gueʼtuʼ. Cuarenta dxi despué biasa Jesús lade gueʼtuʼ, bihuínnibe nezalú ca discípulo stibe ndaaniʼ jardín ra guyuu baʼ stibe, neza zécabe Emaús ne xcaadxi lugar (Luc. 24:13-15). Guyuu biaje guníʼnebe ti binni si —casi dxi guníʼnebe Pedru— ne xcaadxi biaje guníʼnebe stale binni. ¡Ti biaje bihuínnibe nezalú jma de gaayuʼ gayuaa binni! Cumu stale binni biiyaʼ laabe la? guirutiʼ zanda guiníʼ cadi dxandíʼ guiráʼ ni biiyaʼ.

13. Ximodo bisihuinni ca discípulo que nanna dxíchicaʼ maʼ biasa Jesús lade gueʼtuʼ.

¹³ Ca discípulo stiʼ Jesús guyuucaʼ seguru maʼ biásabe lade gueʼtuʼ. Stale discípulo guzanándacabe laacaʼ, bininácabe o dede biiticabe laacaʼ purtiʼ guniʼcaʼ maʼ bibani Jesús. Guietenaláʼdxinu guníʼ Pedru dxandíʼ maʼ biasa Jesús lade gueʼtuʼ nezalú ca xaíque yuʼduʼ ni nanalaʼdxiʼ Cristu ne gucaláʼdxicaʼ ñuuticaʼ laabe. Ñee niguu Pedru xquendanabani ra naxoo pa ñaca cadi dxandíʼ ni la? Cásica laabe ne xcaadxi discípulo que guyuucaʼ seguru nabani Jesús ne cayuuyaʼ dxiiñaʼ de guireeche diidxaʼ. Ra biásabe de lade gueʼtuʼ bisihuínnini laaca ziasa ca discípulo stibe lade gueʼtuʼ. Zacapeʼ nga  bizaaca né Esteban, neca guti nanna dxichi zabani sti biaje (Hech. 7:55-60).

14. Xi racané lii chuʼluʼ seguru dxandíʼ nabani Jesús.

¹⁴ Nápanu razón para guni crenu cayuni mandar Jesús casi Rey ne laa nga Xaíque stiʼ ca neza binni ridagulisaa. Ca dxi stinu riʼ, cadale ca xpinni Cristu. Ñee nidálecabe pa qué nibani Jesús la? Pa qué ñasa Jesús lade gueʼtuʼ zándaca qué ñuu dxi ñunadiáganu de laabe. Peru nápanu stale razón para chuʼnu seguru nabánibe ne zanírube lu dxiiñaʼ de guireeche diidxaʼ lu guidubi Guidxilayú.

15. Gánnanu biasa Jesús lade gueʼtuʼ, ximodo racaneni laanu gucheechenu diidxaʼ sin guidxíbinu.

¹⁵ Gánnanu biasa Jesús lade gueʼtuʼ racané ni laanu gucheechenu diidxaʼ sin guidxíbinu. Maʼ ziné ca xhenemigu Dios chupa mil iza de cayúnicaʼ stipa pur gucueezacaʼ dxiiñaʼ de guireeche ca diidxaʼ nacubi ne galán stiʼ Reinu. Huaquiiñecabe stale cosa para gucueezacabe dxiiñaʼ risaca riʼ: riníʼcabe mal de xquidxi Dios, runi búrlacabe, runinácabe, rucueezacabe laacaʼ de gucheechecaʼ diidxaʼ, riguíñecabe ne ruuticabe laacaʼ. Peru Biblia maca guníʼ: «Intiica guiibaʼ gúnicabe para gucaalúcabe lii, qué zabeendunedícabe ni gastiʼ» (Is. 54:17). Nga runi ca xpinni Binidxabaʼ qué ruchíbicaʼ laanu. Jesús maca guníʼ qué zusaana ca xpinni ne zacanebe laacaʼ (Mat. 28:20). ¡Qué gápanu nin ti razón para guidxíbinu! Intiica si gúnicabe, qué zucueezacabe laanu de gucheechenu diidxaʼ.

16, 17. 1) Ora biasa Jesús lade gueʼtuʼ, ximodo rusihuínnini dxandíʼ guiráʼ ni bisiidibe. 2) Casi na Juan 11:25, xi poder bidii Jiobá Jesús.

¹⁶ Ra biasa Jesús lade gueʼtuʼ rusihuínnini dxandíʼ guiráʼ ni bisiidibe. Apóstol Pablu guníʼ pa ñaca cadi dxandíʼ biasa Jesús lade gueʼtuʼ la? Qué nisaca diʼ fe stiʼ ca xpinni Cristu ne pur gana si nucheechenu diidxaʼ. Ti hombre ni rusiene de Biblia bicaa: «Pa qué ñasa Jesús lade gueʼtuʼ, [...] ca xpinni Cristu ñácacaʼ binni huati ni runi cré ni cadi dxandíʼ». Ne cani rieeteʼ lu ca Evangeliu ñácacani ti historia si stiʼ ti hombre nachaʼhuiʼ ne nuu xpiaaniʼ ni biiti ca xhenemigu laa. Peru dxandíʼ biasa Jesús lade gueʼtuʼ. Nga rusihuinni guiráʼ ni bisiidibe, dede cani guniʼbe zazaaca despué, dxandíʼ cani (biindaʼ 1 Corintios 15:14, 15, 20).

¹⁷ Jesús guníʼ: «Naa nga rusibane gueʼtuʼ, ne naa nga rudiee enda nabani. Tu guni cre naa la? neca ma guti zabani» (Juan 11:25). Ca diidxaʼ guniʼbe riʼ dxandíʼ zazaaca cani. Bidii Jiobá poder Jesús para gusibani cani chiguni mandarné laa guibáʼ ne zaqueca millón de binni ni chiguibani lu Guidxilayú riʼ sin qué chuʼ dxi gáticaʼ. Guendaguti stiʼ Jesús ne ora biasa lade gueʼtuʼ rusihuínnicani zaree guendaguti. Cadi dxandíʼ riguu ndiʼ gana laanu para guni huantarnu ca guendanagana guidxaagalunu, ne racaneni laanu para cadi guidxíbinu gátinu la?

18. Xidé zanda chuʼnu seguru ra gánnanu biasa Jesús lade gueʼtuʼ.

¹⁸ Ra biasa Jesús lade gueʼtuʼ racané ni laanu gánnanu zinanda Jiobá ca ley stiʼ para guni juzgar laanu. Guidúʼyanu xi gudxi Pablu ti grupu de binni ndaaniʼ guidxi Atenas. Laabe guniʼbe: «Ma gudixhe [Dios] ti dxi cuidxi be cuenta laacaʼ. Ma ulí be tobi hombre guni ni, ne zuni ni jneza. Bisihuinni be ulí be laa ra undisa be laa de lade gueʼtuʼ» (Hech. 17:31). Jesús nga Juez ni maʼ gulí Jiobá, nga runi zanda chuʼnu seguru zuni juzgarbe laanu jneza ne zusihuínnibe nadxiibe laanu. Biblia na: «Luguiabe ziuu espíritu stiʼ Jiobá, espíritu stiʼ guendanuuxpiaaniʼ ne  guendariene, espíritu stiʼ conseju ne stiʼ poder, espíritu stiʼ guendananna ne stiʼ guendaridxibi Jiobá; ne ziéchebe purtiʼ ridxíbibe Jiobá. Ne laabe qué zuni juzgarbe pur cani gúʼyasibe, qué zugaanidibe donda pur cani gunadiágasibe. Ne jneza zuni juzgarbe ca pobre né guendaruni jneza zulídxibe binni guidxilayú. Ne zuchéndabe vara ni nuu ruaabe ca lu guidxilayú; ne zuutibe binni malu né espíritu ni riree ruaabe» (Isaías 11:2-4).

19. Guni crenu biasa Jesús lade gueʼtuʼ, ximodo racané ni laanu.

¹⁹ Guni crenu biasa Jesús lade gueʼtuʼ rucaani laanu gúninu ni na Dios. Pa qué nudii Jesús xquendanabani pur laanu ne pa qué ñásabe lade gueʼtuʼ la? qué ñanda diʼ niládinu lu náʼ guendaruchee ne guendaguti (Rom. 5:12; 6:23). Zándaca laaca nininu casi riníʼ binni: «Laidóʼ ne laidéʼ, purti qué ganna nu pa nabani ru nu ixíʼ» (1 Cor. 15:32). Peru laanu qué ricá íquenu gúninu cani riuulaʼdxiʼ binni guidxilayú guni. Cumu nánnanu zandisaʼ Jiobá laanu de lade gueʼtuʼ la? nga runi naguixhe íquenu gúninu guiráʼ ni gábibe laanu.

20. Ra biasa Jesús lade gueʼtuʼ, ximodo bisihuínnini naca Jiobá ti Dios nandxóʼ.

²⁰ Ra biasa Jesús lade gueʼtuʼ bisihuínnini pabiáʼ nandxóʼ Jiobá, ne laaca riguube ndaayaʼ guiráʼ cani ruyubi laabe de guidubi ladxidóʼ (Heb. 11:6). Ñee huayuu dxi guiníʼ íquenu modo bisihuinni Jiobá nuu xpiaaniʼ ne napa poder ra bisibani Xiiñiʼ casi ti espíritu ni qué zati la? Ra biasa Jesús lade gueʼtuʼ bisihuínnini zanda guni Dios guiráʼ ni maʼ bizabiruaa. Jiobá maca guníʼ ziuu ti binni ni zuni ti dxiiñaʼ risaca ni zusihuinni laasibe nga nápabe derechu de guni mandarbe. Para gaca ni na ca diidxaʼ riʼ, napa xidé gatiʼ Jesús ne guiasa lade gueʼtuʼ (Gén. 3:15).

21. Xiñee risaca para lii gánnaluʼ zandisaʼ Dios cani maʼ guti.

²¹ ¡Guizáʼ rudiʼnu xquíxepeʼ Jiobá purtiʼ cayabi laanu zusibani cani maʼ guti! Apóstol Juan binadiaga ca diidxaʼ ni bizabiruaa Dios riʼ: «“Biiyaʼ, ma nabeza Dios lade binni. Laape be zabeza né be laacaʼ. Zaca ca xpinni be, ne laabe zaca be Dios sticaʼ. Zuchaa be nisa riete lú caʼ, ne ma qué ziuu ru enda guti nin enda ruuna nin enda racaná ladxidóʼ nin yuubaʼ, purti ma udiʼdi irá ni uyuu chiqué”. Oraque na ni zuba lu trono que: [...] “Dxandí irá diidxa riʼ, zanda guni cre lu ni”». Yanna, guiníʼ íquenu: tuu nga gudxi Juan ca diidxaʼ riʼ. ¡Laabe nga Jesucristu ni maʼ biasa lade gueʼtuʼ! (Apoc. 1:1; 21:3-5.)