TI GRUPU de hombrehuiiniʼ ne dxaapahuiiniʼ xpinni Cristu gudixhe íquecaʼ chiguuyacaʼ ti película. Stale de ca xcompañérucabe ni rinécabe scuela maʼ biiyacaʼ ni ne guyuuláʼdxicaʼ ni. Ora guyuucabe ra cine, biiyacabe lu cartel que cá caadxi binni ni naaze guiibaʼ ni rinécabe lu guerra ne cá caadxi gunaa ni nacu lari cadi jneza. Xi gúnicabe yaʼ. Ziaanacabe gúʼyacabe película que neca zaqué la?

Ejemplu riʼ rusihuinni ni guiranu ridxaagalunu xiixa cosa ni gusihuinni pa zaxélenu de Dios o pa coʼ ne pa zacané ni laanu gaca xhamígunu laabe o coʼ. Nuu biaje zándaca gacaláʼdxinu gúninu xiixa, peru ora guiníʼ ique chaahuinu ni ruchaʼnu modo guníʼ íquenu que. Ñee riníʼ nga qué ridxélanu xi gúninu la? o jneza nga guchaʼnu modo riníʼ íquenu.

Cumu nadxiinu Jiobá la? bicaani laanu gudiʼnu xquendanabáninu laa ne chuʼnísanu. Gúdxinu laabe qué ziuu dxi gusaananu laabe ne racaláʼdxinu gúninu ni maʼ bidii stiidxanu. Peru Binidxabaʼ, xhenemígunu, racalaʼdxiʼ gudxii déchenu Jiobá (Apoc. 12:17). Maʼ gudixhe íquenu gúninu xhiiñaʼ Jiobá ne chinándanu ca ley stibe; pa guchaʼnu modo riníʼ íquenu zándaca gueeda gátinu. ¡Aque triste nga xa!

Raca biaʼ chupa mil xhoopaʼ gayuaa iza, Nabucodonosor, rey stiʼ Babilonia, biʼniʼ ti bidóʼ naroʼbaʼ de oro ne biʼniʼ mandarbe guni adorar guiráʼ binni laa. Ne tu qué gúnini zulaacabe laa ndaaniʼ ti horno ni cá guí. Peru Sadrac, Mesac ne Abednego chonna hombrehuiiniʼ ni biʼniʼ adorar Jiobá gudixhe íquecaʼ guzuubacaʼ stiidxabe. Cumu qué nusuxíbicabe xañee bidóʼ que la? bilaacabe laacaʼ ndaaniʼ horno cacaguí que. Neca biʼniʼ Jiobá ti milagru para bilá laacabe, gudixhe íquecabe gáticabe para cadi gucheenécabe Dios (Dan. 3:1-27).

 Profeta Daniel laaca qué nuchaa modo guníʼ ique ne qué nusaana de ñuni adorar Dios ni dxandíʼ. Nánnabe pa gúʼyacabe laabe cayuni orarbe zulaacabe laabe ndaaniʼ ti bizé ra nuu caadxi lión. Neca zaqué, qué nusaana de ñuni orarbe Dios chonna biaje ti dxi cásica maca biaabe gúnibe ni. Cumu qué nusaanabe Jiobá la? bilá laabe ne maʼ qué ñuni ca lión que laabe gastiʼ (Dan. 6:1-27).

Ca xpinni Dios de ca dxi riʼ laaca maʼ gudixhe íquecaʼ gúnicaʼ ni na Jiobá sin gucheenecaʼ laabe. Ndaaniʼ ti scuela ni nuu África, qué niná ti grupu de testigu stiʼ Jiobá ñuni saludar bandera. Gúdxicabe laacaʼ zuni expulsárcabe laacaʼ pa qué gúnicaʼ ni casi runi ca xcompañérucaʼ. Qué nindaa, tobi de ca xaíque stiʼ scuela que yeganna guidxi que ne guniʼné chupa chonna de ca baʼduscuela ni naca Testigu, ne laacaʼ bisiénecaʼ laabe né stale respetu ne qué nidxíbicaʼ niniʼcaʼ xi pur qué runi saludarcaʼ bandera. Dede dxi que, ca xpinni Cristu qué huayápacaʼ guendanagana ne zanda checaʼ scuela sin chuʼ tu gabi laacaʼ gúnicaʼ xiixa para gucheenecaʼ Jiobá.

Guidúʼyanu ni bizaaca Joseph. Gupa xheelabe cáncer ne málasi guti. Familia stibe biʼniʼ respetarcaʼ modo naguíxhebe gucaachibe xheelabe. Peru familia stiʼ xheelabe cadi Testigu laacaʼ ne gucaláʼdxicaʼ ñúnicaʼ caadxi cosa ni qué riuulaʼdxiʼ Dios. Joseph guníʼ: «Cumu nánnacabe qué zudieeʼ lugar gúnicabe ni la? gucaláʼdxicabe nucaacabe ca xiiñeʼ ñuni ni nácabe, peru nin tobi de laacaʼ qué ninacaʼ. Familia stiʼ xheelaʼ que gucaláʼdxicaʼ ñúnicaʼ ti velorio ra lidxeʼ ne ñúnicaʼ ca costumbre sticaʼ. Gudxeʼ laacabe pa racaláʼdxicabe gúnicabe ni la? peru cadi ndaaniʼ lidxediáʼ. Nánnacabe gadxé ni runi crécabe ne gadxé ni runeʼ cré ne ni biʼniʼ cré xheelaʼ. Despué de gunidu de laani bíʼnicabe ni sti lugar.

«Ca dxi nagana ne naná que, gunabaʼ Jiobá gacané familia stinneʼ ne gacané naa para cadi gucheeniáʼ ca ley stiʼ. Bicaadiágabe ca oración stinneʼ ne gucanebe laadu para cadi gucheenedu laabe neca cucaalú ca binnilidxeʼ laadu.» Qué lica niníʼ ique Joseph nin ca xiiñiʼ nuchaacaʼ modo riníʼ íquecaʼ ne nucheenecaʼ Dios.

Qué nindaa de guca Pascua lu iza 32, dxi nuu Jesús Sidón bidxiña ti gunaa fenicia laabe ne qué nusaana de ninabaʼ laabe cueebe demonio luguiáʼ xiiñidxaapaʼ. Primé que, Jesús qué nicabi laabe ne gudxi ca discípulo stiʼ: «Ra nuu si cani za de Israel biseenda Bixhoze naa, purti cananiti ca casi dendxuʼ». Cumu qué nusaana gunaa que de ñabi laabe gusiándabe xiiñiʼ la? guniʼbe: «Cadi jneza gaxha cabe pan xiini cabe para gudii cabe biʼcuʼ». Peru gunaa que cumu napa stale fe la? bicabi laabe sicaríʼ: «Nanna, Señor, peru laca ro biʼcu bigú ni riaba xa mexa sti xpixuaanaʼ». Óraque bicaadiaga laabe ne bisianda xiiñidxaapabe (Mat. 15:21-28).

Ora biʼniʼ Jesús sicaríʼ, bisihuinni naca casi Jiobá, purtiʼ Jiobá ruchaa modo riníʼ ique ora nuu razón para guni ni. Guzéʼtenu ti ejemplu, dxi biʼniʼ ca israelita que ti yuzehuiiniʼ de oro, gudixhe ique Dios nunitilú laacabe peru bichaabe modo guníʼ íquebe despué de gunabaʼ Moisés laabe gutiidiláʼdxibe stonda guidxi que (Éx. 32:7-14).

Yenanda apóstol Pablu ejemplu stiʼ Jiobá ne Jesús. Ti tiempu guníʼ íquebe cadi jneza chinebe Juan Marcos lu ca viaje ni bíʼnibe casi misioneru, purtiʼ bisaana laabe ne Bernabé lu primé viaje bíʼnicabe. Peru despué biiyabe maʼ bichaa modo laa ne jma né gana cayuni xhiiñaʼ Dios. Ngue runi gúdxibe Timoteu: «Biyubi Marcu guedanéu ora gueeduʼ, purti zanda acané naa lu xhiiña Dios» (2 Tim. 4:11).

Laanu yaʼ. Zándaca nuu biaje naquiiñeʼ guchaʼnu modo riníʼ íquenu cásica runi Jiobá,  Dios ni qué ridxiichi nagueenda ne nadxii laanu. Casi nuu biaje zanda guchaʼnu modo riníʼ íquenu de sti binni. Pa Jiobá ne Jesús binni qué ruchee laacaʼ peru biʼniʼ cani la? laanu casi binni ruchee, ñee qué zanda guidúʼyanu modo nuu xcaadxi binni ne guchaʼnu modo riníʼ íquenu de laacaʼ pa caquiiñeʼ gúninu ni la?

Nuu biaje zándaca naquiiñeʼ guchaʼnu modo riníʼ íquenu de xiixa ni racaláʼdxinu ugaandanu ndaaniʼ xquidxi Dios. Nuu de cani ridúʼndanenu Biblia maʼ napa tiempu de riecaʼ ca guendaridagulisaa stinu peru caʼruʼ quixhe íquecaʼ chuʼnísacaʼ. Nuu de cani rucheeche diidxaʼ qué riguixhe íquecaʼ gácacaʼ precursor neca ñanda ñúnicaʼ ni. Ne nuu de ca xpinni Cristu qué rúnicaʼ stipa pur ugaandacaʼ xcaadxi dxiiñaʼ ra ridagulisaacaʼ (1 Tim. 3:1). Ñee nácaluʼ casi tobi de cani bizéʼtenu ca la? Bietenalaʼdxiʼ, cayuni invitar Jiobá lii ugaandaluʼ cani naguixhe íqueluʼ. Nga runi, xiñee qué guchaaluʼ modo riníʼ íqueluʼ ne gúniluʼ ni na Dios ne gacaneluʼ xcaadxi binni yaʼ.

Ti hermana ni láʼ Ella guníʼ de dxiiñaʼ ni runi Betel ni nuu África: «Ora yendayaʼ Betel qué gannaʼ pa ziaanaʼ raqué xadxí. Racaladxeʼ guneʼ xhiiñaʼ Jiobá de guidubi ladxiduáʼ, peru nabé ribanaʼ binnilidxeʼ. Dxi nacubi yendayaʼ nabé bibanaʼ laacabe... Peru xcompañeraʼ ni nabezaniáʼ ndaaniʼ tobi si cuartu nabé guluu gana naa ne gudixheʼ iqueʼ guiaanaʼ. Despué de chii iza de nuaaʼ Betel, maʼ gudixhe iqueʼ guiaanaʼ raríʼ biaʼ guneʼ huantar para gacaniáʼ ca hermanu stinneʼ».

Ñee rietenaláʼdxiluʼ ni bizaaca Caín ora gupa envidia biʼchiʼ ne guizáʼ bidxiichi la?  Jiobá biiyaʼ zucaa xiana que laabe gúnibe xiixa cosa malu, ngue runi gudxi laabe gucueezabe xiana stibe pa racaláʼdxibe gusiéchebe ladxidóʼ. Gudxi laabe zucheebe pa qué guchaabe modo riníʼ íquebe. Ñanda nuchaa Caín modo riníʼ ique, peru qué ninabe ninándabe conseju ni bidii Dios laabe. Ne pur ngue biitibe bíʼchibe ne beeda gácabe primé binni ni biiti (Gén. 4:2-8).

Ni bizaaca rey Uzías laaca rusiidiʼ ni laanu ti cosa nabé risaca. Neca gúcabe ti binni ni biʼniʼ ni jneza nezalú Jiobá ne guca xhamígube laa, despué bichabe bi yánnibe. Relatu ca na guyuube ndaaniʼ yuʼduʼ stiʼ Dios para guzaaquibe guʼxhuʼ, peru ca sacerdote si nga zanda guni dxiiñaʼ riʼ. Ne ora gúdxicabe laabe cadi gúnibe ni, qué ninabe nuchaabe modo riníʼ íquebe. Bidxiichibe ne qué nulábibe ni gúdxicabe laabe. Xi bizaaca pur ni bíʼnibe que yaʼ. Biʼniʼ castigar Jiobá laabe né lepra (2 Crón. 26:3-5, 16-20).

Ca ejemplu riʼ rusihuínnicani nuu biaje naquiiñeʼ guchaʼnu modo riníʼ íquenu. Guzéʼtenu ejemplu stiʼ Joachim, laa guyuunisa lu iza 1955 peru guca expulsarbe lu iza 1978. Jma de gande iza despué bisihuínnibe maʼ guca arrepentirbe ne bibiguetaʼ gúcabe testigu stiʼ Jiobá. Cadi xadxí, ti binnigola gunabadiidxaʼ laabe xiñee bindaa para bibiguétabe. Joachim bicabi: «Purtiʼ bidaaʼ xiana ne bichayaʼ bi yanneʼ. Nabé triste nga ni bineʼ purtiʼ bindaa para bichaaʼ modo naa. Biaʼ tiempu qué ñuaaʼ ndaaniʼ xquidxi Dios la? gunnaʼ ca Testigu nga cani rusiidiʼ ni dxandíʼ». Bidii Joachim cuenta naquiiñeʼ gaca arrepentir ne bichaa modo laa.

Ziuu biaje zándaca laaca naquiiñeʼ guchaʼnu modo riníʼ íquenu ne modo gúninu xiixa cosa. Nga runi, naquiiñeʼ gúninu ni para gusiéchenu ladxidóʼ Jiobá (Sal. 34:8).