GUY HOLLIS PIERCE, guyuu lade Grupu ni Zaniruʼ stiʼ ca Testigu stiʼ Jiobá, ne martes 18 stiʼ marzo 2014, bilúxebe xhiiñabe lu Guidxilayú riʼ, dxi nápabe 79 iza. Ne cumu gúcabe tobi de ca biʼchiʼ Cristu la? biásabe para chebe guibáʼ (Heb. 2:10-12; 1 Ped. 3:18).

Guy Pierce gule ndaaniʼ guidxi Auburn (California, Estados Unidos) 6 stiʼ noviembre 1934, ne guyuunísabe lu iza 1955. Bichaganabe lu iza 1977, ne Penny, xheelabe, ne bisiniisicabe chupa chonna xiiñicabe. Ngue runi bíʼyabe binni casi xiiñibe. Lu iza 1982, laabe ne Penny gúcacabe precursor. Despué, lu iza 1986, gúcacabe superintendente de circuito ndaaniʼ guidxi Estados Unidos ne bíʼnicabe dxiiñaʼ ca once iza.

Lu iza 1997 biʼniʼ invitárcabe hermanu Pierce ne xheelaʼ para chigúnicaʼ dxiiñaʼ Betel stiʼ Estados Unidos, ne raqué bíʼnibe dxiiñaʼ lu Departamentu de Serviciu. Ne lu iza 1998 gucanebe Comité ni Ruuyaʼ ca Binni ni Runi Dxiiñaʼ Betel stiʼ Grupu ni Zaniruʼ. Despué, 2 stiʼ octubre iza 1999, bieeteʼ lu ti guendaridagulisaa ni raca guiráʼ iza stiʼ Watch Tower Bible and Tract Society of Pennsylvania maʼ naca hermanu Pierce tobi de cani nuu lu Grupu ni Zaniruʼ. Lu ca últimu iza gudiʼdiʼ ca bíʼnibe dxiiñaʼ lu chupa chonna comité: ni Ruuyaʼ ca Binni ni Runi Dxiiñaʼ Betel, ni Ruuyaʼ xi Guicá lu ca Guiʼchiʼ Ricaanu, ni Ruuyaʼ Gaca ca Guiʼchiʼ ni Riquiiñenu ne ni Ruuyaʼ Dxiiñaʼ Runi Xcaadxi Comité.

Nisi maʼ cuxidxi huiinibe ne riuuláʼdxibe gusixídxibe binni, ngue runi binni de guiráʼ guidxi riuuláʼdxicaʼ chuʼcaʼ gaxha de laabe. Peru gunnaxhii binni laabe purtiʼ laaca gunnaxhiibe laacaʼ, qué nudxiibabe laca laabe, nabé biʼniʼ respetarbe ca ley ne ca principiu stiʼ Jiobá ne nabé gúpabe confianza Dios. Para hermanu Guy Pierce, jma biʼniʼ crebe zaca guiráʼ ni maʼ bizabiruaa Jiobá que guni crebe pa zaree Gubidxa, ne gucaláʼdxibe ñanna guiráʼ binni ni biʼniʼ crebe riʼ.

Nabé biʼniʼ hermanu Pierce xhiiñaʼ Jiobá. Siadóʼ guieʼruʼ riásabe ne stale biaje rúnibe dxiiñaʼ dede huaxhinni. Guyebe guiráʼ guidxi ni nuu lu Guidxilayú para cuʼbe gana ca xpinni Cristu, ne guleebe tiempu para guníʼnebe cani nuu Betel ne xcaadxi xpinni Cristu ni ruyubi gacanebe laacaʼ, o para si chúʼnebe laacaʼ ti ratu. Gúcabe ti hombre ni nabé gunna guidxaagalú binni, gúpabe xhamígube ne biquiiñebe Biblia para guluube gana ca xpinni Cristu. Qué ziuu dxi gusiaandaʼ ca binni ni binibiáʼ laabe cani bíʼnibe.

Nanna dxíchinu, guizáʼ zabanaʼ xheelabe laabe, ca xhoopaʼ xiiñibe, ca xhiágabe ne xiiñiʼ ca xhiágabe, ne guiráʼ cani gupa laabe casi bixhózecaʼ. Sábadu 22 stiʼ marzo 2014, hermanu Mark Sanderson, sti xpinni Cristu ni nuu lade Grupu ni Zaniruʼ, bidii ti libana dxi gútibe Betel stiʼ Brooklyn. Ne luni bizeetebe zié hermanu Pierce guibáʼ ne biindabe ca diidxaʼ guníʼ Jesús riʼ: «Nuu stale lugar ra chuʼ tu ralidxi Bixhozeʼ. [...] Ne ora ma uyaa ne ma bine chaahue ni la? zabigueta gueda caa laatu, ti ra chuaa la? laca chuʼ tu. Ma nanna tu paraa chaaʼ ne nanna tu neza» (Juan 14:2-4).

Guizáʼ zabánanu hermanu Pierce. Peru riéchenu ora gánnanu gúnnabe neza chebe ne raqué nga guiaanabe.