Huayuu caadxi Testigu ni caʼruʼ guichaganáʼ huaniʼcaʼ zacá. Peru nánnacabe racalaʼdxiʼ Jiobá guichaganácabe «ti xpinni Señor». Ni riníʼ ca diidxaʼ ca nga naquiiñeʼ guichagananu tuuxa ni naca testigu stiʼ Jiobá ni maʼ guyuunisa (1 Corintios 7:39). Xiñee riníʼ íquecabe zacá yaʼ.

Nuu tu riníʼ ique zacá purtiʼ jma stale hermana nuu que hermanu ni caʼruʼ guichaganáʼ. Ne dxandipeʼ zacá ni ndaaniʼ stale guidxi. Casi ndaaniʼ guidxi Corea la? lade 100 Testigu 57 nácacaʼ gunaa ne 43 de laacaʼ hombre. Ndaaniʼ guidxi Colombia, lade 100 Testigu 66 nácacaʼ gunaa ne 34 de laacaʼ hombre.

Ndaaniʼ caadxi guidxi napa binni costumbre gudii hombre bueltu o regalu bixhoze ne jñaa novia para guichaganácabe. Ne pa cadi Testigu bixhoze ne jñaa novia ca la? zándaca guinábacaʼ stale bueltu o regalu nabé risaca. Peru stale hermanu qué zanda gudiicaʼ ni. Nga runi, ndaaniʼ ca guidxi ca nuu hermana riníʼ íquecaʼ qué zanda guichaganacaʼ ti Testigu. *

Pa huayuni sentirluʼ zacá la? gunna nanna Jiobá xi cayácaluʼ (2 Crónicas 6:29, 30).

 Neca zacá, Jiobá racalaʼdxiʼ guichagananu ti xpinni si. Xiñee yaʼ. Purtiʼ nánnabe xii nga ni jma jneza para laanu ne racaláʼdxibe gápabe laanu. Qué racaláʼdxibe gúninu xiixa ni guniná laanu. Casi dxi bibani profeta Nehemías, stale judíu bichaganacaʼ gunaa ni qué runi ni na Jiobá. Ngue runi, bisietenalaʼdxiʼ Nehemías laacabe xi bizaaca rey Salomón. Gúdxibe laacaʼ gunnaxhii Dios Salomón ne bíʼnibe laa rey stiʼ guidxi Israel. Peru laa bichaganáʼ ca gunaa ni qué runi ni na Jiobá, ne bicaacaʼ laabe gucheebe (Nehemías 13:23-26). Jiobá racalaʼdxiʼ guibáninu galán. Nga runi, cayábibe ca xpinni Cristu guichaganacaʼ ca binni si ni runi ni nabe (Salmo 19:7-10; Isaías 48:17, 18). Nánnanu napa Jiobá derechu para gabi laanu xi gúninu ne xi cadi naquiiñeʼ gúninu. Ne rudiʼnu xquíxepeʼ laabe purtiʼ ca conseju rudiibe laanu rusihuinni cani nadxiibe laanu ne racaláʼdxibe chuʼnu galán (Proverbios 1:5).

Pa lii guichaganaluʼ tuuxa ni cadi nadxii Jiobá, zándaca guxhélebe lii de laa. Nánnadu qué racaláʼdxiluʼ guizaaca nga (2 Corintios 6:14). Bietenalaʼdxiʼ, guiráʼ ca conseju stiʼ Jiobá racanécani laanu guibáninu galán. Stale xpinni Cristu ni nabani yanna huaguixhe íquecaʼ gúnicaʼ ni na Jiobá ne huayúnicaʼ ni na conseju riʼ. Peru xcaadxi qué huazuubacaʼ diidxaʼ.

Ti hermana de Australia ni láʼ Maggy bizulú binibiáʼ tuuxa ni cadi naca Testigu. * Laabe guniʼbe biaadxabe stale guendaridagulisaa para ganda guireenebe hombre que. Nin qué nindaa bixélebe de Jiobá. Sti baʼdudxaapaʼ de guidxi India ni láʼ Ratana bizulú binibiáʼ ti hombrehuiiniʼ ni rizané scuela. Hombrehuiiniʼ riʼ bizulú biindaʼ Biblia para ganda chuʼ gaxha de laabe. Despué bisaanabe de gúnibe ni na Jiobá ne bidxaabe de religión para ganda guichaganabe hombrehuiiniʼ que.

Ti hermana de Camerún bichaganáʼ ti hombre ni cadi naca Testigu dxi napa 19 iza. Hombre que gudxi laabe qué zuxheleʼ laabe de religión stibe. Peru chupa semana despué de bichaganácabe gudxi hombre que laabe maʼ qué lica zanda chebe guendaridagulisaa. Laabe guniʼbe biʼniʼ sentirbe nuube stúbibe ne guiráʼ dxi ruunabe. Óraque bidiibe cuenta maʼ gastiʼ zanda gúnibe para guchaabe modo nabánibe. Ne guiráʼ dxi ruchiiñaʼ xquendabiaanibe laabe purtiʼ maʼ bicheebe.

Dxandíʼ, zándaca guidxélaluʼ ti binni nachaʼhuiʼ ni cadi naca Testigu. Peru pa guichaganaluʼ laabe, ñee raʼbuʼ qué zaxéleluʼ de Jiobá la? Ximodo zuni sentirluʼ purtiʼ qué ninándaluʼ conseju bidii Jiobá lii para guibániluʼ galán. Ne ni jma risaca, ximodo raʼbuʼ zuni sentir Jiobá (Proverbios 1:33).

Stale hermanu rinándacaʼ ni na conseju stiʼ Jiobá ne richaganacaʼ ti xpinni Cristu si. Laacabe nánnacabe nga nga ni jma jneza gúnicabe. Ne laaca riuuláʼdxicabe gusiéchecabe ladxidóʼ Jiobá. Guzéʼtenu ti ejemplu. Ti hermana de Japón ni láʼ Michiko bidxaagalú ti guendanagana, purtiʼ laabe nánnabe naquiiñeʼ guzuubabe stiidxaʼ Dios, peru ca binnilídxibe racaláʼdxicaʼ guichaganabe ti hombre ni cadi naca Testigu. Ne laaca biiyabe cachaganáʼ ca xhamígube lade ca xpinni Cristu peru laabe cayaanabe stúbibe. Nabé gúcani nagana para laabe. Peru ni gucané laabe nga guietenaláʼdxibe cadi caquiiñeʼ guichaganabe para guibánibe nayecheʼ. Ni jma risaca nga gúnibe ni na Jiobá, Dios ni nayecheʼ (1 Timoteo 1:11). Laaca nánnabe rudii Jiobá laanu ni riuuláʼdxinu. Nga runi, laabe nabe pa racalaʼdxiʼ tuuxa guichaganáʼ peru qué guidxela ti binni ni runi ni na Jiobá la? jma galán cueza dede guidxela ti xpinni Cristu. Despué bichaganáʼ Michiko ti Testigu ne yanna nuube nayecheʼ purtiʼ bizuubabe stiidxaʼ Jiobá.

Laaca nuu hermanu ni caʼruʼ guichaganáʼ purtiʼ cabeza guidxela ti binni biáʼsipeʼ para laa. Guzéʼtenu ti ejemplu. Ti hermanu de Australia ni láʼ Bill guníʼ nuu biaje guyuulaʼdxiʼ gunaa ni cadi naca Testigu. Peru qué ñúnibe xiixa  ni nusihuinni racaláʼdxibe gaca xnóviabe tuuxa ni cadi Testigu. Despué guyuulaʼdxiʼ Bill caadxi hermana, peru ca hermana riʼ qué nulábicaʼ laabe. Gupa xidé guleza Bill 30 iza para bidxelaʼ ti hermana ni naguixhe ique guni cani naguixhe íquebe. Riníʼ íquebe biaʼsi nga ni bíʼnibe pur gulézabe. Nabaninebe xheelabe nayecheʼ purtiʼ rucheechecabe diidxaʼ juntu, ruundacabe Biblia ne rúnicabe ni na Jiobá. Ne laaca riuube nayecheʼ ora maʼ nuunebe ca xhamigu xheelabe purtiʼ laaca rúnicaʼ ni na Jiobá. Laabe nabe jma galán ribaniné binni xheelaʼ ora rinándacaʼ ca conseju stiʼ Biblia.

Pa caʼruʼ guichaganaluʼ purtiʼ racaláʼdxiluʼ guzuubaluʼ stiidxaʼ Jiobá, xi zanda gúniluʼ para cadi guireeluʼ gana. Zanda guiníʼ íqueluʼ guizáʼ nayecheʼ riuu Jiobá ora guʼyaʼ cuzuubaluʼ stiidxaʼ (1 Samuel 15:22; Proverbios 27:11). Laaca zanda guni orarluʼ para gábiluʼ laabe xi runi sentirluʼ (Salmo 62:8). Ne ziuuluʼ jma gaxha de Jiobá pa gúniluʼ stipa pur gúniluʼ ni jneza ne cadi guiníʼ íqueluʼ cosa malu. Bietenalaʼdxiʼ nabé risácaluʼ para laabe. Ne naquiiñeʼ gánnaluʼ nanna Jiobá xi caquiiñeluʼ. Qué zudiibe lii ti xheelaluʼ, peru pa ngapeʼ nga ni caquiiñeluʼ la? nánnabe ximodo gacanebe lii (Salmo 145:16; Mateo 6:32).

Zándaca ziuu biaje zuni sentirluʼ casi David. Ti dxi nuube triste gunábabe gacané Jiobá laabe nagueendaca purtiʼ maʼ huaxiéʼ stipa nápabe (Salmo 143:5-7, 10). Cadi guireeluʼ gana. Guleza dede ora guicabi Jiobá oración stiluʼ. Biindaʼ Biblia ne guníʼ ique ni cayuundaluʼ. Zacatiʼ zannuʼ xi canabaʼ Jiobá gúniluʼ ne laaca zannuʼ ximodo gucanebe ca xpínnibe ni bibani dxiqué. Pa gúniluʼ nga, jma zuni creluʼ laabe ne zuzuubaluʼ stiidxabe.

Xiruʼ zanda gúniluʼ laga cabézaluʼ yaʼ. Zanda gúniluʼ stipa pur jma gaca xhamíguluʼ Jiobá ne gunibiáʼ binni lii ruzuubaluʼ stiidxabe. Laaca biʼniʼ stipa para guidxaagaluʼ xcaadxi xpinni Cristu, gacaneluʼ xcaadxi binni, guʼnuʼ xhiiñaʼ Jiobá ne guzuubaluʼ stiidxaʼ. Ca ndiʼ nga zacané lii guibániluʼ nayecheʼ ora guichaganaluʼ (Génesis 24:16-21; Rut 1:16, 17; 2:6, 7, 11; Proverbios 31:10-27). Cadi gusaana de gucheecheluʼ diidxaʼ ne de gúniluʼ dxiiñaʼ ndaaniʼ neza binni ridagulisaa stiluʼ. Nga zacané lii quixhe íqueluʼ gúniluʼ ni jneza. Ne ngapeʼ biʼniʼ Bill. Cumu gudixhe íquebe gácabe precursor la? nagueenda gudiʼdiʼ ca iza guyuube stúbibe.

Zanda guzúʼbanu stiidxaʼ Jiobá ne guichagananu ti xpinni si Señor. Pa quixhe íquenu guichagananu ti Testigu, zusisácanu Dios ne zabáninu nayecheʼ. Biblia na pa guzuubaʼ binni stiidxaʼ Jiobá de guidubi ladxidóʼ, qué ziuu dxi gusaana de guibani nayecheʼ (Salmo 112:1, 3). Nga runi, qué chuʼ dxi guiaandaʼ lii chinándaluʼ mandatu stiʼ Jiobá de guichaganaluʼ «ti xpinni Señor».