1-3. Xiñee guyuu Pablu seguru zanda gapa confianza Jiobá yaʼ. (Biiyaʼ dibuju ni zeeda ra ruzulú tema riʼ.)

CA XPINNI Cristu de Roma ni bibani lu primé siglu nabé nagana modo bibánicaʼ. Nabé guzananda ca romanu que laacabe. Guníʼcabe nanalaʼdxiʼ ca xpinni Cristu que binni ne nácabe laacaʼ bicaaguicaʼ guidxi que. Biseguyoocabe stale xpinni Cristu, ne chupa chonna de laacaʼ bilaacabe laacaʼ ra nuu ca maniʼ duxhuʼ para gó laacaʼ. Ne xcaadxi bicaacabe laacaʼ lu yaga ne bizaaquicabe laacaʼ nabani nabánicaʼ para guzaanicaʼ guidxi que huaxhinni. Ca xpinni Cristu que gúnnacaʼ zanda guizaacacaʼ zaqueca.

² Ca dxi que nga biseguyoo ca romanu apóstol Pablu. Zándaca guníʼ íquebe pa zacané xcaadxi xpinni Cristu laabe. Xiñee yaʼ. Purtiʼ ti biaje gúpabe ti guendanagana nabé nadipaʼ ne guirutiʼ ñacané laabe. Peru Pablu guníʼ gucané Jiobá laa ra biquiiñeʼ Jesús gudii stipa laabe. Dede guniʼbe casi ñaca bilá Dios laabe «de ruaa lion» (2 Timoteo 4:16, 17). *

 ³ Bietenalaʼdxiʼ Pablu modo gucané Jiobá laa dxiqué, ngue runi gúpabe confianza zanda gacané Jiobá laabe. Nánnabe zudii Jiobá laabe stipa para guni huantarbe guendanagana que ne intiica guendanagana ni gápabe despué. Nga runi guniʼbe zulá Señor laabe de intiica guendanagana ni gápabe (2 Timoteo 4:18). Nánnabe neca qué gacané ca hermanu laabe, Jiobá ne Jesús qué zusaanacaʼ de gacanecaʼ laabe.

4, 5. 1) Tu laa qué zusaana de gacané laanu. 2) Xi zanda gúniluʼ para ganda gaca xhamíguluʼ Jiobá jma.

⁴ Ñee huayápaluʼ xiixa guendanagana nabé nadipaʼ ne biʼniʼ sentirluʼ nuuluʼ stúbiluʼ la? Zándaca binítiluʼ dxiiñaʼ stiluʼ o gúpaluʼ xiixa guendanagana ra scuela. Zándaca guca huaraluʼ o gúpaluʼ sti clase guendanagana. Zándaca guyuuluʼ triste ora bíʼyaluʼ guirutiʼ ñacané lii. Dxandíʼ, chupa chonna guendanagana ni rapa binni nabé nadipaʼ cani ne qué randa runi chaahuiʼ cani. Xi zanda gúniluʼ yaʼ. Biblia cayabi laanu gápanu confianza Jiobá (Proverbios 3:5, 6). Ñee zanda gápanu confianza laabe la? ¡Zanda pue! Lu Biblia zeeda stale historia ni racané laanu gánnanu dxandíʼ racané Jiobá ca xpinni.

⁵ Pa nápaluʼ ti guendanagana ne guirutiʼ cayacané lii, cadi guizaaláʼdxiluʼ. Biʼniʼ casi biʼniʼ Pablu ne biiyaʼ ximodo zacané guendanagana ca lii gápaluʼ confianza Jiobá de guidubi ladxidoʼloʼ. Ne laaca zanda gacané guendanagana ca lii para gudiiluʼ cuenta ximodo rapa Jiobá lii. Nga zacané lii para jma gápaluʼ confianza Jiobá ne gaca xhamíguluʼ laabe jma.

6. Ora gápanu ti guendanagana nabé nadipaʼ, xiñee ziuu biaje zaca nagana para laanu gápanu confianza Jiobá.

⁶ Guníʼ ique nápaluʼ ti guendanagana nabé nadipaʼ ne nabé nuuluʼ xizaa. Maʼ bíʼniluʼ guiráʼ ni nuu lu naluʼ para guni chaahuiluʼ ni ne maʼ gunábaluʼ Jiobá gacané lii. Pa maʼ bíʼniluʼ cani, zanda gatadxí ladxidoʼloʼ ne zanda gápaluʼ confianza zacané Dios lii. Biblia na: «Guidxi, biʼniʼ cré laabe guiráʼ hora. Laguiníʼ guiráʼ ni nuu ndaaniʼ ladxidoʼto nezalube. Ra nuu Dios nga zanda guilanu» (Salmo 62:8 ne biindaʼ 1 Pedro 5:7). Pa racaláʼdxiluʼ gápaluʼ Jiobá casi ti binni ni dxandíʼ xhamíguluʼ, naquiiñeʼ gápaluʼ confianza laabe. Dxandíʼ, nuu biaje nagana gúninu ni. Xiñee yaʼ. Ti razón nga purtiʼ cadi guiráʼ diʼ biaje ricabi Jiobá ca oración ca nagueendaca (Salmo 13:1, 2; 74:10; 89:46; 90:13; Habacuc 1:2).

7. Xiñee cadi guiráʼ diʼ biaje ricabi Jiobá ca oración stinu nagueendaca.

⁷ Xiñee cadi guiráʼ diʼ biaje ricabi Jiobá oración stinu nagueendaca. Para ganda guiéneluʼ ni la? bietenalaʼdxiʼ lu Biblia rieeteʼ zeeda gaca Jiobá casi bixhózenu ne laanu nga xiiñibe (Salmo 103:13). Cadi guiráʼ diʼ biaje rudii binni guiráʼ ni guinabaʼ xiiñiʼ laa. Ne ora rudiicabe laacaʼ xiixa, qué rúnicabe ni nagueendaca. Nuu biaje rinabaʼ ca xcuidi ca xiixa cosa peru despué maʼ qué racaláʼdxicaʼ ni. Ne laaca nánnacaʼ zanda guniná xiixa ni guinabaʼ xcuidi ca laa o guniná ni sti binni. Pa guiráʼ biaje nudiicabe guiráʼ ni ninabaʼ xiiñicabe laacabe nagueendaca, ñeeda gácacabe casi mozo stiʼ ca xiiñicabe. Peru nánnacabe xi caquiiñeʼ ca xiiñicabe ne pora nga jma galán gudiicabe ni laacaʼ. Zacaca  nga rizaaca né Jiobá. Nadxiibe laanu, nánnabe xi caquiiñenu ne pora nga jma galán gudiibe ni laanu. Nga runi naquiiñeʼ cuézanu ne guidúʼyanu ximodo ricabi Jiobá ca oración stinu (zadxélaluʼ sti ejemplu casi laani lu Isaías 29:16 ne 45:9).

8. Xi cayabi Jiobá laanu.

⁸ Cadi guiaandaʼ lii nanna Jiobá pabiáʼ zanda guni huantar cada tobi de laanu (Salmo 103:14). Qué rusaana de gudiibe laanu stipa ni caquiiñenu. Zándaca ziuu biaje zuni sentirnu cará stipa stinu. Peru Jiobá na pa nápanu ti guendanagana nabé nadipaʼ la? laabe zacanebe laanu guni huantarnu (biindaʼ 1 Corintios 10:13). Nanna Jiobá xi guiráʼ zanda guni huantarnu ne nga riguixhe dxi ladxidoʼno.

9. Xi naquiiñeʼ gúniluʼ pa qué ricabi Jiobá oración stiluʼ nagueendaca.

⁹ Pa Jiobá cadi cacabi ca oración stiluʼ nagueendaca, cadi guireeluʼ gana. Cadi guiaandaʼ lii racaláʼdxibe gacanebe laanu, peru rúnibe ni órapeʼ jma caquiiñenu ni. Biblia na nachaʼhuiʼ Jiobá, ngue runi ribézabe né paciencia para gacanebe laanu ne rusihuínnibe riabe laanu. Ne laaca nani nayecheʼ riuu cani napa confianza laabe (Isaías 30:18).

10-12. 1) Xiñee nagana nga gapa tuuxa ti binnilidxi ni huará. 2) Ora nápanu ti guendanagana ne nápanu confianza Jiobá, ximodo riuʼnu jma gaxha de laabe. Bizeeteʼ ti ejemplu.

¹⁰ Lu párrafo 2 que bidúʼyanu «casi ñaca bilá [Pablu] de ruaa lion» (2 Timoteo 4:17). Xi naquiiñeʼ gúniluʼ pa huayápaluʼ xiixa guendanagana nabé nadipaʼ ne biʼniʼ sentirluʼ casi biʼniʼ sentir Pablu yaʼ. Nabé risaca nga gápaluʼ confianza Jiobá. Guzéʼtenu ti ejemplu, ñee cayápaluʼ tuuxa binnilídxiluʼ ni huará la? Pa zacá ni, zándaca rinábaluʼ Jiobá gudii stipa lii ne gacané lii quixhe íqueluʼ gúniluʼ ni jneza. * Zanda gatadxí ladxidoʼloʼ purtiʼ nánnaluʼ riene Jiobá ni cazaacaluʼ. Nánnaluʼ zacanebe lii guni huantarluʼ ne cadi gucheeluʼ (Salmo 32:8).

¹¹ Peru ziuu biaje zuni sentirluʼ cadi cayacané Jiobá lii. Zándaca gadxé gadxé ni guiníʼ ca doctor ca de modo guni tendercaʼ ti binnilídxiluʼ ni huará. O zándaca gulézaluʼ niguixhedxí binnilídxiluʼ ladxidoʼloʼ, peru laga bisiroobacaʼ guendanagana stiluʼ. Pa zacá ni, cadi gusaanaluʼ de guinábaluʼ Jiobá gudii stipa lii ne cadi gusaanaluʼ de guidxíñaluʼ laa. Biblia na: «Ora yendá David ne ca hombre stiʼ ndaaniʼ guidxi que maʼ bicaaguícabe ni, ne xheelacabe ne ca xiiñicabe ne ca xiiñidxaapacabe yenécabe laacaʼ casi esclavu. Ne pur ngue nabé naná guyuu ladxidóʼ David, purtiʼ ca binni que guniʼcaʼ guchacaʼ guié laabe; nabé cadxiichi guiráʼ binni que, cada tobi pur ca xiiñicaʼ ne ca xiiñidxaapacaʼ. Ngue runi gunábabe Jiobá, Dios stibe, gudii stipa laabe» (1 Samuel 30:3, 6). Ne ora gúʼyaluʼ ximodo huayacané Jiobá lii, jma zaca xhamíguluʼ laabe.

¹² Guidúʼyanu ejemplu stiʼ ti hermana láʼ Linda. * Stale iza gúpabe jñaabe ne bixhózebe ante gáticaʼ. Laabe, xheelabe ne bizáʼnabe stale biaje maʼ qué nidxélacabe xiruʼ zanda gúnicabe. Guyuu biaje biʼniʼ sentírcabe maʼ qué zanda guni huantárcabe. Peru yanna ruuyaʼ dxíchicabe ximodo gucané Jiobá laacabe para biʼniʼ huantárcabe. Nanna dxíchibe Jiobá nga bidii stipa ni biquiiñecabe, jmaruʼ si ora biiyacabe qué zanda gaca chaahuiʼ guendanagana stícabe.

13. Ra gupa Rosa confianza Jiobá, ximodo gucané ni laa.

 ¹³ Pa de guidubi ladxidoʼno gápanu confianza Jiobá, zacanebe laanu guni huantarnu ora guizaacanu xiixa desgracia. Nga nga ni bizaaca ti hermana ni láʼ Rosa. Xheelabe cadi naca Testigu ne cayaca divorciar de laabe. Ne ca dxi queca bihuinni napa ti bizáʼnabe ti guendahuará nabé malu. Ne chupa chonna beeu despué guti xheelaʼ bizáʼnabe. Nabé naná guca ndiʼ para Rosa. Guyuusibe caadxi galán la? gúcabe precursora regular. Peru beeda gati jñaabe. Xi gucané laabe guni huantarbe guiráʼ ni gudíʼdibe que yaʼ. Biʼniʼ orarbe Jiobá guiráʼ dxi, neca para gábisibe laa ca cosa nahuiiniʼ ni naguixhe íquebe gúnibe. Laabe guniʼbe beeda gaca Jiobá ti binni ni dxandíʼ xhamígube. Laaca guniʼbe biziidibe gápabe confianza Jiobá lugar de gápabe confianza laca laabe o sti binni. Rosa biʼniʼ sentir dxandíʼ cayacané Jiobá laa, purtiʼ bidii laabe guiráʼ ni biquiiñebe. Biʼniʼ sentirbe tobi si cayuninebe Jiobá dxiiñaʼ.

14. Ximodo zanda gacané Jiobá lii pa guiree ti binnilídxiluʼ ndaaniʼ xquidxi Dios.

¹⁴ Guzéʼtenu de sti guendanagana nabé nadipaʼ. Zándaca guleecabe ndaaniʼ xquidxi Dios ti binnilídxiluʼ. Lii nánnaluʼ Biblia na cadi naquiiñeʼ guinínenu cani maʼ biree ndaaniʼ xquidxi Dios (1 Corintios 5:11; 2 Juan 10). Peru cumu nabé nadxiiluʼ binnilídxiluʼ la? zándaca gaca nagana para lii guzuubaluʼ diidxaʼ. Ximodo zanda gacané Jiobá lii yaʼ. Zudiibe stipa ni caquiiñeluʼ para cadi gucheeneluʼ laabe ne guzuubaluʼ diidxaʼ. Gupa confianza Jiobá ne biiyaʼ ximodo zacané ca guendanagana stiluʼ lii para guidxíñaluʼ jma gaxha de laabe.

15. Xiñee qué nuzuubaʼ Adán stiidxaʼ Jiobá.

 ¹⁵ Zanda guchaaganu guendanagana riʼ né ni biʼniʼ Adán. Xiñee gudobe cuananaxhi ni bidii Eva laabe que yaʼ. Cadi bíʼnibe ni purtiʼ guníʼ íquebe zanda gucheenebe Dios ne guibánirube. Biblia na «cadi Adán di bisiguii binidxabaʼ» (1 Timoteo 2:14). Yanna, xiñee bíʼnibe ni na xheelabe ne qué nuzuubabe stiidxaʼ Jiobá yaʼ. Purtiʼ gunnaxhiibe xheelabe jma que Jiobá (Génesis 3:6, 17). Xi rusiidiʼ ndiʼ laanu yaʼ.

16. Tuu nga naquiiñeʼ gannaxhiinu jma. Xiñee yaʼ.

¹⁶ Ni biʼniʼ Adán rusiidiʼ ni laanu jma naquiiñeʼ gannaxhiinu Jiobá que sti binni (biindaʼ Mateo 22:37, 38). Xiñee yaʼ. Purtiʼ nga nga ni jma zanda gacané binnilídxinu, pa nácacaʼ xpinni Jiobá o pa coʼ. Nga runi, biʼniʼ stipa pur gannaxhiiluʼ Jiobá ne gápaluʼ confianza laa jma ra zidiʼdiʼ dxi. Pa nuuluʼ xizaa de tuuxa binnilídxiluʼ ni maʼ guca expulsar, gudxi Jiobá xi runi sentirluʼ (Romanos 12:12; Filipenses 4:6, 7). * Neca nabé triste chuʼluʼ pur guendanagana cadxaagaluluʼ, biiyaʼ ni casi ti cosa ni zanda gacané lii gaca xhamíguluʼ Jiobá jma. Zacá jma zápaluʼ confianza laabe ne zánnaluʼ pa guzuubaluʼ stiidxabe, jma jneza zaree guiráʼ ni gúniluʼ.

17. Xidé zanda chuʼnu seguru pa qué gusaana de gucheechenu diidxaʼ.

¹⁷ Xiñee bilá Jiobá Pablu «de ruaa lion» yaʼ. Pablu guníʼ bilá Dios laa ti ganda gucheecheruʼ diidxaʼ ne guiluxe dxiiñaʼ ni bidiibe laa (2 Timoteo 4:17). Laaca maʼ bidii Jiobá laanu dxiiñaʼ de gucheechenu diidxaʼ. Ruuyabe laanu casi binni ni runinebe dxiiñaʼ (1 Corintios 3:9; 1 Tesalonicenses 2:4). Pa qué gusaananu de gucheechenu diidxaʼ, zanda chuʼnu seguru zudii Jiobá laanu guiráʼ ni caquiiñenu (Mateo 6:33). Ne qué zaca nagana para laanu cuézanu guicábibe ca oración stinu.

18. Xi zanda gúninu para gaca xhamígunu Jiobá jma ne gápanu confianza laa jma.

¹⁸ Biʼniʼ stipa guiráʼ dxi pur gaca xhamíguluʼ Jiobá jma. Ora gápaluʼ xiixa guendanagana nabé nadipaʼ la? biiyaʼ ni casi ti cosa ni zacané lii chuʼluʼ jma gaxha de Jiobá. Biindaʼ Biblia ne gulee tiempu para guiníʼ íqueluʼ ni cayuundaluʼ. Cadi gusaana de guni orarluʼ ne cadi gusaana de gúniluʼ xhiiñaʼ Jiobá. Pa gúniluʼ cani, zanda gápaluʼ confianza zacané Jiobá lii lu ca guendanagana ni gápaluʼ yanna ne cani guidxaagaluluʼ despué.