Ximodo gusiidiluʼ xcaadxi hermanu
«Irá ni biʼyu bisiide binni, bisiidi ni cani nannu zanda usiidi ni stobi.» (2 TIMOTEO 2:2)
1. 1) Xi nanna ca xpinni Dios. 2) Xiñee nabé risaca ni para laanu ca dxi riʼ yaʼ. 3) Xi zadúʼyanu lu tema riʼ.
CA XPINNI Jiobá nánnacaʼ galán riree xiixa cosa ni cayúnicaʼ ora maʼ biziidiʼ chaahuicaʼ modo gúnicaʼ ni. Guzéʼtenu ti ejemplu, dxi gudindené Abrahán ca xhenemigu yené ca hombre ni maʼ biziidiʼ tinde ne zaqué gunda bilabe Lot (Génesis 14:14-16). Ca dxi bibani David guyuu binni ni maʼ biziidiʼ guundaʼ para gusisaca Jiobá (1 Crónicas 25:7). Xiñee risaca ndiʼ para laanu ca dxi riʼ yaʼ. Primé, purtiʼ napa xidé tindenenu Binidxabaʼ ne guidxilayú stiʼ (Efesios 6:11-13). Guiropa, purtiʼ naquiiñeʼ gúninu stipa pur gusisácanu Jiobá ora rininu de laa nezalú binni (Hebreos 13:15,16). Cásica ca xpinni Dios de dxiqué, laanu laaca naquiiñeʼ guizíʼdinu ti ganda guibáninu galán. Ra ridagulisaanu, maʼ bidii Jiobá ti dxiiñaʼ ca binnigola de gusiidicaʼ xcaadxi hermanu (2 Timoteo 2:2). Lu tema riʼ zadúʼyanu caadxi de ca cosa ni huayuni caadxi hermanu.
GUCANÉ HERMANU CA JMA GANNAXHII JIOBÁ
2. Xi zanda guni ti binnigola ora chigusiidiʼ ti hermanu, ne xiñee.
2 Zeeda gaca ti binnigola casi ti binni ni runi dxiiñaʼ layú. Ante gudxiibabe biidxiʼ stibe zándaca riguube abono layú que ti zacá guiniisi ca yagahuiiniʼ ca galán. Zacaca nga ora chigusiidiʼ ti binnigola tuuxa hermanu, zanda guʼndané laabe chupa chonna textu stiʼ Biblia. Xiñee yaʼ. Purtiʼ zacá zacané binnigola ca laabe gúnibe guiráʼ ni guiziidibe despué (1 Timoteo 4:6).
3. 1) Ximodo zanda iquiiñeʼ ti binnigola Marcos 12:29, 30 ora guiniʼné ti hermanu. 2) Xi zándaca guizaaca ora gunadiaga hermanu ca guni orar binnigola ca pur laa.
3 Pa nácaluʼ binnigola ra ridagulisaaluʼ, galán gánnaluʼ ximodo cayacané ni caziidiʼ ti hermanu laa para guiníʼ ique jneza ne ximodo runi sentir. Para gánnaluʼ ni, zanda gúʼndaneluʼ laabe Marcos 12:29, 30 (biindaʼ ni). De racá gunabadiidxaʼ laabe, ra bidiibe laabe Jiobá, ximodo huayacané ni laabe lu cani riguixhe íquebe gúnibe. Guendarinabadiidxaʼ riʼ zanda gucaani laabe guiniʼbe ximodo zanda gúnibe xhiiñaʼ Jiobá de guidubi ladxidoʼbe. Laaca zanda guni orárneluʼ laabe ne guinábaluʼ Jiobá gudii laabe espíritu santu stiʼ para ganda gúnibe ca dxiiñaʼ ni chicaabe. Zándaca ra gunadiágabe guni orarluʼ pur laabe cuʼ ni gana laabe gúnibe jma ra ridagulisaabe.
4. 1) Bizeeteʼ chupa chonna historia stiʼ Biblia ni zanda gacané ca hermanu guiniisicaʼ ndaaniʼ xquidxi Dios. 2) Xii nga naquiiñeʼ guicá ique ti binnigola ora gusiidiʼ ti hermanu.
4 Ora guzulú gusiidiluʼ ti hermanu, guniʼné laabe de xiixa historia stiʼ Biblia casi cani zeeda lu 1 Reyes 19:19-21, Nehemías 7:2, Nehemías 13:13 ne Hechos 18:24-26. Casi ca historia riʼ zacané cani laabe gúʼyabe pabiáʼ risaca nga gacanebe xcaadxi binni, gápacabe confianza laabe ne cadi gudxiibabe laca laabe. Ca guenda riʼ zeeda gaca cani casi abono ni rusaba ti binni lu layú stiʼ. Zacané ni hermanu riʼ guiniisi jma nagueenda ndaaniʼ xquidxi Dios. Ti binnigola de Francia guníʼ ora rusiidiʼ ti hermanu, ni ruyúbibe nga gacanebe laa quixhe ique guni ni na Biblia. Laabe nabe ruyúbibe modo ganda gúʼndanebe xpinni Cristu ca caadxi textu para guiene caadxi de ca cosa sicarú ni zeeda ndaaniʼ Biblia (Salmo 119:18). Ximódoruʼ zanda gacané ti binnigola ca hermanu gannaxhiicaʼ Jiobá jma.
GULUU GANA LAABE GÚNIBE JMA NE GUDXI LAABE XIÑEE
5. 1) Xiñee galán nga guiniʼné ti binnigola ti hermanu de cani naguixhe ique ugaanda. 2) Xiñee risaca nga gusiidiʼ ti binnigola ca hermanu ora nahuiinirucaʼ. (Biiyaʼ ni cá ñee yaza.)
5 Gunabadiidxaʼ hermanu ca xi naguixhe ique ugaanda. Pa cadi naguixhe íquebe ugaandabe xiixa, gucané laabe guyúbibe tobi ni zanda ugaandabe. Guyuu nayecheʼ ora gábiluʼ laabe xi gudixhe íqueluʼ gúniluʼ dxiqué ne pabiáʼ galán biʼniʼ sentirluʼ ora bigaandaluʼ ni. Cadi nagana para gúniluʼ ni ne zabeenduluʼ ni galán. Ti binnigola ni naca precursor África, bisiene xiñee naquiiñeʼ guni ca binnigola zacá. Laabe guniʼbe, dxi nácabe nahuiiniʼ, gunabadiidxaʼ ti binnigola laabe xi naguixhe íquebe ugaandabe. Ngue gucané laabe quixhe íquebe gúnibe jma xhiiñaʼ Dios. Stale hermanu ni maʼ xadxí de naca binnigola nacaʼ nabé risaca nga guzulú gusiidicaʼ ca hombrehuiiniʼ laga nahuiinicaʼ. Zanda guicaacabe xiixa dxiiñaʼ ni zanda gúnicabe ra ridagulisaacabe. Xiñee galán nga gusiidiʼ ti binnigola ca hombrehuiiniʼ ca yaʼ. Purtiʼ nga zanda gacané laacabe ugaandacabe ni quixhe íquecabe dxi guiniisicabe ante chuʼ xiixa ni uquiinde laacabe. Biblia na: «Lii nga ribezaʼ gacaneluʼ naa Jiobá, Señor stinneʼ, ni runeʼ cré dede dxi nahuiineʼ. Dios stinneʼ, dede nahuiineʼ huasiidiluʼ naa ne dede yanna cayuʼnuʼ ni, ne qué huasaanaʼ de guiniéʼ guiráʼ ca cosa sicarú ni maʼ bíʼniluʼ» (Salmo 71:5, 17). *
Bisiene hermanu ca xii nga ni naquiiñeʼ guni ne xiñee, ne gudxi laabe galán cayúnibe xhiiñabe (Biiyaʼ párrafo 5 dede 8)
6. Xi biʼniʼ Jesús para bisiidiʼ xcaadxi binni.
6 Para cuʼbe gana ti hermanu guni jma lu xhiiñaʼ Dios, cadi naquiiñeʼ si gábibe laa xi guni, sínuque naquiiñeʼ gusiénebe laa xiñee risaca gúnini. Ne sicaríʼ nga biʼniʼ Jesús para bisiidiʼ xcaadxi binni. Biʼniʼ mandarbe ca apóstol stibe gucheechecaʼ diidxaʼ. Peru primé gúdxibe laacaʼ xiñee naquiiñeʼ guzuubacaʼ diidxaʼ. Gúdxibe laacaʼ: «Irá xixé ni nuu ibáʼ ne ni nuu guidxilayú ma nexhe ladxi nayaʼ. Nga runi, laché ne lachigusiidiʼ binni de guiráʼ guidxi sananda naa» (Mateo 28:18, 19). Ximodo zanda chinándaluʼ ejemplu stiʼ Jesús yaʼ.
7, 8. 1) Ximodo zanda chinanda ca binnigola ejemplu stiʼ Jesús. 2) Xiñee risaca nga gábibe hermanu ca galán ni cayuni. 3) Xi conseju zanda gacané ca binnigola para gusiidicaʼ xcaadxi hermanu. (Biiyaʼ cuadru ni láʼ «Conseju para gusiidiluʼ xcaadxi hermanu».)
7 Ora gábiluʼ hermanu ca guni xiixa, bisiene laabe né Biblia xiñee risaca nga gúnibe ni. Zacá zusiidiluʼ laabe gúnibe ca cosa ca purtiʼ Biblia na gácani ne cadi purtiʼ si naquiiñeʼ gúnibe ni. Quíxhenu ti ejemplu, pa guinábaluʼ ti hermanu guʼyaʼ cadi guixii nisa ra puertaʼ Yoo stiʼ Reinu zanda gúʼndaneluʼ laabe Tito 2:10. Bisiene laabe pa gúnibe ni jma ziuulaʼdxiʼ binni gucaadiaga stiidxaʼ Dios. Ne laaca zanda gábiluʼ laabe pa gúnibe zacá qué zaree chuiʼ ñee cani maʼ nagola. Pa gusiéneluʼ laabe ximodo gúnibe dxiiñaʼ zacané ni laabe guiníʼ íquebe ca hermanu ne qué zacabe tema chinanda ca hermanu ni maca nexheʼ gaca. Ora gúʼyabe xi ribeendú ca hermanu pur dxiiñaʼ ni rúnibe jma ziuuláʼdxibe gacanebe.
8 Ne ora gúʼyaluʼ zinanda hermanu ca conseju ni bidiiluʼ laa gudxi laabe galán ni cayúnibe. Xiñee risaca gúniluʼ ndiʼ yaʼ. Purtiʼ zacá zacaneluʼ laabe guiniisibe ndaaniʼ xquidxi Dios. Ora rábiluʼ hermanu ca galán ni cayuni zeeda gácani casi ora nuzeeluʼ ti yagahuiiniʼ para guiniisi (zadxélaluʼ ti ejemplu de laani lu Mateo 3:17).
STI GUENDANAGANA NI RÁPACABE
9. 1) Xi rizaaca ndaaniʼ caadxi guidxi ra nabeza binni ricu. 2) Xiñee stale hombrehuiiniʼ qué ruuyacaʼ xhiiñaʼ Dios casi ti cosa ni jma risaca.
9 Ndaaniʼ caadxi guidxi ra nabeza binni ricu, ruuyaʼ ca binnigola huaxiéʼ riuulaʼdxiʼ cani nahuiiniʼ gúnicaʼ jma ra ridagulisaacaʼ. Gunabadiidxacabe ti grupu de xpinni Cristu ni maʼ xadxí de naca binnigola de 20 guidxi xiñee nuu guendanagana ca. Stale de laacabe guníʼ, dxi jma nahuiiniʼ ca hermanu riʼ, qué niguu bixhózecaʼ gana laacaʼ niguixhe íquecaʼ ñúnicaʼ jma lu xhiiñaʼ Jiobá. Ne ora laacabe gucaláʼdxicabe ñúnicabe jma, guluu bixhózecabe gana laacabe gúʼndacabe scuela roʼ para guni ganárcabe stale bueltu. Ngue runi qué ñuu dxi ñuuyacabe xhiiñaʼ Dios casi ti cosa ni jma risaca para laacabe (Mateo 10:24).
10, 11. 1) Ximodo zanda gacané ti binnigola ti hermanu guchaa modo laa. 2) Xi textu zanda guʼndané ti binnigola ti hermanu, ne xiñee. (Biiyaʼ ni cá ñee yaza.)
10 Nagana nga gacanenu ti hermanu ni qué racalaʼdxiʼ guni jma lu xhiiñaʼ Dios ra ridagulisaa. Peru zanda gacanenu laabe pa gúninu stipa ne gápanu stale paciencia. Guiníʼ íquenu ejemplu stiʼ hombre ni runi dxiiñaʼ lu layú que. Para guiniisi ti yagahuiiniʼ derechu, naquiiñeʼ guni enderesarbe ni chaahuiʼ chaahuiʼ. Zacaca nga naquiiñeʼ gúniluʼ, chahuiʼ chaahuiʼ gucané ti xpinni Cristu guchaa modo laa ne ganda guni jma dxiiñaʼ ra ridagulisaa. Ximodo yaʼ.
11 Gulee tiempu para gaca xhamíguluʼ hermanu ca. Gudxi laabe caquiiñeʼ ca binni ridagulisaa laabe. Guriné laabe ne biindané laabe caadxi textu stiʼ Biblia ni gacané laabe guiníʼ íquebe dxi bidiibe laabe Jiobá (Eclesiastés 5:4; Isaías 6:8; Mateo 6:24, 33; Lucas 9:57-62; 1 Corintios 15:58; 2 Corintios 5:15; 13:5). Biyubi modo chindaluʼ ndaaniʼ ladxidoʼbe ra guinabadiidxaluʼ laabe: «Xi bidii stiidxaluʼ Jiobá dxi bidiiluʼ xquendanabániluʼ laa yaʼ. Ximodo rábiluʼ biʼniʼ sentirbe ora guyuunísaluʼ yaʼ» (Proverbios 27:11). «Xi biʼniʼ sentir Binidxabaʼ yaʼ» (1 Pedro 5:8). Nabé galán gúʼndaneluʼ laabe ca textu riʼ, purtiʼ zacá zanda chindaluʼ ndaaniʼ ladxidóʼ hermanu ca (biindaʼ Hebreos 4:12). *
HOMBREHUIINIʼ, BILUÍʼ ZANDA GUNI CONFIARCABE LII
12, 13. 1) Xi biʼniʼ Eliseo ora gudxi Elías laa gusaana de gacané laabe yaʼ. 2) Ximodo guluu ndaayaʼ Jiobá Eliseo pur bizuubaʼ diidxaʼ.
12 Hombrehuiiniʼ, caquiiñeʼ ca binni ridagulisaa lii. Xi zacané lii gúniluʼ xhiiñaʼ Jiobá jneza yaʼ. Para gánnanu ni la? guidúʼyanu ejemplu stiʼ ti xpinni Dios de dxiqué ni láʼ Eliseo.
13 Raca 3,000 iza, profeta Elías biʼniʼ invitarbe ti hombrehuiiniʼ láʼ Eliseo para gacané laabe. Oraqueca guná Eliseo. Bizuubabe diidxaʼ ne gucanebe profeta riʼ lu caadxi dxiiñaʼ ni qué risácapeʼ (2 Reyes 3:11). Xhoopaʼ iza bisiidiʼ Elías Eliseo. Dxi mayaca guiluxe Elías de guni xhiiñaʼ ndaaniʼ guidxi Israel, gúdxibe Eliseo maʼ zanda gusaana de gacané laabe. Peru Eliseo gudxi laabe chonna biaje: «Qué zusaanaʼ lii». Eliseo gudixhe ique guiaanané Elías. Ne Jiobá guluu ndaayaʼ laabe purtiʼ qué nusaanabe Elías. Ximodo yaʼ. Ra bidiibe lugar laa guuyaʼ ximodo ziné ti bi nadipaʼ Elías (2 Reyes 2:1-12).
14. 1) Ximodo zanda chinanda ca hombrehuiiniʼ ejemplu stiʼ Eliseo. 2) Xiñee risaca nga guni ca hombrehuiiniʼ ca dxiiñaʼ gudiicabe laacaʼ.
14 Ximodo zanda chinándaluʼ ejemplu stiʼ Eliseo yaʼ. Neca qué risácapeʼ dxiiñaʼ gudiicabe lii, bíʼnini de guidubi ladxidoʼloʼ. Bietenalaʼdxiʼ, binnigola ni cusiidiʼ lii ca xhamíguluʼ laabe. Gudxi laabe rusisácaluʼ ni rúnibe pur lii ne racaláʼdxiluʼ guiziidiluʼ jma. Peru ni jma risaca nga gusihuínniluʼ zanda gápacabe confianza lii ne gúniluʼ ca dxiiñaʼ ni gudiicabe lii. Xiñee yaʼ. Purtiʼ zacá zudii ca binnigola ca cuenta racalaʼdxiʼ Jiobá guicaaluʼ jma dxiiñaʼ ra ridagulisaaluʼ (Salmo 101:6; biindaʼ 2 Timoteo 2:2).
BIʼNIʼ RESPETAR CA BINNIGOLA
15, 16. 1) Ximodo bisihuinni Eliseo biʼniʼ respetar maestru stiʼ. (Biiyaʼ dibuju ni zeeda ra ruzulú tema riʼ.) 2) Xiñee gupa xcaadxi profeta que confianza Eliseo.
15 Historia stiʼ Eliseo laaca rusihuinni ni risaca nga guni respetarnu ca binnigola purtiʼ nánnacaʼ gusiidicaʼ. Despué de yeganna Elías ne Eliseo caadxi profeta de guidxi Jericó, guyecaʼ ra guiiguʼ Jordán. Óraque, «gucuaa Elías lari risaca stiʼ bizeechube ni ne gudxíbibe ni lu nisa que, ne bixeleʼ nisa que», óraque guirópacabe gudíʼdicabe ndaaniʼ ni ra nabidxi que. Laga zizácabe, ziniʼné Elías laabe ne laabe cucaadiaga chaahuibe laa ne ziziidibe guiráʼ ni cayabi laabe. Qué ñuu dxi ñuni cré Eliseo maʼ nanna de guiráʼ cosa. Despué de ziné Jiobá Elías lu bi nadipaʼ que, bibiguetaʼ Eliseo ra guiiguʼ que. Gudxíbibe xhaba Elías lu nisa que ne gunábabe gacané Jiobá laabe. Óraque bixeleʼ Jiobá, Dios stiʼ Elías, nisa que sti biaje (2 Reyes 2:8-14).
16 Ñee bidiiluʼ cuenta primé milagru biʼniʼ Eliseo zeeda gácani casi últimu milagru biʼniʼ Elías la? Qué niníʼ ique Eliseo cumu maʼ naca xaíque maʼ ñuni ca cosa que modo riuulaʼdxiʼ, sínuque bíʼniruʼ cani cásica biʼniʼ Elías cani. Zacá bisihuínnibe runi respetarbe maestru stibe. Ne nga gucané xcaadxi profeta que gápacaʼ confianza laabe (2 Reyes 2:15). Guca Eliseo profeta 60 iza, ne bidii Jiobá laabe poder para gúnibe stale milagru, jma que Elías. Xi zanda guizíʼdinu de ejemplu stiʼ Eliseo yaʼ.
17. 1) Ximodo zanda chinanda ca hombrehuiiniʼ ejemplu stiʼ Eliseo. 2) Ra zidiʼdiʼ dxi, xi zanda guni ca hombrehuiiniʼ.
17 Pa guicaaluʼ jma dxiiñaʼ ra ridagulisaaluʼ, cadi guiníʼ íqueluʼ nagueendaca naquiiñeʼ guchaaluʼ modo raca ca dxiiñaʼ ca. Bietenalaʼdxiʼ zanda guchaaluʼ caadxi cosa ora caquiiñeʼ congregación ca ni ne ora xquidxi peʼ Jiobá canabaʼ gácani. Qué chuʼ dxi gúniluʼ ni purtiʼ si racaláʼdxiluʼ. Bietenalaʼdxiʼ Eliseo biʼniʼ ca cosa ca casi modo biʼniʼ Elías ni. Zacá bisihuínnibe runi respetarbe maestru stibe. Ne laaca gucanebe ca profeta que gápacaʼ confianza laabe. Pa chinándaluʼ guiráʼ ni bisiidiʼ ca binnigola lii de lu Biblia la? zusihuínniluʼ runi respetarluʼ laacabe. Ne ca hermanu ni nuu ndaaniʼ neza binni ridagulisaa zápacaʼ confianza lii (biindaʼ 1 Corintios 4:17). Ora guiziidiluʼ jma, zanda guchaaluʼ caadxi cosa ni gacané neza binni ridagulisaa chinanda xquidxi Jiobá, purtiʼ laani cadi cusaana ni de guiniisi ni. Ne despué zacané Jiobá lii gúniluʼ jma cosa que biaʼ biʼniʼ cani bisiidiʼ lii, cásica guca ne Eliseo (Juan 14:12).
18. Xiñee nagueendaca naquiiñeʼ gusiidicabe ca xpinni Cristu ni nuu ndaaniʼ ca congregación ca.
18 Rinábadu Jiobá gacané ca conseju stiʼ guiropaʼ tema riʼ ca binnigola cueecaʼ tiempu para gusiidicaʼ xcaadxi xpinni Cristu. Ne laaca runi orardu para guiale ndaaniʼ ladxidóʼ jma hermanu guiziidiʼ ximodo naquiiñeʼ gápacaʼ ca neza binni ridagulisaa. Nga zacané ca neza binni ridagulisaa ni nuu lu guidubi Guidxilayú chuʼcaʼ jma naguidxi. Ne laaca zacané cani cada tobi de laanu guzúʼbanu stiidxaʼ Jiobá laga cabézanu ca dxi jma nagana.
^ párrafo 5 Pa ti hombrehuiiniʼ rusihuinni maʼ biniisi ndaaniʼ xquidxi Dios, qué rudxiibaʼ laca laa ne napa ca guenda ni caquiiñeʼ para gacané ra ridagulisaa, zanda guiníʼ ca binnigola gácabe siervu ministerial neca caʼruʼ gusaabe 20 iza (1 Timoteo 3:8-10, 12; biiyaʼ revista La Atalaya 1 stiʼ julio 1989, yaza 29).
^ párrafo 11 Ora guiníʼneluʼ hermanu ca, zanda iquiiñeluʼ Torre stiʼ rapa 15 stiʼ abril 2012, yaza 14 dede 16, párrafo 8 dede 13, ne libru Cadi guixélenu de Dios ni nadxii laanu, capítulo 16, párrafo 1 dede 3.
