1, 2. 1) Xiñee nanna dxíchiluʼ nadxii Jiobá ca xpinni. 2) Laanu casi binni guidxilayú, xi caquiiñenu.

ÑEE nanna dxíchiluʼ nadxii Jiobá ca xpinni la? Guníʼ ique ca ejemplu riʼ. Ti Hermana ni láʼ Taylene nabé biyubi guiree ca cosa ni guni jnézapeʼ, ne ndiʼ nabé guluu ni laabe triste. Stale iza guluu ca hermanu gana laabe né diidxaʼ nadóʼ guchaabe modo laabe. Hermana riʼ guníʼ pa qué ñannaxhii Jiobá laa, qué nudii lugar nicaabe stale conseju ne niguucabe gana laa. Sti hermana ni láʼ Brigitte biaana viuda né chupa xiiñiʼ. Laabe nabe gusiniisi binni xiiñiʼ lu guidxilayú nga tobi de ca cosa jma nagana lu xquendanabani binni, jmaruʼ si pa qué gápacabe tobi de ca bixhózecabe. Peru nanna dxíchibe nadxii Jiobá laabe purtiʼ huayacané laabe gudxiilube yuubaʼ stibe, ne purtiʼ qué huadii lugar gacanabe jma que biaʼ zanda guni huantarbe (1 Corintios 10:13). Sti hermana láʼ Sandra napa ti guendahuará ni qué rianda. Lu ti guendaridagulisaa roʼ bidxiña ti hermana ni qué runibiaʼbe para ugapadiuxi laabe ne guniʼné laabe. Xheelaʼ Sandra guníʼ nabé guyuuláʼdxicabe ni biʼniʼ hermana que. Laabe nabe runi sentirbe pabiá nadxii Jiobá laabe ne rihuínnini dede lu ca cosa ni jma nahuiiniʼ runi ca hermanu ca pur laabe.

 ² Laanu casi binni guidxilayú caquiiñeʼ gannaxhiinu ne gannaxhiicabe laanu, purtiʼ zacá nga bizáʼ Jiobá laanu. Peru zanda guireʼnu gana pa huaranu, pa qué gápanu bueltu o pa guirutiʼ gucaadiaga laanu ora maʼ canagucheechenu diidxaʼ ne guiníʼ íquenu cadi nadxii Jiobá laanu. Pa guizaacanu zacá, naquiiñeʼ guietenaláʼdxinu rizaaláʼdxibe laanu ne racaláʼdxibe gacanebe laanu. Qué ziuu dxi gusaanabe laanu pa qué gusaananu laabe (Isaías 41:13; 49:15).

3. Xi zacané laanu chuʼnu seguro nadxii Jiobá laanu.

³ Ca hermanu ni maʼ bizéʼtenu ca nanna dxíchicaʼ gucané Jiobá laacaʼ ora gudíʼdicaʼ lu guendanagana. Laanu laaca zanda chuʼnu seguru racalaʼdxiʼ Jiobá gacané laanu (Salmo 118:6, 7). Pa guiníʼ íquenu lu ca cosa galán ni maʼ bíʼnibe pur laanu, ziuʼnu seguru nadxiibe laanu. Biblia na: «Zietenaladxeʼ guiráʼ ni runi Jah; purtiʼ dxandipeʼ zietenaladxeʼ ca cosa galán bíʼniluʼ dxiqué. Ne dxandipeʼ zaníʼ iqueʼ guiráʼ ni rúniluʼ, ne nabé zazaaladxeʼ cani rúniluʼ» (Salmo 77:11, 12). Lu tema riʼ zadúʼyanu tapa de ca cosa ni maʼ bisigaʼdeʼ Jiobá laanu ne ximodo zanda gudiʼnu xquíxepeʼ laabe: cani bizaʼbe, Biblia, oración ne ra bidiibe xiiñibe gati pur laanu.

4. Xi rudiʼnu cuenta ora ridúʼyanu cani bizáʼ Jiobá.

⁴ Ora ridúʼyanu cani maʼ bizáʼ Jiobá, rudiʼnu cuenta guizáʼ nadxii Jiobá laanu (Romanos 1:20). Bidiibe laanu Guidxilayú ne guiráʼ ni caquiiñenu para guibáninu nayecheʼ. Ne laaca bizaʼbe guiráʼ clase guendaró para chuuláʼdxinu guidoʼno cani (Eclesiastés 9:7). Ti Hermana láʼ Catherine ni nabeza ndaaniʼ guidxi Canadá guníʼ nabé riuulaʼdxiʼ guʼyaʼ ximodo rigaa guiráʼ yagahuiiniʼ ora riluxe inviernu ne ruzulú primavera. Riuuláʼdxibe guuyabe ora guieleʼ ca guieʼ ca ne ximodo ribiguetaʼ ca pájaruhuiiniʼ ca ora maʼ gudiʼdiʼ inviernu. Ne riuuláʼdxibe gúʼyabe ora ritó ti colibrí ni bisaanabe ruaa ventana guzina stibe. Laabe nabe rudii Jiobá laanu stale cosa galán purtiʼ guizáʼ nadxii laanu. Riuulaʼdxiʼ Jiobá guuyaʼ guiráʼ ni maʼ bizáʼ ne laaca racaláʼdxibe chuuláʼdxinu cani (Hechos 14:16, 17).

5. Xi sti cosa rusihuinni nadxii Jiobá laanu.

⁵ Sti cosa ni rusihuinni nadxii Jiobá laanu nga modo bizaʼbe laanu. Laabe bíʼnibe laanu modo ganda gúninu dxiiñaʼ ni gusiecheʼ laanu ne guni sentirnu zanda gúninu ni (Eclesiastés 2:24). Bidiibe laanu Guidxilayú para guchanu ni de binni, gudxíʼbanu luni, ne para gápanu ca maniʼ ca ne xcaadxi cosa ni nabani (Génesis 1:26-28). Ne laaca bíʼnibe laanu para gápanu ca guenda sicarú ni nápabe (Efesios 5:1).

6. Xiñee naquiiñeʼ gudiʼnu xquíxepeʼ Dios pur bidii laanu Biblia.

⁶ Bidii Jiobá laanu Biblia purtiʼ nadxii laanu. Naquiiñeʼ gudiʼnu xquíxepeʼ laabe pur ni bisigáʼdebe laanu riʼ, purtiʼ racané ni laanu gánnanu ximodo Dios ne xi runi sentirbe pur binni guidxilayú. Biblia rusiene laanu xi biʼniʼ sentir Jiobá pur ca israelita neca bicheenecaʼ laabe stale biaje. Salmo 78:38 na: «Laabe biabe laacaʼ; bitiidiláʼdxibe donda sticaʼ ne qué ñuutibe laacaʼ. Ne stale biaje bicueezabe xiana stibe, ne qué nidxiichinebe laacaʼ». Ora riníʼ íquenu ni na textu riʼ racané ni laanu gánnanu nadxii Jiobá laanu stale ne rizaalaʼdxiʼ laanu neca rucheenenu laa (biindaʼ 1 Pedro 5:6, 7).

7. Xiñee zeeda gaca Biblia casi ti tesoro.

⁷ Para laanu zeeda gaca Biblia casi ti tesoro. Xiñee yaʼ. Purtiʼ riquiiñeʼ Jiobá ni  para guiniʼné laanu. Ora nabé riniʼné binni xiiñiʼ, jma rannaxhiisaacaʼ ne jma rápacaʼ confianza. Jiobá nga Bixhózenu ni nadxii laanu. Ne neca qué ridúʼyanu ne qué runidiáganu laabe, riquiiñebe Biblia para guiníʼnebe laanu. Nga runi ora guidúʼndanu ni naquiiñeʼ gucaadiaga chaahuinu ni gábibe laanu (Isaías 30:20, 21). Zacá zánnanu racalaʼdxiʼ Jiobá gabi laanu xi gúninu ne gapa laanu. Zacá zunibiáʼ chaahuinu laabe ne zápanu jma confianza laabe. Biblia na: «Qué ruchee diʼ ley stiʼ Jiobá, riguixhedxini ladxidóʼ binni. Jneza ni rusietenalaʼdxiʼ Jiobá laanu, ne riguuni xpiaaniʼ binni ni qué ganna. Jneza cani gudixhe Jiobá guni binni, rusiéchecani ladxidoʼcaʼ, ne nayá mandamientu stiʼ Jiobá, rusizaanini bizalú binni. Para guidxibi binni Jiobá naquiiñeʼ gaca nayá, ne qué ziuu dxi gusaana binni de guni adorar laabe zacá. Ca ley stiʼ Jiobá ni caníʼ modo gaca juzgar binni dxandíʼ cani; huahuinni jneza cani» (Salmo 19:7-9). «Peru ni gucaadiaga naa la? zabani galán, qué ziuu tu guchiichi laa ne qué zadxibi guizaaca xiixa desgracia» (Proverbios 1:33).

8, 9. 1) Xi racalaʼdxiʼ Jiobá gánnanu. 2) Bizeeteʼ ti ejemplu ni rusihuinni qué ruuyaʼ Jiobá ra ruchéʼsinu.

⁸ Racalaʼdxiʼ Jiobá gánnanu qué ruuyabe paraa cucheʼnu, sínuque ruuyabe ca cosa galán ni rúninu (2 Crónicas 16:9). Guidúʼyanu ejemplu stiʼ Jehosafat, ti rey de Judá. Laa biʼniʼ ti cosa ni cadi jneza, gudixhe íquebe chuʼbe tobi si né rey stiʼ Israel ni láʼ Acab para gucaalúcabe ca siriu. Ti grupu de 400 profeta ni cadi dxandíʼ gúdxicaʼ Acab zuni ganar lu guendaridinde  que. Peru ti profeta ni dxandíʼ láʼ Micaya gudxi Acab ne Jehosafat zuníticaʼ pa gucaalucaʼ ca siriu. Ne nguepeʼ nga ni bizaacaʼ. Guti Acab lu guendaridinde que, ne Jehosafat bilá ñati. Óraque biseendaʼ Jiobá Jehú para uguu jneza Jehosafat pur cosa malu ni gudixhe ique guni, peru laaca biseendaʼ laabe para gábibe Jehosafat ca diidxaʼ riʼ: «Maʼ bidxélabe xiixa ni galán luguialuʼ» (2 Crónicas 18:4, 5, 14-22, 33, 34; 19:1-3).

⁹ Xi cosa galán maʼ biʼniʼ rey Jehosafat yaʼ. Chupa chonna iza ante biʼniʼ mandarbe ca príncipe, ca levita, ca sacerdote checaʼ guidubi naca Judá ne gusiidicaʼ binni ca ley stiʼ Dios. Nabé stale cosa galán guleendú Jehosafat, purtiʼ dede né ca binni de xcaadxi guidxi biziidicaʼ de Jiobá (2 Crónicas 17:3-10). Neca gudixhe ique Jehosafat guni ti cosa ni cadi jneza, qué nusiaandaʼ Jiobá ca cosa ni galán bíʼnibe. Xi rusiidiʼ ejemplu riʼ laanu yaʼ. Neca gucheʼnu, pa gúninu stipa pur gúninu xhiiñaʼ Jiobá, qué zusaana de gannaxhiibe laanu ne qué zusiaandabe ca cosa galán ni maʼ bíninu.

10, 11. 1) Xiñee zanda guininu oración ca nga ti regalu stiʼ Jiobá. 2) Ximodo zanda guicabi Jiobá ca oración stinu. (Biiyaʼ foto ni zeeda ra ruzulú tema riʼ.)

¹⁰ Xi runi ti binni nachaʼhuiʼ ora racalaʼdxiʼ xiiñiʼ guiniʼné laa. Cumu rizaaláʼdxibe xiiñibe la? ribeebe tiempu para gucaadiágabe laa ne gánnabe xi cayuni sentir. Jiobá nga Bixhózenu ne nabé risácanu para laa. Nga runi ora runi orarnu laabe, rucaadiaga chaahuibe laanu. Dxandíʼ, ti ndaayaʼ nga ganda guinínenu Jiobá.

¹¹ Naca oración ti regalu stiʼ Jiobá. Xiñee yaʼ. Purtiʼ pur laani zanda guiníʼnenu Jiobá ora tiica gacaláʼdxinu. Laabe nga xhamígunu ne ora tiica nuube para gucaadiágabe laanu. Lu primé párrafo que bizéʼtenu de ti hermana ni láʼ Taylene. Laabe nabe zanda gábinu Jiobá intiica si. Ora gábinu laabe xi runi sentirnu, zanda guicábibe laanu de stale modo, zanda iquiiñebe ti versículo stiʼ Biblia, tobi de ca libru ne ca revista stinu o iquiiñebe ti xpinni Cristu para cuʼ gana laanu. Jiobá rucaadiaga laanu ne riene laanu neca guirútiruʼ tu gúnini. Sti modo rusihuínnibe guizáʼ nadxiibe laanu nga ora ricábibe ca oración stinu.

12. Xiñee galán nga guidúʼndanu de ca oración ni zeeda lu Biblia. Gunáʼ nga chupa chonna de ca oración ca.

¹² Ca oración ni ridúʼndanu lu Biblia zanda gusiidiʼ cani laanu stale cosa. Nga runi galán gúninu pa guidúʼndanu cani gatigá ora runi adorarnu Dios né binnilídxinu. Zanda guidúʼndanu de oración ni biʼniʼ Jonás dxi nuu ndaaniʼ benda ngola que (Jonás 1:17–2:10). Laaca zanda guidúʼndanu oración ni biʼniʼ Salomón ora biluxe yuʼduʼ que (1 Reyes 8:22-53). Ne laaca zanda guiníʼ íquenu oración ni bisiidiʼ Jesús (Mateo 6:9-13). Pa cueenu tiempu para guiníʼ íquenu lu ca oración ni maʼ bizéʼtenu riʼ, zazíʼdinu guni orarnu jma jneza. Ne cadi guiaandaʼ laanu risaca nga guni orarnu gatigá. Pa gúninu zacá, «zaguixhe dxí [Dios] ladxidóʼ [no]» ne xquendabiaaninu. Pa guni orarnu gatigá jma zudiʼnu xquíxepeʼ Jiobá pur nadxii laanu (Filipenses 4:6, 7).

13. Xi zanda guicaanu pur guti Jesús pur laanu.

¹³ Sti modo maʼ bisihuinni Jiobá nadxii laanu nga ra bidii Xiiñiʼ gati pur laanu. Laabe bisigáʼdebe ni laanu para gápanu «enda nabani ni qué zaluxe» (1 Juan 4:9).  Apóstol Pablu bisiene casi guirutiʼ zudii xquendanabani pur ti «hombre runi jneza» ne zándaca nuu tu zudii xquendanabani pur ti «hombre chaʼhuiʼ». Peru -guniʼbe bisihuinni Dios pabiáʼ nadxii laanu ora biseenda Xiiñiʼ para gatiʼ pur laanu «neca cuchéʼ né nu laa chiqué» (Romanos 5:6-8). Pur ni bidii Dios laanu riʼ zanda gaca xhamígunu laa ne racá nga ra bisihuínnibe nadxiibe laanu.

14, 15. 1) Xi ribeendú ca xpinni Cristu ni bibí né espíritu santu pur bidii Jesús xquendanabani pur laacaʼ. 2) Xi ribeendú ca xpinni Cristu ni cadi naca de cani bibí pur bidii Jesús xquendanabani pur laacaʼ.

¹⁴ Xi ribeendú ca xpinni Cristu ni bibí né espíritu santu pur guti Jesús pur laacaʼ yaʼ. Grupuhuiiniʼ de xpínnibe riʼ runi sentircaʼ nadxii Jiobá laacaʼ de ti modo jma risaca (Juan 1:12, 13; 3:5-7). Maʼ gulí Dios laacabe né espíritu santu stiʼ, ne pur nga maʼ nácacabe xiiñibe (Romanos 8:15, 16). Pablu guníʼ guirácabe nuunécabe Cristu tobi si «para cui né [cabe] laa ibáʼ» (Efesios 2:6). Peru pa nuuruʼ chupa chonna de cani bibí lu Guidxilayú riʼ, xii nga gucalaʼdxiʼ Pablu niníʼ yaʼ. Gucaláʼdxibe niniʼbe zanda guibani guiráʼ cani bibí guibáʼ sin qué chuʼ dxi gáticaʼ (Efesios 1:13, 14; Colosenses 1:5).

¹⁵ Yanna xi ribeendú cani cadi naca de cani bibí para checaʼ guibáʼ yaʼ. Pa nápacabe fe lu guendaguti stiʼ Cristu, laaca zanda gaca xhamígucabe Dios. Ne despué, zanda gueeda gácacabe xiiñiʼ Dios ne gápacabe guendanabani ni qué zaluxe lu Guidxilayú riʼ. Racá ridúʼyanu, ra bidii Jiobá Xiiñiʼ para gati pur laanu bisihuínnibe nadxiibe guiráʼ binni (Juan 3:16). Riéchenu gánnanu pa qué guchéʼnenu Dios zudiibe laanu ti guendanabani ndaaniʼ Paraísu. Rihuinni dxíchica, ra bidii Jiobá Xiiñiʼ nga bisihuinni pabiáʼ nadxii laanu. Nga runi, cadi gusaana de gudiʼnu xquíxepeʼ laabe de guidubi ladxidoʼno.

16. Xi zúninu pa guiníʼ íquenu modo rusihuinni Jiobá nadxii laanu.

¹⁶ Stáleruʼ modo rusihuinni Jiobá nadxii laanu. Rey David guníʼ: «Para naa, ¡guizáʼ sicarú guiráʼ ni riníʼ íqueluʼ! Dios stinneʼ, ¡qué zanda diʼ ugabaʼ guirácani! Pa ñacalaʼdxeʼ nugabaʼ cani la? jma stale cani que ca yuxi ni nuu» (Salmo 139:17, 18). Pa guiníʼ íquenu guiráʼ modo rusihuinni Jiobá nadxii laanu, ra tiidiʼ dxi jma zannaxhiinu laabe ne zúninu ni nabe biaʼ gándatiʼ.

17, 18. Ximodo zanda gusihuínninu nadxiinu Jiobá.

¹⁷ Ximodo zanda gusihuínninu nadxiinu Jiobá. Ti modo nga gucheechenu stiidxaʼ Reinu né stale gana (Mateo 24:14; 28:19, 20). Sti modo nga ra cadi guchéʼnenu Jiobá ora guidxaagalunu guendanagana ni gusihuinni pa dxandíʼ nápanu fe. Biblia na: «Jiobá Dios nga gubidxa ne escudo; nachaahuibe né laanu ne rusisácabe laanu. Jiobá qué rucueeza ni galán para cani canazá sin donda» (Salmo 84:11, biindaʼ Santiago 1:2-5). Neca nabé naroʼbaʼ ca guendanagana ni guidxaagalunu, nanna Jiobá xi guendanagana cadídinu ne zacanebe laanu purtiʼ guizáʼ nadxiibe laanu (Salmo 56:8).

¹⁸ Lu tema riʼ maʼ bidúʼyanu xcaadxi modo zanda gusihuínninu nadxiinu Jiobá. Primé, ra guiníʼ íquenu lu ca cosa sicarú ni maʼ bizaʼbe. Guiropa, ra guiduʼndaʼ chaahuinu Biblia. Guionna, ra cadi gusaana de guni orarnu para chuʼnu jma gaxha de Jiobá. Ne guidapa, ra guiníʼ íquenu bidii Jiobá Xiiñiʼ gati pur laanu (1 Juan 2:1, 2). Pa gúninu cani maʼ bizéʼtenu riʼ, ziuʼnu seguru nadxii Jiobá laanu ne ra tiidiʼ dxi jma zannaxhiinu laabe.