1, 2. 1) Xi ñuuláʼdxiluʼ ñúniluʼ ndaaniʼ Paraísu. (Biiyaʼ dibuju ni zeeda ra ruzulú tema riʼ.) 2) Xii nga ca cosa ni zaguu laanu jma nayecheʼ ndaaniʼ Paraísu.

APÓSTOL Pablu guníʼ naquiiñeʼ gúninu stipa pur ugaandanu guendanabani ni qué zaluxe (biindaʼ 1 Timoteo 6:12, 19). Stale de ca xpinni Dios zacaacaʼ guendanabani ni qué zaluxe riʼ ndaaniʼ Paraísu lu Guidxilayú. Pa lii nga tobi de laacabe, cadi dxandíʼ né stale gana cabézaluʼ guibániluʼ racá la? Ñee zanda guxuíʼ luluʼ ximodo zuni sentirluʼ guibániluʼ guiráʼ siadóʼ nayecheʼ, nazaaca ne gastiʼ naguu xizaa lii la? (Isaías 35:5, 6.) Guníʼ ique pabiáʼ galán ziuuneluʼ ca binnilídxiluʼ ne ca xhamíguluʼ, ne cani guiasa lade gueʼtuʼ (Juan 5:28, 29; Hechos 24:15). Ne zápaluʼ tiempu para guiziidiluʼ intiica cosa chuuláʼdxiluʼ. Zanda guizíʼdiluʼ de ciencia, guxhídxiluʼ saa o gucuiluʼ lídxiluʼ.

² Peru ziuu xcaadxi cosa ni zaguu laanu jma nayecheʼ. Xi laacani yaʼ. Tobi de laacani nga guiráʼ binni zuni respetar lá Jiobá ne zuzuubacaʼ stiidxasibe (Mateo 6:9, 10). Sti cosa nga puru si binni ni qué gapa donda nga zabani lu Guidxilayú riʼ, casi gucalaʼdxiʼ Jiobá ñácani. Ne chaahuiʼ chaahuiʼ  zácanu binni ni qué gapa donda ne ra tiidiʼ dxi jma zaca xhamígunu Dios (Salmo 73:28; Santiago 4:8).

3. Xi para naquiiñeʼ chuʼnu listu yanna.

³ Nuunu seguru zuni Jiobá guiráʼ ni maʼ guníʼ. Xiñee yaʼ. Purtiʼ Biblia na «para Dios gasti ni nagana» (Mateo 19:25, 26). Pablu guníʼ naquiiñeʼ gúninu stipa pur ugaandanu guendanabani ni qué zaluxe. Nga runi naquiiñeʼ gusihuínninu ne modo guibáninu runi crenu ora tiica si zeeda fin. Pa racaláʼdxinu guibáninu ndaaniʼ Paraísu, naquiiñeʼ chuʼnu listu yanna para guibáninu ndaaniʼ ni. Guidúʼyanu ximodo zanda chuʼnu listu.

4. Bizeeteʼ ti ejemplu ni rusihuinni ximodo zanda chuʼnu listu para guibáninu ndaaniʼ Paraísu.

⁴ Ximodo zanda chuʼnu listu para guibáninu ndaaniʼ Paraísu yaʼ. Guníʼ ique lu ejemplu riʼ. Ora tuuxa chindeza sti guidxi, ximodo riuube listu yaʼ. Gúnibe ni ganda casi ora maʼ nibézabe raqué. Casi guiziidibe diidxaʼ ni riníʼcabe raqué ne guiaabe ca costumbre stiʼ guidxi que. Dede zanda gobe guendaró ni rócabe lugar que. Zacaca nga laanu, zanda chuʼnu listu para guibáninu ndaaniʼ Paraísu ra gúninu ni ganda casi ora maʼ nuunu ndaaniʼ ni. Guidúʼyanu caadxi cosa ni zanda gúninu.

5, 6. Xiñee dede ca yanna naquiiñeʼ gúninu cani quixhe xquidxi Jiobá.

⁵ Nabáninu ndaaniʼ ti guidxilayú ra runi binni ni na Binidxabaʼ. Stale binni riníʼ ique cadi naquiiñeʼ guzuubaʼ stiidxaʼ Dios ne cada tobi zanda guni ni gapa gana. Xi huabeendúcabe pur nga yaʼ. Nabé racaná binni ne cadi nayecheʼ nabánicaʼ (Jeremías 10:23). Peru laanu nánnanu naca Jiobá ti xaíque ni nadxii binni. Nga runi ruzuubanu stiidxabe. Ne ndaaniʼ Paraísu ca jma galán zabáninu purtiʼ guiráʼ binni zuzuubaʼ stiidxaʼ Dios.

⁶ Pa racaláʼdxinu chuʼnu listu para guibáninu ndaaniʼ Paraísu, dede ca yanna naquiiñeʼ gúninu cani quixhe xquidxi Jiobá. Xiñee yaʼ. Purtiʼ ndaaniʼ Paraísu ca zábicabe laanu gúninu Guidxilayú riʼ ti jardín sicarú ne gacanenu ca binni ni guiasa lade gueʼtuʼ guiziidicaʼ de Jiobá. Ziuu stale dxiiñaʼ gúninu dxicá. Nga runi naquiiñeʼ guinabadiidxanu laca laanu: «Pa guinabaʼ xquidxi Jiobá naa guneʼ xiixa ni qué riuuladxeʼ, ñee zuzuubaʼ diidxaʼ ne zuneʼ xhiiñaʼ né stale gana la?».

7, 8. 1) Xiñee naquiiñeʼ guiaanu gacanenu xquidxi Jiobá yanna. 2) Xi huanábacabe caadxi hermanu guni. 3) Xi zuni sentirnu ndaaniʼ Paraísu.

⁷ Para ganda guibáninu ndaaniʼ Paraísu, naquiiñeʼ guizíʼdinu chuʼnu nayecheʼ né ni gábicabe laanu gúninu ne gacanenu sti binni. Casi ora gabi xquidxi Jiobá laanu gúninu ti dxiiñaʼ sti lugar, ñee rúninu stipa pur gúninu ni ne chuʼnu nayecheʼ la? Pa guiaanu gacanenu xquidxi Jiobá yanna, qué zaca nagana para laanu gúninu ni ndaaniʼ Paraísu (biindaʼ Hebreos 13:17). Guiníʼ íquenu ni bizaaca ca israelita dxi yendacaʼ lu layú ni bizabiruaa Jiobá gudii laacaʼ. Qué ñanda nibícabe paraa cuézacabe. Gúdxicabe cada tobi paraa chindeza lu layú que (Números 26:52-56; Josué 14:1, 2). Zacaca nga ndaaniʼ Paraísu ca laaca zándaca qué zabídinu paraa cuézanu. Peru pa maʼ bizíʼdinu gacanenu xquidxi Jiobá, ziuʼnu nayecheʼ gúninu ni na Jiobá gastiʼ naca paraa cuézanu.

⁸ Ti ndaayaʼ nabé naroobaʼ nga gúninu ni na Dios ndaaniʼ Paraísu dxi guni  mandar gobiernu stibe. Nga runi dede yanna racanenu xquídxibe de guidubi ladxidoʼno. Peru zándaca gábicabe laanu chigúninu xhiiñabe sti lugar. Casi caadxi hermanu ni biʼniʼ dxiiñaʼ ndaaniʼ Betel de Estados Unidos gúdxicabe laacaʼ chigúnicaʼ dxiiñaʼ fuera de Betel. Ne chupa chonna de ca superintendente gunábacabe laacaʼ chigúnicaʼ dxiiñaʼ casi precursor especial pur iza sticaʼ o pur xcaadxi razón. Guiráʼ ca hermanu riʼ cayechenecaʼ dxiiñaʼ ni cayúnicaʼ, ne Jiobá caguu ndaayaʼ laacabe stale. Pa racaláʼdxinu chuʼnu nayecheʼ ne cuʼ ndaayaʼ Jiobá laanu, xi naquiiñeʼ gúninu yaʼ. Guinábanu gacané Jiobá laanu, gúninu guiráʼ ni ganda para gúninu ni nabe ne guiéchenenu intiica si dxiiñaʼ gudiicabe laanu. Biblia na: «Ndaayaʼ stiʼ Jiobá nga ni runi binni ricu, ne qué redané ni yuubaʼ» (Proverbios 10:22). Peru pa ndaaniʼ Paraísu ca racaláʼdxinu cuézanu ti lugar, peru xquidxi Jiobá gabi laanu cuézanu sti lugar yaʼ. Nuunu seguru qué zasaca para laanu paraa cuézanu ne xi dxiiñaʼ gúninu. Zudiʼnu xquíxepeʼ Jiobá pur gudii lugar guibáninu ndaaniʼ Paraísu ca (Nehemías 8:10).

9, 10. 1) Xiñee zándaca naquiiñeʼ gápanu paciencia ndaaniʼ Paraísu. 2) Ximodo zanda gusihuínninu yanna nápanu paciencia.

⁹ Zándaca ndaaniʼ Paraísu ca naquiiñeʼ gápanu paciencia. Guzéʼtenu ti ejemplu, zándaca guidúʼyanu pabiáʼ nayecheʼ guni sentir xcaadxi binni ora guiasa binnilídxicaʼ ne ca xhamígucaʼ lade gueʼtuʼ. Peru zándaca naquiiñeʼ cuézanu dede ora guiasa ca binnilídxinu ne ca xhamígunu lade gueʼtuʼ. Pa guizaacanu zacá, ñee ziechenenu cani maʼ biasa binnilidxi ne zápanu paciencia la? (Romanos 12:15.) Pa gápanu paciencia dede ca yanna ne cuézanu guni Jiobá cani maʼ bidii stiidxaʼ, laaca zápanu paciencia ndaaniʼ Paraísu ca (Eclesiastés 7:8).

¹⁰ Sti modo zanda gusihuínninu cayuʼnu listu para guibáninu ndaaniʼ Paraísu ca nga ora guidxaa xiixa lu ca libru ne ca revista stinu. Ñee ruundaʼ chaahuinu ca cosa nacubi riʼ la? Ñee rápanu paciencia ora qué guiénenu guiráʼ ni na ni la? Pa nápanu paciencia yanna, ndaaniʼ Paraísu ca qué zaca diʼ nagana para laanu gápanu paciencia ora gabi Jiobá laanu xi naquiiñeʼ gúninu (Proverbios 4:18; Juan 16:12).

11. Xiñee yanna nga naquiiñeʼ guizíʼdinu gutiidiláʼdxinu stonda binni yaʼ.

¹¹ Gutiidiláʼdxinu donda stiʼ binni laaca racané ni laanu chuʼnu listu para guibáninu ndaaniʼ Paraísu. Lu 1,000 iza guni mandar Cristu chaahuiʼ chaahuiʼ guiranu zácanu binni sin donda, dede cani guiasa lade gueʼtuʼ (Hechos 24:15). Ñee zutiidiláʼdxinu stonda binni ora gucheʼné laanu ne zannaxhiinu laacabe la? Pa dede ca yanna guizíʼdinu gutiidiláʼdxinu donda stiʼ stobi qué zaca ni nagana para laanu ndaaniʼ Paraísu (biindaʼ Colosenses 3:12-14).

12. Xiñee naquiiñeʼ gusihuínninu ca guenda ni cusiidiʼ Jiobá laanu yanna.

¹² Ca guenda ni rusiidiʼ Jiobá laanu gápanu yanna laaca naquiiñeʼ gusihuínninu cani ndaaniʼ Paraísu. Xiñee yaʼ. Purtiʼ zándaca qué zápanu guiráʼ ni racaláʼdxinu ndaaniʼ Paraísu. Ne zándaca naquiiñeʼ cuézanu para gápanu xiixa cosa. Naquiiñeʼ chuʼnu nayecheʼ ne gudiinu xquíxepeʼ ora tiicaʼ. Pa gusihuínninu ca guenda riʼ yanna, zusihuínninu cayuʼnu listu para guibáninu ndaaniʼ Paraísu ne racaláʼdxinu guibáninu ndaaniʼ  ti guidxilayú ra guiráʼ binni zuzuubaʼ stiidxaʼ Jiobá (Hebreos 2:5; 11:1).

13. Xii nga ni jma zasaca para laanu ndaaniʼ Paraísu ca yaʼ.

¹³ Ndaaniʼ Paraísu ca zápanu guiráʼ ni caquiiñenu para chuʼnu nayecheʼ. Peru ni jma zusiecheʼ laanu nga gaca xhamígunu Jiobá (Mateo 5:3). Gúninu ni na Jiobá nga ni jma zasaca para laanu ne ziuʼnu nayecheʼ ora gúninu cani (Salmo 37:4). Nga runi, pa racaláʼdxinu chuʼnu listu para guibánibu ndaaniʼ Paraísu, ni jma naquiiñeʼ gusisácanu yanna nga gúninu ni na Jiobá (biindaʼ Mateo 6:19-21).

14. Xi zanda quixhe ique cani nahuiiniʼ ugaanda ndaaniʼ xquidxi Dios.

¹⁴ Ximodo zanda chuʼnu jma nayecheʼ ra gúninu ni na Jiobá yaʼ. Ti modo nga quixhe íquenu ugaandanu xiixa ndaaniʼ xquidxi Jiobá. Pa nahuiiniluʼ guníʼ ique ximodo zanda iquiiñeluʼ xquendanabániluʼ para gúniluʼ ni na Jiobá. Zándaca quixhe íqueluʼ gúniluʼ jma lu xhiiñaʼ Jiobá. Lu ca libru ne revista stinu zanda guidxélaluʼ ximodo zanda gúniluʼ ni. * Laaca zanda guiníʼneluʼ ca hermanu ni maʼ ziné stale iza de cayuni xhiiñaʼ Jiobá lu xquendanabani. Pa iquiiñeluʼ xquendanabániluʼ para gúniluʼ ni na Jiobá, zaziidiluʼ stale cosa ni zacané lii chuʼluʼ listu para guibániluʼ ndaaniʼ Paraísu.

15. Xi xcaadxi cosa zanda quixhe íquenu gúninu ndaaniʼ xquidxi Dios.

¹⁵ Guiranu zanda quixhe íquenu gúninu ni na Jiobá jma galán. Zanda quixhe íquenu guizíʼdinu gucheechenu diidxaʼ sti modo. Laaca zanda guiníʼ íquenu ximodo zanda gúninu ni na Biblia jma jneza lu xquendanabáninu. Laaca zanda gúninu stipa gúʼndanu jma jneza ne nadipaʼ, guicábinu jma galán ne gutiidinu ca libana stinu jma jneza. Guietenaláʼdxinu ni zacané laanu gúninu ni na Dios né stale gana nga quixhe íquenu ugaandanu xiixa ndaaniʼ xquídxibe ne chuʼnu listu para guibáninu ndaaniʼ Paraísu.

16. Xiñee nánnanu jma galán zabáninu pa gúninu ni na Jiobá.

¹⁶ Pa iquiiñenu tiempu stinu para chuʼnu listu ti guibáninu ndaaniʼ Paraísu, ñee pur gana si cayúninu ni la? Coʼ. Gúninu ni na Jiobá nga modo  jma galán zanda guibáninu. Qué rúninu ni nabe purtiʼ riuu tu rucaa laanu gúninu ni o purtiʼ racaláʼdxinu guilanu dxi guinitilú guidxilayú riʼ. Gúninu xhiiñaʼ Jiobá ne gaca xhamígunu laa racaneni laanu lu xquendanabáninu ne racaneni laanu chuʼnu jma nayecheʼ. Ne zacá huayuni Jiobá ne laanu. Guendaranaxhii stibe ne modo rusiidibe laanu jma galán cani que intica cosa. Biblia na: «Lii nga Dios stinneʼ, qué rusaana de guyubeʼ lii. Guizáʼ racalaʼdxeʼ ganna de lii. De tantu racalaʼdxeʼ ganna de lii dede rieeguaʼ casi ti layú nabidxi ne ra gastiʼ nisa. Zacá nga maʼ biiyaʼ lii ti lugar ra nandxóʼ ora biiyaʼ stipa stiluʼ ne guendarisaca stiluʼ. Purtiʼ jma galán guendanachaʼhuiʼ stiluʼ que guendanabani, zusisaca ruaaʼ lii» (Salmo 63:1-3). Pa guni adorarnu Jiobá de guidubi ladxidoʼno ziuʼnu jma nayecheʼ. Cani maʼ ziné stale iza de cayuni ni nabe nánacaʼ jma galán ribani ti binni ora runi ni na Jiobá (Salmo 1:1-3; Isaías 58:13, 14).

17. Bisiene pa ziuʼnu nayecheʼ ne zaziiláʼdxinu ndaaniʼ Paraísu ca.

¹⁷ Ñee zanda chuʼnu nayecheʼ ne guiziiláʼdxinu ndaaniʼ Paraísu la? Zanda pue. Purtiʼ bizáʼ Jiobá laanu para chuuláʼdxinu guibáninu ne chuʼnu nayecheʼ. Ne laabe nabe zudiibe guiráʼ ni racaláʼdxinu (Salmo 145:16; Eclesiastés 2:24). Peru guietenaláʼdxinu jma nayecheʼ riuʼnu ora ni jma risaca para laanu nga gaca xhamígunu Jiobá. Nga runi ndaaniʼ Paraísu ca zanda guiziiláʼdxinu ne chuʼnu nayecheʼ, peru ni jma risaca nga gúninu ni na Jiobá. Nga runi, dede ca yanna naquiiñeʼ guibáninu zacá ne quixhe íquenu lu ca cosa galán ni cudii Dios laanu pur cayúninu ni na (Mateo 6:33).

18. Ximodo rusihuínninu cayuʼnu listu para guibáninu ndaaniʼ Paraísu.

¹⁸ Qué zanda guxuíʼlunu pabiáʼ galán zabáninu ndaaniʼ Paraísu ca. Gusihuínninu racaláʼdxinu chuʼnu ndaaniʼ ni ra chuʼnu listu dede ca yanna. Ximodo yaʼ. Ra gusihuínninu ca guenda ni maʼ bisiidiʼ Jiobá laanu ne gucheechenu diidxaʼ né stale gana. Guiéchenu gúninu ni na Jiobá né guiráʼ stipa stinu. Nanna dxíchinu zuni Jiobá guiráʼ ni maʼ guníʼ ndaaniʼ Paraísu. Nga runi dede ca yanna guibáninu casi ñaca maʼ nuunu ndaaniʼ ni.