1, 2. Xi qué huasaana de guni ca xpinni Jiobá.

BIAʼ dxi huabani binni lu Guidxilayú, huaníʼ Jiobá gadxé gadxé profecía. Ne ca xpínnibe qué rireecaʼ gana laga cabézacaʼ gaca ni na cani. Casi Jeremías guníʼ zunitilú ca babilonio Judá. Ne ngapeʼ nga ni bizaaca lu iza 607 ante de Cristu (Jeremías 25:8-11). Isaías maca guníʼ zacané Jiobá ca judíu para guireecaʼ de Babilonia ne guibiguétacaʼ xquídxicaʼ. Ne nabe: «Guiráʼ cani cabeza laabe ziuucaʼ nayecheʼ» (Isaías 30:18). Miqueas laaca gunna dxichi zaca ni na ca profecía que. Nga runi guniʼbe: «Zatanayaʼ» (Miqueas 7:7). Ne gudiʼdiʼ gayuaa iza de guleza ca xpinni Dios gueeda Mesías ni bieeteʼ lu ca profecía que (Lucas 3:15; 1 Pedro 1:10-12). *

² Laanu laaca cabézanu gaca ni na ca profecía ra rieeteʼ de Reinu stiʼ Dios. Jesús nga Rey stiʼ Reinu ca ne mayaca gulabe laanu de guidxilayú malu riʼ. Dxi gueeda fin, zunitilube ca binni malu ne zabeebe guiráʼ ca cosa ni runiná laanu  (1 Juan 5:19). Málasi zedandá fin. Nga runi naquiiñeʼ chuʼnu listu.

3. Peru pa maʼ stale iza de cabézanu guedandá fin, xi zándaca guinabadiidxanu yaʼ.

³ Guizáʼ maʼ racaláʼdxinu guedandá dxi gaca ni na Dios lu Guidxilayú riʼ (Mateo 6:10). Peru pa maʼ stale iza de cabézanu guedandá fin, zándaca guinabadiidxanu pa naquiiñeruʼ gatananu ne chuʼnu listu.

4. Xiñee cadi naquiiñeʼ gusaana de gatananu ne chuʼnu listu.

⁴ Xiñee cadi naquiiñeʼ gusaana de gatananu ne chuʼnu listu yaʼ. Pur stale razón nabé risaca. Tobi de laacani nga purtiʼ Jesús biʼniʼ mandar laanu gatananu ne chuʼnu listu (Mateo 24:42; Lucas 21:34-36). Ne xquidxi Jiobá gatigá rabi laanu gatananu ne chuʼnu listu para dxi gueeda fin ne cadi guiaandaʼ laanu maʼ bidii stiidxaʼ Jiobá gudii laanu Paraísu (biindaʼ 2 Pedro 3:11-13).

5. Xi sti razón nuu para chuʼnu listu dxi gueeda fin.

⁵ Ca primé xpinni Cristu que naquiiñeʼ ñatanacaʼ ne ñuucaʼ listu para dxi stiʼ Jiobá. Peru yanna nga jma naquiiñeʼ chuʼnu listu para dxi gueeda fin ca. Xiñee yaʼ. Purtiʼ bizulú biʼniʼ mandar Jesús lu iza 1914, ne dede dxi que nabáninu lu ca últimu dxi. Xiñee nanna dxíchinu zacá ni yaʼ. Purtiʼ ca cosa ni guníʼ Jesús zazaaca tiempu ca maʼ cayaca cani ca dxi stinu riʼ. Guidxilayú riʼ zeʼ dxi jma zinitilú ne ca diidxaʼ nacubi ne galán stiʼ Reinu careechecani lu guidubi naca Guidxilayú (Mateo 24:3, 7-14). Qué niníʼ diʼ Jesús pabiáʼ zandaa ca últimu dxi. Nga runi naquiiñeʼ chuʼnu listu purtiʼ málasi zedandá fin.

6. Xiñee nánnanu jma nagana zabani binni ra tiidiʼ dxi.

⁶ Ca dxi stinu riʼ, zé dxi jma nagana zabani binni guidxilayú. Xiñee nánnanu zacá ni yaʼ. Purtiʼ Biblia na zaca binni jma malu lu ca últimu dxi riʼ (2 Timoteo 3:1, 13; Mateo 24:21; Apocalipsis 12:12). Nga runi, neca nagana modo nabani binni yanna, nánnanu zácaruʼ ni jma nagana. Peru, ñee riníʼ nga guizáʼ nagana nabani binni dxi gueeda fin ca la?

7. Xi rudiʼnu cuenta ora riníʼ íquenu ni na Mateo 24:37-39.

⁷ Nuu tu zándaca guiníʼ ique ziuu guendarindaana ante guzulú gran tribulación, guendahuará ne guerra guiráʼ guidxi (Apocalipsis 7:14). Peru cadi zacá diʼ ni. Xiñee yaʼ. Purtiʼ pa guizaaca nga, guiráʼ binni zudii cuenta maʼ cayaca ni na ca profecía ca. Dede ca binni ni qué runi cré ni na Biblia zudiicaʼ cuenta. Peru Jesús guníʼ cadi guiráʼ diʼ binni zudii cuenta pa maʼ nabáninu lu ca últimu dxi. Laabe guniʼbe málasi zanaazeʼ dxi que laacaʼ purtiʼ nabánicaʼ casi ora gastiʼ chiguizaaca (biindaʼ Mateo 24:37-39). Xi rudiʼnu cuenta ora guiníʼ íquenu lu ni guníʼ Jesús yaʼ. Ante guzulú gran tribulación qué zaca diʼ xquendanabani binni jma nagana ne guiníʼ ique maʼ zeeda fin (Lucas 17:20; 2 Pedro 3:3, 4).

8. Laanu, ca xpinni Dios, xi nanna dxíchinu.

⁸ Guníʼ Jesús profecía de ca últimu dxi ti ca binni si ni gataná gudiicaʼ cuenta maʼ bedandá fin. Laanu, ca xpinni Dios qué huasaana de gatananu (Mateo 24:27, 42). Nga runi, dede 1914 huadúʼyanu ximodo cayaca ni na cada tobi de ca profecía riʼ. Nanna dxíchinu nabáninu lu ca últimu dxi stiʼ guidxilayú malu riʼ. Ne Jiobá maʼ gudixhe padxí gunitilú ni.

9. Xiñee cadi naquiiñeʼ gusaana de gatananu ne chuʼnu listu.

 ⁹ Casi maʼ bidúʼyanu, cadi naquiiñeʼ gusaana de gatananu ne chuʼnu listu. Xiñee yaʼ. Primé, purtiʼ racaláʼdxinu guzúʼbanu stiidxaʼ Cristu. Ne guiropa, purtiʼ runi crenu cayaca ni na profecía ra rieeteʼ de ca últimu dxi. Xiñee runi crenu nga yaʼ. Cadi purtiʼ si runi crenu intiica si cosa, sínuque purtiʼ nápanu prueba ni cusihuinni cayaca ni na ca profecía ni zeeda lu Biblia.

10, 11. 1) Xiñee gudxi Jesús ca discípulo stiʼ gatanacaʼ. 2) Xi naquiiñeʼ gúninu pa candaa para gueeda fin. (Biiyaʼ ca dibuju ni zeeda ra ruzulú tema riʼ.)

¹⁰ Stale testigu stiʼ Jiobá maʼ zinecaʼ stale iza de cabézacaʼ gueeda fin. Peru gastiʼ naca panda iza de cayúninu ni na Dios, naquiiñeʼ gatananu ne chuʼnu listu. Naquiiñeʼ chuʼnu listu ora gunitilú Jesús guidxilayú stiʼ Binidxabaʼ. Guietenaláʼdxinu gudxi Jesús ca discípulo stiʼ gatanacaʼ purtiʼ qué gánnacaʼ padxí gueeda fin. Ne laaca gúdxibe laacaʼ: «Zeda aca ni casi ti hombre ni che viaje zitu. Ante iree be de ralidxi be la? rusaana be xhiiña be lu ná ca jmozo be, rabi be cada tobi xi guni, ne rabi be ni rapa raqué gataná, cadi guedandá be laa nisiaasiʼ. Nga ca laatu, lagataná purti qué ganna tu pora guendaʼ, pa casi guiaazi gubidxa o galaa gueela o telayú o siadóʼ. Cadi mala guedandaya laatu nisiaasi tu. Ni cayabe laatu ri la? cayabe irá binni: chuʼ listu» (Marcos 13:33-37).

¹¹ Dxi biene ca xpinni Cristu bizulú biʼniʼ mandarbe lu iza 1914, bidiicaʼ cuenta ora tiica si zanda guedandá fin. Ngue runi guyuucaʼ listu. Ximodo yaʼ. Gudixhe íquecaʼ gucheechecaʼ diidxaʼ. Lu Marcos capítulo 13 guníʼ Jesús cabeza ca mozo que guedandá xpixuaanacaʼ ti hora, peru zándaca gueedabe jma huadxí. Ora tiica guedandabe, naquiiñeʼ gatanácabe. Ndiʼ rusiidiʼ laanu pa maʼ zinenu stale iza de cabézanu gueeda fin, qué riníʼ diʼ ni candaa para gueeda ni o maʼ cadi nabáninu ora gueeda ni. Naquiiñeʼ gatananu.

12. 1) Xi gunabadiidxaʼ Habacuc Jiobá. 2) Xi bicabi Jiobá Habacuc.

¹² Guiníʼ íquenu ejemplu stiʼ profeta Habacuc. Qué nireebe gana ora gúdxibe ca binni que zanitilú Jerusalén. Ante guibánibe, guyuu xcaadxi profeta laaca guniʼcaʼ ni guniʼbe que pur stale iza. Ne bidii Habacuc cuenta ca binni que jma malu laacaʼ que ante. Ngue runi gunábabe gacané Jiobá laabe. Gunabadiidxabe laa: «Dede padxí nga gucaaʼ ridxi lii Jiobá para gacaneluʼ naa, ne sin gunadiágaluʼ naa yaʼ». Neca qué ñabi Jiobá laabe padxí guinitilú Jerusalén, gudxi laabe gatanabe ne laaca gudxi laabe: «Qué zandaani». Biblia na: «Dede padxí nga gucaaʼ ridxi lii Jiobá para gacaneluʼ naa, ne sin gunadiágaluʼ naa yaʼ. Dede padxí nga gucaaʼ ridxi lii para gulaluʼ naa lade ca guendaridinde riʼ pue. Caʼruʼ diʼ guidxiña dxi para gaca ni bihuinni lu visión que, peru cahuinni zácani dede dxi gueeda fin, ne dxandíʼ zácani. Neca guindaani la? gulézaruʼ ni; purtiʼ dxandíʼ zácani. Qué zandaani» (Habacuc 1:2; 2:3).

13. 1) Xi ñándaca niníʼ ique Habacuc. 2) Xi ñándaca nizaaca Habacuc pa niníʼ ique zacá.

¹³ Bixuiʼlú niree Habacuc gana ne niníʼ ique: «Maʼ ziniáʼ iza de cabezaʼ guinitilú Jerusalén. Zándaca candaaruʼ  para guinitilú ni, nga runi cadi caquiiñeʼ diʼ gucheecheʼ diidxaʼ. Guni stobi ni xa». Pa niníʼ ique Habacuc zacá, xi ñándaca nizaacabe yaʼ. Maʼ qué ñaca xhamígube Dios. Ne ñátibe pa qué ñuube listu ora ñedandá fin que.

14. Xi zuni sentirnu ndaaniʼ Paraísu.

¹⁴ Dxi maʼ nuunu ndaaniʼ Paraísu, zadúʼyanu modo biʼniʼ Jiobá guiráʼ ni guníʼ gaca lu ca últimu dxi. Nga runi, ximodo zuni sentirnu yaʼ. Jma zápanu confianza Jiobá ne ziuʼnu seguru zúnibe guiráʼ ni maʼ bizabiruaabe. Biblia na: «Yanna mayaca gateʼ. Ne laatu nanna dxíchitu de guidubi ladxidoʼto ne guidubi xhiálmatu huayaca guiráʼ diidxaʼ sicarú ni huayabi Jiobá laatu, Dios stitu. Maʼ guca guirácani para laatu. Nin tobi de laacani qué liica huachee» (Josué 23:14). Nabé zudiʼnu xquíxepeʼ Jiobá purtiʼ beedané fin que órapeʼ naquiiñeʼ gueeda ni ne purtiʼ biʼniʼ mandarbe ca xpínnibe gatanacaʼ ne chuʼcaʼ listu (Hechos 1:7; 1 Pedro 4:7).

15, 16. Xiñee naquiiñeʼ quixhe íquenu gucheechenu diidxaʼ.

¹⁵ Qué zusaana xquidxi Jiobá de gusietenalaʼdxiʼ laanu ni jma risaca lu xquendanabáninu nga gúninu ni na Dios. Nga zacané laanu cadi gusaana de gúninu ni nabe, peru jma zacané ni laanu cadi gusiáʼndanu naquiiñeʼ gucheechenu diidxaʼ nagueendaca. Nanna dxíchinu cayaca ni na profecía ni guníʼ Jesús de ca últimu dxi ne maʼ cadi candaa para gueeda fin. Nga runi, ni jma risaca para laanu nga gúninu ni na Jiobá ne gucheechenu ca diidxaʼ nacubi ne galán stiʼ Reinu (Mateo 6:33; Marcos 13:10).

¹⁶ Mayaca guinitilú guidxilayú stiʼ Binidxabaʼ. Ora rucheechenu diidxaʼ, racanenu binni guilá. Guidúʼyanu ti ejemplu ni rusihuinni pabiáʼ risaca nga quixhe íquenu guilá binni. Lu iza 1945, biaazi ti barcu de Alemania ne guti mil binni. Bilá ti guendaxheelaʼ ni despué beeda gaca testigu stiʼ Jiobá. Hermana riʼ rietenalaʼdxiʼ laga ziyaaziʼ barcu que cayuni ti gunaa ridxi purtiʼ ziyaaziʼ ca maleta stiʼ ne ca cosa risaca stiʼ. Peru xcaadxi binni ni zeʼ ndaaniʼ barcu que nánnacaʼ ni jma risaca nga gacanecaʼ xcaadxi binni que para guilacaʼ. Ca dxi riʼ laaca nuu xquendanabani binni ra naxoo. Nga runi naquiiñeʼ quixhe íquenu gucheechenu diidxaʼ purtiʼ  nánnanu pa gucheechenu diidxaʼ nga zalá ca binni ca. Racaláʼdxinu gúninu guiráʼ ni nuu lu nanu para gacanenu binni guilá.

17. Xiñee nánnanu zedandá fin ora tiica si.

¹⁷ Rihuinni dxíchica cayaca ni na ca profecía ni zeeda lu Biblia ne ora tiica si zanda guedandá fin ca. Maʼ cadi candaa zacalaʼdxiʼ Organización de las Naciones Unidas ne ca gobiernu ca gunduuxecaʼ ca religión ni rusiidiʼ ni cadi dxandíʼ (Apocalipsis 17:16). Ñee candaaruʼ para guizaaca nga la? Coʼ. Cadi guiaandaʼ laanu zucaa Dios ca gobiernu ca gucaalucaʼ ca religión ni rusiidiʼ ni cadi dxandíʼ. Zanda gúnibe ndiʼ nagueenda ne ora tiica si (Apocalipsis 17:17). Mayaca guinitilú guidxilayú stiʼ Binidxabaʼ. Nga runi, chinándanu conseju stiʼ Jesús riʼ: «Laguuya gá laatu cadi ma canazá tu canaxudxi tu ne nisi icá ique tu ni ricá ique binni ni qué runibiáʼ Dios. Pacaa zaguidxi ladxidóʼ to, ne nin ganna tu mala zanaaze dxi que laatu» (Lucas 21:34, 35; Apocalipsis 16:15). Cadi gusaana de gatananu ne quixhe íquenu gúninu ni na Jiobá. Chuʼnu seguru zulabe cani gataná ne cani chuʼ listu (Isaías 64:4).

18. Xi guendarinabadiidxaʼ zacábinu lu sti tema ca.

¹⁸ Laga cabézanu gueedandá fin, chinándanu conseju ni bidii discípulo Judas. Laa guníʼ naquiiñeʼ guquídxinu fe stinu, cadi gusaana de guni orarnu ne gúninu stipa pur cadi gusaana de gaca xhamígunu Dios laga cabézanu dxi gusigáʼdebe laanu guendanabani ni qué zaluxe (Judas 20, 21). Ximodo zanda gusihuínninu dxandíʼ nápanu gana cuézanu ndaaniʼ Paraísu. Lu sti tema ca zadúʼyanu ni.