1, 2. Xiñee maʼ gadxé laanu de ca maniʼ nuu lu Guidxilayú.

XIÑEE maʼ gadxé laanu de ca maniʼ nuu lu Guidxilayú. Guzéʼtenu caadxi ejemplu. Laanu randa rininu, rucaʼnu, ridúʼndanu ne riénenu xi rabi xcaadxi binni laanu. Laaca zanda guni orarnu ne guidúʼndanu para Jiobá. Dede nagasi qué ganda guiene ca científicu ximodo randa runi cerebru stinu guiráʼ cani bizéʼtenu riʼ.

² Aparte de bizáʼ Jiobá laanu para guininu, laaca bidiibe laanu sti cosa ni runi laanu gadxé de ca maniʼ ca (Salmo 139:14; Apocalipsis 4:11). Cumu bizaʼbe laanu cásica laabe la? rudiibe lugar laanu quixhe íquenu gúninu ni chuuláʼdxinu (Génesis 1:27). Nga runi, zanda quixhe íquenu iquiiñenu guenda bidii Jiobá laanu de guininu riʼ para gusisácanu laa ne para gúninu ni na.

3. Xi bidii Jiobá laanu para gacané laanu quixhe íquenu gúninu ni jneza.

³ Maʼ bisaanané Jiobá laanu Biblia para gusiidiʼ laanu ximodo gusisácanu laa ne ximodo gúninu ni na. Yanna riʼ zanda guʼndaʼ binni guidubi naca Biblia o ti ndaa de laani lu jma de 2,800 diidxaʼ. Ora guidúʼndanu Biblia ne guni meditarnu lu ni cadúʼndanu, rizíʼdinu guiníʼ íquenu cásica riníʼ ique Jiobá  (Salmo 40:5; 92:5; 139:17). Ne pa guiníʼ íquenu cásica laabe la? zanda quixhe íquenu gúninu ni jneza ne zápanu ti guendanabani ni qué zaluxe (biindaʼ 2 Timoteo 3:14-17).

4. 1) Xi riníʼ diidxaʼ meditar. 2) Xi guendarinabadiidxaʼ zacábinu lu tema riʼ.

⁴ Guni meditar binni nga gucaa ique ti cosa, guiníʼ ique chaahuiʼ luni né stale cuidadu ne guizaalaʼdxiʼ ni (Salmo 77:12; Proverbios 24:1, 2). Nabé risaca cueenu tiempu para guiníʼ íquenu lu cani rizíʼdinu de Jiobá ne de Jesús (Juan 17:3). Lu tema riʼ zacábinu chonna guendarinabadiidxaʼ: Xi zanda gacané laanu para guni meditarnu. Gunáʼ nga caadxi cosa ni zanda guni meditarnu lu. Xi zanda gúninu para guni meditarnu gatigá ne chuuláʼdxinu gúninu ni.

5, 6. Xi zacané laanu guieteláʼdxinu ne guiene chaahuinu ni cadúʼndanu.

⁵ Laanu randa rúninu caadxi cosa sin guiníʼ íquenu cani, casi guicaanu bi, sanu o gusanu bicicleta. Peru, ñee laca randa rúninu zacá ora maʼ cadúʼndanu la? Zándaca ora maʼ cayúʼndanu xiixa riníʼ íquenu lu sti cosa. Xi zanda gúninu para cadi guizaacanu nga yaʼ. Naquiiñeʼ gucáʼ íquenu ne guiníʼ íquenu xi riníʼ ni cadúʼndanu. Ne ora guiluxe guidúʼndanu ti párrafo o ti subtítulo, guinabadiidxanu laca laanu: «Xi rusiidiʼ ni biindaʼ riʼ naa yaʼ. Ñee rieneʼ chaahueʼ ni la?».

⁶ Lugar de gúʼndaluʼ ndaaniʼ ladxidoʼloʼ la? jma galán guiniʼluʼ xi cayuundaluʼ. Maʼ biiyaʼ ca científicu jma rietenaláʼdxinu ni ridúʼndanu ora rúninu zacá. Ne nanna Jiobá ni, purtiʼ laa bizáʼ laanu. Nga runi gúdxibe Josué guʼndaʼ ley stibe «chaahuidugá», casi ora niníʼ ni para laa si. Biblia na: «Cadi gusaana de guiniʼluʼ guiráʼ cani zeeda lu libru ra cá Ley riʼ, dxi ne gueelaʼ biindaʼ ni chaahuidugá ti ganda gúniluʼ cani zeeda luni; purtiʼ zacá nga zabeenduluʼ ni galán lu guiráʼ ni gúniluʼ ne zúniluʼ cani né guendabiaaniʼ» (Josué 1:8). Pa guidúʼndanu Biblia sicaríʼ la? zacaneni laanu guiníʼ íquenu ni cadúʼndanu ne guietenaláʼdxinu ni.

7. Paraa ne pora zanda guni meditarnu. (Biiyaʼ dibuju ni zeeda ra ruzulú tema riʼ.)

⁷ Dxandíʼ, nuu tiru raca nagana para laanu guiníʼ ique chaahuinu lu ti cosa ne guni meditarnu ora maʼ cayúʼndanu xiixa. Zándaca maʼ bidxáganu o cayaca stale ridxi ra nuunu. Nga runi naquiiñeʼ guni meditarnu ti lugar ra gastiʼ ridxi ne ora cadi cá íquenu sti cosa. Casi David, laa biʼniʼ meditar huaxhinni (Salmo 63:6). Ne Jesús biyubi lugar ra gastiʼ ridxi para guni meditar ne guni orar (Lucas 6:12).

8. 1) Gunáʼ nga caadxi cosa ni zanda guni meditarnu lu. 2) Ximodo runi sentir Jiobá ora rusíʼdinu xcaadxi binni de laa.

⁸ Aparte de guni meditarnu lu cani ridúʼndanu lu Biblia, laaca zanda guni meditarnu lu xcaadxi cosa. Guzéʼtenu ti ejemplu. Ora guidúʼyanu cani maʼ bizáʼ Dios, guinabadiidxanu laca laanu: «Xi rusiidiʼ cani bizáʼ Jiobá naa yaʼ». Pa gúninu zacá, ziale de ndaaniʼ ladxidoʼno gúninu ti oración para gudiʼnu xquíxepeʼ laabe. Ne pa nuunenu xcaadxi binni la? zanda gábinu laacaʼ xi cayuni sentirnu (Salmo 104:24; Hechos 14:17). Ruuyaʼ Jiobá xi rúninu ne nabé riéchebe ora riníʼ íquenu de laabe, ora runi orarnu laabe ne ora rusíʼdinu xcaadxi binni de laabe. Biblia na: «Bizulú gucuá lu ti libru lá  cani ridxibi Jiobá ne lá cani riníʼ ique lu labe para guietenaláʼdxibe laacaʼ» (Malaquías 3:16).

9. 1) Xi gudxi Pablu Timoteu. 2) Gunáʼ nga ca cosa ni zanda guni meditarnu lu ora maʼ cayuʼnu listu para chigúʼndanenu ti binni de Biblia o para chigucheechenu diidxaʼ.

⁹ Apóstol Pablu gudxi Timoteu guiníʼ ique chaahuiʼ ante guiníʼ xiixa, ante guni o gusiidiʼ ti cosa, purtiʼ nuu tu cayuuyaʼ laa (biindaʼ 1 Timoteo 4:12-16). Laanu laaca naquiiñeʼ guiníʼ íquenu lu ca cosa riʼ. Casi ora maʼ cayuʼnu listu para chigúʼndanenu ti binni de Biblia la? naquiiñeʼ cueenu tiempu para guni meditarnu. Guiníʼ íquenu xi zanda guinabadiidxanu binni o xi ejemplu zanda guininu ni gacané laabe gaca xhamígube Dios. Pa gúninu sicaríʼ, zacaneni laanu gaca fe stinu jma naguidxi ne zusíʼdinu né stale gana. Laaca naquiiñeʼ guni meditarnu ante chigucheechenu diidxaʼ. Biblia na: «Purtiʼ laca Esdras nga guluu listu ladxidóʼ ante guʼndaʼ ley stiʼ Jiobá ne para guni ni cá luni ne para gusiidiʼ guidxi Israel ca ley ni caníʼ ximodo naquiiñeʼ guibánicaʼ ne ximodo gúnicaʼ ni jneza» (Esdras 7:10). Zanda guidúʼndanu ti capítulo ni zeeda lu libru stiʼ Hechos o guiníʼ íquenu lu ca versículo ni chigúʼndanu o ni zeeda lu tobi de ca publicación ni chiguluinu binni. Laaca zacané ndiʼ laanu chuʼnu nayecheʼ ora gucheechenu diidxaʼ (2 Timoteo 1:6). Ne galán guiníʼ íquenu xi caquiiñeʼ ca binni nuu neza ra rucheechenu diidxaʼ ne xi zanda gábinu laacabe ti chuuláʼdxicabe guiziidicabe jma. Zacá jma jneza zaquiiñenu Biblia ora gucheechenu diidxaʼ (1 Corintios 2:4).

10. Xi xcaadxi cosa zanda guni meditarnu lu.

¹⁰ Xi xcaadxi cosa zanda guni meditarnu lu yaʼ. Pa ricaanu nota ora riuunu reunión ne ora riuunu asamblea la? galán cueenu tiempu para guidúʼndanu cani. Galán guinabadiidxanu laca laanu:  «Xi rusiidiʼ ndiʼ naa de Biblia ne de organización stiʼ Dios yaʼ». Laaca zanda guiníʼ íquenu ni ridúʼndanu lu revista Torre stiʼ ni rapa, lu ¡Despertad! ne lu ca publicación ni riree lu asamblea. Ora guidúʼndanu de tuuxa hermanu lu Anuario, naquiiñeʼ cueenu tiempu para guiníʼ íquenu historia stibe ti chindá ni ndaaniʼ ladxidoʼno. Laga cadúʼndanu ca publicación stinu, galán guni marcarnu ca cosa jma risaca zeeda luni o gucaʼnu xiixa nota cueʼ ca párrafo stini. Zacané ndiʼ laanu para guietenaláʼdxinu xiixa ni zanda iquiiñenu ora maʼ chigúninu ti libana ne ora chigánnanu ti hermanu o ti binni ni riuulaʼdxiʼ guiziidiʼ de Biblia. Ni jma risaca ora maʼ cayuni meditarnu nga cueenu tiempu para chindá ni cayúʼndanu ndaaniʼ ladxidoʼno ne gudiʼnu xquíxepeʼ Jiobá.

11. Xii ndiʼ ni jma risaca guni meditarnu lu, ne xiñee. (Biiyaʼ nota.)

¹¹ Lade ca cosa ni jma risaca guni meditarnu nga cani guidúʼndanu lu Biblia. Xiñee yaʼ. Guiníʼ íquenu pa málasi maʼ qué ñápanu Biblia. * Neca gáxhacabe ni laanu, guirutiʼ zanda gucueeza laanu de guiníʼ íquenu lu cani maʼ bizíʼdinu de memoria, casi xiixa textu zeeda lu Biblia o ca diidxaʼ riuundaʼ stiʼ Reinu (Hechos 16:25). Zaquiiñeʼ Jiobá espíritu stiʼ para gusietenalaʼdxiʼ laanu cani maʼ bizíʼdinu ne para cadi guchéʼnenu laa (Juan 14:26).

12. Xi zanda gúninu ti ganda guidúʼndanu Biblia guiráʼ dxi.

¹² Xi zanda gúninu para guidúʼndanu Biblia guiráʼ dxi yaʼ. Guidúʼyanu ti modo. Zanda iquiiñenu chupa chonna gubidxa lu ti semana para guidúʼndanu biaʼ ra chiguiuundaʼ Biblia lu Scuela stiʼ cani Rucheeche Diidxaʼ ne cueenu tiempu para guiníʼ íquenu de laacani. Ne zanda iquiiñenu xhupa gubidxa para guidúʼndanu xiixa ni zeeda lu libru stiʼ Mateo, Marcos, Lucas o Juan, ne guiníʼ íquenu lu ni biʼniʼ Jesús ne ni bisiidiʼ (Romanos 10:17; Hebreos 12:2; 1 Pedro 2:21). Ne para cueendunu stale cosa galán ora maʼ cadúʼndanu la? zanda iquiiñenu tobi de ca publicación stinu casi libru El hombre más grande, ra gudixhe chaahuiʼ xquidxi Dios guiráʼ ni biʼniʼ Jesús dxi bibani lu Guidxilayú (Juan 14:6).

13, 14. Xiñee risaca guiníʼ íquenu de Jiobá ne de Jesús, ne xi zucaani laanu gúninu.

¹³ Pa guiníʼ íquenu de Jiobá ne de Jesús la? zacaneni laanu guiniisinu lu stiidxaʼ Dios ne zacaneni gaca fe stinu naguidxi (Hebreos 5:14; 6:1). Pa huaxiéʼ ribeenu tiempu para guiníʼ íquenu de Jiobá la? chaahuiʼ chaahuiʼ zaxélenu de laabe ne zándaca dede zusaana de gaca xhamígunu laabe (Hebreos 2:1; 3:12). Cadi guiaandaʼ laanu xi guníʼ Jesús: pa «jma cá ique [nu] dxiiña ne gapa [nu] bidxichi» ne guibáninu casi nabani binni guidxilayú la? zaxélenu de Jiobá, purtiʼ cadi cayúninu ni cazíʼdinu lu Biblia (Lucas 8:14, 15).

¹⁴ Nga runi, nabé risaca cadi gusaana de guni meditarnu lu Biblia ne gunibiáʼ chaahuinu Jiobá guiráʼ dxi. Zacané nga laanu gúninu stipa para gusihuínninu ca guenda stibe ne gácanu casi laabe (2 Corintios 3:18). Pa gúninu zacá la? zazíʼdirunu de Dios ne qué ziuu dxi gusaana de gunibiaʼnu laabe. Cadi dxandíʼ naroʼbaʼ ndaayaʼ riʼ la? (Eclesiastés 3:11.)

15, 16. 1) Xi ribeendunu ora riníʼ íquenu de Jiobá ne de Jesús. 2) Xiñee nuu tiru raca nagana para laanu gápanu tiempu para guni meditarnu. 3) Xiñee risaca gúninu stipa para guni meditarnu.

 ¹⁵ Pa guiníʼ íquenu de Jiobá ne de Jesús la? laaca zacaneni laanu para cadi gusaana de gúninu ni na Jiobá né stale gana. Ora guʼyaʼ xcaadxi hermanu ne binni rúninu ni na Jiobá né stale gana la? laaca zúnicaʼ casi cayúninu. Ne ora runi meditarnu ni biʼniʼ Jiobá ora biseendaʼ Jesús para gatiʼ pur laanu, rudiʼnu cuenta pabiáʼ risaca gaca xhamígunu Dios (Romanos 3:24; Santiago 4:8). Guzéʼtenu ni guca Mark, ti hermanu de Sudáfrica ni biseguyoocabe laa chonna iza, purtiʼ qué niná ñuu lu política. Laabe nabe casi ora ñebe de viaje nga ora runi meditarbe. Ora guni meditar binni jma la? jma stale cosa riziidiʼ de Jiobá. Ne ora maʼ careebe gana ne nuube xizaa la? ruundabe Biblia ne ribeebe tiempu para guiníʼ íquebe. Racané nga laabe para gatadxí ladxidoʼbe.

¹⁶ Nuu tiru zaca nagana para laanu gápanu tiempu para guni meditarnu ni zeeda lu Biblia. Xiñee yaʼ. Purtiʼ nuu stale cosa ni zanda gucueeza laanu de gúninu ni na Dios. Ti hermanu de África láʼ Patrick ruzeeteʼ nabé stale cosa napa para guni tender guiráʼ dxi. Nuu de laacani nabé riguu cani xizaa laabe. Xi rúnibe óraca yaʼ. Primeru runi orarbe Jiobá para gábibe laa xi cuchiiñaʼ laabe. Zacá ratadxí ladxidoʼbe ne randa runi meditarbe. Riquiiñebe chupa chonna minutu para gúnibe ndiʼ, peru racaneni laabe para guni sentirbe nuube jma gaxha de Jiobá. Ora runi meditarbe la? laaca racaneni laabe guiénebe ni rusiidiʼ Dios lu Biblia (Salmo 94:19). Nga runi, pa guidúʼndanu Biblia ne guni meditarnu luni guiráʼ dxi la? zabeendunu stale cosa galán. Dxandíʼ, risaca nga stipa ni gúninu (Hechos 17:11).

17. Pora ribeeluʼ tiempu para guni meditarluʼ.

¹⁷ Nuu tu laa ruundaʼ Biblia, runi meditar ne runi orar siadoʼroʼ. Xcaadxi runi ni galaa dxi, ora maʼ caziilaʼdxiʼ. Ne nuu tu laa zándaca riuulaʼdxiʼ guni ni huadxí o ante chigasi. Xcaadxi zándaca ruundacaʼ ti ratuhuiiniʼ siadóʼ ne ti ratuhuiiniʼ huaxhinni (Josué 1:8). Ora tiica si gúninu ni, ni jma galán nga cueenu tiempu lu ca cosa ni huaxiéʼ risaca para guidúʼndanu Biblia guiráʼ dxi ne guni meditarnu luni (Efesios 5:15, 16).

18. Xi maʼ guníʼ Jiobá chiguni para cani runi meditar lu Biblia ne para cani runi stipa pur guni ni caziidiʼ.

¹⁸ Maʼ guníʼ Jiobá zaguu ndaayaʼ guiráʼ binni ni runi meditar ni zeeda lu Biblia ne cani runi stipa pur guni guiráʼ ni caziidiʼ. Biblia na: «Nayecheʼ nga riuu hombre ni qué huayuu dxi chinanda conseju stiʼ binni malu, ne qué ruzuhuaa lu neza stiʼ ca binni ruchee, ne qué ribí lu banguʼ stiʼ cani runi burla. Riuulaʼdxiʼ guʼndaʼ ley stiʼ Jiobá, ne dxi ne gueelaʼ ruundaʼ ni chaahuidugá. Ne dxandipeʼ zeeda gaca casi ti yaga ni zuhuaa ra cuxooñeʼ nisa, ni rudii cuananaxhi stiʼ xhi ne ca bandaga stiʼ qué riguunduʼ, ne guiráʼ ni guni zaree ni laa galán» (Salmo 1:1-3). Jesús guníʼ ziuʼnu nayecheʼ pa gucaʼdiáganu ne gúninu ni rusiidiʼ Jiobá laanu lu Biblia (Lucas 11:28). Peru ni jma risaca nga zusisácanu Jiobá pur modo nabáninu pa guni meditarnu lu ni guidúʼndanu lu Biblia guiráʼ dxi. Ne zacané Dios laanu guibáninu nayecheʼ tiempu riʼ ne zudiibe laanu guendanabani ni qué zaluxe ndaaniʼ ti paraísu (Santiago 1:25; Apocalipsis 1:3).