CHIGÜENIÁʼ laatu historia stiʼ xtiuaʼ, Nikolai Dubovinsky, biʼchiʼ bixhozebiidaʼ. Chupa chonna iza ante gátibe, bicaabe guiráʼ ni bietenaláʼdxibe. Guniʼbe ca cosa galán ne cosa feu gudíʼdibe dxi bíʼnibe xhiiñaʼ Jiobá, peru ni jma bizeetebe nga tiempu bicueeza gobiernu stiʼ Unión Soviética laacabe de gucheechecabe diidxaʼ ne guidagulisaacabe. Neca gudíʼdibe ra nagana, qué ñuu dxi nusaana de ñápabe fe ne biʼniʼ crebe zuni Jiobá ni maʼ guníʼ. Nabé guniʼbe ñuuláʼdxibe ñanna ca hermanu huiiniʼ historia stibe, nga runi ñuuladxeʼ ñueniáʼ laatu caadxi de ca cosa ni bizaacabe. Iza 1926 nga gule bixhozeʼ Nikolai, lade ti familia de campesinu ni nabeza ndaaniʼ guidxi Podvirivka, provincia stiʼ Chernivtsi (Ucrania).

Sicaríʼ ruzulú historia stibe: «Ti biaje bedané Ivan, tobi de ca bicheʼ ni jma huaniisi, libru El Arpa de Dios ne El Plan Divino de las Edades, laaca beedanebe chupa chonna revista Torre stiʼ ni rapa ne caadxi folletu ra lidxeʼ, guca ndiʼ ti dxi stiʼ iza 1941. Biindaʼ guiráʼ cani, ne nabé bidxagayaaʼ ora gunnaʼ qué gapa Dios donda pur guiráʼ yuubaʼ ridiʼdiʼ binni, sínuque Binidxabaʼ nga napa donda. Ne ora biindaʼ ca Evangeliu, nagueendaca bidieeʼ cuenta maʼ bidxelaʼ ni dxandíʼ. Oraqueca bizuluáʼ gunieniáʼ guiráʼ binni xi chiguni Reinu stiʼ Dios. Dxi jma maʼ ziyeneʼ ni ruundaʼ lu Biblia la? jma bicaani naa guneʼ ni na Jiobá.

»Cumu cayaca guerra tiempu que la? bidieeʼ cuenta zuninácabe naa pur cani runeʼ cré, purtiʼ qué racalaʼdxeʼ guuteʼ binni. Rapaʼ gana chuaaʼ listu para intiica guendanagana guidxagaluáʼ, ngue runi biziideʼ caadxi textu de memoria casi Mateo 10:28 ne 26:52. Gudixheʼ iqueʼ guzuubaʼ stiidxaʼ Jiobá neca guuticabe naa pur laani.

»Guluucabe naa lu ejércitu lu iza 1944, purtiʼ maʼ bisaaʼ 18 iza. Raqué nga primé biaje binebiaʼyaʼ xcaadxi hombrehuiiniʼ Testigu casi naa, laaca maʼ yenécabe laacaʼ para chuʼcaʼ lu ejércitu. Qué lica niníʼ íquedu ni chupa biaje ora gúdxidu laacabe qué ziuudu lu guerra. Guizáʼ bidxiichi ca soldadu que ne gúdxicaʼ laadu qué zudiicaʼ ni guidoʼdo dede gátidu, zuseendacaʼ laadu chindaadu zanja ra rucaachilú ca soldadu o gudiicaʼ ti balazu laadu. Gúcadu nadxibalú ora gúdxidu laacabe sicaríʼ: “Zanda gúnitu laadu intiica gápatu gana, peru zuzúʼbadu stiidxaʼ Dios ra cayuni mandar laadu cadi guutidu binni” (Éxodo 20:13).

»Últimu la? biseendacabe naa ne xhupa hermanu Bielorrusia para chigúnidu dxiiñaʼ lu caadxi layú ne guni chaahuidu ca yoo ni guca feu. Dede nagasi redasilú naa pabiáʼ feu biaana ca lugar nuu gaxha de Minsk pur guerra que. Biiyaʼ stale yaga ni gucuá guí guidubi guriá  carretera. Ndaaniʼ ca zanja que nuu stale gueʼtuʼ ni qué nigaachiʼ ne stale caballu ni maʼ guti. Laaca biiyaʼ stale camión ne stale guiibaʼ ni bisaana ca soldadu, dede biiyaʼ ca pedazu stiʼ ti avión ni biaba. Raqué nga biiyaʼ xi guiráʼ rizaaca ora qué rinanda binni ley stiʼ Dios.

»Neca biluxe guerra que lu iza 1945, guníʼcabe zuseguyoocabe laadu chii iza, purtiʼ qué ninadu ninaazedu guiibaʼ. Qué lica ñanda ñuudu reunión chonna iza ne qué ñápadu nin ti publicación. Gunda gunínedu caadxi hermana pur carta, peru laaca gunaazecabe laacaʼ ne guníʼcabe guieguyoocaʼ veinticinco iza ndaaniʼ ti campu para gúnicaʼ dxiiñaʼ nadipaʼ.

»Cumu guníʼcabe maʼ qué ziaanadu ndaaniʼ cárcel que chii iza la? ngue runi bireeʼ lu iza 1950 ne yebieeʼ ra lidxeʼ. Guca jñaaʼ ne ti bizanaʼ ni jma nahuiiniʼ láʼ Maria testigu stiʼ Jiobá tiempu guyaaʼ cárcel, ne maʼ caziidiʼ ca bicheʼ ni jma huaniisi de Biblia tiempu que. Racalaʼdxiʼ puliciá stiʼ Unión Soviética guseguyoo naa sti biaje purtiʼ rucheecheʼ diidxaʼ. Óraque nga gudxi ca hermanu ni cayuuyaʼ modo guireeche diidxaʼ ndaaniʼ guidxi que naa gacaniáʼ laacaʼ gaca imprimir ca publicación stinu nagaʼchiʼ. Napaʼ 24 iza dxiqué.»

«Nabé riuulaʼdxiʼ ca hermanu que guiniʼcaʼ sicaríʼ: “Pa gacaláʼdxitu gucueezatu laadu de gúnidu ni na Dios la? zúnidu ni nagaʼchiʼ” (Proverbios 28:28). Tiempu que nápadu ti yoohuiiniʼ ndaaniʼ yú ne raqué nga runi imprimirdu stale de ca libru ne ca revista stinu. Primé lugar ra bineʼ dxiiñaʼ nga ndaaniʼ ti yoo napa bicheʼ Dmitry xagueteʼ lidxi, ndaaniʼ yú. Nuu tiru rusaa chupa semana sin guireeʼ de raqué. Pa guizuíʼ lámpara de queroseno que purtiʼ rirá oxígeno la? rigataʼ ti ratu ne ribezaʼ chuʼ bi ndaaniʼ cuartu que sti biaje.

 »Ti dxi gunabadiidxaʼ hermanu cayuneniáʼ dxiiñaʼ que naa: “Nikolai, ñee maʼ guyuunísaluʼ la?”. Neca maʼ ziniaaʼ once iza de cayuneʼ xhiiñaʼ Jiobá, caʼruʼ chuaanisaʼ. Guniʼné hermanu que naa de laani ne guyuaanisaʼ gueelaʼ queca ndaaniʼ ti laguna, dxi napaʼ 26 iza. Gudiʼdiʼ si chonna iza, gulícabe naa para gacaʼ tobi de cani nuu lu Comité de País. Dxiqué ribícabe ca hermanu ni cadi deguyoo para chuʼcaʼ lugar stiʼ cani daguyoo, ti cadi gusaana de guireeche diidxaʼ.»

«Jmápeca nagana nga gaca imprimir ca publicación que ra nagaʼchiʼ que chuʼ binni cárcel. Para cadi guinaazeʼ KGB naa la? gadxe iza qué ñaaʼ reunión, ngue runi stúbesiaʼ biyubeʼ xi guneʼ para cadi guixeleʼ de Jiobá. Maca nuu si ora ruuyaʼ familia stinneʼ, peru riecheʼ stale purtiʼ nannaʼ riénecabe ximodo nuaaʼ. Cumu nabé runeʼ dxiiñaʼ ne naquiiñeʼ gatanaʼyaʼ la? bisidxágani naa. Naquiiñeʼ chuaaʼ listu para intiica cosa. Chiguzeeteʼ ti ejemplu. Ti huadxí beeda chupa puliciá ra yoo nabezaʼ que. Peru gunda bireeʼ ra ventana nuu deche yoo que ne biaazeʼ ndaaniʼ guiʼxhiʼ. Ora zidideʼ ti lugar ra gastiʼ yaga, binadiagaʼ caadxi ridxi ne laaca binadiaga caree caadxi tiru. Oraqueca bidieeʼ cuenta cadiʼdiʼ ca balazu que cueeʼ. De raqué biree ti puliciá dxiʼbaʼ caballu stiʼ, guzananda naa ne bichá tiru naa dede ra birá bala stiʼ. Gucuá tobi de ca bala que ti chu nayaʼ. Gunda bireeʼ de raqué despué de guzanándabe naa 5 kilómetru ne bicacheluáʼ ndaaniʼ ti guiʼxhiʼ. Gudiʼdiʼ si tiempu, dxi guca juiciu que, gunnaʼ bindaacabe 32 bala naa.

»Cumu huaxiéʼ rireeʼ de ra nucacheluáʼ que la? biniteʼ color stinneʼ. Tutiica guʼyaʼ naa la? zudii cuenta xi cayuneʼ, ngue runi nabé ruyubeʼ ximodo chuaaʼ lu gubidxa ti cadi gánnacabe xi runeʼ. Cumu xadxí ngue gulezaʼ ndaaniʼ yú ne bineʼ dxiiñaʼ raqué la? biʼniʼ huará ni naa. Ti biaje qué lica ñanda ñaaʼ ti reunión nabé risaca purtiʼ biree rini xieeʼ ne ruaaʼ.»

«Gunaazecabe naa 26 stiʼ enero iza 1957. Xhoopaʼ beeu despué biʼniʼ mandar Tribunal Supremo de Ucrania guni fulisárcabe naa. Cumu maʼ gastiʼ pena de muerte guidxi que la? maʼ qué ñuuticabe naa, peru biʼniʼ  mandárcabe guideguayuaaʼ veinticinco iza. Biseendacabe naa ne xcadxe hermanu campu nuu Mordvinia para gúnidu dxiiñaʼ nadipaʼ, pa ñaanadu raqué biaʼ iza guníʼcabe la? biaʼsi nizaa ni ti gayuaa treinta. Maʼ nuu biaʼ gaayuʼ gayuaa Testigu raqué ora yendadu. Rúnidu grupuhuiiniʼ para guidúʼndanu revista Torre sti ni rapa nagaʼchiʼ. Peru bidxélacabe caadxi revista stidu ne gúxhacabe ni laadu. Biindaʼ si ti puliciá caadxi de laacani, guníʼ: “Pa qué gusaana de gúʼndatu cani la? guirutiʼ zuni ganar laatu”. Bínidu guiráʼ dxiiñaʼ bidiicabe laadu ndaaniʼ campu que, ne stale biaje bínidu jma de ni gunábacabe laadu. Neca zaqué, guníʼ comandante que: “Para laadu la? qué risaca dxiiñaʼ cayúnitu; ni racaláʼdxidu nga gusaanatu Dios stitu”.»

Biree bixhozeʼ Nikolai lu campu que iza 1967, de raqué gucanebe para guyáʼ caadxi congregación ndaaniʼ guidxi Estonia ne guidxi San Petersburgo (Rusia). Ra bizulú iza 1991 guleecabe sentencia bidiicabe laabe iza 1957, purtiʼ biiyacabe qué ñuni xtiuaʼ gastiʼ para guieguyoo. Laaca iza 1991 que nga gundísacabe ca cargu ni napa stale Testigu ni bininá gobiernu laacaʼ. Lu iza 1996 yebíʼ xtiuaʼ ndaaniʼ guidxi Velikiye Luki, provincia stiʼ Pskov, nuuni biaʼ 500 kilómetru de San Petersburgo, ra guziʼbe ti yoohuiiniʼ. Gurí ti Yoo stiʼ Reinu luni iza 2003. Ridagulisaa chupa congregación raqué, ne cada dxi zidale binni rié ndaaniʼ cani.

Naa ne xheelaʼ rúnidu dxiiñaʼ ndaaniʼ yoo Betel stiʼ ca testigu stiʼ Jiobá ni nuu Rusia. Últimu biaje beeda ganna bixhozeʼ Nikolai laadu nga beeu marzo iza 2011, chupa chonna beeu ante gatiʼ. Biéchedu stale ora gúdxibe laadu: «Né guiráʼ ni cayaca riʼ, zuluaʼsiaʼ maʼ bizulú gadxe buelta ni cudiicabe Jericó» (Josué 6:15). Nápabe 85 iza. Neca nagana modo bibánibe, guniʼbe ni runi sentirbe sicaríʼ: «¡Nabé nayecheʼ nuaaʼ purtiʼ gudixheʼ iqueʼ guneʼ ni na Jiobá dxi nahuiineʼ! Qué lica racaʼ arrepentir».