Ñee maʼ biindaluʼ ca últimu tema ni bedané revista Torre stiʼ ni rapa la? Yanna biiyaʼ pa zanda guicábiluʼ ca guendarinabadiidxaʼ riʼ:

Gunáʼ nga caadxi de ca cosa ni zanitilú ora gueeda fin.

Caadxi de laacani nga ca gobiernu napa binni, guerra ne guendaquéiquiiñeʼ, ca binni riuulaʼdxiʼ cosa malu, ca religión ni qué rusiidiʼ ni na Dios ne riguítecaʼ binni (1/5, yaza 3 dede 5).

Tuu nga Gog de Magog ni ruzeeteʼ libru stiʼ Ezequiel.

Cadi Binidxabaʼ diʼ nga Gog de Magog. Zándaca laani nga ti grupu de guidxi roʼ ni zacalaʼdxiʼ gunitilú xquidxi Dios guzulú si gran tribulación (15/5, yaza 29 ne 30).

Xi xhoopaʼ cosa zanda gacané tuuxa chuʼ nayecheʼ ora maʼ zigola.

Biblia cudii ca conseju riʼ: 1) gánnanu nuu cosa ni maʼ qué zanda gúninu, 2) gácanu binni nuu xpiaaniʼ, 3) guidúʼyanu xiruʼ zanda gúninu, 4) gudiʼnu de ni nápanu, 5) guidxaaganu xcaadxi binni, ne 6) gudiʼnu xquíxepeʼ. Pa gusihuínninu ca guenda riʼ zacanécani laanu chuʼnu nayecheʼ ora maʼ zigólanu (1/6, yaza 8 dede 10).

Ximodo bisihuinni ca milagru biʼniʼ Jesús naca ti binni ni riuulaʼdxiʼ gudii.

Dxi guca ti guendaxheelaʼ guidxi Caná, biʼniʼ Jesús 380 litru nisa vinu. Sti dxi bíʼnibe ti milagru para biyaanabe jma de 5,000 binni (Mateo 14:14-21; Juan 2:6-11). Guiropaʼ biaje riʼ bisihuínnibe riuuláʼdxibe gudiibe cásica runi Bixhózebe (15/6, yaza 4 ne 5).

Xiñee nanna dxíchinu zanda gusiéchenu ladxidóʼ Jiobá neca binni ruchee laanu.

Job, Lot, David ne xcaadxi xpinni Dios laaca bicheecaʼ. Peru guyuulaʼdxiʼ Dios modo biʼniʼ adorárcabe laa purtiʼ biiyaʼ dxandíʼ racaláʼdxicabe guzuubacabe stiidxaʼ. Guca arrepentírcabe ne biʼniʼ chaahuicabe neza stícabe. Laanu laaca naquiiñeʼ gúninu zacá (1/7, yaza 12 ne 13).

Ñee zati guiráʼ binni nuu ndaaniʼ ca religión ni qué rusiidiʼ ni dxandíʼ ora guinitilú Babilonia guidxi roʼ la?

Coʼ, ruluíʼ qué zaca diʼ ni zacá. Zacarías 13:4-6 cusiene ti cosa: dede ca xaíque stiʼ ca religión ni qué rusiidiʼ ni dxandíʼ zaxélecaʼ de laacani ne zaniʼcaʼ qué huayuu dxi chuʼcaʼ ndaaniʼ cani (15/7, yaza 15 ne 16).

Xiñee guníʼ Barac zié lu guerra, pa chiné Débora laa.

Barac nga ti hombre ni gupa fe. Lugar de ninábabe nudii Dios laabe jma guiibaʼ, gunábabe chiné ti representante stiʼ Jiobá laabe ne ca soldadu stibe para uguu gana laacabe (Jueces 4:6-8; 5:7) (1/8, yaza 13).

Gunáʼ nga ca cosa ni zanda iquiiñeʼ ti xpinni Cristu para guni meditar.

Zanda guni meditarbe lu cani bizáʼ Dios, zanda iquiiñebe Biblia, oración ne modo bisihuinni Jiobá nadxii laanu ora biseendaʼ Xiiñiʼ gueeda gati pur laanu (15/8, yaza 10 dede 13).

Tu binni qué zaná ti Testigu solteru guireené para cadi guixeleʼ de Dios.

Dxandíʼ rúninu stipa pur gácanu nachaʼhuiʼ né guiráʼ binni, peru Biblia cudii mandatu riʼ laanu: cadi jneza diʼ guiréʼnenu ti binni ni caʼruʼ gudii xquendanabani Jiobá ne qué ruzuubaʼ stiidxabe (1 Corintios 15:33) (15/8, yaza 25).

Xiñee biniti apóstol Pedru fe stiʼ ti ratuhuiiniʼ, peru xi biʼniʼ para bibiguetaʼ ni sti biaje.

Bisihuinni apóstol Pedru napa fe ora bizulú guzá lu nisa ne zeʼ ra nuu Jesús (Mateo 14:24-32). Peru, ora biiyadxí Pedru pabiáʼ reciu nuu bi que la? bidxibi. Peru nagueendaca biiyadxibe Jesús ne bidiibe lugar gacané laabe (15/9, yaza 16 ne 17).

Hechos 28:4 na guníʼ ique ca binni de Malta naca apóstol Pablu tobi ni ruuti binni. Nannuʼ xiñee la?

Para ca binni de Malta la? diosa Dike, o Dicea nga ni ruuyaʼ gaca justicia. Ngue runi, ora bíʼyacabe biquiichiʼ ti beenda Pablu la? guníʼ íquecabe cayuni castigar diosa que laabe (1/10, yaza 9).

Xi rizíʼdinu de ni bizaaca Marta dxi biʼniʼ caadxi cosa ni huaxiéʼ risaca.

Ti biaje jma gucuá ique Marta guni ti guendaró nanixe. Gudxi Jesús laabe jma galán ni biʼniʼ béndabe purtiʼ gurí para gucaadiaga ne guiziidiʼ de Dios. Laanu laaca naquiiñeʼ chuʼnu cuidadu ti cadi chuʼ xiixa ni huaxiéʼ risaca gucueeza laanu de gúninu ni na Dios (15/10, yaza 18 dede 20).